ලංකා විදුලිබල මණ්ඩලය අද (04) මැදියම් රැයේ සිට අකුරට වැඩ
(04.09.2025 – hirunews.lk)
විදුලිබල සංශෝධන පනතෙහි ප්‍රතිපාදනයන් ද අනුකූල නොවන අයුරින් ලංකා විදුලිබල මණ්ඩලය ප්‍රතිව්‍යුහගතකරණ ක්‍රියාවලිය සිදු කිරීමට එරෙහිව ඉංජිනේරුවන් ඇතුලු සියලු විදුලි සේවකයින් අද (04) මධ්‍යම රාත්‍රියේ සිට අකුරට වැඩ කිරීමේ වෘත්තිය ක්‍රියාමාර්ගයකට පිවිසීමට තීරණය කර තිබෙනවා.
ප්‍රතිව්‍යුහගතකරණ ක්‍රියාවලිය නිවැරදි කර සේවකයින්ගේ වෘත්තිය අයිතිවාසිකම් සුරක්ෂිත කරන ලෙස ඉදිරිපත් කර ඇති ඉලලීම් 24 ක් පදනම් කරගෙන මෙම වෘත්තිය ක්‍රියාමාර්ගය ගැනීමට මණ්ඩලයේ සියලු වෘත්තිය සංගම තීරණය කර ඇති බවයි ඉංජිනේරු සංගමයේ සභාපති ධනුෂ්ක පරාක්‍රමසිංහ කියා සිටියේ ෴
2025 වසරේ 05 ශ්‍රේණිය ශිෂ්‍යත්ව විභාගයේ ප්‍රතිඵල නිකුත් වෙයි
(04.09.2025 – hirunews.lk)
2025 වසරේ 05 ශ්‍රේණිය ශිෂ්‍යත්ව විභාගයේ ප්‍රතිඵල අන්තර්ජාලයට නිකුත්කර තිබෙනවා.
ඒ අනුව https://www.doenets.lk/examresults සබැදිය ඔස්සේ ඔබට ප්‍රතිඵල පරික්ෂා කරගත ගැකියි.
එම විභාගයේ උත්තර පත්‍ර පරික්ෂා කිරීම පසුගිය 22වැනිදා සිට 27 වැනිදා දක්වා සිදු කෙරුණු බවයි එම දෙපාර්තමේන්තුව පවසා සිටියේ.
මෙම වසරට අදාළ 05 ශ්‍රේණිය ශිෂ්‍යත්ව විභාගය පසුගිය අගෝස්තු 10 වනදා පැවැත් වුණා.
මෙවර ශිෂ්‍යත්ව විභාගය සඳහා සිංහල මාධ්‍යයෙන් අයදුම්කරුවන් 231,638 ක් සුදුසුකම් ලබා සිටි අතර දෙමළ මාධ්‍යයෙන් සුදුසුකම් ලබා සිටි අයැදුම්කරුවන් සංඛ්‍යාව 76,313 ක්.
අනුව සම්පූර්ණ අයදුම්කරුවන් 307,951 ක් විභාගයට පෙනී සිටියා.
+++
+
මාලිගාවත්තේ වෙඩිල්ල ‘කුඩු සළිඳු’ගේ වැඩක් බවට සැකයක්
(03.09.2025 – hirunews.lk)
කොළඹ, මාලිගාවත්ත, ජුම්මා මස්ජිද් පාරේ පිහිටි වෙළෙඳසැලක් තුළ අද (03) සිදුවූ වෙඩි තැබීම ද පාතාල කල්ලි දෙකක් (2) අතර පවතින ආරවුලක ප්‍රතිඵලයක් බව පොලිසිය පවසනවා.
මෙම වෙඩි තැබීමත් සමග වසරේ මේ දක්වා සිදුවූ වෙඩි තැබීම් 92 දක්වා ඉහළ යන අතර ඉන් පුද්ගලයින් 48 දෙනෙකු මියගොස් තවත් පුද්ගලයින් 54 දෙනෙකු තුවාල ලබා තිබෙනවා.
කොළඹ මාලිගාවත්ත ජුම්මා මස්ජිද් පාරේ පිහිටි ත්‍රිරෝද අමතර කොටස් අලෙවිසැලක් තුළ අද මෙම වෙඩි තැබීම සිදුව තිබුණා.
යතුරුපැදියකින් පැමිණි පුද්ගලයින් දෙදෙනෙකු (2) එම වෙඩි තැබීම සිදු කර තිබුණේ ටී 56 වර්ගයේ ගිනි අවියක් භාවිත කරමින්.
එහිදී අදාළ වෙළෙඳසැලේ සේවය කළ කොළොන්නාව ප්‍රදේශයේ පදිංචි අවුරුදු 28 ක තරුණයෙකු වෙඩි ප්‍රහාරයෙන් තුවාල ලැබූ අතර ඔහු කොළඹ ජාතික රෝහලේ ප්‍රතිකාර ලබනවා.
වෙඩික්කරුවන් වෙඩි ප්‍රහාර දෙකක් (2) එල්ල කර ඇති අතර ඉන් එක් වෙඩිල්ලක් අදාළ තරුණයාගේ දකුණු උරහිසට වැදී තිබූ බවයි පොලිසිය සඳහන් කළේ.
වෙඩික්කරුවන් පැමිණෙන ආකාරය සහ වෙඩි තබා ඉන් පිටව යන අයුරු සීසීටීවී කැමරාවල ද සටහන් වී තිබෙනවා.
ඒවායේ දැක්වෙන්නේ වෙඩික්කරුවන් ටී-56 ගිනි අවිය අතැතිව කිසිඳු චකිතයකින් සහ බියකින් තොරව වෙළඳසැලට ඇතුලු වී වෙඩි තබා පිටව යන අයුරුයි.
පොලිසිය සඳහන් කළේ තුවාල ලැබූ තරුණයා සේවය කළ ත්‍රීරෝද රථ අමතර කොටස් වෙළෙඳසැලේ හිමිකරු දැනට විදෙස්ගතව සිටින සංවිධානාත්මක අපරාධකරුවෙකු වන ‘කංඡිපානී ඉම්රාන්’ගේ හිතවතෙකු බවයි.
එමෙන්ම, මෙම වෙඩි තැබීම ප්‍රබල මත්ද්‍රව්‍ය ජාවාරම්කරුවෙක් වන ‘සලිඳු මල්ශික ගුණරත්න’ හෙවත් ‘කුඩු සළිඳු’ නමැත්තාගේ පාර්ශවය විසින් සිදු කරන්නට ඇති බවටයි දැනට සැක පළ කරන්නේ.
කෙසේ වෙතත් වෙඩික්කරුවන් පිළිබඳව තවමත් තොරතුරක් අනාවරණය වී නැහැ ෴
+++
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴