අල ලූනු බදු අර්බුදයක් : අධ්‍යක්ෂ ජනරාල් ඉල්ලා අස්වෙයි !
(30.08.2025 – 14:01 +0530 – deshaya.lk)
ආනයනික ද්‍රව්‍ය සඳහා බදු පැනවීමේ ප්‍රතිපත්තියට පටහැණිව අල සහ ලූනු සඳහා බදු ඉහළ දමන ලෙසට ‘මුදල් අමාත්‍යාංශ ලේකම්වරයා’ගෙන් ලැබුණු නියෝගයක් ක්‍රියාත්මක කිරීම ප්‍රතික්ෂේප කළ ‘මුදල් අමාත්‍යංශයේ වෙළෙඳ ආයෝජන ප්‍රතිපත්ති දෙපාර්තමේන්තුවේ අධ්‍යක්ෂ ජනරාල් ප්‍රදීප් කුමාර මහතා’ සිය තනතුරෙන් ඉල්ලා අස්වූ බව මුදල් අමාත්‍යාංශ ආරංචි මාර්ග සඳහන් කරයි. අස්වනු නෙලන කාලයට ආනයනික අල ලූනු සඳහා මුදල් අමාත්‍යවරයා විසින් බදු පැනවීම සාමාන්‍යයෙන් සිදුවන්නකි. එහෙත් එම බදු පැනවීමට කැබිනට් අනුමැතිය ලබාගත යුතු බව අදාළ නීතියේ සඳහන්ය. එසේ වුවද මෙවර බදු පැනවීම සඳහා කැබිනට් අනුමැතියකින් තොරව ‘මුදල් අමාත්‍යාංශ ලේකම්වරයා’ ‘අධ්‍යක්ෂ ජනරාල්වරයා’ට නියෝග කර ඇතැයි වාර්තා වෙයි.
එම නියෝගය නීතියට පටහැණි බව කියමින් බදු පැනවීමේ ගැසට්ටුව නිකුත් කළ නොහැකි බව ‘වෙළෙඳ ආයෝජන ප්‍රතිපත්ති දෙපාර්තමේන්තුවේ අධ්‍යක්ෂ ජනරාල්වරයා’ ‘අමාත්‍යංශ ලේකම්වරයා’ට දැනුම් දී තිබේ. නමුත් ‘අමාත්‍යංශ ලේකම්වරයා’ කෙසේ හෝ මෙම කටයුත්ත සිදුවිය යුතු බවට නැවත නියෝග කළ බැවින් එම නීතිවිරෝධී නියෝගය ඉටුකළ නොහැකි බව පවසමින් ‘අධ්‍යක්ෂ ජනරාල් ප්‍රදීප් කුමාර මහතා’ සිය තනතුරෙන් ඉල්ලා අස්වූ බව වැඩිදුරටත් වාර්තා වේ.
ඒ අතර රේගු ආරංචි මාර්ග සඳහන් කරන්නේ මෙම බදු පැනවීමට දින කිහිපයකට පෙර ලූනු මෙට්‍රික් ටොන් 27,000 ක් පමණ ආනයනකරුවන් විසින් ආනයනය කර ඇති බවයි. සාමාන්‍යයෙන් මෙරට මාසික ලූනු අවශ්‍යතාව මෙට්‍රික් ටොන් 20,000 ක් පමණය. එම ලූනු නව බද්ද නොගෙවා ආනයනය කර ඇති නමුත් අලෙවි කරන්නේ බදු සහිතව වැඩි මිලට බව වාර්තා වෙයි. මෙයින් ලූනු ආනයනකරුවන් රුපියල් කෝටි 100 කට අධික විශාල ලාබයක් ලබන බව තොග වෙළෙඳපොල ආරංචි මාර්ග සඳහන් කරයි ෴
මහනුවර ජාතික රෝහලේ අක්කර 28 ක් අනවසර පදිංචිකරුවන්ගේ ග්‍රහණයට
(30.08.2025 – 21:32 +0530 – sinhala.adaderana.lk)
මහනුවර ජාතික රෝහල සතු ඉඩම් අක්කර 58 න් අක්කර 28 ක්ම අනවසර පදිංචිකරුවන් අත්පත්කරගෙන ඇතැයි එහි අධ්‍යක්ෂිකා වෛද්‍ය ඉරේෂා ප්‍රනාන්දු මහත්මිය පවසයි.
මෙම ඉඩම්වල ගොඩනැගිලි ඉදිකිරීම දිගින් දිගටම සිදුවන අතර ඒ හේතුවෙන් රෝහල් කටයුතු පවත්වාගෙන යෑමේදී දැඩි දුෂ්කරතා මතුව ඇති බව ඇය සඳහන් කළේය.
ශ්‍රී ලංකාවේ දෙවැනි ප්‍රධානතම ජාතික රෝහල වන මහනුවර ජාතික රෝහල ශික්ෂණ රෝහලක් ලෙසද ප්‍රචලිතය.
එහි වාට්ටු 80 ක්, දැඩි සත්කාර ඒකක 11 ක් සහ අනෙකුත් ප්‍රතිකාර ඒකක ස්ථාපිත කර තිබේ.
දිවයිනේ නන්දෙසින් පැමිණෙන විශාල රෝගීන් ප්‍රමාණයක් දෛනිකව ප්‍රතිකාර ලබාගන්නා මෙම රෝහල තවත් දියුණු කළ හැකිවුවත් ඊට බාධා මතුව ඇත.
ඒ රෝහල සතු ඉඩම්වල පුද්ගලයින් අනවසරයෙන් පදිංචි වී සිටීම හේතුවෙනි.
රෝහල සතු ඉඩම්වල නිවාස, වෙළෙඳසැල් සහ ගොඩනැගිලි ඉදිකර ඇති අතර තවදුරටත් එවැනි ඉදිකිරීම් ද ඉදිවෙමින් පවතියි.
එවැනි තත්ත්වයක් තුළ රෝහල් කටයුතු පවත්වාගෙන යෑමේදී මතුව ඇත්තේ දැඩි දුෂ්කරතාවන් ය.
එමෙන්ම වෙළෙඳසැල්, මල්ශාලා, යතුරුපැදි ගාල්කිරීම නිසා මහනුවර ජාතික රෝහලට පිවිසෙන මාර්ගය පවා අවහිර වී තිබේ.
ඒ හේතුවෙන් සිදුව ඇත්තේ අසාධ්‍ය රෝගියෙකු කඩිනමින් රෝහල වෙත රැගෙන ඒමට පවා නොහැකි තත්ත්වයකි ෴
+
දුරකථනයෙන් කළ මරණ තර්ජනයට පද්මේ, CI ලින්ටන්ගෙන් සමාව අයැදී
(31.08.2025 – 19:30 +0530 – sinhala.adaderana.lk)
ශ්‍රී ලංකා පොලිසිය, ඉන්දුනීසියාවේ ජකර්තා නුවර පොලිසිය සහ ජාත්‍යන්තර පොලිසිය ඒකාබද්ධව සිදුකළ මෙහෙයුමකින් පසුගියදා අත්අඩංගුවට ගැනුණු සංවිධානාත්මක අපරාධකරුවන් මෙන්ම, මත්ද්‍රව්‍ය ජාවාරම්කරුවන් වන ‘කෙහෙල්බද්දර පද්මේ’, ‘කමාන්ඩෝ සලින්ත’, ‘බැකෝ සමන්’ ඇතුළු පිරිස රැගත් ශ්‍රී ලංකන් ගුවන් යානය ඊයේ (30) රාත්‍රි 07:30 ට පමණ කටුනායක ගුවන් තොටුපොළට ළඟා විය.
එම යානයේ ඉන්දුනීසියානු පොලිස් නිලධාරීන් කණ්ඩායමක්ද පැමිණි අතර, එහිදී ඔවුන්ව සහ මෙම මෙහෙයුම සිදුකළ බස්නාහිර උතුර අපරාධ කොට්ඨාසය භාර සහකාර පොලිස් අධිකාරී රොහාන් ඕලුගල මහතා සහ අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරී මහින්ද ජයසුන්දර යන නිලධාරීන් ද පොලිසිය විසින් පිළිගත්තේය.
එම අවස්ථාවේදී ගුවන් තොටුපොළට පැමිණ සිටි මහජන ආරක්ෂක අමාත්‍ය ආනන්ද විජේපාල මහතා සහ පොලිස්පති නීතිඥ ප්‍රියන්ත වීරසූරිය මහතා ඇතුළු නිලධාරීන් විසින් මෙම මෙහෙයුමේදී දායකත්වය දැක්වූ ඉන්දුනීසියානු ආරක්ෂක අංශ සාමාජිකයින්ට තිළිණ ප්‍රදානයක් සිදුකරනු ලැබුවේය.
පසුගියදා බස්නාහිර උතුර අපරාධ කොට්ඨාසයේ සංවිධානාත්මක අපරාධ මැඩලීමේ ඒකකයේ ස්ථානාධිපති ප්‍රධාන පොලිස් පරීක්ෂක ලින්ටන් ද සිල්වා මහතාට දුරකතනය ඔස්සේ මරණ තර්ජන එල්ල කර තිබූ ‘කෙහෙල්බද්දර පද්මේ’ ඊයේ (30) ගුවන් තොටුපළ පරිශ්‍රයේදී ලින්ටන් සිල්වා මහතාගේ මුහුණට මුහුණ හමුවීම විශේෂ සිදුවීමක් විය.
එහිදී ‘කෙහෙල්බද්දර පද්මේ’ සහ ‘කමාන්ඩෝ සලින්ත’, ‘ලින්ටන් සිල්වා’ දුටුවිට දැඩි තැති ගැනීමකට ලක්වූ බව වාර්තා වේ.
අනතුරුව ‘පද්මේ’ සමීපයට යමින් ලින්ටන් ද සිල්වා මහතා පවසා ඇත්තේ, “ආහ් මල්ලී අපි හම්බුණා එහෙනම්” ලෙසය.
අනතුරුව කෙහෙල්බද්දර පද්මේ, ලින්ටන් සිල්වා මහතාගෙන් සමාව ඇයැද සිට ඇති අතර ඔහු පවසා ඇත්තේ, “සර්, මට සර් එක්ක ටිකක් කතා කරන්න ඕනේ” යනුවෙනි.
ඊට පිළිතුරු දුන් ලින්ටන් සිල්වා මහතා, “අපි හමුවෙමුකෝ මල්ලී පස්සේ…” යනුවෙන් පවසා ඇති බව වාර්තා වේ.
මේ අතරතුර, මහජන ආරක්ෂක අමාත්‍යවරයා සහ පොලිස්පතිවරයා ගුවන් තොටුපොළ පරිශ්‍රයේදී මාධ්‍යය වෙත අදහස් පළ කර තිබුණි.
ගුවන් තොටුපොළේඳී අපරාධ පරීක්ෂණ දෙපාර්තමේන්තුව අත්අඩංගුවටගත් ‘කෙහෙල්බද්දර පද්මේ’ ඇතුළු අපරාධකරුවන් 05 දෙනා දැඩි ආරක්ෂක රැකවල් මධ්‍යයේ ගුවන්තොටුපළෙන් පිටතට රැගෙන ආවේ ඊයේ (30) රාත්‍රී 09:15 ට පමණ වේ.
අනතුරුව, ‘මන්දිනු පද්මසිරි පෙරේරා’ හෙවත් ‘කෙහෙල්බද්දර පද්මේ’, ‘නිලංග සම්පත් සිල්වා’ හෙවත් ‘පානදුර නිලංග’ සහ ‘ශලින්ත මදුෂාන් පෙරේරා’ හෙවත් ‘කමාන්ඩෝ සලින්ත’ යන අපරාධකරුවන් ප්‍රශ්න කිරීම් සඳහා අපරාධ පරීක්ෂණ දෙපාර්තමේන්තුවේ විමර්ශන ඒකක තුනකට (3) වෙන වෙනම ඇතුළත් කර තිබේ.
‘ළහිරු මදුසංඛ’ හෙවත් ‘තැඹිලි ළහිරු’ සහ ‘එන්.එන්. ප්‍රසංග’ හෙවත් ‘බැකෝ සමන්’ යන අපරාධකරුවන් භාරකෙරුණේ, බස්නාහිර උතුර අපරාධ කොට්ඨාසය භාර සහකාර පොලිස් අධිකාරී රොහාන් ඕලුගල මහතා අධ්‍යක්ෂ ධුරය දරන බස්නාහිර උතුර අපරාධ කොට්ඨාසයටය.
නමුත් ආරක්ෂක හේතූන් මත පසුව ඔවුන් දෙදෙනා (2) කොළඹ වරාය පොලිසියට රැගෙනවිත් ඇති අතර එහි සිට ප්‍රශ්න කරමින් සිටින බව පොලිස් අභ්‍යන්තර ආරංචි මාර්ග පැවසුවේය.
මෙම අපරාධකරුවන් දෙදෙනා (2) ගෙන්, පසුගිය සමයේ රටේ දැඩි ආන්දෝලනයකට තුඩුදුන් ‘කජ්ජා’ නමැත්තා සහ දරු දෙදෙනා (2) ඝාතනය සම්බන්ධයෙන් ප්‍රශ්න කර ඇති අතර එහිදී ඒ සම්බන්ධයෙන් වැදගත් කරුණු කිහිපයක්ම ඔවුන් අනාවරණ කර තිබේ.
අපරාධකරුවන් පාපොච්චාරණය කර ඇත්තේ ‘දරුන්’ නමැති මත්ද්‍රව්‍ය ජාවාරම්කරුවා ගෙන් ‘කජ්ජා’ නමැත්තා මත්ද්‍රව්‍ය මිලදීගත් නමුත් ඒ සඳහා ‘කජ්ජා’ මුදල් ලබානොදුන් බවය.
ඊට පළිගැනීමක් වශයෙන් ‘කජ්ජා’ ඝාතනය කළ බව අපරාධකරුවන් පාපොච්චාරණය කර ඇත.
මේ අතර, ‘කෙහෙල්බද්දර පද්මේ’ ඇතුළු අපරාධකරුවන් පස් දෙනා (5) මෙරටට රැගෙන ඒමට පෙර ඉන්දුනීසියාවේ ජකර්තා නුවර පිහිටි ‘මෙට්රෝ පොලිස් මූලස්ථානයෙන්’ පලායෑමට උත්සාහ දරා ඇති බවද වාර්තා වේ.
ඒ එහි සිරගත කර සිටි ඉන්දුනීසියානුවන් පිරිසකගේද සහාය ඇතිවය.
ජකර්තා නුවර දින කිහිපයකට පෙර පැවති විරෝධතා අතරතුර විරෝධතාකරුවන් පිරිසක් එරට මෙට්රෝ පොලිස් මූලස්ථානය ද වටලා තිබුණි.
පිරිස පාලනය කිරීමට එරට පොලිසිය කඳුළු ගෑස් ප්‍රහාර එල්ල කර ඇති අතර එම අවස්ථාවේදී හුස්ම ගැනීමට අපහසු බව පවසමින් අපරාධකරුවන් පස්දෙනා (5) එම ස්ථානයෙන් පලායාමට උත්සාහ දරා ඇතත් එය ව්‍යර්ථ වී තිබේ.
එවන් වාතාවරණයක ජනාධිපති අනුර කුමාර දිසානායක මේ සම්බන්ධයෙන් රොහාන් ඕලුගල ගෙන් සහ මහින්ද ජයසුන්දර ගෙන් සෘජුව විමසීම් සිදුකර ඇති අතර අනතුරුව අපරාධකරුවන් කඩිනමින් මෙරටට ගෙන්වා ගැනීම කෙරෙහි අවධානය යොමුවී තිබුණි.
ඒ අනුව අද (31) දිවයිනට රැගෙන ඒමට නියමිතව සිටි අපරාධකරුවන් පස්දෙනා (5) ඊයේ (30) දිනයේදීම දිවයිනට රැගෙන එනු ලැබූ බවද සඳහන් වේ ෴
+
මළ මිනී රැගෙන යන ගමන් ‘හර්ස්’ එකෙන් සොරකමේ ගිය තිදෙනෙක් (3) රිමාන්ඩ්
(31.08.2025 – hirunews.lk)
නාවලපිටිය නගරයේ මල්ශාලාවක සේවය කරමින් එහි ඇති මෘත දේහ මිනී රැගෙන යන වෑන් රථයේ තබාගෙන රාත්‍රී කාලයේදී රන් භාණ්ඩ වෙළඳසැල් හා නිවාස බිඳිමින් සොරකමේ යෙදී සිටියේ යැයි කියන තිදෙනකු (3) ලබන 09 වැනිදා තෙක් රක්ෂිත භාරයේ තැබීමට නාවලපිටිය දිසාවිනිසුරු හා මහේස්ත්‍රාත් ලසන්ජි රත්නායක නියෝග කළා.
සැකකරුවන් සන්තකයේ තිබී රුපියල් ලක්ෂ තිස් අටකට (38) ආසන්න රන් භාණ්ඩ ද අත්අඩංගුවට ගත් බව නාවලිපටිය පොලිසිය අධිකරණයට කරුණු වාර්තා කළා.
මෙසේ රක්ෂිත බන්ධනාගාර ගත වූයේ අනුරාධපුර කහටගස්දිගිලිය ප්‍රදේශයේ පදිංචි දිවයිනේ ලියාපදිංචි අපරාධකරුවකු (අයි.ආර්.සී.) (1) හා නාවලපිටිය ප්‍රදේශයේ පදිංචිකරුවන් දෙදෙනෙක් (2).
මෙහි ප්‍රධාන සැකකරු වූ කහටගස්දිගිලිය ප්‍රදේශයේ පදිංචි අපරාධකරුවා (අයිආර්සී) (1) මෙම මල්ශාලාවේ මිනී වෑන් රථයේ රියදුරු ලෙස සේවය කරන අතර තවත් පුද්ගලයෙකු (1) එහි මිනී කපන්නා වේ.
අනෙක් සැකකරු (1) මොවුන්ගේ සොරකම්වලට සහය දුන් අයකු බවද පොලිසිය පවසනවා.
සැකකරුවන් මල් ශාලාවට ගෙන යන සහ එයින් රැගෙන එන මළමිනී සහිත කාර් රථය රැගෙන ගොස් මාර්ගයේ නවතා වෙළෙඳසල් සහ නිවාස බිද ඇති බවට තොරතුරු හෙළිව ඇතැයි පොලීසිය පවසනවා.
මල්ශාලාවට අයත් වෑන් රථය මහ රාත්‍රී නගරයේ නවතා තිබෙනු නිසිවකු හෝ දුටුව ද සැක සිතී නැත්තේ ප්‍රදේශවාසීන්ට එම රථය හුරු පුරුදු නිසා බව පොලිසිය සඳහන් කරනවා.
නාවලපිටිය නගරයේ සුපිරි වෙළඳසල් සංකීර්ණයේ රන් භාණ්ඩ වෙළඳසැලක් කඩා එහි තිබූ රන් භාණ්ඩ සොරාගෙන ගොස් තිබූ අතර සවිකර තිබූ සීසීටීවි කැමරාවල දත්ත පද්ධතියද (DVR) රැගෙන ගොස් තිබුණා. ඒ අකුත් 07 වැනිදා.
මෙම වෙළඳසැලේ රන් භාණ්ඩ අලෙවිය හා උකස් ගැනීමද සිදු කර තිබූ අතර එහි ආරක්ෂාව සඳහා පිටත දොරටුවට අමතරව ඇතුළත ගනකම් වීදුරු සහිත ආවරණයක්ද යොදා තිබූ බව සඳහන් වෙනවා. එසේ වුවද එම රන්භාණ්ඩ ආයතනයට ඇතුළු වූ සොරුන් එය බිඳ රන්භාණ්ඩ සොරාගෙන ගොස් තිබුණා.
සැකකරුවන් රන්භාණඩ වෙළඳසැලෙන් රැගෙන ගිය කැමරාවල දත්ත පද්ධතිය DVR නාවලපිටිය ප්‍රදේශයෙන් මහවැලි ගඟට දමා ඇති බවද හෙළි වී ඇත.
ඒ සම්බන්ධයෙන් පරීක්ෂණ පැවැත්වූ පොලිසියට ‘සී සී ටී වී’ කැමරා පරීක්ෂා කිරීමේදී මෙම මිනීකාරය දැකගත හැකිවූ බව සදහන්.
සැකකරුවන් සොරකම් කරන භාණ්ඩ සඟවා තබා ඇත්තේ මිනී එම්බාම් කරන ස්ථානයේ වුවත් තම සේවකයින් මෙලෙස සොරකමේ යෙදෙන බවට මල්ශාලා හිමිකරු දැන නොසිටි බවද හෙළි වී තිබෙනවා.
සොරා ගත් රන් භාණ්ඩ අනුරාධපුර, මහනුවර, ගිණිගත්හේන, නාවලපිටිය, ගම්පොළ, කහටගස්දිගිලිය, මිහින්තලය ආදී නගරවල උකස් කර තිබියදී සොයා ගත් බව පොලීසිය පවසනවා.
මෙම මුදල් වලින් ප්‍රධාන සැකකරු මිලදීගෙන ඇති යතුරුපැදියක් ද පොලිසිය සොයාගෙන තිබෙනවා.
ගම්පොල කොට්ඨාශ භාර ජ්‍යෙෂ්ඨ පොලිස් අධිකාරී එරික් පෙරේරා, පොලිස් අධිකාරී දුෂ්‍යන්ත හේරත් යන නිලධාරීන්ගේ උපදෙස් මත නාවලපිටිය පොලිස් ස්ථානාධිපති ප්‍රධාන පොලිස් පරීක්ෂක හරේන්ද්‍ර කළුගම්පිටිය, උප පොලිස් පරීක්ෂක සුරේස්, පොලිස් සැරයන්වරු වන 31064 සුගත්, 45442 කුමාර, කාන්තා පොලිස් සැරයන් 3660 සමන්මලී, පොලිස් කොස්තාපල්වරු වන 71958 නිරෝෂන්, 55589 බණ්ඩාර, 35968 අජන්ත යන නිලධාරින් මෙහි පරීක්ෂණ සිදු කරනවා ෴
+
පොලිස් වෙසින් අල්ලස් ගන්න ගිය සුරාබදු නිලධාරීන් තිදෙනක් (3) කොටු වෙති
(31.08.2025 – hirunews.lk)
හෙරොයින් මත්කුඩු සමග අත්අඩංගුවට ගත් පුද්ගලයකුට (1) නඩුවක් නොදමා මුදාහැරීමට රුපියල් ලක්ෂ 20 ක අල්ලස් මුදලක් ඉල්ලා එම පුද්ගලයාව කන්කසන්තරේ වංකානේ සුරා බදු කාර්යාලය අසල නිවසක බලහත්කාරයෙන් රඳවා ගෙන සිටි සුරා බදු නිලධාරීන් තිදෙනකු (3) අත්අඩංගුවට ගැනීමට උතුරු පළාත් අපරාධ කොට්ඨාසය කටයුතු කර ඇතැයි පොලිස් මූලස්ථානය පවසනවා.
එම සැකකරුවන් අතර සුරා බදු නියාමකවරයකු, සැරයන්වරයකු සහ සුරා බදු පරීක්ෂකවරයකු සිටින බව පොලිසිය සඳහන් කරනවා.
අත්අඩංගුවට ගන්නා විට සුරාබදු නියාමකවරයා සහ සුරාබදු සැරයන්වරයා නිල ඇඳුමෙන් සිට ඇතැයි පොලිසිය පවසනවා.
කන්කසන්තරේ ප්‍රධාන වීදිය, මාදගල් ලිපිනයේ පදිංචි කාන්තාවකගේ සහෝදරයා ‘පොලිස් මත්ද්‍රව්‍ය නාශක කාර්යාංශයේ’ නිලධාරීන් විසින් හොරයින් මත්කුඩු සමඟ අත්අඩංගුවට ගෙන වංකානේ සුරා බදු කාර්යාලය අසල නිවසක රඳවාගෙන සිටින බවත් තම සහෝදරයා ට නඩුවක් නොදමා මුදා හැරීමට තමාගෙන් එම නිලධාරින් රුපියල් ලක්ෂ 20 ක අල්ලස් මුදලක් ඉල්ලන බව එම කාන්තාවක ‘උතුරු පළාත් අපරාධ කොට්ඨාසය’ වෙත කරන ලද පැමිණිල්ලක් අනුව සැකකරුවන් තිදෙනා (3) අත්අඩංගුවට ගෙන තිබෙනවා.
එම කාන්තාව විසින් කරන ලද පැමිණිල්ලකට අනුව එම කාන්තාව එම නිවසට යවා රුපියල් ලක්ෂ 20 ක් ලබා දී ඇයගේ සහෝදරයාව ඔවුන්ගේ ග්‍රහණයෙන් මුදාගෙන එම ස්ථානයෙන් පිටතට පැමිණීමේදී ‘උතුරු පළාත් අපරාධ කොට්ඨාසයේ’ නිලධාරීන් විසින් එම ස්ථානය වටලා එහි සිටි නිලධාරීන් තිදෙනා (3) අත්අඩංගුවට ගෙන තිබෙනවා.
එම නිවස තුළ සිට ඇත්තේ ‘පොලිස් මත්ද්‍රව්‍ය කාර්යාංශයේ නිලධාරීන්’ නොව ‘සුරාබදු නිලධාරීන්’ බව සිදුකළ විමර්ශනවලදී අනාවරණය වී ඇත
අත්අඩංගුවට ගත් සැකකරුවන් තිදෙනා (3) අරියම්පති, පුන්ගාන්කුලම් හා අරියම්පති 3 පදිංචි වයස අවුරුදු 32, 36 හා 48 පසුවන්නන්.
සැකකරුවන් වැඩිදුර විමර්ශන සඳහා ‘අල්ලස් හෝ දූෂණ චෝදනා විමර්ශන කොමිෂන් සභාව’ වෙත භාරදීමට කටයුතු කර තිබෙනවා.
‘උතුරු පළාත් අපරාධ කොට්ඨාසයේ’ ස්ථානාධිපති එස් සංජීව මහතා ඇතුළු කණ්ඩායමක් වැඩිදුර විමර්ශන කටයුතු සිදු කරනවා ෴
+
වෙන්නප්පුව වෙඩි තැබීමකින් පුද්ගලයෙක් (1) ජීවිතක්ෂයට
(31.08.2025 – hirunews.lk)
වෙන්නප්පුව, වැව පාරේදී වෙඩි තැබීමකින් පුද්ගලයෙකු (1) ජීවිතක්ෂයට පත්ව තිබෙනවා.
පොලිසියට ගොස් ආපසු එමින් සිටි පුද්ගලයෙකුට මෙසේ වෙඩි තබා ඝාතනය කර ඇති බවයි පොලිසිය පවසන්නේ.
මොහු තවත් අයෙකු (1) සමඟ යතුරුපැදියකින් ගමන් කරමින් සිටියදී, මෝටර් රථයකින් පැමිණි පිරිසක් ඔවුන් දෙදෙනාට (2) තියුණු ආයුධයකින් පහර දී වෙඩි තබා ඇති බවයි පොලිසිය පවසන්නේ.
මරණකරු සමග සිටි අනෙක් පුද්ගලයා (1) පලා ගොස් ඇති බවද පොලිසිය පවසනවා.
යතුරුපදියෙන් පැමිණි දෙදෙනා (2) ගෙන් මිය ගිය තැනැත්තා මහාධිකරණයේ පවතින නඩුවකට අදාළව වෙන්නප්පුව පොලීසියේ අත්සන් කිරීමට පැමිණ ආපසු යමින් සිටි අවස්ථාවේදී මෙම වෙඩි තැබීම සිදුව ඇති බවයි පොලිසිය පවසන්නේ.
රිවොල්වර වර්ගයේ ගිනි අවියකින් මෙම වෙඩි තැබීම සිදුකර තිබෙනවා.
ලබන සැප්තැම්බර් 09 වැනිදා මිය ගිය පුද්ගලයාගේ නඩුව සම්බන්ධයෙන් අධිකරණ තීන්දුව ලබා දීමට නියමිතව තිබූ බවයි පොලීසිය පවසන්නේ ෴
+
ගජ මුතු තුනක් (3) එක්ක සැකකරුවකු (1) අල්ලයි
(31.08.2025 – hirunews.lk)
රුපියල් එක් කෝටි විසි ලක්ෂයකට (1,20,00,000) ගජ මුතු තුනක් (3) අලෙවි කිරීමට සූදානම් වූ පුද්ගලයෙකු කටුගස්තොට පොලීසිය මගින් අත්අඩංගුවට ගෙන තිබෙනවා.
යුද හමුදා බුද්ධි අංශ වෙත ලැබුණු තොරතුරක් අනුව කටුගස්තොට පොලිසිය දැනුවත් කිරීමෙන් අනතුරුවයි සැකකරු අත්අඩගුවට ගෙන ඇත්තේ.
සැකකරු අම්පාර, උහන ප්‍රදේශයේ සිට පැමිණි 30 හැවිරිදි අයෙක්.
කටුගස්තොට පොලීසියේ නිලධාරියෙකු උපාය දූතයෙකු ලෙස යොදවා අදාළ සැකකරු සම්බන්ධ කරගෙන ගජ මුතු මිලදී ගන්නා මුවාවෙන් කටුගස්තොට නගරයට ගෙන්වා ගෙන තිබෙනවා.
එහිදී සැකකරු (1) අත්අඩංගුවට ගෙන ගජමුතු පොලිස් භාරයට ගෙන තිබෙන බවයි පොලිසිය පවසන්නේ.
මෙම ගජමුතු විකිණීම සඳහා ගුරුවරයෙකු විසින් ඔහුට ලබා දුන් බවයි සැකකරු පොලිසියට ප්‍රකාශ කර ඇත්තේ.
අත්අඩංගුවට ගත් සැකකරු (1) මහනුවර මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව රක්ෂිත බන්ධනාගාර ගත කෙරුණා ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴