රනිල්ගෙන් සජිත්ට කොළ එළියක් : සජබ හා එක්වූ අයට පැනවූ අත්හිටුවීම් ඉවතට
රනිල්ගෙන් සජිත්ට කොළ එළියක් : සජබ හා එක්වූ අයට පැනවූ අත්හිටුවීම් ඉවතට
(31.08.2025 – hirunews.lk)
විපක්ෂ නායක සජිත් ප්‍රේමදාස මහතා සහ සමගි ජන බලවේගය සමඟ එක් වූ සියලුම පක්ෂ සාමාජිකයින්ට පනවා තිබූ අත්හිටුවීමේ නියෝග ඉවත් කිරීමට එක්සත් ජාතික පක්ෂය තීරණය කර ඇති බව එම පක්ෂයේ ජ්‍යෙෂ්ඨ ප්‍රකාශකයකු සඳහන් කළා.
එක්සත් ජාතික පක්ෂයේ නායක හිටපු ජනාධිපති රනිල් වික්‍රමසිංහගේ උපදෙස් මත මෙම පියවර ගෙන ඇතැයි ද එම ප්‍රකාශකයා පවසනවා.
මෙය විපක්ෂයේ එකමුතුව සදහා ගනු ලබන පළමු පියවර වශයෙන් එජාපය සඳහන් කර ඇතැයි ද වාර්තා වෙනවා.
ලබන 06 වැනිදා පැවැත්වෙන එක්සත් ජාතික පක්ෂයේ වාර්ෂික සම්මේලනයට සියළුම සාමාජිකයින්ට මෙන්ම විපක්ෂයේ අයට ද ආරාධනා කර ඇති අතර, එහිදී වත්මන් දේශපාලන තත්ත්වය පිළිබඳව සාකච්ඡා කිරීමට නියමත බව ද ඉහත ප්‍රකාශකයා සඳහන් කළා.
විපක්ෂ නායක සජිත් ප්‍රේමදාස, හිටපු ජනාධිපතිවරුන් වන මහින්ද රාජපක්ෂ සහ මෛත්‍රීපාල සිරිසේන යන මහත්වරුන්ට ද මෙම සම්මේලනයට ආරාධනා කර තිබෙනවා.
රනිල් වික්‍රමසිංහ මහතා රක්ෂිත භාරයේ රෝහල්ගතව සිටියදී විපක්ෂ නායක සජිත් ප්‍රේමදාස මහතා ඇතුළු සජබ සාමාජිකයන් පිරිසක් ඔහුගේ සුව දුක් විමසා බැලීමට ගොස් තිබුණා ෴
හෙට (01) සිට අධිවේගී මාර්ගවල සියලුම වාහනවල ආසන පටි අනිවාර්යයි
(31.08.2025 – hirunews.lk)
හෙට දින එනම්, සැප්තැම්බර් 01 වන දින සිට අධිවේගී මාර්ගවල ධාවනය වන සියලුම වාහනවල, ඉදිරිපස සහ පසුපස යන සියලුම ආසනවල සිටින මගීන්ට ආසන පටි පැළඳීම අනිවාර්ය කර ඇතැයි ජාතික මාර්ග ආරක්ෂණ කවුන්සිලයේ සභාපතිවරයා පවසනවා.
එමෙන්ම, ආසන පටි නොමැති වාහන සඳහා, ඒවා සවිකර ගැනීම සඳහා මාස 3 ක සහන කාලයක් ලබා දෙන බවද ඔහු වැඩිදුරටත් සඳහන් කළා ෴
ළමා රෝහලේ දොස්තරලාගේ කැන්ටිම ගැන විමර්ශනයක්
(31.08.2025 – hirunews.lk)
රිජ්වේ ආර්යා ළමා රෝහලේ වෛද්‍යවරුන් සඳහා පවත්වාගෙන යන ආපනශාලාව නිසි ටෙන්ඩර් කැඳවිමකින් තොරව බාහිර පාර්ශ්වයකට ලබා දීම සම්බන්ධයෙන් සෞඛ්‍ය අමාත්‍යංශයේ ප්‍රසම්පාදන කමිටුව මගින් විශේෂ විමර්ශණයක් ආරම්භ කර ඇතැයි රෝහල් ආරංචි මාර්ග සඳහන් කරනවා.
ආපනශාලාව විධිමත් ලෙස පවත්වාගෙන ගිය කණ්ඩායමට පසුගිය 25 වෙනිදා වන විට ඉවත් වන ලෙස රෝහලේ වෛද්‍යවරුන් කීපදෙනකු ඔවුන්ට දන්වා ඇති බව වාර්තා වෙනවා.
මෙම වෛද්‍යවරුන් කීහිපදෙනා ඒ සම්බන්ධයෙන් රෝහල් බලධාරින්ට පවා දැනුවත් කිරීමක් සිදුකර නැතැයි ද සදහන් වනවා.
මොවුන් ඉවත් වූ පසුව හෙට (01) නව කණ්ඩායමකට ආපනශාලාව ටෙන්ඩර් පටිපාටියකින් තොරව ලබා දීමට මෙම වෛද්‍යවරුන් කීපදෙනා කටයුතු කිරිම සම්බන්ධයෙන් එතෙක් ආපනශාලාව පවත්වාගෙන ගිය කණ්ඩායම සෞඛ්‍ය අමාත්‍යංශයට පැමිණිලි කර තිබෙනවා.
එම පැමිණිල්ලට අනුව අමාත්‍යංශය මගින් විශේෂ පරික්ෂණයක්ද මේ වන විට ආරම්භ කර ඇතැයි ද පැවසෙනවා.
එමෙන්ම, මේ සම්බන්ධයෙන් අල්ලස් හා දූෂණ විමර්ෂණ කොමිසමටද පැමිණිල්ලක් ඉදිරිපත් වී ඇති බවද රෝහල් ආරංචි මාර්ග සඳහන් කරනවා.
ඉකුත් 25 වෙනිදා සිට වෛද්‍යවරුන් ආහාර ලබා ගන්නා ආපනශාලාව වසා දැමීම හේතුවෙන් වෛද්‍යවරුන් දැඩි අපහසුවකට පත්ව ඇතැයි ද වාර්තා වෙනවා ෴
පස්සර ප්‍රදේශයේ අභිරහස් මරණයන් දෙකක් (2)
(31.08.2025 – hirunews.lk)
බදුල්ල – පස්සර 9 කණුව ප්‍රදේශයේ නිවසක තිබි අභිරහස ලෙස මියගිය පුද්ගලයන් දෙදෙනෙකුගේ (2) මළ සිරුර පොලිසිය විසින් සොයාගෙන තිබෙනවා.
මෙලෙස මියගොස් ඇත්තේ වයස අවුරුදු 26 සහ 38 වියේ පසුවන පස්සර හා ගම්පොල යන ප්‍රදේශවල පදිංචිකරුවන් බවයි පොලිසිය සදහන් කළේ.
ප්‍රදේශවාසීයෙකු විසින් පොලිසියට කළ දැනුම්දීමක් මත අද (31) උදෑසන මෙම මළ සිරුරු සොයාගෙන තිබුණා.
පොලිස් නිලධාරීන් විසින් සිදුකල මුලික විමර්ශන වලදි මියගොස් සිටින එක් (1) පුද්ගලයෙකු අතෙහි තිබී සිරින්ජරයක් සොයාගෙන තිබෙනවා.
පසුව සිදුකළ විමර්ශනවලදී අනාවරණය වී ඇත්තේ මොවුන් දීර්ඝ කාලයක සිට මත්ද්රව්ය සදහා දැඩිලෙස ඇබ්බැහිව සිටි පුද්ගලයන් දෙදෙනෙකු බවයි.
ඒ අනුව, ඔවුන් මත්ද්රව්ය අධිමාත්‍රාවකින් භාවිතා කිරීම නිසා මෙම මරණ සිදුවී ඇති බවට පොලිසිය සැක පළ කරනවා ෴
අම්පාරේ පැත්තක්ම වැනසූ කුඩු ජාවාරමා අල්ලයි
(31.08.2025 – hirunews.lk)
අම්පාර දිස්ත්‍රික්කයේ කල්මුණේ, අක්කරපත්තුව, නින්දවුර් අවට ප්‍රදේශවලට මත්ද්රව්ය අලෙවි කරන ප්‍රධාන ජාවාරම්කරු අත්අඩංගුවට ගැනිමට අම්පාර පොලිස් අධිකාරි කාර්යාලයේ කොට්ඨාශ දුෂණ මර්දන අංශයේ නිළධාරීන් සමත්ව තිබෙනවා.
නින්දවුර් පොලිස් බල ප්‍රදේශයේ නින්දවුර් ගම්මානයේ කරන ලද මෙම වැටලිමේදි සැකකරු සතුව තිබී ‘අයිස් මත්ද්රව්ය’ ග්‍රෑම් 23 යි මිලි ග්‍රෑම් 300 ක් ද අත්අඩංගුවට ගෙන ඇතැයි පොලිසිය පවසනවා.
අම්පාර කොට්ඨාශ දුෂණ මර්දන අංශයේ ස්ථානාධිපති උප පොලිස් පරීක්ෂක මුදිත ප්‍රියංකරට ලද තොරතුරක් මත මෙම වැටලිම සිදුකර තිබෙනවා.
එහිදි මෙම ‘අයිස් මත්ද්රව්ය’ සහ සැකකරු සමග ‘අයිස් මත්ද්රව්ය’ ප්‍රවාහනය කිරිමට ගන්නා ‘යාරිස්’ වර්ගයේ මෝටර් රථයක්, දුරකථන 03 ක්,බැංකු කාඩ් 04 ක්,බැංකු පොත් 01 ක් අත් අඩංගුවට ගෙන තිබෙනවා.
සැකකරු ජුම්මා පල්ලිය පාර, මිරා නගර් නින්දවුර් පදිංචි 33 හැවිරිදි පුද්ගලයෙක්.
නැගෙනහිර දිසාව භාර ජ්‍යෙෂ්ඨ නියෝජ්‍ය පොලිස්පති වරුණ ජයසුන්දරගේ උපදෙස් පරිදි අම්පාර නියෝජ්‍ය පොලිස්පති සුජිත් වෙදමුල්ලගේ අධික්ෂණය යටතේ අම්පාර කොට්ඨාශ භාර පොලිස් අධිකාරි ඩී.බී.එච්.කලණසිරිගේ මෙහයවිමෙන් අම්පාර කොට්ඨාශ දුෂණ මමර්දනය අංශයේ ස්ථානාධිපති උප පොලිස් පරීක්ෂක මුදිත ප්‍රියංකර, පොලිස් සැරයන්වරුන් වන 33887 සෙන්ඩස්, රණසිංහ, 67697 අමිල, 67796 පුෂ්ප කුමාර, පොලිස් කොස්තපාල්වරුන් වන 87285රුමේන්ද්‍ර, 95062 සුනිල්, කාන්තා පොලිස් කොස්තාපල්වරියන් වන 10674 උදාරි, 11332 සසලා, පොලිස් කොස්තාපල් රියැදුරු 80645 ආසිරි යන නිළධාරින් මෙම වැටලීම සිදුකර තිබෙනවා ෴
සැප්තැම්බර් 07 වනදා ලංකාවට දුර්ලභ පූර්ණ චන්ද්‍රග්‍රහණයක්
(31.08.2025 – hirunews.lk)
ලබන සැප්තැම්බර් 07 වන දින රාත්‍රියේ ශ්‍රී ලංකාවට දුර්ලභ ‘ලෝහිත සඳ’ (Blood Moon) දර්ශනයක් දැකගත හැකි බව කොළඹ විශ්වවිද්‍යාලයේ භෞතික විද්‍යා අධ්‍යයන අංශයේ මහාචාර්ය චන්දන ජයරත්න සඳහන් කරනවා.
මෙම දර්ශනය පුරා පැය 5 කුත් විනාඩි 27 ක් පුරා පැවතිය හැකි බවත්, එයින් පැය 1 යි විනාඩි 22 ක් සඳ රතු පැහැයෙන් දිස්වන පූර්ණ චන්ද්‍රග්‍රහණ අවධියයක් බවයි මහාචාර්යවරයා සඳහන් කළේ.
මෙම ආකාශ වස්තු දර්ශනය ලොව ජනගහනයෙන් 85% කට පමණ දැකගත හැකි අතර ආසියාව, ඕස්ට්‍රේලියාව, යුරෝපය සහ අප්‍රිකාව යන කලාපවලට එය හොඳින් දිස්වනු ඇති.
මෙම චන්ද්‍රග්‍රහණය නැරඹීම සඳහා විශේෂ උපකරණ අවශ්‍ය නොවන අතර, වලාකුළු රහිත අහසක් ඇත්නම් රටේ ඕනෑම ස්ථානයක සිට පියවි ඇසින් නැරඹිය හැකි බවත් මහාචාර්යවරයා පවසනවා.
එමෙන්ම, මෙම සංසිද්ධිය දැකබලා ගැනීම සඳහා, ආතර් සී. ක්ලාක් ආයතනය විසින් සජීවී විකාශයක් පැවැත්වීමට සැලසුම් කර ඇති අතර, කොළඹ විශ්වවිද්‍යාල තාරකා විද්‍යා සංගමය සැප්තැම්බර් 07 වන දින සවස 07:30 සිට කොළඹ විශ්වවිද්‍යාල ක්‍රීඩා පිටියේදී රාත්‍රී අහස නිරීක්ෂණ කඳවුරක් සහ ඡායාරූප සැසියක් පැවැත්වීමට නියමිතයි ෴
රත්නපුර රෝහල් ලොක්කා ගැන පරීක්ෂණය කළ හැටි හරිද?
(31.08.2025 – hirunews.lk)
රත්නපුර රෝහලේ අධ්‍යක්ෂවරයාගේ දරදඬු ක්‍රියාකලාපය සම්බන්ධයෙන් සෞඛ්‍ය අමාත්‍යංශය පස්දෙනකු (5) ගෙන් යුත් විමර්ෂණ කණ්ඩායමක් විශේෂ පරික්ෂණයක් සිදුකර ඇත්තේ එම අධ්‍යක්ෂවරයා රෝහල තුළ සිය රාජකාරිය කරමින් සිටියදී බවට රෝහලේ ආරංචි මාර්ග සඳහන් කරනවා.
මෙම පරික්ෂණය දින 03 ක් පුරා රත්නපුර රෝහලේදී සිදුව තිබෙනවා.
එසේ සිදුකළ පරික්ෂණයේදී රෝහල් අධ්‍යක්ෂවරයාගේ දරදඬු ක්‍රියාකලාපයන් සම්බන්ධයෙන් සාක්ෂි ලබා දීමට සිටි බොහෝ දෙනකුට එම අවස්ථාව වැලකී ගොස් ඇතැයි ද පැවසෙනවා.
රෝහලේ එක්තරා කාමරයක පැවැති මෛම විමර්ෂන කටයුත්ත සඳහා සාක්ෂි ලබාදීමට යන පුද්ගලයින් කවුද යන්න අධ්‍යක්ෂවරයාගේ හිතවතුන් ඔහුට තොරතුරු දී ඇති බවද එම ආරංචි මාර්ග තහවුරු කර සිටිනවා.
මෙවැනි පසුබිමක් තුළ අධ්‍යක්ෂවරයාගේ තර්ජනයට ලක් වූ කාන්තා පාර්ශ්වයේ කිසිවෙක් විමර්ෂණ නිලධාරින්ට කරුණු ඉදිරිපත් කිරිමට ගොස් නොමැති බවත් අධ්‍යක්ෂවරයා රෝහලෙන් පරිබාහිරව රඳවා ගනිමින් මෙම විමර්ෂණය සිදුකළේ නම් එම කාන්තාවන් සාක්ෂි ලබා දිමට කැමැත්ත පළ කර තිබූ බවත් සඳහන්.
මේ අතර අධ්‍යක්ෂවරයාගේ මැර තර්ජනයන් හෙලා දකිමින් ‘රජයේ වෛද්‍ය නිලධාරීන්ගේ සංගමය’ රෝහල් පරිශ්‍රයේ ප්‍රදර්ශනය කර තිබු බැනරයක් ගලවා ඉවත් කරන ලෙස රෝහලේ ආරක්ෂකවරයා අදාළ අංශවලට නියෝගයක් කර ඇති අතර එසේ නොකරන්නේ නම් ආරක්ෂක අංශ ප්‍රධානීයාව රෝහලෙන් ඉවත් කරන බවට ද අධ්‍යක්ෂවරයා විසින් තර්ජනය කරනු ලැබ ඇති බවද වාර්තා වෙනවා.
මේ වන විට ප්‍රදේශයේ මැර පිරිසක් විසින් ‘රෝහල් අධ්‍යක්ෂවරයාව රැකගනිමු’ යනුවෙන් සඳහන් කරන ලද පෝස්ටර් රෝහලෙන් පිට ප්‍රදර්ශනය කර ඇතැයිද එම පෝස්ටර් යතුරුපැදියකින් පැමිණි පුද්ගලයින් දෙදෙනෙකු (2) අලවා පලා ගොස් ඇති බවද රෝහල් ආරංචි මාර්ග සඳහක් කරනවා.
මේ සම්බන්ධයෙන් රෝහල් අධ්‍යක්ෂ වෛද්‍ය ඉමේෂ් ප්‍රතාපසිංහ ගෙන් කළ විමසුමකදී ඔහු සඳහන් කළේ, තමා මේ සම්බන්ධව කිසිවක් නොදන්නා බවත් අපට තොරතුර ලබා දුන් පුද්ගලයින්ගෙන්ම වැඩි විස්තර ලබා ගන්නා ලෙසිනි ෴
ඒකාබද්ධ කාලසටහන අත්හදා බැලීමක්ලු
(31.08.2025 – hirunews.lk)
ලංගම සහ පුද්ගලික බස්රථ ඒකාබද්ධ කාලසටහනක් යටතේ ධාවනය කිරිම අත්හදා බැලීමක් පමණක් වන බව පාර්ලිමේන්තු මන්ත්‍රී චන්දන සූරියාරච්චි පවසනවා.
කෙසේ වෙතත් මෙම වැඩසටහන ක්‍රියාත්මක කිරීම හරහා ගමනාගමන මණ්ඩලයට විශාල පාඩුවක් සිදුවන බවයි වෘත්තිය සමිති පෙන්වා දෙන්නේ.
පෞද්ගලික බස් රථ සමග ඒකාබද්ධ කාලසටහනකට අනුව ධාවනය කිරීමට ගෙන ඇති තීරණයට විරෝධය පළ කරමින් සහ තවත් ඉල්ලීම් කිහිපයක් මුල් කරගනිමින් ශ්‍රී ලංකා ගමනාගමන මණ්ඩලයේ වෘත්තීය සංගම් කිහිපයක් පසුගිය 27 වනදා සිට අඛණ්ඩ වැඩවර්ජනයක් ආරම්භ කර තිබෙනවා.
කෙසේ වෙතත් වර්ජනයක් ක්‍රියාත්මක වුව ද බොහෝ ප්‍රදේශවල බස් ධාවනය නිසි පරිදි සිදුවන බවයි අප වාර්තාකරුවන් සදහන් කළේ.
වර්ජන ක්‍රියාමාර්ගය පිළිබද අදහස් දක්වමින් ශ්‍රී ලංකා නිදහස් ජාතික ප්‍රවාහන සේවක සංගමයේ ප්‍රධාන ලේකම් බන්දුල රත්නායක පැවසුවේ අදාළ කාලසටහන ක්‍රියාත්මක කිරීමට අවශ්‍ය පහසුකම්වත් ලංගමය සතුව නොමැති බවයි.
කෙසේ වෙතත් ඒකාබද්ධ බස් කාලසටහන ක්‍රියාත්මක කිරීමට ගමනාගමන මණ්ඩලයට අවශ්‍ය පහසුකම් කඩිනමින් ලබා දීමට කටයුතු කරන බවයි පාර්ලිමේන්තු මන්ත්‍රී චන්දන සූරියාරච්චි ප්‍රකාශ කළේ ෴
දැනට ක්‍රියාත්මක ලංගම හා පෞද්ගලික බස් එකාබද්ධ කාල සටහන යටතේ බස් ධාවනය කිරීමෙන් කොළඹ හලාවත මාර්ගයේ බස් ධාවනයෙන් පමණක් දිනකට රු. ලක්ෂ පනහක (50) අලාභයක් සිදුවන බව ‘ජාතික නිදහස් ප්‍රවාහන සේවක සමිතිය’ පවසනවා.
ඔවුන් වැඩිදුරටත් පවසන්නේ මෙම ඒකාබද්ධ කාලසටහන් ක්‍රමය මගින් පෞද්ගලික අංශයේ ආදායම තර වී ලංගම තව තවත් පාඩු ලබන බවයි ෴
+++
+
අමුකොටුව කන්දේ තිදරු මව ඝාතනයට සැමියා අත්අඩංගුවට
(31.08.2025 – hirunews.lk)
හබරාදූව, අමුකොටුව කන්ද ප්‍රදේශයේදී තියුණු ආයුධයකින් පහරදී කාන්තාවක් ඝාතනය කිරීමේ සිද්ධිය සම්බන්ධයෙන් ඇයගේ සැමියා වන 48 හැවිරිදි ලබැදුම විතානගේ ජගත් රුවන් කුමාර නැමැත්තා හබරාදූව පොලීසිය විසින් අත්අඩංගුවට ගෙන තිබෙනවා.
අමුකොටුව කන්ද, පිලාන, අගුලුගහ ලිපිනයේ පදිංචිව සිටි 42 හැවිරිදි ඉදිරිමුණි නන්දනී රුද්‍රිගු නැමැති තිදරු මවක මෙලෙස ඝාතනයට ලක්ව තිබෙනවා.
සිද්ධිය වූ දිනයේ, එනම් අගෝස්තු 29 වැනිදා සවස 06:30 ට පමණ, තේ කර්මාන්ත ශාලාවක සේවය අවසන් කර නිවස බලා යමින් සිටි ඇයට සැමියා විසින් මඟ රැක සිට පහර දී ඇති බවයි පොලිසිය සඳහන් කළේ.
එමෙන්ම, මෙම යුවළ වසර කිහිපයක සිට වෙන්ව ජීවත් වී තිබෙනවා.
ඝාතනයට ලක් වූ කාන්තාවගේ පපුවේ, පිටේ, බෙල්ලේ සහ හිසේ පිහි ඇණුම් තුවාල 7 ක් තිබී ඇති අතර, මරණ පරීක්ෂණ වාර්තාවලට අනුව, හෘදයට සහ අභ්‍යන්තර ඉන්ද්‍රියන්ට සිදු වූ බරපතල හානි සහ අධික රුධිර වහනය හේතුවෙන් ඇය මියගොස් තිබෙනවා.
බරපතල තුවාල ලැබූ කාන්තාව ප්‍රදේශවාසීන් විසින් ගාල්ල කරාපිටිය රෝහලට ඇතුළත් කර ඇති නමුත් එහිදී ඇය ජීවිතක්ෂයට පත්ව ඇති බවයි අප වාර්තාකරු සඳහන් කළේ.
සැකකරු හෙට (01) ගාල්ල මහේස්ත්‍රාත් අධිකරණයට ඉදිරිපත් කිරීමට නියමිත බවත් හබරාදූව පොලීසිය සඳහන් කළා ෴
දරුවන් පැදගිය යතුරුපැදිය කොල්ල කෑ සැකකරු සොයයි
(31.08.2025 – hirunews.lk)
උදේ ආහාර ගෙන ඒම සඳහා යතුරුපැදියෙන් ආ එකම පවුලේ සහෝදර දරුවන් දෙදෙනෙකුට (2) කළුතර ගල්ලස්ස ළමා රෝහල අසලදී පහරදී ඔවුන් ආ යතුරුපැදිය කොල්ල කා පළා ගිය බව කියන පුද්ගලයකු (1) අත් අඩංගුවට ගැනීමට දකුණු කළුතර පොලිසිය පරීක්ෂණ පවත්වනවා.
ඉකුත් 28 වැනිදා උදේ ආහාර ගෙන ඒම සඳහා පුතුන් දෙදෙනා (2) යතුරු පැදියෙන් වෙළඳසැලකට ගිය බවත්, ආපසු එන අතරමග ප්‍රදේශයේම පදිංචි අයකු (1) අත දමා ඔවුන් නතර කර යතුරු පැදිය ඉල්ලා ඇති බවත් අදාළ පුද්ගලයන් දෙදෙනාගේ (2) මව පොලිසියට පැමිණිලිකර තිබුණා.
“යතුරු පැදිය දෙන්න බැහැ” යැයි කී විට උරණවී ඇති මොහු සිය පුත්‍රයන් දෙදෙනාව (2) බිමට තල්ලු කර පහරදී බලහත්කාරයෙන් යතුරු පැදිය රැගෙන මැහිමුල්ල දෙසට එය පදවාගෙන ගොස් ඇති බවත්, ලොකු පුතා කෑ ගසාගෙන යතුරු පැදිය පසුපස දිව යනවිට එය දුටු අසල්වැසියෙකු තමාට දුරකථන ඇමතුමක් ලබා දුන් බවත් ඇය පොලිසියට කර තිබූ පැමිණිල්ලේ වැඩිදුරටත් සඳහන්.
දකුණු කළුතර පොලිසිය මේ පිළිබඳව වැඩිදුර පරීක්ෂණ පවත්වනවා.
දකුණු කළුතර අයි.ඩී.එච්. පාරේ පදිංචි රවන්මුණි රසිකා සංජීවනී ද සිල්වා (අවු.46) යන අය විසින් පොලීසියට කරන ලද පැමිණිල්ල අනුව මේ පිළිබඳ පරීක්ෂණ ආරම්භ කොට තිබෙනවා ෴
සරසවි චිත්‍රාගාරය බින්ද සැකකරුගේ නිවෙසේ ගිනිඅවියක්
(31.08.2025 – hirunews.lk)
කිරිබත්ගොඩ සරසවි චිත්‍රාගාරය බිඳ තඹවලින් නිමවූ කෞතුක භාණ්ඩ රැසක් සොරාගත් තිදෙනකු (3) ගෙන් යුත් සංවිධානාත්මක සොර කල්ලියේ සැකකරුවකුගේ (1) නිවස තුළ තිබී විදේශීය රටක නිෂ්පාදිත ගත් බෝර 12 වර්ගයේ ගිනි අවියක් සොයා ගැනීමට හැකිවූ බව කිරිබත්ගොඩ පොලිසිය කියනවා.
එම සැකකරුවන් තිදෙනා (3) සන්තකයේ තිබී ‘අයිස් මත්ද්රව්ය’ මිලිගෑම් 13930 ක්, ස්මාට් වර්ගයේ ජංගම දුරකථනන දෙකක් (2), පිත්තලවලින් නිමවන ලද අලියකුගේ රුවක්, තඹවලින් නිමවන ලද කෞතුක වටිනාකමින් යුත් සිලින්ඩර් කීපයක් පොලිස් භාරයට ගෙන තිබෙනවා.
මීට දින කීපයකට ඉහත දී රාත්‍රී කාලයේදී සරසවි චිත්‍රාගාර භූමියට ඇතුළු වී එහි ගබඩාව කඩා රුපියල් තුන් ලක්ෂ පනස් දහසක් (3,50,000) පමණ වටිනා පිත්තල වලින් සහ තඹවලින් නිමවන ලද ගෑස් හා ඔක්සිජන් සිලින්ඩර් මෙන්ම පිත්තලවලින් නිමවන ලද අලි රුවක් ද සැකකරුවන් විසින් සොරාගෙන තිබුණා.
එම සොරකම සම්බන්ධයෙන් කිරිබත්ගොඩ පොලිසිය වෙත පැමිණිල්ල ලැබීමෙන් අනතුරුව, යම් පුද්ගලයන් කීප දෙනකු කිරිබත්ගොඩ ප්‍රදේශයේ වගුරු බිමක වලක් හාරා කිසියම් භාණ්ඩ කීපයක් වළදමා ඇති බවට එහි නිලධාරීන්ට ලද තොරතුරක් අනුව, ඒ සම්බන්ධයෙන් ආවේෂණ රාජකාරී සිදුකරමින් සිටියදී, එය රැගෙන යාම සඳහා සැකකරුවන් තිදෙනා (3) පැමිණි අවස්ථාවේදී අත්අඩංගුවට ගත් බව පොලිසිය පවසනවා.
අත්අඩංගුවට ගත් සැකකරුවන් තිදෙනා (3) සන්තකයේ ‘අයිස් මත්ද්‍රව‍ය’ තිබී හමුවීමෙන් අනතුරුව සිදුකළ වැඩිදුර ප්‍රශ්න කිරීමේදී, ලැබුණු තොරතුරු වලට අනුව, සැකකරුවන් අතර සිටි ප්‍රධාන සැකකරුගේ කඩවත නුවර පාරේ නිවස පරික්ෂා කිරීමේදී, විදේශීය රටක නිෂ්පාදිත ගිනි අවිය සොයා ගැනීමට හැකිවූ බව පොලිසිය සඳහන් කරනවා.
මෙම සැකකරුවන් මීට පෙරද සොරකම් ගණනාවකට පොලිස් අත්අඩංගුවට පත් වූවන් බවයි පොලිසිය පවසන්නේ.
සෙසු සැකකරුවන් කඩවත ප්‍රදේශයේ පදිංචිකරුවන්.
වයස අවුරුදු 32 ත් 38 අතර පසුවන සැකකරුවන් මහර මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
කිරිබත්ගොඩ පොලිසිය පරීක්ෂණ පවත්වනවා ෴
+++
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴