ජනපතිට ඉහළින් ඉන්දීය යතුරු පැදි සමාගමක ලොක්කෙක් තීරණ ගනිමින්…? – විමල් වීරවංශ
ජනපතිට ඉහළින් ඉන්දීය යතුරු පැදි සමාගමක ලොක්කෙක් තීරණ ගනිමින්…?
(06.02.2025 – 00:02 +0530 – lankacnews.com)
‘ගජ මිතුරු කයි පාලනය’ට රතු එළිය දැල්විමේ අවස්ථාව බවට ඉදිරි පළාත් පාලන මැතිවරණය පත්කරගන්නැයි මේ රටේ පොදු මහජනතාවගෙන් ඉතා ඕනෑකමින් ඉල්ලා සිටින බව ‘ජාතික නිදහස් පෙරමුණේ නායක විමල් වීරවංශ මහතා’ පැවසීය.
බත්තරමුල්ලේ පිහිටි ‘ජාතික නිදහස් පෙරමුණෙ’ මූලස්ථානයේ (05) පැවැති මාධ්‍ය හමුවකට එක්වෙමින් විමල් වීරවංශ මහතා මෙම ඉල්ලීම කළේය.
අනුර කුමාර දිසානායක ජනපතිවරයාටත් ඉහළින් තීරණ ගනු ලබන ආණ්ඩුවේ උපදේශකවරයකු ‘ඉන්දියානු යතුරු පැදි සමාගමක’ අධ්‍යක්ෂවරයෙක් බව අනාවරණය කළ විමල් වීරවංශ මහතා, වාහන ආනයන බාධා ඉවත් කිරීමේ ගැසට්ටුවෙන් දේශීය මෝටර් සයිකල් එකලස් කිරීමේ කර්මාන්තය මත තබා ඇති තර්ජනය ඉවත්කොට එය වෙනස් කිරීමට කටයුතු කරන්නැයි අවධාරණය කළේය.
විමල් වීරවංශ මහතා මෙසේ ද කීවේය :
“ඔබ දන්නවා වාහන ආනයනයට තිබුණු බාධාවන් ඉවත් කරමින් අද වනවිට ආණ්ඩුව ගැසට් නිවේදනයක් නිකුත් කර තිබෙනවා. යම් යම් බාධා ඉවත් කරමින් විවිධ බදු ක්‍රම යෝජනා කරමින් වාහන ආනයනයට අවසර ලැබෙන ආකාරයෙන් මෙම ගැසට් නිවේදනය නිකුත් කර තිබෙනවා.
ආණ්ඩුව බලයට එන්න කලින් පොඩි මිනිස්සුන්ට වාහනයක් ගන්න තත්ත්වයක් ‘ජාතික ජන බලවේග ආණ්ඩුව’ට ඇති කරන්න පුළුවන් කිවුවා. එහෙත් මේ ගැසට් නිවේදනය බැලුවම පේනවා සාමාන්‍ය ජනතාව භාවිතා කරන්න ඉඩ තිබෙන වාහන අති විශාල බදු ප්‍රමාණයක් පටවලා තිබුණ වගේ සියයට දෙසීයකට මිල ඉහළ යාමකට ලක් කර තිබෙනවා. ඒ නිසා ආණ්ඩුව දීපු පොරොන්දුවයි මෙතන භාවිතයයි අතර සම්පූර්ණ පරස්පරයක් තිබෙනවා.
අද අපි ඊට වඩා බරපතල කාරණයක් මතු කරනවා. ඔබ දන්නවා 2021 මම කර්මාන්ත ඇමති හැටියට ඉන්න වෙලාවේ ‘එස්.ඕ.පී. සම්මත මෙහෙයුම් පටිපාටිය’ කියන ප්‍රතිපත්තියක් මෙරට වාහන එකලස් කරන කර්මාන්තයේ යෙදෙන පිරිසේ හිත සුව පිණිස හඳුන්වා දුන්නා. අමාත්‍ය මණ්ඩලයේ අනුමැතියත් අරගෙන එය සම්පූර්ණයෙන්ම බලාත්මක කළා. ‘සම්මත මෙහෙයුම් පටිපාටිය’ට මුලින් මෝටර් සයිකල් ඇතුළත් කර තිබුණේ නැහැ. මම මෝටර් සයිකල් පවා මේ පටිපාටියට ඇතුළත් කළා. එමගින් සිදු උනේ විදේශීය සන්නාම සහිත වාහන ලංකාවේ එකලස් කරලා නිපැදවීමයි. සියයට විස්සක හෝ විසි පහකට (20% – 25%) උඩින් දේශීය අගය එකතු කිරීමක් තියෙනවා නම් එම අගය එකතු කිරීමට සාපේක්ෂව බදු ප්‍රමාණය අඩු කරන්න කටයුතු කළා. වාහන එකලස් කිරීමේ කර්මාන්තයට ඒක දිරි ගැන්වීමක්.
අපි ‘එස්.ඕ.පි.’ ගේන කොට මේ රටේ වාහන එකලස් කරන ආයතන තිබුණේ තුනයි (3). අද වෙනකොට මෝටර් සයිකල් කර්මාන්තයට පමණක් ආයතන 17 ක් ක්‍රියාත්මක වෙනවා. මේ දාහතේ (17) සියයට විස්ස – විසිපහ (20% – 25%) ට වැඩි ‘අගය එකතු කිරීමක්’ සිදුවෙනවා. සයිලන්සර් එක වෙන්න පුළුවන්; සීට් එක වෙන්න පුළුවන්; ටයර් එක වෙන්න පුළුවන් – ඒක දේශීය වශයෙන් නිපදවලා වාහන නිෂ්පාදන ක්‍රියාවලියට අපේ රටේ මිනිස්සු දායක වෙනවා. මේ මෝටර් සයිකල් කර්මාන්තයට අදාළ ආයතන 17 න් පමණක් සෘජු හා වක්‍ර රැකියා විසි දහසකට (20,000) අධික සංඛ්‍යාවක් නිර්මාණය වෙලා තියෙනවා. ඒ විතරක් නෙමෙයි මේ රටට වසරකට අවශ්‍ය මෝටර් සයිකල් සංඛ්‍යාව නිපදවීමේ හැකියාව මේ ආයතන 17 පෙන්නුම්කර තිබෙනවා. එහි වැදගත් දේ තමයි චීනය සහ වෙනත් රටවල් ඇතුළු මෝටර් සයිකල් නිපදවන වෙනත් සන්නාම සහිත තවත් ආයතන 17 ක් ලංකාවට ඇවිත් එකලස් කිරීමේ කර්මාන්තයට සම්බන්ධවෙන්න සූදානම් බවත් ප්‍රකාශයට පත්කර තිබෙනවා. ඒකෙන් පේන්නෙ 2021 කර්මාන්ත අමාත්‍යාංශය ගත්ත තීරණය මත දේශීය වශයෙන් වාහන එකලස් කිරීමේ කර්මාන්තයේ විශාල පිබිදීමක් ඇති වෙලා තියෙනවා.
දැන් මොකද වෙලා තියෙන්නෙ ?
දැන් මේ ආණ්ඩුව අලුතින් ගහපු චක්‍ර ලේඛයේ දී අපට දැනගන්න තියෙන විදියට මුලින් මුදල් අමාත්‍යාංශ ලේකම්වරයා පවා එකඟවෙලා තියෙනවා ඒ වාහන ආනයනයට නිදහස් කරන ලැයිස්තුවට මෝටර් සයිකල් ඇතුළත් නොකර සිටින්න. එකලස් කරන ආයතනත් මෙහිදී කාරණා දෙකක් (2) පිළිබඳව ඉල්ලා තිබුණා. එක්කො නිදහස් නොකර සිටින්න නැත්නම් අධික බද්දක් ඒවාට පනවන්න කියලා. අවසානයේ සිද්ධ උනේ මොකද්ද ?
තමුන්නාන්සෙලා දන්නවා ආණ්ඩුවේ උපදේශකයෙක් ඉන්නවා ‘හුලං’ කියලා. හුලං විස්කෝතු ද ? මන් දන්නෙ නෑ. මේ ‘හුලං’ උපදේශකයා කලින් ගෝඨාභය ආණ්ඩුවෙත් හිටියා. මේ ‘හුලං’ උපදේශකයා ඉන්දියානු මෝටර් සයිකල් සමාගමක අධ්‍යක්ෂ මණ්ඩල සාමාජිකයෙක්. ඒ ‘හුලං’ගෙ ඉල්ලීම මත මෝටර් සයිකලුත් මේකට ඇතුළත් කළා. මෙතැනදි දේශීය වශයෙන් එකලස් කරන මෝටර් සයිකලේකයි ‘හුලං’ගෙ බදු ප්‍රමාණයට අනුව එන ආනයනික මෝටර් සයිකලේකයි තියෙන මිල පරතරය රුපියල් දහ දාහයි (10,000) . එතකොට සාමාන්‍ය පාරිභෝගිකයා ආනයනික මෝටර් සයිකලය මිලදී ගන්න පෙළඹෙනවා.
එතකොට වෙන්නෙ දැනට ක්‍රියාත්මක එකලස් කරන ආයතන 17 ට සිද්ධ වෙච්ච අලකලංචිය දැක්කම එන්න තියෙන 17 ත් නතර වෙනවා. එවිට මේ තියෙන කර්මාන්ත පවත්වාගෙන යන්න බැරිවෙනවා. ඔවුන් මේ කර්මාන්ත වසා දාලා ලංකාවෙන් පිටවෙලා යනවා. එතකොට මේකෙන් යැපුණු සෘජු හා වක්‍ර රැකියා 20,000 කට අධික පිරිසකට රැකියා අහිමි වෙනවා. දැන් මේක ද මේ ‘ජාතික ජනබලවේගයේ, ජේවීපි ආණ්ඩුවක්’ ගෙන ඒමෙන් ජනතාව බලාපොරොත්තු උනේ ? පෝලිමේ ගිහිං ඡන්දෙ දුන්නෙ ඒකට ද ? ‘දේශීය කර්මාන්ත නගා සිටුවනවා’ කියලා ඔවුන් කලින් පොරොන්දු උනා. ‘දේශීය වශයෙන් ඒවා බලගන්වනවා’ කිවුවා. එහෙත් අද මේ ගහලා තියෙන ගැසට් නිවේදනය අනුව එකලස් කරන මෝටර් සයිකල් කර්මාන්තය අනතුරේ වැටෙනවා. ඒ විතරක් නෙමෙයි ඒවා වසා දැමීමෙන් ඒ මත රැකියා කරපු විසිදහසකට (20,000) අධික පිරිසකගෙ රැකියා නිසැක වශයෙන්ම තර්ජනයට ලක්වෙනවා.
කිවුවේ එකක්, කරන්නෙ තව එකක්.
අන්තිමට මේ ආණ්ඩුව මෙහෙයවන්නෙ, ආණ්ඩුවේ තීරණ ගන්නෙ, අනුර දිසානායක ජනාධිපති නෙමෙයි අර වාණිජ මණ්ඩලෙන් දාපු ‘හුලං’ තමයි ආණ්ඩුවේ සියල්ල තීරණය කරන්නෙ. ඒ නිසා දේශීය කර්මාන්ත පිළිබඳව අංශු මාත්‍රයක තැකීමක් නොකර ඒවා නොසලකා යන ආණ්ඩුවේ ගමන් මග දැන් පැහැදිලියි. ඒ නිසා ඔවුන්ගෙ දැන් ප්‍රතිපත්තිය වෙලා තියෙන්නෙ ‘හුලං’ කියන විදියට ආර්ථිකය ඇදගෙන යන එකයි.
‘ලෝක බැංකුවෙන් මෙතෙක් නොලැබුණු විශාලම ණය මුදල අපට ලැබෙනවා’ කියලා ආණ්ඩුව දැන් කියනවා. හැබැයි බලය ගන්න කලින් නම් ‘ණය අරගෙන රටක් ගෙනියන්න ආණ්ඩුවක් ඕන ද? ඒකට ඔය පොලී මුදලාලි කෙනෙක් ගත්ත නම් හරි’ කිවුවා. හැබැයි අද ගත්තොත් පැයට කිලෝමීටර් හැට හැත්තෑවක වේගෙන් ණය ගන්න ආණ්ඩුවක් බවට මේ ආණ්ඩුව පත්වෙලා තියෙනවා. ඉතිං දැන් බලන්න ඡන්දෙට කලින් දීපු කයිය එකක්. දැන් දෙන කයිය තව එකක්. කයි දෙකක්. දැන් මේ කයිය ගගහා යන්නෙ රනිල් වික්‍රමසිංහ මහත්මයා ඇදගෙන ආපු පාරෙමයි.
එදා අයි.එම්.එෆ්. උවමනාව අනුව රනිල් වික්‍රමසිංහ මහත්මයා ගෙනාපු ආර්ථික පරිවර්තන පනතට එදා ජවිපෙ මන්ත්‍රීවරුන් තිදෙනාම (3) විරුද්ධ උනා. ශ්‍රේෂ්ඨාධිකරණයටත් ගියා. හැබැයි දැන් කියනවා ආර්ථික පරිවර්තන පනත අපි සංශෝධන සහිතව ක්‍රියාත්මක කරනවලු. එදා ගහපු කයිය එකක්. දැන් ගහන කයිය තව එකක්. පරණ කයියයි. අලුත් කයියයි දෙකක්.
හඳුන්නෙත්තිලා කිවුවා එක පෑන් පාරෙන් හාල් මෝල් හිමියන්ගෙ ප්‍රශ්නෙ විසඳන්න පුළුවන් කියලා. දැන් පෑන් නැද්ද මන් දන්නෙ නෑ ජනාධිපති ලේකම් කාර්යාලයේත්, එහෙම ප්‍රශ්නෙ විසඳිලා නැහැ. ඉහළ පරිමාන හාල් මෝල් හිමියන්ට අනුව වී මිල තීරණය වෙනවා. සහතික මිල දැමීම කල් දමනවා. ඒ අතරෙ ඉහළ පරිමාන වී මෝල් හිමියන්ම කුඹුරටම ගිහිල්ලා ගොවියන්ගෙන් වී ටික කොල්ල කනවා. ඒ නිසා එදා ගහපු කයියයි අද ගහන කයියයි දෙකක්. එදා ගැහුවේ ගොවියා වෙනුවෙන් කයිය. අද ගහන්නෙ ඉහළ පරිමාන හාල් මෝල් හිමියන් වෙනුවෙන් කයිය. ඒ අනුව කියපු දේයි කරන දේයි අතර පරස්පරය දැන් පැහැදිලියි.
වාහන ආනයන ගැසට් පත්‍රයේ මෝටර් සයිකල් සම්බන්ධයෙන් අනුගමනය කරන ප්‍රතිපත්තිය බැලුවම මේක දැන් මනාව පැහැදිලියි. මෝටර් සයිකල් එකලස් කිරීමේ කර්මාන්තය ලංකාවේ හොඳින් සිද්ධවෙන නිසා ඒ ගැන වෙනම සළකා බැලිය යුතුව තිබුණා. එහෙම කිසිම තැකීමක් නැතිව ගැසට් පත්‍රය නිකුත් කරනු ලැබුවා.
ඔබ කවුරුත් දන්නවා පසුගිය කාලයේ රේගුවේ කිසිම පරීක්ෂා කිරීමකින් තොරව ඇමතිවරයාගේ බලපෑමට යටත්ව කන්ටේනර් තුන්සිය ගණනක් නිදහස් කරනු ලැබුවා. ඉන් දෙසියකට වැඩි ප්‍රමාණයක් රතු ලැයිස්තුවට අයිතියි. මේ කාගේ කන්ටේනර් ද ? බස්නාහිර පළාතේ ආණ්ඩුකාරයා කියලා තිබුණා මේ වනවිට මගේ ඒ ආයතන සමඟ සම්බන්ධයක් නැත කියලා. කන්ටේනර් ගෙන ආපු සමාගම සමඟ මේ වනවිට සම්බන්ධයක් නැතිලු. ධම්මික පෙරේරා දේශපාලනයට එනවිට තමන්ගෙ කම්පැනිවලින් ව්‍යාජලෙස අයින්වෙලා තමන්ගෙ පවුලෙ අයට ඒක බාර දීලා ආව නේ. බස්නාහිර ආණ්ඩුකාරයත් ඒ වගේ එකක් කරා වෙන්න පුළුවන්. ආණ්ඩුකාර ධුරය හම්බවෙනකොට එයාගෙ ‘එක්ස්පො ලංකා සමාගමෙන්’ එයා නීත්‍යානුකූලව ඉවත්වෙලා එයාගෙ වෙන කාටහරි එහි කළමනාකරණය බාර දුන්නා වෙන්න පුළුවන්.
හැබැයි මේ ආපු කන්ටේනර්වලින් විශේෂයෙන් රතු ලැයිස්තුවේ තිබුණ ඒවායින් අති මහත් බහුතරය ‘එක්ස්පො ලංකා සමාගමේ’ ඒවා. ආණ්ඩුව බොරුවට නිලධාරින් තුන් දෙනෙකු (3) ගෙන් පරීක්ෂණ කමිටුවක් දාලා තියෙනවා. ඒ දැම්මයි කියලා වැඩක් වෙන්නෙ නෑ. ඔය නිලධාරින් අන්තිමට දෙන්නෙ ආණ්ඩුවට ඕන තීන්දුවක්. එහෙම පරීක්ෂණ කමිටුවක් දානවා නම් දාන්න ඕන ස්වාධීන එකක්. මේ තමන්ගෙ ඡන්දෙට උදව් කරපු බිලියන ගණන් මුදල් දීපු ගජ මිතුරන්ව පිනවන විදිය.
අද රාජ්‍ය සේවයේ ඉන්නවා සංවර්ධන නිලධාරින්. ඒ අයට අවුරුදු ගණනකට පසුව විභාගයක් තිබුණා. මෙතුවක් කල් ඒ විභාගයට සාමාන්‍යයෙන් සියයට (100) වඩා ලකුණු ගත්ත අයට උසස්වීම දුන්නා. දැන් මේක ‘120 ට වඩා’ කියලා කරන්න යනවා. එතකොට උසස්වීම් ලැබෙන ප්‍රමාණය අඩු කරන්න යනවා. මේ අයට උසස්වීමක් ගන්න තිබුණ එකම ක්‍රමය මේ විභාගය විතරයි. දැන් 120 ට වඩා ලකුණු ගත්ත අයට දෙනවයි කිය කිය ඒක අදිනවා. එතකොට බලන්න රාජ්‍ය සේවකයො සියයට 80 ක් විතර පෝලිමේ ගිහිං ඡන්දෙ දුන්නෙ ඔය මාලිමාවට. මෙන්න ඒකට ඡන්දෙ දීපු අයට සලකණ විදිය. තමන්ට ඡන්දෙ දීපු රාජ්‍ය සේවකයා ගැන වත් පහළ පන්තික සමාජය ගැන වත් නෙමෙයි අද ඔවුන් හිතන්නෙ; ‘තමන්ගෙ ඡන්ද ව්‍යාපාරයට මුදල් වියදම් කරපු ගජ මිතුරු කල්ලිය’ ගැන විතරයි හිතන්නෙ. ඒ ගජ මිතුරන්ට ආණ්ඩුකාර පට්ටම් දෙන්නෙත්, රේගු පරීක්ෂා කිරීමකින් තොරව කන්ටේනර් නිදහස් කරන්නෙත් ගජ මිතුරන්ව පිනවන්න. ඒ නිසා පිනවන්නෙ පුංචි මිනිහා නෙමෙයි. ඡන්දෙ දීපු මිනිහා නෙමෙයි. ඉතාම පැහැදිලිව බිලියන ගණන් තමන්ගෙ ඡන්ද ව්‍යාපාරයට සල්ලි දීපු ගජ මිතුරන්. ඒ නිසා ‘ගජ මිතුරු කයි පාලනයක්’ බවට මේ පාලනය අද පත්වෙලා තියෙනවා.
ඉදිරි පළාත් පාලන මැතිවරණයේ දී මේ ‘ගජ මිතුරු කයි පාලනය’ට රතු එළිය දැල්විමේ අවස්ථාව බවට පත්කරගන්නැයි මේ රටේ පොදු ජනතාවගෙන් අපි ඉතා ඕනෑකමින් ඉල්ලා සිටිනවා. විශේෂයෙන් මාලිමාවට ඡන්දය දීලා කණගාටුවෙන, ඒ පිළිබඳව පසුතැවෙන, පොල් ගෙඩියක් රු. 250-300 ට ගන්න වෙලා හූල්ලන, කැකුළු හාල් ටිකක් හොයාගන්න බැරිව ලතවෙන, හාල්වල මිල ඇහුවම හාල් කිලෝවක් නෙමෙයි ඊට අඩුවෙන් ගන්න හිතිලා තියෙන, මේ හැමෝටම අපි ඉතා ඕනෑකමින් ඉල්ලා සිටිනවා මේ ‘කයිපාලනය’ට රැවටෙන්නෙ නැතිව බොරුවට පෙන්වන ඊනියා අල්පේච්ච තාවයට අහුවෙන්න එපා කියලා පොදු ජනතාවගෙන් අපි ඉල්ලනවා. ප්‍රගතිශීලි, ජාතිකවාදී දේශමාමක බලවේග තෝරාගෙන ඉදිරි පළාත් පාලන මැතිවරණයේ දී ඡන්දය දීලා, ‘අන්ත දක්ෂිණාංශක බලවේග’වලට මේ රටේ පාලන බලය අරන් දෙන මාවත නිර්මාණය නොකර, වාම, ප්‍රගතිශීලි ජාතික මාමක මෙන්ම ‘සැබෑ දේශමාමක බලවේග’වලට ඡන්දය පාවිච්චි කරන්න සූදානම් වෙන්න කියලා පොදු ජනතාවට ආරාධනා කරනවා.
ඒ වගේම මේ ගැසට් නිවේදනය වෙනස් කරන්න. මෝටර් සයිකල් එකලස් කිරීමේ කර්මාන්තය මත තබා ඇති තර්ජනය ඉවත් කරන්න. මෝටර් සයිකල් ආනයනය කරනවා නම් මීට වඩා වැඩි බද්දක් ආනයන මෝටර් සයිකල්වලට දාන්න. දේශීය වශයෙන් එකලස් කරන මෝටර් සයිකල් කර්මාන්තය ආරක්ෂා කරන්න පියවර ගන්නැයි විමල් වීරවංශ මහතා ඉල්ලා සිටියේය.
වාහන කම්පැනි අතුගෑවිලාම යනවා වාහන ආනයනයේ අලුත් කතාවක් – විමල් වීරවංශ ගෙන් (05.02.2025)
+
නීතිපති දෙපාර්තමේන්තුව ඉදිරිපිට උණුසුම් තත්ත්වයක් (06.02.2025) (01:45 pm)
+
ගම්පොල උත්සවයක් අතරතුර සිදුවූ නොසිතූ දේ සියල්ල කැමරාවේ පටිගත වෙයි (06.02.2025)
+
රටම කැළඹුණු ෂාෆ්ටර් ඝාතනය පිටුපස මහමොළකරු කවුද? | මෙතෙක් මාධ්‍යයෙන් හෙළි නොකළ, සම්පූර්ණ කතාව (06.02.2025)
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴