රු. ලක්ෂ 12 ක අල්ලසක් ගත් ගොවිජන සේවා නිෂ්පාදන සහකාරයෙකු අත්අඩංගුවට
රු. ලක්ෂ 12 ක අල්ලසක් ගත් ගොවිජන සේවා නිෂ්පාදන සහකාරයෙකු අත්අඩංගුවට
(17.10.2025 – hirunews.lk)
වගා ඉඩමකට අක්කර බදු ගෙවූ බවට කුවිතාන්සියක් ලබාදී අවශ්‍ය කටයුතු කිරීම සඳහා අල්ලස් වශයෙන් රුපියල් ලක්ෂ 35 ක මුදලක් ඉල්ලා ඉන් රුපියල් ලක්ෂ 12 ක් ලබාගත් බව කියන සිද්ධියකට අදාලව දියළුම ගොවිජන සේවා මධ්‍යස්ථානයේ කෘෂිකර්ම පර්යේෂණ හා නිෂ්පාදන සහකාරවරයෙකු අල්ලස් කොමිසම විසින් ඊයේ (16) අත්අඩංගුවට ගනු ලැබ තිබෙනවා.
මෙම සැකකරු රුපියල් ලක්ෂ 10 ක මුදලක් මින් පෙරදීද පැමිණිලිකරුගෙන් ලබාගෙන ඇතැයි ද අල්ලස් කොමිසම සඳහන් කරනවා.
සැකකරු අත්අඩංගුවට ගෙන ඇත්තේ තණමල්විල – වැල්ලවාය ප්‍රධාන මාර්ගයේ ඇතිලිවැව නගරයේ අවන්හලක් තුළ දී බවද අල්ලස් කොමිසම පවසනවා.
මහව ප්‍රදේශයේ පුද්ගලයකු විසින් සිදු කරන ලද පැමිණිල්ලකට අනුව මෙහි විමර්ශනය ආරම්භ කළ බවද අල්ලස් කොමිසම පවසනවා.
අනවසරයෙන් අල්ලාගෙන වගා කටයුතු සිදු කරන ලද අක්කර 20 ක පමණ ප්‍රමාණයක රජයේ ඉඩමකින් අක්කර 12 ක පමණ ප්‍රමාණයක් පැමිණිලිකරු වෙත වගා කටයුතු සිදු කිරීම සඳහා එම ඉඩමට පැමිණිලිකරු මඟින් අක්කර බදු ගෙවූ බවට කුවිතාන්සියක් ලබා දී ඒ සඳහා අවශය කටයුතු සිදු කර දීමට මුලින් රු. ලක්ෂ 35 ක මුදලක් ඉල්ලා එයින් පසුව රු. ලක්ෂ 10 ක මුදලක් ලබාගැනීම සහ ඉතිරි රු. ලක්ෂ 25 ක මුදලින් රු.1,200,000 ක (රුපියල් ලක්ෂ දොළහක) මුදලක් අල්ලස් වශයෙන් ඉල්ලා ලබාගැනීමේ චෝදනාව මත සැකකරු අත්අඩංගුවට ගෙන තිබෙනවා.
අත්අඩංගුවට ගන්නා ලද සැකකරු වැල්ලවාය ප්‍රධාන මහේස්ත්‍රාත් අධිකරණයට ඉදිරිපත් කිරීමට නියමිතයි ෴
මෙරට පාස්පෝට් හිමියන්ටත් කටුනායකදී ඊ-ගේට්ස් පහසුකම්
(17.10.2025 – hirunews.lk)
කටුනායක බණ්ඩාරනායක ජාත්‍යන්තර ගුවන් තොටුපොළ (BIA) විසින් ශ්‍රී ලංකා ගුවන් ගමන් බලපත්‍ර හිමියන් සඳහාම සුවිශේෂී ලෙස ස්වයංක්‍රීය දේශසීමා පාලන (ABC) ඊ-ගේට්ස් (e-Gates) හඳුන්වා දී තිබෙනවා.
මෙම නවීන තාක්ෂණය මගින් මගීන්ට වඩාත් වේගවත් සහ ආරක්ෂිත ආගමන විගමන නිෂ්කාශන අත්දැකීමක් ලබා දෙනු ඇති බවයි ඔවුන් සඳහන් කරන්නේ.
මෙය ශ්‍රී ලංකාවේ සුහුරු සංචාරණ සහ ඩිජිටල් දේශසීමා කළමනාකරණය කරා යන ගමනේ වැදගත් සන්ධිස්ථානයක් සනිටුහන් කරනු ලබනවා.
ඒ අනුව, මෙම නව පහසුකම භාවිත කිරීමට සුදුසුකම් ලබන සංචාරකයින්ට පූර්ව ලියාපදිංචි වීමෙන් පහත සරල පියවර තුන අනුගමනය කරමින් බාධාවකින් තොරව ගමන් කළ හැකියි.
- පියවර 01 – එක් වරක් ලියාපදිංචි වීම (One-time registration)
- පියවර 02 – අවශ්‍ය ජෛවමිතික දත්ත ලබා දීම (Obtain required biometrics)
- පියවර 03 – ඊ-ගේට්ස් හරහා ඔබේ සුහුරු ගමන ආරම්භ කරන්න (Start your smart travel through e-gates)
මෙමගින් ආගමන කවුන්ටරවල රැඳී සිටින කාලය අවම කර, ගමන් කටයුතු වඩාත් කාර්යක්ෂම කරනු ඇති ෴
මහපොළ ශිෂ්‍යත්ව අයදුම්පත් භාර ගැනීමේ අවසන් දිනය දීර්ඝ කෙරේ
(17.10.2025 – hirunews.lk)
2024 – 2025 අධ්‍යයන වර්ෂය සඳහා සාමාන්‍ය ප්‍රවේශය යටතේ විශ්වවිද්‍යාලවලට සුදුසුකම් ලැබූ සිසුන්ගේ මහපොළ ශිෂ්‍යාධාර අයදුම්පත් භාර ගැනීමේ කාලය දීර්ඝ කර තිබෙනවා.
ඒ අනුව ලබන 31 වැනිදා දක්වා අයදුම් කිරීමට හැකියාව පවතින බවයි විශ්වවිද්‍යාල ප්‍රතිපාදන කොමිෂන් සභාව සඳහන් කළේ.
මීට පෙර ඒ සදහා ලබා දී තිබූ කාලය ලබන සදුදායින් (20) අවසන් වීමට නියමිතව තිබුණා ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴