කලාඔය බස් රථයේ සිරවී සිටි පිරිස බේරා ගැනීමට ත්‍රිවිධ හමුදා මෙහෙයුමක්
කලාඔය බස් රථයේ සිරවී සිටි පිරිස බේරා ගැනීමට ත්‍රිවිධ හමුදා මෙහෙයුමක්
(29.11.2025 – 00:59 +0530 – sinhala.adaderana.lk)
පුත්තලම සහ අනුරාධපුර මාර්ගයේ කලාඔය ආශ්‍රිතව බස් රථයක සිරවී සිටියදී අසල තිබූ නිවසක වහලයක් මත රඳවා සිටින මගීන් බේරා ගැනීම සඳහා ත්‍රිවිධ හමුදාව සහ පොලීසිය එක්ව මෙහෙයුමක් ආරම්භ කර ඇතැයි නාවික හමුදාපති වයිස් අද්මිරාල් කාංචන බානගොඩ මහතා පවසයි.
මාධ්‍ය වෙත අදහස් දක්වමින් ඒ මහතා සඳහන් කර සිටියේ පළමුව නාවික හමුදාවේ සහන කණ්ඩායමක් යොදවා ගලවා ගැනීමේ උත්සාහයක නිරත වූ බවත් එය අසාර්ථක වූයේ පැවැති කාලගුණය සහ සැඩ පහර නිසාවෙන් බවය.
කෙසේ වෙතත් මේ වන විට නාවික හමුදාවේ ක්‍රියාකාරි යාත්‍රා බලගනය, ශ්‍රී ලංකා නාවික කිමිදුම් අංශය, විශේෂ යාත්‍රා බලගනය ආදීයෙන් සැදුම් ලත් අතිරේක භට පිරිස් මෙම මුදවා ගැනීම් සඳහා යොමුවෙමින් පවතින බවත් නාවික හමුදාපතිවරයා සඳහන් කළේය ෴
+++
තව පැය කිහිපයකින් කොළඹට මහ ගංවතුර අවදානමක් | වහා ඉවත්වන්න! (29.11.2025 04:00 +0530)
+++
Water Levels of Kelani Ganga as at 2025-11-29 04:30 +0530
+++
මුලතිව්වලට මි.මී. 271 ක වාර්තාගත වැසි : කෑගල්ලට සහ කටුනායකටත් ධාරානිපාත වැසි
(29.11.2025 – hirunews.lk)
කාලගුණ විද්‍යා දෙපාර්තමේන්තුවේ ස්වභාවික විපත් පිළිබඳ පූර්ව අනතුරු ඇඟවීමේ මධ්‍යස්ථානය විසින් ‘දිට්වා’ (Ditwah) සුළි කුණාටුව සම්බන්ධයෙන් නොවැම්බර් 28 වන දින රාත්‍රී 11:00 ට නිකුත් කරන ලද රතු නිවේදනය අනුව ඊයේ (28) දිනය තුළ වැඩිම වර්ෂාපතනය මුලතිව් ප්‍රදේශයෙන් වාර්තා වී තිබෙනවා.
ඒ අනුව, ඊයේ (28) දින උදෑසන 08:30 සිට රාත්‍රී 11:00 දක්වා මුලතිව්, පුලියම් පොක්කනයි ප්‍රදේශයෙන් මිලි මීටර් 271.0 ක වර්ෂාපතනයක් ලැබී ඇති අතර, කෑගල්ල දුනුමාලේ වත්ත ප්‍රදේශයට මිලි මීටර් 178.5 ක වර්ෂාපතනයක්ද, ගම්පහ කටුනායකට මි.මී. 176.4 ක් වර්ෂාපතනයක් ද ලැබී තිබෙනවා.
මෙහිදී ඉදිරි පැය කිහිපය තුළ උතුරු, උතුරු-මැද, මධ්‍යම සහ වයඹ පළාත්වල සහ ත්‍රිකුණාමලය දිස්ත්‍රික්කයේ ඇතැම් ස්ථානවලට මි.මී. 200 ට වැඩි ඉතා තද වැසි ඇති විය හැකි බවයි එම නිවේදනයේ සඳහන් වන්නේ.
එමෙන්ම, සබරගමුව සහ බස්නාහිර පළාත්වල සහ ගාල්ල හා මාතර දිස්ත්‍රික්කවල ඇතැම් ස්ථාන වලට මි.මී. 150 ට වැඩි ඉතා තද වැසි ඇති විය හැකි බවත් එම නිවේදනයේ සඳහන්.
දිවයිනේ බොහෝ ප්‍රදේශවල පැ.කි.මී. 60-70 දක්වා වන ඉතා තද සුළං සහ විටින් විට පැ.කි.මී. 80-90 දක්වා වන ප්‍රහාරාත්මක සුළංද ඇති විය හැකි බවයි එම නිවේදනයේ සඳහන් වන්නේ ෴
කොළඹ වරායේ සියලුම පර්යන්තයන්හි වැඩකටයුතු තාවකාලිකව අත්හිටුවීමට පියවර ගෙන ඇති බව ශ්‍රී ලංකා වරාය අධිකාරිය පවසනවා. ඒ පවතින අධික වැසි සහ සුළං තත්ත්වය හේතුවෙන් ෴
අද (28) සිට ක්‍රියාත්මක වන පරිදි සියලු සෞඛ්‍ය සේවකයින් ගේ නිවාඩු අවලංගු කර ඇති බව සෞඛ්‍ය අමාත්‍යාංශය නිවේදනය කරනවා.
ඒ අනුව එම නිවාඩු අවලංගු කිරීම නැවත දැනුම් දෙනතුරු ක්‍රියාත්මක බවයි එම නිවේදනයේ සඳහන්.
එහිදී, සියලු රෝහල් අධ්‍යක්ෂවරු හා ආයතන ප්‍රධානීන් රෝගී සත්කාර සේවා අඛන්ඩව පැය 24 පුරා ක්‍රියාත්මක කළ හැකි වන පරිදි රෝහල් කාර්ය මණ්ඩලය සේවයට කැඳවීම සඳහා වැඩපිළිවෙලක් සකස් කළ යුතු බව එම අමාත්‍යංශය අදාල බලධාරීන් වෙත දැනුම් දෙනු ලබනවා ෴
+++
ගංවතුරින් ජල සම්පාදන මණ්ඩලයේ ජල මූලාශ සහ පිරිපහදු ස්ථාන රැසක් ජලයෙන් යටවෙයි
(29.11.2025 – 00:14 +0530 – sinhala.adaderana.lk)
පවතින ගංවතුර තත්ත්වය හේතුවෙන් ජාතික ජල සම්පාදන මණ්ඩලය සතුව ඇති ජල මූලාශ සහ ජල පිරිපහදු මධ්‍යස්ථාන රැසක් ජලයෙන් යටවී ඇතැයි ජාතික ජල සම්පාදන හා ජලාපවහන මණ්ඩලය පවසයි.
එම මණ්ඩලයේ සභාපති චන්දන බණ්ඩාර මහතා පැවසුවේ ජල මූලාශ ගංවතුරින් යටවීම හේතුවෙන් එහි පොම්ප ක්‍රියාත්මක කිරීමටද මේ වන විට නොහැකි වී ඇති බවය.
එමෙන්ම බොහෝ ස්ථානවල ඇති ජලය පිරිපහදු කිරීමේ මධ්‍යස්ථානද ජලයෙන් යටවී ඇතැයිද මේ හේතුවෙන් ජල පොම්පාගාර සහ ජලය පවිත්‍ර කිරීමේ පවිත්‍රාගාරද නිසියාකාරව ක්‍රියාත්මක කිරීමට නොහැකි වී ඇතැයිද ඒ මහතා පැවසීය.
මහනුවර දිස්ත්‍රික්කයේ ජල පොම්පාගාර සහ ජල පිරිපහදු කිරීමේ මධ්‍යස්ථාන සම්පූර්ණයෙන් ජලයෙන් යටවී ඇතැයිද මෙය යථා තත්ත්වයට පත් කර ගැනීමට යම් කාලයක් ගත වනු ඇතැයිද පැවසූ සභාපතිවරයා සඳහන් කළේ මීට අමතරව කෑගල්ල, මාවනැල්ල, ප්‍රදේශවලද ජල සැපයුමට මේ වන විට බාධා මතුව ඇති බවය.
මීට අමතරව උතුරු මැද පළාත, සබරගමුව, ඌව, ප්‍රදේශවල පිහිටි ජල පොම්පාගාර මේ වන විට සම්පූර්ණයෙන්ම ජලයෙන් යටවී ඇතැයිද සභාපතිවරයා සඳහන් කළේය.
කෙසේ නමුත් බස්නාහිර පළාත තුළ ජල සැපයුමට මෙතෙක් බාධාවක් මතු වී නැතත් වාරිමාර්ග දෙපාර්තමේන්තුව සහ අනෙකුත් ආපදා කළමණාකරණ මධ්‍යස්ථාන විසින් කැලණි ගඟේ ජල මට්ටම ඉහළ නගිමින් පවතින බවට අනතුරු අඟවා ඇතැයිද යම් හෙයකින් අඩි 7 කින් කැලණි ගඟේ ජල මට්ටම ඉහළ ගියහොත් අඹතලේ ජල පවිත්‍රාගාරය නිසියාකාරව ක්‍රියාත්මක කිරීමේ ගැටළු මතුවන බවත් ඒ මහතා සඳහන් කළේය.
එසේ වුවහොත් කොළඹ නගරයට ජලය සැපයීමේ බාධාවන් මතුවන බවත් කෙසේ හෝ මෙම තත්ත්වය මැඩපවත්වා ගැනීම සඳහා උත්සාහ කරන බවත් සභාපතිවරයා වැඩිදුරටත් අදහස් දක්වමින් පැවසීය.
+++
ශ්‍රී ලාංකික දිනයට වෙන්කළ කෝටි ගණනක මුදල ගංවතුරෙන් අවතැන් වූ ජනතාවට දෙන්න | #සුහාරා #VoxVeritas #lka (28.11.2025)
+++
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴