සිගිරිය පොලිස් බල ප්‍රදේශයේ කුඹුක්කදන්වලදී පරිසර ක්‍රියාකාරිකයෙකුට තියුණු ආයුධ ප්‍රහාරයක් .. බරපතල තුවාල ..
(02.08.2025 – 12:40 +0530 – lankacnews.com)
සිගිරිය පොලිස් බල ප්‍රදේශයේ කුඹුක්කදන්වලදී පුද්ගලයින් සිව්දෙනෙකු (4) විසින් එල්ල කරන ලද තියුණු ආයුධ ප්‍රහාරයකින් එක් අයෙකු (1) බරපල තුවාල ලබා දඹුල්ල රෝහලට ඇතුළත් කර තිබේ.
ඔහුගේ කැපුම් තුවාල බරපතල තත්ත්වයේ පවතින බැවින් සැත්කම් කිහිපයක් සිදුකර ඇති බව රෝහල් ආරංචි මාර්ග පවසයි.
පහරදීම සිදුකළ පුද්ගලයින් සිව්දෙනා (4) සිද්ධියෙන් පසු පලාගොස් ඇති අතර, සිගිරිය පොලීසිය සිද්ධිය සම්බන්ධයෙන් සහ පහරදීම සිදුකළ පුද්ගලයින් සොයා පුළුල් විමර්ශනයක් ආරම්භ කර ඇත.
තුවාල ලබා ඇත්තේ දඹුල්ල, කිඹිස්ස, කුඹුක්කදන්වල ප්‍රදේශයේ පදිංචි ‘වසන්ත කුමාර හේරත්’ නමැති පුද්ගලයෙකි. වාර්තා වන පරිදි, මොහු ප්‍රදේශයේ සිදුවන වන විනාශය, රජයේ රක්ෂිත ඉඩම් අල්ලා ගැනීම සහ සතුන් දඩයම ඇතුළු පාරිසරික විනාශයන්ට එරෙහිව අදහස් දක්වමින්, අදාළ නිලධාරීන් දැනුවත් කරන ප්‍රදේශයේ ප්‍රකට පරිසර ක්‍රියාකාරිකයෙකි.
මෙම පහරදීම ඔහුගේ පාරිසරික ක්‍රියාකාරකම්වලට සම්බන්ධ දැයි පොලීසිය විමර්ශනය කරයි.
දඹූල්ල මහින්ද රත්නායක
දෙහිඕවිටදී බස් රථයක් ප්‍රපාතයකට පෙරළෙයි
(02.08.2025 – 08:54 +0530 – sinhala.adaderana.lk)
කෑගල්ල – අවිස්සාවේල්ල මාර්ගයේ දෙහිඕවිට තැඹිලියාන ප්‍රදේශයේදී බස් රථයක් ප්‍රපාතයකට පෙරළී තිබේ.
අදාළ බස් රථයේ ඇගලුම් කර්මාන්ත ශාලාවක සේවක සේවිකාවන් පිරිසක් ගමන්කර තිබූ බවද වාර්තා වෙයි.
අනතුර සිදුවී ඇත්තේ අද (02) අලුයම 06:30 ට පමණය.
බස් රථයේ 41 දෙනෙකු පමණ ගමන් කර තිබෙන අතර ඔවුන් සියලුදෙනාම අවිස්සාවේල්ල මූලික රෝහලට ඇතුළත් කර තිබෙන බව ‘අද දෙරණ වාර්තාකරු’ පැවසීය.
දැරණියගල සිට අවිස්සාවේල්ල කර්මාන්ත පුරය දක්වා ධාවනය කරමින් තිබියදී බස් රථය අනතුරට ලක්වී තිබේ.
+++
+
ගල්කිස්ස ප්‍රදේශයේ සිදුවූ ගැටුමකින් තරුණයෙකු මරුට
(02.08.2025 – hirunews.lk)
ගල්කිස්ස පොලිස් වසමේ අරලිය නිවාස ප්‍රදේශයේදී ඊයේ (01) සවස් කාලයේදී පුද්ගලයින් දෙදෙනෙකුට (2) තියුණු ආයුධවලින් පහරදී ලුනාව රෝහලට ඇතුලත් කර ප්‍රථිකාර ලබමින් සිටියදී එක් (1) පුද්ගලයෙකු මියගොස් ඇති බව ගල්කිස්ස පොලිසිය සඳහන් කරනවා.
මරණකරු වයස අවුරුදු 28 ක් වූ අඟුලාන ප්‍රදේශයේ පදිංචිකරුවෙක්.
දෙපාර්ශවයක් අතර ඇති වූ ආරවුලක් හේතුවෙන් තියුණු ආයුධවලින් පහරදී මෙම ඝාතනය සිදු කර ඇති බවටයි දැනට සිදු කරන ලද විමර්ශනයේදී අනාවරණය වී ඇත්තේ.
මෘත ශරීරය ලුනාව රෝහලේ මෘත ශරීරාගාරයේ තැන්පත් කර තිබෙනවා.
තුවාල ලැබූ අනෙක් පුද්ගලයා වැඩිදුර ප්‍රථිකාර සඳහා කළුබෝවිල රෝහලට ඇතුලත් කර ඇති අතර, සැකකරුවන් අත්අඩංගුවට ගැනීම සඳහා ගල්කිස්ස පොලිසිය වැඩිදුර විමර්ශන සිදු කරනු ලබනවා ෴
‘මුතුගල සර්ට ස්ත්‍රී දූෂණ චෝදනා’ | අනිවාර්යෙන් නඩු දානවා (02.08.2025)
+++
දිනේෂ් මුතුගල මහතා සෝතාපන්න උත්තමයෙකු බව ධම්මරාජ මහා බෝසතානෝ (ලසන්ත බණ්ඩාර මහතා) ප්‍රකාශකරති.
https://www.youtube.com/watch?v=oHL31OPUqXk#t=2300
2025 වසරේ ගතවූ කාලය තුළ විදේශ රැකියා සම්බන්ධ පැමිණිලි 2620 ක්
(02.08.2025 – hirunews.lk)
වසරේ ගත වූ මාස 7 තුළ විදේශ රැකියා සම්බන්ධ වංචනික ක්‍රියාවල නිරත වූ පුද්ගලයින් හා බලපත්‍ර රහිත රැකියා නියෝජිතායතනවලට එරෙහිව නඩු පවරා වින්දිතයින්ට රුපියල් ලක්ෂ 1994 කට අධික මුදලක් යළි අයකර දීමට කටයුතු කළ බව ශ්‍රී ලංකා විදේශ සේවා නියුක්ති කාර්යාංශය පවසනවා.
ඒ අනුව පසුගිය මාස 7 තුළ විදේශ රැකියා වංචාකරුවන්ට එරෙහිව අධිකරණයේ පවරා ඇති නඩු සංඛ්‍යාව 567 ක් වන අතර, එම කාලය තුළ ලැබී ඇති විවිධ පැමිණිලි සංඛ්‍යාව 2,620 ක්.
එමෙන්ම අදාළ කාලය තුළ වංචනිකයින් 36 දෙනෙකු අත්අඩංගුවට ගෙන ඇති අතර බලපත්‍රලාභී රැකියා නියෝජිත ආයතනවල පුද්ගලයින් 07 දෙනෙකු ද ඊට අයත්.
මේ අතර, 2024 වර්ෂය තුළදී රුපියල් ලක්ෂ 1825 කට අධික මුදලක් වින්දිතයින්ට යළි අය කර දීමට කාර්යාංශය සමත්වී ඇති අතර, පසුගිය වර්ෂයේදී විදේශ රැකියා ආශ්‍රිත පැමිණිලි 4,658 ක් ලැබී තිබෙනවා ෴
මහේස්ත්‍රාත් තිලිණ ගමගේගේ වැඩ තහනම්
(02.08.2025 – hirunews.lk)
මොරටුව දිසා විනිසුරුවරයා සහ මහේස්ත්‍රාත්වරයා වශයෙන් කටයුතු කළ ‘තිලිණ ගමගේ’ගේ වැඩ තහනම් කිරීමට ‘අධිකරණ සේවා කොමිෂන් සභාව’ කටයුතු කර තිබෙනවා.
එහිදී ඔහුට අදාළව ඇති විෂමාචාර චෝදනා පිළිබඳ මේ වනවිට ‘අධිකරණ සේවා කොමිෂන් සභාව’ විසින් සිදුකරමින් පවතින විමර්ශනයක් හේතුවෙන් මෙම වැඩ තහනම් කිරීම සිදු කර ඇති අතර දින 21 තුළ කරුණු දක්වන ලෙස ඊයේ (01) මහේස්ත්‍රාත්වරයා වෙත ‘අධිකරණ සේවා කොමිසම’ ලිඛිතව දැනුම් දී තිබෙනවා.
අලි ජාවාරම් සම්බන්ධව ඔහු කටයුතු කර ඇති ආකාරය පිළිබඳව මෙම විමර්ශන සිදු කරන අතර, පසුගිය ජුනි මාසයේදී ‘අධිකරණ සේවා කොමිෂන් සභාව’ තිලිණ ගමගේට එරෙහිව චෝදනා පත්‍රයක් ගොනුකර තිබෙනවා.
තිලිණ ගමගේ කූඨ ලෙස සකස් කරන ලද බලපත්‍රයක් උපයෝගී කරගෙන ‘සකුරා’ නැමැති අලි පැටවකු සන්තකයේ තබාගැනීම තුළින් පොදුදේපළ පනත යටතේ වරදක් සිදුකර ඇතැයි චෝදනා කරමින් අධිචෝදනා 25 ක් යටතේ නීතිපතිවරයා විසින් නඩුකරයක් ගොනු කර තිබුණා.
තිලිණ ගමගේට එරෙහිව අලි පැටවෙකු නීතිවිරෝධීව ළඟ තබාගැනීම පිළිබඳ ‘අපරාධ පරීක්ෂණ දෙපාර්තමේන්තුව’ විසින් ආරම්භ කර තිබුණු අතර, 2015 මැයි මාසයේදී එම අලි පැටවා ‘වනජීවී දෙපාර්තමේන්තුව’ට යළි බාරදෙනු ලැබුවා.
එහිදී අධිකරණ සේවා කොමිෂන් සභාව 2016 මැයි මාසයේදී එවකට කොළඹ අතිරේක මහේස්ත්‍රාත්වරයෙකු ලෙස කටයුතු කළ තිලිණ ගමගේගේ වැඩ තහනම් කරනු ලැබුවා.
2019 නොවැම්බර් 07 වැනිදා ‘තිලිණ ගමගේ’ සහ ‘චන්ද්‍රරත්න බණ්ඩාර යටවර’ ඇතුළු සිව්දෙනෙකුට (4) එරෙහිව කොළඹ මහාධිකරණ විනිසුරුවරයෙකු වූ ගිහාන් කුලතුංග ඉදිරියේ චෝදනා ගොනු කරනු ලැබු අතර, ඉන් අනතුරුව තිලිණ ගමගේට එරෙහිව නීතිපති දෙපාර්තමේන්තුව චෝදනා ගොනු කිරීමේදී ප්‍රමාණවත් තරම් සාක්ෂි ඉදිරිපත් කර නොතිබීම හේතුවෙන් 2021 දෙසැම්බර් 16 වැනිදා තිලිණ ගමගේව චෝදනාවලින් නිදහස් කරනු ලැබුවා ෴
අබිරහස් ලෙස මියගිය තරුණයෙකුගේ මළසිරුරක් හමුවෙයි
(02.08.2025 – 14:21 +0530 – sinhala.adaderana.lk)
ඔහිය – උඩවේරියවත්ත ප්‍රදේශයේ තිබී පුද්ගල මළසිරුරක් සොයා ගෙන තිබේ.
ප්‍රදේශයේ ග්‍රාම නිලධාරීවරයා විසින් කළ පැමිණිල්ලකට අනුව සිදු කළ පරීක්ෂාවකදී මෙම මළ සිරුර හමු වූ බව හල්දුම්මුල්ල පොලිසිය පැවසුවේය.
මෙසේ මිය ගොස් ඇත්තේ උඩවේරියවත්ත ඔහිය පන්සල අසල පදිංචි 22 හැවිරිදි තරුණයෙකි.
මරණයට හේතුව මෙතෙක් අනාවරණය වී නොමැති අතර හල්දුම්මුල්ල හා බණ්ඩාරවෙල පොලිසිය මේ සම්බන්ධයෙන් වැඩිදුර පරීක්ෂණ පවත්වයි ෴
ඩිජිටල් ගනුදෙනු ගැන මහ බැංකු අධිපතිගෙන් පැහැදිලි කිරීමක්
(02.08.2025 – 13:13 +0530 – sinhala.adaderana.lk)
ඩිජිටල් ගනුදෙනු ප්‍රවර්ධනය කරනවා හා සමානවම බැංකු හා මූල්‍ය ආයතන ඊට අදාළ යටිතල පහසුකම් ගමේ සිටින ජනතාව දක්වාම රැගෙන යා යුතු බව මහබැංකු අධිපති ආචාර්ය නන්දලාල් වීරසිංහ මහතා පවසයි.
දඹුල්ලේ පැවති උත්සවයක් අමතමින් අධිපතිවරයා මේ බව ප්‍රකාශ කළේය.
ශ්‍රී ලංකා මහබැංකුව සංවිධාන කරන ඩිජිටල් ගනුදෙනු ප්‍රවර්ධන වැඩසටහනක් මහබැංකු අධිපති ආචාර්ය නන්දලාල් වීරසිංහ මහතාගේ ප්‍රධානත්වයෙන් දඹුල්ල ආර්ථික මධ්‍යස්ථානය කේන්ද්‍ර කරගනිමින් ඊයේ පැවැත් වුණි.
එහිදී අදහස් දැක්වූ මහ බැංකු අධිපති ආචාර්ය නන්දලාල් වීරසිංහ මහතා,
“ඩිජිටල් ගනුදෙනුවලදී විශේෂයෙන් අපේ රටේ ගෙවීම් සහ පියවීම් සඳහා විශාල වශයෙන් අවශ්‍ය කරන යටිතල පහසුකම් කාලයක් තිස්සේ සම්පූර්ණ කරලා තියෙනවා. Online Banking, QR code එක පාවිච්චි කරලා ගෙවන ඒවා රජයේ ගෙවීම්වලටත් රජය විසින් දැන් GovPay කියලා එකකින් යම්කිසි රජයේ සේවාවන්වලට ගෙවන්න පහසුකම් හදලා තියෙනවා. බදු ගෙවීමට පුළුවන් ඒ ආකාරයට. පහසුකම් තියෙනවා. නමුත් අපි දකින්නේ භාවිතය ඉතාම අඩුයි.
විශේෂයෙන් බස්නාහිර පළාතෙන් පිටතට යනකොට අපි දකිනවා විශාල වශයෙන් තවමත් මුදල් විශේෂයෙන් නෝට්ටු සහ කාසි භාවිතයට තමයි හුඟදෙනෙක් පුරුදු වෙලා තියෙන්නේ. ඒක තමයි පහසු විදිහට දකින්නේ. නමුත් ඇත්ත වශයෙන්ම කල්පනා කරලා බැලුවොත් ව්‍යාපාරයක් කරන කෙනෙක්ට සහ පාරිභෝගිකයා පැත්තෙන් ගත්තොත් හැමෝටම මේ මුදල් පරිහරණය ඇත්ත වශයෙන්ම අමතර කාලයක් මුදලක් වැය වෙන කාරණයක් හිතලා බැලුවොත්.
විශේෂයෙන් බැංකු පද්ධතිය සහ මූල්‍ය ආයතන ඩිජිටල් ගනුදෙනු ප්‍රවර්ධනය කරන ආයතනවලට තියෙනවා විශේෂ කාර්යයභාර්යක් මේ වගේ තැන්වලට ඇවිත් ප්‍රවර්ධනය කරනවාට අමතරව මේක යන්න ඕන ගමටම. එහෙම ගියොත් විතරයි මේ ගැන විශ්වාසයක් ඇතිවෙන්නේ.
මේකේ අනිසි බියක් තියෙනවා මේ බදුවලට අහුවෙයි කියලා. එහෙම එකක් නැහැ බදුවලට අහුවෙනවා නම් සල්ලිවලින් ගනුදෙනු කළත් බදුවලට අහුවෙනවා නම් අහුවෙනවා. ඒක වළක්වන්න කාටවත් බැහැ.”
+
මත්ද්‍රව්‍ය ජාවාරමේ නිරත චීන ජාතිකයෙකු අත්අඩංගුවට
(02.08.2025 – 14:32 +0530 – sinhala.adaderana.lk)
මෙරට සිටින චීන ජාතිකයන්ට රාත්‍රී සමාජ ශාලාවල හා කැසිනෝ ශාලාවල අයිස් මත්ද්‍රව්‍ය අලෙවි කරන ප්‍රධාන පෙළේ ජාවරම්කරු කොළඹ දකුණ කොට්ඨාස අපරාධ විමර්ශන කාර්යංශය මගින් අත්අඩංගුවට ගෙන තිබේ.
බම්බලපිටියේදී අත්අඩංගුවට ගනු ලැබූ මෙම පුද්ගලයා දිගු කලක සිට මෙරට නීතිවිරෝධීව රැඳී සිටින චීන ජාතිකයෙකු බව පොලීසිය පැවසීය.
චීන ජාතිකයන්ට අයිස් මත්ද්‍රව්‍ය අලෙවි කිරීමේ ජාවාරමක් පිළිබඳ කොළඹ දකණ කොට්ඨාස අපරාධ විමර්ශන කාර්යාංශයට ලද තොරතුරක් අනුව සිදුකළ විමර්ෂනයේදී මෙම අත්අඩංගුවට ගැනීම සිදුකිරීමට හැකිව තිබේ.
සැකකරු අත්අඩංගුවට ගන්නා විටත් ඔහු සතුව තිබී අයිස් මත්ද්‍රව්‍ය ග්‍රෑම් 50 කට අධික ප්‍රමාණයක් ද පොලිසිය විසින් සොයාගෙන ඇත.
මාලදිවයින් ජාතිකයෙකුගෙන් හා ලාංකිකයෙකුගෙන් තමා මත්ද්‍රව්‍ය ලබාගන්නා බවත්, ඒවා රාත්‍රී සමාජශාලාවලට හා කැසිනෝ ශාලාවලට පැමිණෙන චීන ජාතිකයන්ට අලෙවිකරන බවත් ඔහුගෙන් සිදුකළ ප්‍රශ්න කිරීම්වලදී අනාවරණ වී තිබේ.
2019 වසරේ දී මෙරටට පැමිණ ඇති මෙම චීන ජාතිකයා මේ දක්වා මෙරට තුළ රැඳී සිට ඇත්තේ ද නීතිවිරෝධීවය.
සැකකරු අධිකරණයට ඉදිරිපත් කර රඳවා තබා ප්‍රශ්න කිරීමට නියමිතය.
+
ආණ්ඩුව ගෙදර යන්න සැරසෙයි. ඊට කලින් අමුතු මෙහෙයුමක් – උදය ගම්මන්පිල (02.08.2025)
+
රටකට පැහැදිළි මුල්‍ය ප්‍රතිපත්තියක්, බදු ප්‍රතිපත්තියක් නැතිව විනයක් නැතිව එක අඟලක ප්‍රගමනයක් නැත (02.08.2025)
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴