ජනාධිපතිට හැකි දෙයක් කරනු.. අපේ ස්ථාවරය එසේමයි..- විශ්ව විද්‍යාල ආචාර්යවරුන්
ජනාධිපතිට හැකි දෙයක් කරනු.. අපේ ස්ථාවරය එසේමයි..- විශ්ව විද්‍යාල ආචාර්යවරුන්
(23.04.2023 – 19:10 +0530 – lankacnews.com)
උසස් පෙළ පිළිතුරු පත්‍ර ඇගයීම සඳහා කටයුතු නොකරන්නේ නම් නීතිමය ක්‍රියාමාර්ග ගන්නා බවට ජනාධිපති රනිල් වික්‍රමසිංහ මහතා විසින් කර ප්‍රකාශයට විශ්වවිද්‍යාල ආචාර්යවරුන්ගේ සමිති සම්මේලනය අභියෝග කරයි.
නිවේදනයක් නිකුත් කරමින් එම සම්මේලනය සඳහන් කරන්නේ ජනාධිපතිවරයාට කළ හැකි දේ කරන ලෙසයි.
උසස් පෙළ පිළිතුරු පත්‍ර ඇගයීම සඳහා විශ්වවිද්‍යාල ආචාර්යවරු එක් වන්නේ ජාතික සේවයක් ලෙස මිස ඒ සඳහා නිසි ලෙස ගෙවීම් සිදු නොවන බවද නිවේදනයේ දැක්වේ.
එම සම්මේලනය විසින් නිකුත් කරන ලද නිවේදනය මෙසේය :
“විශ්වවිද්‍යාල අධ්‍යයන කාර්ය මණ්ඩලය විසින් අ.පො.ස උසස් පෙළ උත්තර පත්‍ර පරීක්ෂා කිරීමේ ක්‍රියාවලිය සතියක් ඇතුළත ආරම්භ නොකළහොත් අධ්‍යාපනය, විශේෂයෙන්ම විභාග කටයුතු, අත්‍යවශ්‍ය සේවාවක් ලෙස ප්‍රකාශයට පත් කරන බව ශ්‍රී ලංකාවේ ජනාධිපතිවරයා 2023 අප්‍රේල් 19 වන දින මහජනතාවට දැනුම් දුන්නේය. වික්‍රමසිංහ මහතා සිය නීත්‍යානුකූල මුක්තිය භාවිත කරමින් මෙම විද්වතුන් සිරගත කරන බවටත්, ඔවුන්ගේ දේපළ රාජසන්තක කරන බවටත් තර්ජනය කළේය.
පසුගිය මහ මැතිවරණයේදී තම ආසනය පවා අහිමි කරගත්තා වූත්, මහජන ඡන්දයෙන් තේරී පත් නොවූත්, අනීතික ජනාධිපතිවරයෙකුගේ මෙම ආන්දෝලනාත්මක ප්‍රකාශය භාරගත යුත්තේ බලාපොරෙත්තු බිඳී යමින් පවතින බලයක් වෙත තව තවත් ආශක්තව සිටීම පිණිස ගන්නා උපායක් වශයෙනි.
එබැවින් ඔහුට අණ දෙන ජාතික හා ජාත්‍යන්තර මට්ටමේ බලවතුන්ට අවනත වෙමින්, ජනතාවාදී නමුත් ජනාධිපතිවරයා විසින් තම අණසක යටතේ තබාගෙන සිටින මාධ්‍ය අංශ, FUTA සහ එහි සාමාජිකයින්ගේ මතයට සවන් දීමටවත් ඉදිරිපත් නොවී, ඔවුන් අපහාසයට පත් කිරීමට මෙම ප්‍රශ්නය භාවිත කිරීම කණස්සල්ලට කරුණකි.
එබැවින් මෙම මාධ්‍ය ප්‍රකාශයේ පැහැදිලි අරමුණු හතරක් මෙලෙස දැක්විය හැකිය.
ප්‍රථමයෙන්, FUTA අපේක්ෂා කරන්නේ රටේ සියලුම විශ්වවිද්‍යාල ආචාර්යවරුන්ට එරෙහිව ඔහු කළ ඒ තර්ජනය ක්‍රියාවට නංවන මෙන් ඉල්ලමින් ජනාධිපතිවරයාගේ ව්‍යාජ තර්ජනයෙන් ඔහුටම පෙරළා අභියෝග කිරීමටයි. අධ්‍යාපනය අත්‍යාවශ්‍ය සේවාවක් ලෙස ප්‍රකාශයට පත් කරන බවත්, තම සාහසික රෙගුලාසිවලට අනුකූල නොවන සියලුම විද්වතුන්ට නඩු පවරන බවත් ඔහු ප්‍රකාශ කර ඇත.
මේ සතිය අවසානයේදී අප අත්අඩංගුවට ගනිමින්, අපගේ දේපළ රාජසන්තක කිරීම් ආරම්භ කරන බවට ඔහු අප සියලු දෙනාටම තර්ජනය කර ඇති බව ප්‍රසිද්ධියට පත්ව ඇති කරුණකි. එහෙත් මේ රට විනාශ කළ සහ බංකොලොත් කළ දේශපාලකයන්ගේ අයථා ඉපැයීම් ගැන ඔහුගේ කන් බිහිරි තරම් නිහඬය.
ජනාධිපතිතුමනි, මෙම තර්ජනය නීතිවිරෝධී මෙන්ම අයුක්ති සහගතද වන නමුත් ඔබට කළ හැකි බරපතලම දේ කරන මෙන් අපි ඔබට අභියෝග කරමු. අ.පො.ස උසස් පෙළ උත්තර පත්‍ර පරීක්ෂා කිරීම විශ්වවිද්‍යාල ආචාර්යවරුන් ජාතික සේවයක් ලෙස ඉටු කරන අතිරේක ක්‍රියාකාරකමකි.
එය අපගේ නිත්‍ය රාජකාරිවල කොටසක් නොවන අතර, මෙම කාර්යය සඳහා අපට නිසි ලෙස ගෙවීම් සිදු නොවන බව ද සඳහන් කළ යුතුය. අප බොහෝ දෙනෙකුට 2022 දී කළ කාර්යභාරය වෙනුවෙන් ලැබිය යුතු සොච්චම් ගෙවීම පවා ලබා දී නොමැත.
දෙවනුව, FUTA නැවත අවධාරණය කරන්නේ හිතාමතාම වෘත්තිකයන් ඉලක්ක කර ඇති අසාධාරණ, හිතුවක්කාර, සහ අනවශ්‍ය නව බදු ක්‍රමය හේතුවෙන් එහි සාමාජිකයින් බොහෝ දෙනෙකුට තම පවුල්වලට පෝෂණය සහ ඇඳුම් පවා ලබා දීමේදී විශාල ගැටලුවලට මුහුණ දීමට සිදු ව ඇති බවයි. ඒ කවර හේතුවක් නිසාද? දූෂිත සහ ගජමිතුරු ව්‍යාපාරිකයන් ද, දේශපාලන හෙංචයියන් ද බේරා ගැනීම සඳහාය. මෙවන් අවස්ථාවක අ.පො.ස. උසස් පෙළ විභාගයේ උත්තර පත්‍ර පරීක්ෂා කිරීමෙහි නිරත වීමට අමතර කාලයක් හා සම්පත් වැය කිරීමට අපට හැකියාවක් නැත. අපේ සාධාරණ ඉල්ලීම් සහ තාර්කික විකල්ප යෝජනා මේ වන තෙක් ආමන්ත්‍රණයට ලක් වී නොමැත.
පාසල්වල සුළු උත්සවවලට නැවත නැවත පැමිණීමටත්, සුළු ප්‍රචාරක උත්සවවලට සහභාගි වීමටත් කාලය ඇති ජනාධිපතිවරයා, ලාංකීය ඉතිහාසයේ විශාලතම වෘත්තීය සමිති සන්ධානය වන වෘත්තිකයන්ගේ වෘත්තීය සමිති එකමුතුව (PTUA) හමුවීමට දුන් පොරොන්දුව සහ කාලය වෙන් කිරීම තුන් වතාවක්ම පැහැර හැර තිබේ. අපේ විකල්ප සාකච්ඡා කිරීමට හෝ අපේ ස්ථාවරයට සවන් දීමටවත් ඔහු ඉදිරිපත් නො වූවේය. ඒ වෙනුවට ඔහුට අවශ්‍ය වන්නේ ඔහුට පෙර ජීවත් වූ බොකාසා සහ ඉඩි අමීන් මෙන් ඔහුගේ අවශ්‍යතා ආරක්ෂා කර ගැනීමටත්, ඔහුගේ ගජමිතුරන් සහ වාසි උදෙසා වෙහෙසෙන්නන් ආරක්ෂා කිරීමටත් ලැජ්ජා සහගත සහ ආත්මාර්ථකාමී නීති ක්‍රියාත්මක කිරීමටයි.
නින්දා සහගතයි ජනාධිපතිතුමනි!
තෙවනුව, අපගේ මෙම සාධාරණ ඉල්ලීම් ජාතික ප්‍රගමනය උදෙසා වහාම විසඳිය හැකි ඒවා බවත්, වහාම විසඳිය යුතු ඒවා බවත් අපි අවධාරණය කරමු. බදු ප්‍රතිසංස්කරණය පිළිබඳ ජාත්‍යන්තර මූල්‍ය අරමුදලේ යෝජනා වික්‍රමසිංහ රෙජීමය අභිබවා ගොස් ඇති බවක් පෙන්නුම් වේ.
මෙම බදු ප්‍රතිසංස්කරණ මර්දනකාරී රෙගුලාසි සමඟ සම්බන්ධ කිරීමටත්, ඒ ඔස්සේ විපක්ෂ මතධාරී ජනතාව මත යළිත් රාජ්‍ය භීෂණය පැටවීමටත් උත්සහ දරයි. මෙමගින් නිදහස් අධ්‍යාපනය සහ නිදහස් සෞඛ්‍යය විනාශ කරන නව ලිබරල්වාදී ආර්ථික ක්‍රමයක් ස්ථාවර කෙරෙනු ඇත. එය පෞද්ගලීකරණයේ නාමයෙන් අපගේ සියලු වත්කම් හා ඉඩම් කෑදර ව්‍යාපාරික අවශ්‍යතාවලට විකුණා, දේශීය ආදායම් හා ජීවනෝපාය විනාශ කර, තව දුරටත් මේ රටේ දුප්පතුන් සූරාකමින්, දිළිඳු කරමින්, දුලබ කිරීමට අඛණ්ඩව කටයුතු කරගෙන යයි. තත්ත්වය එසේ වුවත්, ජනතාව යා යුතු මාර්ගය මෙයද යන්න පිළිබඳව විවෘත මහජන සංවාදයක නැගී ඒමක් නම් නැත.
හතරවනුව, විශ්වවිද්‍යාල සහ පාසල් පද්ධතියට අවශ්‍ය මූලික සම්පත් පවා ඔහුගේ රජය විසින් රඳවා තබා ගනු ලබන වාතාවරණයක් තුළ උසස් පෙළ සිසුන් කෙරෙහි ජනාධිපතිවරයා දක්වන මෙම කුහක දෙබිඩි සැලකිල්ලෙහි යම් නොගැලපීමක් ඇති බව අපි පැහැදිලි කිරීමට කැමැත්තෙමු. වර්තමානයේ විශ්වවිද්‍යාල වෙතින් අපේක්ෂා කෙරෙන්නේ පවතින පුරප්පාඩු සඳහා පවා නව කාර්ය මණ්ඩල බඳවා නොගෙන පවත්වාගෙන යාමකි. මූලික සැපයුම් අත්හිටුවා ඇත. ශිෂ්‍ය පර්යේෂණාධාර සහ ශිෂ්‍ය ණය ලබා නොදෙයි.
නේවාසිකාගාර සහ ආපනශාලා පහසුකම් දුක් උපදවන තරම් අප්‍රමාණවත්ය. මූල්‍ය සහ වෙනත් බාධාවන් හේතුවෙන් සිසුන් සිය ගණනකට පාඨමාලා හැදෑරිය නොහැකි ව ඇත. ඉඩකඩ හා ද්‍රව්‍ය හිඟය නිසා ගුරුවරුන්ට ඉගැන්වීමට නොහැකිය. සිසුන් සහ ඔවුන්ගේ අධ්‍යාපනය ගැන රජය සැබවින්ම සැලකිලිමත් වූයේ නම් මෙම අර්බුදය සමනය කිරීමට තවත් බොහෝ දේ කිරීමට ඉඩ තිබුණු අතර, ඒ සඳහා ඇති එකම අවහිරය උසස් පෙළ උත්තර පත්‍ර ඇගයීම යැයි මවාපෑම් කළ යුතු නොවේ.
අවසාන වශයෙන්, FUTA නැවත අවධාරණය කරන්නේ ජනාධිපතිවරයාගේ තර්ජනය අසාර්ථක වීමෙන් පසුද, අපට හිරිහැර හෝ තර්ජනයක් නොවන බව පෙනී යෑමෙන් පසු ද, අපගේ ඉල්ලීම් සහ දුෂ්කරතාවන් පිළිබඳ සාකච්ඡාව, සම්මුඛ සාකච්ඡාවක මට්ටම දක්වා වැඩිදියුණු වන්නේ නම් ද, සිසුන්ගේ හෝ දෙමාපියන්ගේ දැඩි ඉල්ලීම්වලින් තොරවම විශ්වවිද්‍යාල ආචාර්ය සංගමය අ.පො.ස. උසස් උත්තර පත්‍ර පරීක්ෂා කිරීමේ ක්‍රියාවලියට ස්වේච්ඡාවෙන් ආපසු යාමට තීරණය කළ හැකි බවයි.
මේ රටේ ජනතාව විජයග්‍රහණය කරන තුරු අපි අපේ අරගලය කිසිදා අත් නොහරිමු. නමුත් අපි අපගේ වෘත්තීය ක්‍රියාමාර්ගයේ අවධානය සහ දිශානතිය වෙනස් කිරීමට ඉඩ ඇත. එසේ කරන්නේ, අපගේ සාමාජිකයින්ට සහ සමස්ත දේශයට අවැසි යුක්තිය සහ සාධාරණත්වය සඳහා අඛණ්ඩව සටන් කිරීමේදී මහජනයාගේ හිස මත බලෙන් පටවා ඇති බර ලිහිල් කිරීමට අවස්ථාව උදාවන බැවිනි. පෙර සහ වර්තමාන අරගලවලදී පොදු මහජනතාවගේ විශ්වාසය හා ගෞරවය දිනාගත් වගකිවයුතු වෘත්තීය සමිති සම්මේලනයක් වශයෙන් ජාතිය උදෙසා අප සතු භූමිකාව සහ වගකීම් කවරේ දැයි අපි දනිමු.
ජනාධිපතිවරයා සහ ඔහුගේ ආණ්ඩුව සාවද්‍ය තොරතුරු පැතිරීමෙන් සහ මුසා පැවසීමෙන් මේ උත්සහ දරන්නේ, මහජනයා උපායශීලීව රවටා, FUTA වැනි සංවිධාන සහ අනෙකුත් ප්‍රධාන වෘත්තීය සමිති නිහඬ කිරීමේ මාරාන්තික න්‍යාය පත්‍රයක් ක්‍රියාත්මක කිරීමට ජනයා යොමු කිරීමටයි. ශ්‍රී ලංකාවේ පුරවැසියන්ගේ මූලික අයිතිවාසිකම් සහ ජීවන තත්ත්වය ආරක්ෂා කිරීම සඳහා වන අපගේ අරගලය අපි කිසි විටෙකත් අත් නොහරිමු. අපගේ සාමාජිකයන් වෙනුවෙන් අප ගන්නා සෑම ක්‍රියාමාර්ගයකදීම, ආගම, සංස්කෘතිය, ස්ථානය, ස්ත්‍රී-පුරුෂභාවය, වයස් භේදය, මතවාද, භාෂාව හෝ වෙන යම් විෂමතාවක් හෝ නොසළකා මේ රටේ සියලුම පුරවැසියන්ට වඩාත් යහපත් වූ යහපතක් උදාකරලීමේ අරමුණෙන් අප කිසිවිටෙකත් බැහැර නො වන බව අවධාරණය කිරීමට මෙය අවස්ථාවක් කර ගනිමු.
ලේකම්
විශ්වවිද්‍යාල ආචාර්යවරුන්ගේ සමිති සම්මේලනය
ජැක්සන් මැරෙන්නෙ නෑ… මෙන්න සාක්ෂි – සුරාජ් ගෝවින්න…TALK WITH SUDHATHTHA (23.04.2023)
+
ජපානයේ ගොවිපොළවල් සඳහා ග්‍රමිකයින් බඳවා ගැනේ
(23.04.2023 – 22:28 +0530 – hirunews.lk/sinhala)
ජපානයේ ගොවිපොළවල් සඳහා ශ්‍රී ලංකාවෙන්, දකුණු ආසියාවෙන් සහ අග්නිදිග ආසියාවේ වෙනත් රටවලින් කම්කරුවන් බඳවා ගැනීමට නියමිතයි.
ජපානයේ විශාලතම තාවකාලික කාර්ය මණ්ඩල සමාගමක් වන ‘පර්සෝල් හෝල්ඩින්ග්ස්’, අස්වැන්න නෙලීම වැනි සෘතුමය රැකියා සඳහා විදේශීය ශ්‍රමිකයින් ගොවිපොළ වෙත යැවීමේ සේවාවක් මාර්තු මාසයේ දී දියත්කර තිබෙනවා.
කෘෂිකාර්මික පාසල් වැනි ස්ථානවල අධ්‍යාපනය ලබා ඇති ඉන්දුනීසියාව සහ අනෙකුත් අග්නිදිග ආසියාතික රටවල කම්කරුවන් සඳහා මෙම අවස්ථාව හිමිවන බව සඳහන්.
‘පර්සෝල් හෝල්ඩින්ග්ස්’ සමාගමේ විධායක නිලධාරී මොරිහිරෝ ටාඩා පැවසුවේ,
“අඛණ්ඩව පහත වැටෙන දේශීය ජනගහනයකින් පමණක් ප්‍රමාණවත් ගොවි කම්කරුවන් සුරක්ෂිත කිරීම අපේ රටට අපහසු වනු ඇත. අපගේ ජීවිතයට අත්‍යවශ්‍ය කෘෂිකර්මාන්තය පවත්වා ගැනීම සඳහා අපි සම්පූර්ණයෙන්ම නව ප්‍රවේශයක් ගත යුතුයි.” යන්නයි.
ඉන්දුනීසියාව, අග්නිදිග ආසියාව මෙන් ම ඉන්දියාව, නේපාලය සහ ශ්‍රී ලංකාව වැනි දකුණු ආසියාතික රටවල ශ්‍රමිකයින් බඳවා ගැනීමට මෙම සමාගම බලාපොරොත්තු වන බවයි වැඩිදුරටත් සඳහන් වන්නේ ෴
ඇමැතිව නොතැකූ අතිරේක ලේකම් අත්‍යවශ්‍ය එන්නතක් මාස 4 ක් පමා කරලා
(24.04.2023 – 02:00 +0530 – mawbima.lk)
රජයේ රෝහල්වල වැඩිපුරම භාවිතයට ගන්නා ප්‍රතිජීවක එන්නතක් මිලදී ගැනීමේ ක්‍රියාවලිය මාස හතරක් (4) තිස්සේ පමා කළ සෞඛ්‍ය අමාත්‍යාංශයේ අතිරේක ලේකම්වරයකුගේ ක්‍රියා කලාපය සෞඛ්‍ය ඇමැති කෙහෙලිය රඹුක්වැල්ල මැදිහත් වී නතර කොට තිබේ.
Cefuroxime Ijcetion 750 mg නමැති එන්නත මිලදී ගැනීම සඳහා කැඳවා තිබූ ටෙන්ඩරය ජාතික ඖෂධ නියාමන අධිකාරියේ ලියාපදිංචි සමාගමකට ලබාදීමට තාක්ෂණික කමිටුව මඟින් නිර්දේශ කර තිබියදී මිල ගණන් ඉදිරිපත් කර තිබූ ලියාපදිංචිය 2019 නොවැම්බර් 30 වැනි දින අවසන්ව ඇති බව හා නැවත එම ඖෂධය සඳහා ලියාපදිංචියට අවසර ලබා නොගත් සමාගමට ලබාදීමට ඉහත සඳහන් අතිරේක ලේකම්වරයා ඉතා සූක්ෂ්ම ලෙස කටයුතු කර තිබී ඇත.
ලියාපදිංචිය නැවත ලබා ගෙන නැති මෙම සමාගම මීට පෙර සපයනු ලැබූ එම ඖෂධයෙහි කාණ්ඩ තුනක් (3) මේ වන විට තත්ත්වයෙන් අසමත්ව ඇති බව ජාතික ඖෂධ නියාමන අධිකාරිය විසින් 2023 පෙබරවාරි 18 වැනි දින සෞඛ්‍ය ලේකම්වරයාට දැනුම් දී තිබිණි.
නමුත් සෞඛ්‍ය අමාත්‍යාංශය මඟින් ප්‍රසම්පාදන මණ්ඩලය වෙත 2023.04.10 වැනි දින ඉදිරිපත් කරන ලද නිරීක්ෂණයන්හි එකී කාරණාව සම්බන්ධව අදාළ අතිරේක ලේකම්වරයා විසින් කිසිදු සඳහනක් නොකිරීම නිසා ප්‍රසම්පාදන අභියාචන මණ්ඩලය මඟින් නිර්දේශය ලබාදීමේදී මෙම සමාගම් දෙකම (2) සම තත්ත්වයේ ඇති සමාගම් වශයෙන් නිරීක්ෂණය කොට ඇත.
ප්‍රතිජීවක ඖෂධ ප්‍රසම්පාදනයේදී මිලෙන් අඩු ගුණාත්මක භාවයෙන් අඩු ඖෂධයක් ලබාදෙනවාට වඩා නිවැරදි ගුණාත්මකභාවය සහිත ඖෂධයක් ලබාදීමේ වැදගත්කම විශේෂඥ වෛද්‍යවරුන් විසින් නිරන්තරයෙන් පෙන්වා දෙන කාරණයකි.
එසේ නොවුණහොත් කාලයක් සමඟ රෝගීන්ගේ ශරීරය තුළ ප්‍රතිජීවක ප්‍රතිරෝධය (Antibiolie Resistance) ඇති වී සංකීර්ණ තත්ත්වයක් අනාගතයේ උදා වීමට ඉඩ ඇති බව ඔවුහු පෙන්වා දෙති.
ගුණාත්මකභාවයක් සහිත අත්‍යවශ්‍ය ඖෂධ කඩිනමින් රට තුළට සැපයීම සඳහා සෞඛ්‍ය අමාත්‍යාංශයට ඇති කාර්යභාරය ඉමහති. නමුත් මෙවැනි උසස් නිලධාරීන් නිවැරදි කරුණු වසන් කරමින් තොරතුරු සැපයීමෙන් එහි බලපෑම වක්‍රාකාරව රෝගී ජනතාව වෙත එල්ල වීම වැළැක්විය නොහැකිය. ඉහත සඳහන් ඖෂධය මාස හතරක (4) පමණ කාලයක් තිස්සේ රජයේ රෝහල් පද්ධතිය තුළ තොග රහිත තත්ත්වය පැවැතීම මඟින් රෝගීන්ට වැඩි මුදලක් ගෙවා එම ඖෂධය මිලදී ගන්නට සිදුව තිබේ. මේ වන විට එම ඖෂධ එනම් එන්නත් කුප්පියක පෞද්ගලික ෆාමසියක මිල වන්නේ රුපියල් 850 කි.
ඉහත කී අතිරේක ලේකම්වරයාගේ ක්‍රියාකලාපය නිසා අදාළ මිලදී ගැනීම ප්‍රසම්පාදන කමිටුව වෙත ඉදිරිපත් කිරීමට ප්‍රමාද වීමත් ජනාධිපති ප්‍රසම්පාදන අභියාචන මණ්ඩලය (PAB) වෙත වැරදි තොරතුරු සැපයීමත් නිසා නිවැරදි තීන්දු තීරණ ගෙන ප්‍රසම්පාදනය කඩිනම් කර අදාළ ඖෂධය සැපැයුම් කර ගැනීමට තිබූ ඉඩකඩ මේ වන විට ඇහිරී ගොස් තිබේ.
ජාතික ඖෂධ නියාමන අධිකාරියේ මේ වන විට ලියාපදිංචි කර නොමැති මෙන්ම කලින් සැපයුම් කර ඇති මෙම ඖෂධයේම කාණ්ඩ තුනක් (3) ජාතික ඖෂධ තත්ත්ව පාලන රසායනාගාරය තුළ කරන ලද පරීක්ෂණවලදී අසමත් වූ ඖෂධයක් මිලදී ගැනීම සඳහා එකී ප්‍රසම්පාදන අභියාචනා මණ්ඩලයේ නිර්දේශය ලබාදී ඇත.
මේ තත්ත්වය ගැන සෞඛ්‍ය අමාත්‍යවරයාගෙන් ‘මව්බිම’ විමසූවිට කීවේ මේ තොරතුරු සත්‍ය බවයි.
මේ තත්ත්වය ගැන තමාට වාර්තාවක් ලබාදෙන ලෙස පසුගිය සිකුරාදා අමාත්‍යාංශ ලේකම්වරයාට දැනුම් දුන් බවත්, මෙම ඖෂධය මිලදී ගැනීම ප්‍රමාදවීම ගැන අදාළ ලේකම්වරයාගෙන් තමා කරුණු විමසූ බවත් ජනාධිපති ප්‍රසම්පාදන මණ්ඩලයට යැවූ වාර්තාවට මෙතෙක් පිළිතුරක් නැති බව ඔහු දැනුම් දීම නිසා තමා මේ සම්බන්ධව ජනාධිපති ලේකම්වරයාට දුරකථනයෙන් කතා කොට දැනුම් දුන් බවත් කීය.
මේ අතරතුර තමා සිකුරාදා අමාත්‍යාංශ කාර්යාලයට යන විට අදාළ ලේකම්වරයා එහි පැමිණ ජනාධිපති ප්‍රසම්පාදන මණ්ඩලයෙන් පිළිතුරු එවා තිබෙන බව දැනුම් දුන් බවත් කීය.
කෙසේ වෙතත් එම වාර්තාව ලබාගත් තමා අදාළ ඖෂධය වහාම ගෙන්වීමට කටයුතු කරන ලෙස සිකුරාදාම අදාළ අංශවලට නියෝගයක් දුන් බව ඇමැති රඹුක්වැල්ල මහතා ‘මව්බිම’ට කීය. ඔහු කීවේ ගෙන්වීම ප්‍රමාද කර ඇති මෙම එන්නත් කුප්පි 1,60,000 ක් පමණ මසකට පාවිච්චි කරන බවත්ය ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴