හිටපු නාවික හමුදාපති නිශාන්ත උළුගේතැන්න මහතාට ඇප දුන් අධිකරණයෙන් සී.අයි.ඩීයට දොස්
හිටපු නාවික හමුදාපති නිශාන්ත උළුගේතැන්න මහතාට ඇප දුන් අධිකරණයෙන් සී.අයි.ඩීයට දොස්
(14.10.2025 – lankadeepa.lk)
රක්ෂිත බන්ධනාගාර ගතකර සිටින හිටපු නාවික හමුදාපති නිශාන්ත උළුගේතැන්න මහතා අත්අඩංගුවට ගැනීමේ දී අපරාධ පරීක්ෂණ දෙපාර්තමේන්තුව කටයුතු කර ඇති ආකාරය දැඩිව විවේචනය කරමින් ඔහු ඇප මත මුදාහරින ලෙස කුරුණෑගල මහාධිකරණ විනිසුරු ටිකිරි ජයතිලක මහතා අද (14) නියෝග කළේය.
සාක්ෂි නොමැති අවස්ථාවකදී සැකකරුවකුට එරෙහිව කටයුතු කළ යුතු ආකාරය පිළිබඳ අපරාධ නඩුවිධාන සංග්‍රහයේ පැහැදිළිව දක්වා තිබෙන බවත්, එහි 116 වගන්තිය අනුව කටයුතු කළ යුතු බව ඇප නියෝගය ප්‍රකාශයට පත්කරමින් මහාධිකරණ විනිසුරුවරයා පවසා සිටියේය .
තවද, අපරාධ පරීක්ෂණ දෙපාර්තමේන්තුව මෙහි දී කටයුතු කර ඇති ආකාරයේ දෝෂ පෙන්වා දුන් විනිසුරුවරයා පැවසූවේ විමර්ෂන අංශයක ස්ථානාධිපති වැනි ජ්‍යෙෂ්ඨ තනතුරකට පත්කරන්නේ වසර 20 කට වැඩි පළපුරුද්දක් ඇති නිලධාරීන්, එසේ පත්කිරීම් සිදුකිරීමෙන් බලාපොරාත්තු වෙන්නේ එම විමර්ශන නීත්‍යනුකූල තත්වයන් තුළ සිදු කළ යුතුයි. සැකකරු සම්බන්ධයෙන් සාක්ෂි නොමැති අවස්ථාවක කටයුතු කළ යුතු ආකාරය සම්බන්ධයෙන් පැහැදිළිව නඩු තීන්දු ගණනාවක් තිබෙනවා, මෙම නඩුවේදී ද එලෙස කටයුතු කළ යුතුව තිබුණු බව ද මහේස්ත්‍රාත්වරයා අපරාධ පරීක්ෂණ දෙපාර්තමේන්තුව හමුවේ දන්වා සිටියේය.
ඒ අනුව සැකකරුට විරුද්ධව නඩුවක් පවත්වාගෙන යෑමට ප්‍රමාණවත් සාක්ෂි නොමැති බවට මහාධිකරණයට නිරීක්ෂණය වන බව සඳහන් කරමින් සැකකරු ඇප මත මුදාහරින ලෙස විනිසුරුවරයා නියෝග කළේය ෴
+++
+++
+++
මානෙල් මල නුඹ … උළුගේතැන්න ඇතුළු සියලුම රණවිරුවන්ට උත්තමාචාරය !
+
තංගල්ල මුහුදෙන් හමුවූ මත්ද්‍රව්‍යවල බර කිලෝ 1250 ක් – මෑත කාලයේදී හමුවූ උපරිම මත්ද්‍රව්‍ය තොගය මෙයයි
(14.10.2025 – hirunews.lk)
තංගල්ල රැකව මුහුදු තීරයට එහා නාවික සැතපුම් පහක් (5) පමණ ඈත මුහුදේ පාවෙමින් තිබූ මත්ද්‍රව්‍ය අඩංගු මලු රැගත් නාවික හමුදාවේ මුර සංචාරක යාත්‍රා තුනක් අද (14) රාත්‍රි 07 ට පමණ තංගල්ල ධීවර වරායට පැමිණියා.
මුර සංචාරයේ යෙදුණු තංගල්ල නාවික හමුදා කඳවුරේ මුර සංචාරක යාත්‍රාවක සිටි නිළධාරින් පිරිසක් මුහුදේ පාවෙමින් තිබූ සැක කටයුතු සුදු පැහැති මල්ලක් දැක තිබුණා.
එය නාවික යාත්‍රාවට ගෙන විමසිලිමත් වීමේදී එතුළ තිබූ පෙට්ටිවල මත්ද්‍රව්‍ය අසුරා ඇති බව එම නිලධාරින් දැක තිබුණා.
පසුව සිය උසස් නිළධාරින් දැනුවත් කළ එම නාවිකයින් තවත් මුර සංචාරක යාත්‍රා දෙකක් කැඳවා මුහුදේ සෝදිසි මෙහෙයුමක් ක්‍රියාත්මක කරනු ලැබුවා.
ඒ අනුව මුහුදේ පාවෙමින් තිබූ මත්ද්‍රව්‍ය අඩංගු මලු 51 ක් නාවික හමුදා නිළධාරින් විසින් සොයාගනු ලැබ තිබුණා.
ඒ අතර තිබී හෙරොයින් අඩංගු මලු 03 ක් සහ අයිස් මත්ද්‍රව්‍ය අඩංගු මලු 48 ක් සොයාගත් බව නාවික හමුදාව පැවසුවා.
එහි මත්ද්‍රව්‍ය කිලෝ 1250 ක් පමණ ඇතැයි පැවසේ.
එය මෑත කාලයේදී මුහුදෙන් සොයාගත් වැඩිම මත්ද්‍රව්‍ය ප්‍රමාණය වන බව ද වාර්තා වෙයි.
මත්ද්‍රව්‍ය අඩංගු මලු ගොඩට ගෙන බර කිරා ඒවා මත්ද්‍රව්‍ය නිවාරණ කාර්යාංශයට බාර දෙන බව නාවික හමුදාව පැවසුවා.
මෙම සිදුවීම නිරීක්ෂණය කිරීම සඳහා නාවික හමුදාපති වයිස් අද්මිරාල් කාංචන බානගොඩද රාත්‍රියේ දි තංගල්ල ධීවර වරායට පැමිණ සිටියා.
එසේම, මත්ද්‍රව්‍ය නිවාරණ කාර්යාංශයේ නියෝජ්‍ය පොලිස්පති අශෝක ධර්මසිංහ මත්ද්‍රව්‍ය භාරගැනීම අධීක්ෂණ කිරීමට පැමිණ සිටියා.
පොලිස් නිළධාරියකු පැවසුවේ ඒවා අසුරා තිබූ පෙට්ටි සහ පාවෙමින් තිබූ මත්ද්‍රව්‍ය පෙට්ටි සීනිමෝදර ප්‍රදේශයේ ලොරි තුනක (3) තිබී හසුවූ මත්ද්‍රව්‍ය අසුරා තිබූ පෙට්ටි එක හා සමාන බවයි ෴
+++
+
නේපාලයේදී ඉන්දියානු කතක් ලෙස පෙනීසිටි’ඉෂාරා සෙව්වන්දි’ සමඟ නේපාලයේදී අත්අඩංගුවට ගත් පස්දෙනා (5) ගේ නම් ගම් හෙළිවෙයි
(15.10.2025 – hirunews.lk)
සංවිධානාත්මක අපරාධ කල්ලි නායකයකු වූ ‘සංජීව කුමාර සමරරත්න’ හෙවත් ‘ගනේමුල්ල සංජීව’ ඝාතනයට සම්බන්ධ ප්‍රධාන සැකකාරිය වන ‘ඉෂාරා සෙව්වන්දි’ ඇතුළුව නේපාලයේදී අත්අඩංගුවට ගැනුණු සැකකරුවන් 6 දෙනාගේ නම් එරට මාධ්‍ය වාර්තා හෙළිකර තිබෙනවා.
මෙරට පාතාල කණ්ඩායම් හා සම්බන්ධ පුද්ගලයන් හයදෙනෙකු (6) නේපාලයේදී මෙලෙස අත්අඩංගුවට පත් වූ අතර, ‘වීරසිංහ පිනිපුර දේවගේ ඉෂාරා සෙව්වන්දි’ සමඟින් ‘ජීවදාසන් කනකරාසා’, ‘තක්ෂි නන්දකුමාර’, ‘දිනේෂ් ශ්‍යාමන්ත ද සිල්වා කළුදාර’, ‘කෙනඩි බස්තියම්පිල්ලෙයි’ හෙවත් ‘J.K. බායි’ සහ ‘වික්‍රම ආරච්චිගේ දිනේෂ් නිශාන්ත කුමාර’ ද වන බවයි ‘නේපාලයේ කත්මණ්ඩු පෝස්ට්’ මාධ්‍ය වාර්තා කළේ.
සැකකරුවන් පිළිබඳ ජාත්‍යන්තර පොලීසිය හෙවත් ‘ඉන්ටර්පෝල්’ වෙතින් රතු නිවේදනයක් නිකුත් කර ඇති අතර, එමගින් අපරාධ සඳහා අවශ්‍ය පුද්ගලයින් සොයාගන්නා ලෙස සාමාජික රටවලට අනතුරු අඟවා තිබුණා.
මෙම ඉල්ලීම කරනු ලබන රටේ තානාපති කාර්යාලය ද එවැනි අවස්ථාවන්ට සම්බන්ධවීම එහි පිළිගත් ක්‍රමවේදය බවද දැක්වෙනවා.
කත්මණ්ඩු හි ශ්‍රී ලංකා තානාපති කාර්යාලය මෙම සිද්ධිය සම්බන්ධයෙන් විශේෂ අවධානයක් යොමුකර ඇති බවත් මෙම මෙහෙයුම සිදුකරන ලද්දේ නේපාල පොලිස් මූලස්ථානයේ ඉන්ටර්පෝල් ජාතික මධ්‍යම කාර්යාංශයේ කණ්ඩායමක් විසින් බවත් එරට පොලිසිය උපුටා දක්වමින් අදාළ වාර්තාව සඳහන් කළා.
‘ගනේමුල්ල සංජීව’ ඝාතනය කොළඹ අලුත්කඩේ උසාවිය තුළ සිදුවුණේ පසුගිය පෙබරවාරි 20 වැනිදායි.
ඝාතනයේ ප්‍රධාන සැකකාරිය වන ඉෂාරා සෙව්වන්දි, ඝාතනයෙන් පසු මුහුදින් ඉන්දියාවට පලාගොස් ඇති අතර, ඇය ඒ සඳහා රුපියල් මිලියන 6.5 ක් පමණ වියදම් කර තිබෙන බව ද එහි සඳහන්.
ඇය ඉන්දියාවේ සති දෙකක් (2) පමණ රැඳී සිට පසුව ගොඩබිම මාර්ගයෙන් කත්මණ්ඩු වෙත පැමිණ තිබෙනවා.
‘සෙව්වන්දි’ භක්තපූර්හි කාමරයක් කුලියට ගෙන, තමා ඉන්දියාවේ බෙංගලූරු නගරයේ පුරවැසියකු බවට නිවැසි හිමියාට පැවසූ බව එහි සඳහන්.
ඇය මාසයක් පමණ එහි රැඳී සිට ඇති අතර, අවදානම අවම කර ගැනීම සඳහා වැඩි වශයෙන් කාමරය තුළම රැඳී සිට ඇති බවයි එහි දැක්වෙන්නේ.
නේපාල පොලිසිය තමන්ව අත්අඩංගුවට නොගනු ඇතැයි විශ්වාස කරමින් ඇය එහි ආරක්ෂිත යැයි සිතා පදිංචිව සිට තිබෙනවා.
‘කෙනඩි බැස්තියම්පිල්ලේ (J.K. බායි ලෙසද හඳුන්වනු ලබන)’ තමෙල්හි හෝටලයකදී අත්අඩංගුවට ගෙන තිබෙනවා. ප්‍රධාන කල්ලි නායකයා සමඟ ඔහු සම්බන්ධ වී සිට ඇති අතර, ඔහු ලබා දුන් තොරතුරු උපයෝගී කරගෙන සෙව්වන්දි සිටි ස්ථානය සොයා ගැනීමට හැකි වූ බවයි එහි දැක්වෙන්නේ.
‘ජීවදාසන් කනකරාසා’ සහ ‘තක්ෂි නන්දකුමාර්’, මිත්‍රපාර්ක් නව බස් නැවතුම්පොළ අසලදී අත්අඩංගුවට ගෙන තිබුණා.
අත්අඩංගුවට ගත් සැකකරුවන් හයදෙනාම (6) ‘කෙහෙල්බද්දර පද්මේ’ විසින් මෙහෙයවනු ලබන කුප්‍රකට ශ්‍රී ලංකා පාතාල කල්ලියේ සාමාජිකයන් බව ද එම වාර්තාවේ දැක්වෙනවා.
මෙම කල්ලිය මැලේසියාවේ සහ ඩුබායි සිට මත්ද්‍රව්‍ය ජාවාරම් සහ සංවිධානාත්මක අපරාධවල නිරතව සිට ඇති බව ද එහි සඳහන්.
‘සංජීව ඝාතනය’ට අදාළව උසාවියේ CCTV දර්ශන මගින් හෙළි වූයේ, ‘සෙව්වන්දි’ නීතිඥවරියක ලෙස වෙස්වලාගෙන, පොතක් තුළ සඟවා ගත් ආයුධයක් උසාවියට රැගෙන ඒමෙන් වෙඩි තැබීමට සහය වූ බවයි. වෙඩික්කරු වූ ‘දිල්ෂාන් පියුමංග’ සිද්ධිය වූ දිනම ශ්‍රී ලංකා පොලිසිය විසින් අත්අඩංගුවට ගෙන තිබුණා.
නේපාලයේ ශ්‍රී ලංකා තානාපති කාර්යාලය මෙම සිද්ධිය සම්බන්ධයෙන් සමීපව නිරීක්ෂණය කර ඇති අතර සහ ශ්‍රී ලංකා පොලිසියෙන් සහ තානාපති කාර්යාලයෙන් ලැබුණු බුද්ධි තොරතුරු අනුව, නේපාල පොලිසිය මෙහෙයුම දියත් කර තිබෙන බව සඳහන්.
ඔවුන් නේපාලයේ කිසිදු අපරාධයක් සිදු කර නොමැති බැවින්, ආගමන දෙපාර්තමේන්තුව සමඟ සම්බන්ධීකරණය කරමින් සිටින බව පොලිස් ආරංචි මාර්ග පවසන බව නේපාල වාර්තාවල දැක්වෙනවා.
සියලුම සැකකරුවන් (හයදෙනාම) පිටුවහල් කිරීම සඳහා කටයුතු කර ඇති බවත් නේපාල නීතිය යටතේ අවශ්‍ය දඩ මුදල් දැනටමත් ගෙවා ඇති බවත් දෙපාර්තමේන්තුවේ ජ්‍යෙෂ්ඨ නිලධාරියෙකු තහවුරු කළ බව නේපාල මාධ්‍ය වාර්තා කළා.
නේපාලය සහ ඉන්දියාව අතර විවෘත දේශසීමාවක් පැවතීම නිසා අපරාධකරුවන්ට රටවල් දෙක අතර පලා යාමට හැකියි.
කෙසේ වෙතත්, ශ්‍රී ලංකා අපරාධකරුවන් නේපාලයේ සැඟවී සිටීම සාමාන්‍යයෙන් දුර්ලභ බව ඉන්ටර්පෝල් නිලධාරීන් සඳහන් කර තිබුණා ෴
+++
+++
‘ඉෂාරා සෙව්වන්දි’ පැන යන්න හිටියේ මුරුසියට
(15.10.2025 – hirunews.lk)
නේපාලයේදී අත්අඩංගුවට ගත් ‘ඉෂාරා සෙව්වන්දි’ නුදුරු දිනයකදීම එහි සිට මුරුසි දිවයින වෙත පැනයාමට සැලසුමක් සකස් කර සිට ඇති බවට විමර්ශකයින් අනාවරණය කරගෙන තිබෙනවා.
‘ඉෂාරා සෙව්වන්දි’ නමැත්තියට නේපාලයේ සිට මුරුසි දිවයිනට පලා යාමට සැලසුම් සකස් කර දී ඇත්තේ ‘ජේ.කේ. බායි’ නමැත්තා බවද මේ වන විට හෙළිව ඇතැයි විමර්ශන කණ්ඩායම පවසනවා.
මෙම ‘කෙනඩි බැස්තියන් පිල්ලේ’ හෙවත් ‘ජේ.කේ. බායි’ නමැත්තා ‘ඉෂාරා සෙව්වන්දි’ නේපාලයෙන් පැන්නීම සඳහා ව්‍යාජව සකස් කරන ලද විදෙස් ගමන් බලත්‍රයක් ද මේ වන විට පොලිසිය සොයා ගෙන තිබුණා.
ශ්‍රී ලංකා පොලීසිය මෙම මෙහෙයුම සිදු නොකළා නම් මෙම සැකකාර ‘ඉෂාරා සෙව්වන්දි’ නුදුරු දිනයකදීම මුරුසි දිවයින වෙත පලා යාමට සූදානමින් සිට ඇතැයි වාර්තා වුණා.
මෙම සැකකාරිය සමඟ තවත් සැකකරුවන් 05 දෙනකු පොලිස් අත්අඩංගුවට ගනු ලැබ තිබූ අතර මොවුන් අද (15) මෙරටට පැමිණීමට නියමිතයි ෴
+++
ඕලුගල සර්? ආ,කෙල්ලේ කොහොමද? සෙව්වන්දි ඕලුගලට කියූ රහස්, සර් කැමති ගාණක් කියන්නකෝ… (15.10.2025)
+++
සෙව්වන්දි මිද්දෙණියේ සිට රැගෙන ගියේ මිද්දෙණියේ සුපුන්! බබා පොලීසියට අල්ලස්දී පැනයන්න හදයි! (15.10.2025)
+++
සෙව්වන්දිව ගේන්න STF නිලධාරීන් දෙදෙනකුත් (2) නේපාලයට (15.10.2025)
+
‘බස් ලලිය’ගේ කප්පම් පාතාලේ ඉවරයි ! ගහපුවයි ගහන්න හිටපුවයි ගැන සම්පූර්ණ පැටිකිරිය මෙන්න (15.10.2025)
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴