කොළඹ ජාතික රෝහලේ ප්‍රතිකාර ලබමින් සිටි හිටපු ජනපති රනිල් පිටව යයි
කොළඹ ජාතික රෝහලේ ප්‍රතිකාර ලබමින් සිටි හිටපු ජනපති රනිල් පිටව යයි
(29.08.2025 – hirunews.lk)
කොළඹ ජාතික රෝහලේ නේවාසිකව ප්‍රතිකාර ලබමින් සිටි හිටපු ජනාධිපති රනිල් වික්‍රමසිංහ අද (29) පස්වරුවේ රෝහලෙන් පිටව ගොස් තිබෙනවා.
රෝහලෙන් බැහැරව ගියද ලබාදී තිබෙන වෛද්‍ය උපදෙස් අනුව ඔහු නිවසේ තවදුරටත් විවේක ගැනීමට නියමිතයි.
නිවසේ රැඳී සිටින කාලය තුළදී ඔහුගේ සෞඛ්‍ය තත්ත්වය සම්බන්ධයෙන් පවුලේ වෛද්‍යවරු දැඩි අධීක්ෂණයෙන් කටයුතු කිරීමට නියමිත බවටයි වාර්තා වෙන්නේ ෴
+++
රනිල් වෙනුවෙන් ඇප අත්සන් කලේ වෛද්‍යවරුන් තිදෙනෙක් (3)
(29.08.2025 – hirunews.lk)
හිටපු ජනාධිපති, එක්සත් ජාතික පක්ෂයේ නායක රනිල් වික්‍රමසිංහට ඇප ලබාදීම සඳහා ඉදිරිපත් වී ඇත්තේ වෛද්‍යවරුන් තිදෙනකු (3) බව වාර්තා වෙනවා.
පසුගිය 26 වෙනිදා කොටුව මහේස්ත්‍රාත් අධිකරණය මගින් රනිල් වික්‍රමසිංහට රුපියල් ලක්ෂ පනහ (50) බැගින් වූ ශරීර ඇප තුනක් (3) යටතේ ඇප ලබාදුන් අතර ඒ සඳහා ඇප ලබාදීමට ඉදිරිපත් වූයේ වෛද්‍යවරුන් තිදෙනෙකු (3) යි.
මෙම වෛද්‍යවරුන් තිදෙනා (3) සිය කැමැත්තෙන්ම රනිල් වික්‍රමසිංහ හිටපු ජනාධිපතිවරයා වෙනුවෙන් ඇප අත්සන් කිරීමට පැමිණ සිටි අතර එය සම්බන්ධීකරණය කරන ලද්දේ එක්සත් ජාතික පක්ෂයේ සභාපති, හිටපු අමාත්‍ය වජිර අබේවර්ධන විසින් බවද වැඩිදුරටත් වාර්තා වෙනවා ෴
හිටපු ජනාධිපති, එක්සත් ජාතික පක්ෂයේ නායක රනිල් වික්‍රමසිංහට ඇප ලැබීමෙන් අනතුරුව ජාතික රෝහලේ සිට ඔහු මුලින්ම දුරකථනයෙන් කතා කර ඇත්තේ සමගි ජන බලවේගයේ නායක, විපක්ෂ නායක සජිත් ප්‍රේමදාසට බව වාර්තාවෙනවා.
“ඔබ ඇතුළු විපක්ෂයේ පක්ෂ නායකයන් මා වෙනුවෙන් ගත් ක්‍රියාමාර්වලට ගොඩක් ස්තුතියි” රනිල් සජිත්ට ප්‍රකාශ කර තිබෙනවා.
“සර් මේ ක්‍රියා මාර්ගය මම මෙතනින් නතර කරන්නේ නැහැ. ඉදිරියටම ගෙනියනවා” යයි සජිත් ප්‍රේමදාස රනිල්ට ප්‍රකාශ කර තිබෙන බවද වාර්තා වෙනවා.
“මට දවස් කිහිපයක් රෝහලේ ප්‍රතිකාර ගන්න වෙනවා. ඊට පස්සේ මම ඇවිත් ඔක්කොම නායකයින් හමු වෙන්නම්” යනුවෙන් හිටපු ජනාධිපති රනිල් වික්‍රමසිංහ විසින් සජිත් ප්‍රේමදාසට ප්‍රකාශ කොට ඇති බවද දේශපාලන අභ්‍යන්තර ආරංචි මාර්ගවලින් වැඩිදුරටත් වාර්තා වෙනවා ෴
+++
ඒකාබද්ධ විපක්ෂයේ තේමා පාඨය විමල් වීරවංශගේ නිර්මාණයක්
(29.08.2025 – hirunews.lk)
හිටපු ජනාධිපති රනිල් වික්‍රමසිංහ අත්අඩංගුවට ගැනීමට එරෙහිව විපක්ෂයේ පක්ෂවල පොදු විරෝධතාවය සඳහා තේමා පාඨය ගොඩනැගුවේ ජාතික නිදහස් පෙරමුණේ නායක හිටපු අමාත්‍ය විමල් වීරවංශ බව වාර්තා වෙනවා.
රනිල් වික්‍රමසිංහ අත්අඩංගුවට ගෙන ඇති අවස්ථාවේදී මල් පාර කාර්යාලයේදී පැවති විපක්ෂයේ පක්ෂ නායකයින්ගේ රැස්වීමට ගිය විමල් වීරවංශ හිටපු මන්ත්‍රීවරයා විරෝධතාවය සදහා තේමාව ඔහු විසින් ලබා දී තිබෙන බව වාර්තා වෙනවා.
‘ව්‍යවස්ථාපිත ඒකාධිපතිවාදය පරදවමු’ යනුවෙන් විමල් වීරවංශ මෙම තේමා නිර්මාණය කොට ඇති අතර ඊට විපක්ෂයේ සියලුම පක්ෂ නායකයින්ගේ එකඟත්වය හිමි වූ බවද දේශපාලන අභ්‍යන්තර ආරංචි මාර්ගවලින් වැඩිදුරටත් වාර්තා වෙනවා ෴
රට සිහින පෙන්වා රු. ලක්ෂ 250 ක් වංචා කළ සැකකරුවෙක් අත්අඩංගුවට
(29.08.2025 – hirunews.lk)
අසර්බයිජාන් රටේ රැකියා ලබා දෙන බව පවසා රුපියල් ලක්ෂ 250 ක මුදලක් වංචා කළ පුද්ගලයෙක් හැටන් ප්‍රදේශයේදී අත්අඩංගුවට ගත් බව හැටන් විශේෂ අපරාධ විමර්ශන අංශය කියයි.
අත්අඩංගුවට ගත් සැකකරු වයස අවුරුද 41 ක කදුරුවෙල පදිංචි අයෙක්.
විවිධ සමාජ සේවා සිදුකරන පුද්ගලයන් හා සම්බන්ධ වී එම පුද්ගලයන් නමින් බැංකු ගිණුම් ආරම්භ කර එම ගිණුම් වෙත සමාජ ක්‍රියාකාරිකයන් මගින් මුදල් බැර කර‍වාගෙන මෙම මුදල් වංචා කර ඇති බව ද පොලීසිය පවසනවා.
මෙම සැකකරු හැටන් පොලිස් කොට්ඨාසය තුළ පමණක් රුපියල් ලක්ෂ 250 ක මුදලක් වංචා කර ඇති බවට හෙළිව ඇතැයි ද පොලීසිය සඳහන් කරනවා.
මෙම සැකකරු දිවයිනේ විවිධ ප්‍රදේශවල මෙවැනි මුදල් වංචා කර ඇති බවට දැනට කරන ලද විමර්ශනවලදී හෙළිව ඇති බැවින් එසේ වංචාවට හසුවුවන් වෙතොත් ‘හැටන් විශේෂ අපරාධ විමර්ශන අංශයේ’ ස්ථානාධිපතිවරයාගේ 071 690 7033 දරණ දුරකතන අංකයට දැනුම් දෙන ලෙසට පොලිස් මූලස්ථානය සදහන් කරනවා ෴
අලුත්ගමදී පොලිසියෙන් අහසට වෙඩි
(29.08.2025 – hirunews.lk)
අලුත්ගම, දර්ගා නගරය ප්‍රදේශයේදී පොලිස් නිලධාරියකු විසින් අහසට වෙඩි තැබීමක් සිදු කර ඇති බව අලුත්ගම පොලිසිය පවසනවා.
මෙම සිදුවීම වාර්තා වන්නේ, පොලිස් නිලධාරීන්ට යකඩ පොල්ලකින් පහර දීමට උත්සාහ කළ සැකකරුවකු පාලනය කිරීමට උත්සාහ කිරීමේදී බවයි පොලිසිය සඳහන් කළේ.
දෙපිරිසක් අතර ඇති වූ ආරවුලක් සම්බන්ධයෙන් ලද පැමිණිල්ලකට අනුව පොලිස් නිලධාරීන් කණ්ඩායමක් එම ස්ථානයට ගොස් ඇති අතර, එහිදී, එක් (1) සැකකරුවෙක් යකඩ පොල්ලක් රැගෙන පොලිස් නිලධාරීන්ට පහර දීමට උත්සාහ කර තිබෙනවා.
එම අවස්ථාවේදී පොලිස් නිලධාරියකු තමා සතු රිවෝල්වරයෙන් අහසට වෙඩි තබා ඇති බවයි පොලිසිය සඳහන් කළේ.
පසුව පොලිසිය ආරවුල පාලනය කර ඇති අතර, පහර දීමට උත්සාහ කළ සැකකරු අත්අඩංගුවට ගෙන තිබෙනවා.
එමෙන්ම, සැකකරු කළුතර මහේස්ත්‍රාත් අධිකරණයට ඉදිරිපත් කිරීමට නියමිත බවත් පොලිසිය සඳහන් කළා ෴
අපේක්ෂා රෝහලේ විකිරණ ප්‍රතිකාර යන්ත්‍ර තුනක් අක්‍රිය වෙලා – රෝගීන් අමාරුවේ
(29.08.2025 – hirunews.lk)
මහරගම අපේක්ෂා රෝහලේ නව විකිරණ ප්‍රතිකාර ඒකකයේ සිසිලන පද්ධතියේ වායු කාන්දුවක් හේතුවෙන් ‘ඉලෙක්ට්‍රා කම්පැක් විකිරණ යන්ත්‍ර’ තුනෙහි (3) විකිරණ ප්‍රතිකාර පෙරේද (27) සවස සිට නතර කර ඇතැයි රෝහල් ආරංචි මාර්ග සඳහන් කරනවා.
මේ හේතුවෙන් දිනකට විකිරණ ප්‍රතිකාර ලබා ගන්නා රෝගින් 220 ට විකිරණ ප්‍රතිකාර අහිමි වී ඇතැයිද මෙය බරපතල තත්වයක් යැයි එම රෝහල් ආරංචි මාර්ග පවසනවා.
මෙම යන්ත්‍ර ත්‍රිත්වයට විදුලි ජනක යන්ත්‍රයක් නොමැති වීම සහ මීයන්, කලවැද්දන් වැනි සතුන් විසින් හානි කිරීම හේතුවෙන් විටින් විට බිඳවැටි රෝගී ප්‍රතිකාරයන් ඇණහිටින බවද වාර්තා වෙනවා.
විටින් විට ප්‍රතිකාරයන් ඇණහිටීම හේතුවෙන් පොරොත්තු ලේඛණය මාස තුනත් – හයත් (3-6) අතර කාලයක් දක්වා විහිදි ගොස් ඇති බවද පැවසෙනවා.
සාමාන්‍ය ප්‍රතිකාරයක් මෙන් නොව විකිරණ ප්‍රතිකාරයක් ආරම්භ කිරීමෙන් පසුව දෛනිකව අනිවාර්යයෙන්ම නියමිත දින ගණන කළ යුතු ප්‍රතිකාරයක් වන අතර අතරමැදින් ප්‍රතිකාර නොලබා සිටීම පිළිකා රෝගීන්ගේ පිළිකා තත්ත්වය උත්සන්න කිරීමට පවා හේතු විය හැකි බව කියැවෙනවා.
මෙම යන්ත්‍රවල ප්‍රතිකාර ආරම්භ කළ 2020 වසරේ සිටම මේ දක්වා මෙම ගැටලු පවතින අතර මේවා විසඳීමට මේ වනතෙක් සෞඛ්‍ය අමාත්‍යාංශයේ ප්‍රමාණවත් අවධානය යොමුවී නොමැති බව වාර්තා වෙනවා.
මේ වන විට මහරගම අපේක්ෂා රෝහලේ ස්ථාපිත කර ඇති ‘ලීනියර් ඇක්සලරේටර ප්‍රතිකාර යන්ත්‍ර’ පහෙන් (5) විකිරණ ප්‍රතිකාර සිදු කරන්නේ එක් (1) යන්ත්‍රයක පමණි.
මේ අතරින් ‘වේරියන් ලීනියර් ඇක්සලරේටර් ප්‍රතිකාර යන්ත්‍රයේ’ ප්‍රතිකාර කටයුතු පසුගිය වසරේ (2024) බිඳ වැටුණු අතර, ඉහත කී වායු කාන්දුව නිසා ‘ඉලෙක්ටා කම්පැක්ට් යන්ත්‍ර’ තුනක (3) ප්‍රතිකාර කටයුතු බිඳවැටී ඇතැයි සඳහන් වෙනවා.
මෙවැනි විකිරණ ප්‍රතිකාරයක් පෞද්ගලික අංශයෙන් කර ගැනීම සඳහා රුපියල් ලක්ෂ පහේ සිට පහළොව (5-15) දක්වා වියදමක් දැරීමට රෝගීන්ට සිදුවෙනවා ෴
විදුලි සේවකයන්ට වන්දි ලැබෙන හැටි : අවම රු. ලක්ෂ 9 යි, උපරිම රු. ලක්ෂ 50 යි
(29.08.2025 – hirunews.lk)
ශ්‍රී ලංකා විදුලිබල මණ්ඩලය ප්‍රතිව්‍යුහගත කිරීමේ වැඩපිළිවෙළ යටතේ ස්වේච්ඡාවෙන් විශ්‍රාම යන සේවකයන් සඳහා වන්දි ගෙවීමේ සැලැස්මක් බලශක්ති අමාත්‍යාංශය විසින් ඉදිරිපත් කර තිබෙනවා. මෙම යෝජනා ක්‍රමය යටතේ සේවකයන්ට රුපියල් ලක්ෂ 9 ක අවම සහ රුපියල් ලක්ෂ 50 ක උපරිම සීමාවකට යටත්ව වන්දි මුදලක් හිමි වනු ඇති. බලශක්ති අමාත්‍ය කුමාර ජයකොඩි මහතා විසින් නිකුත් කරන ලද ‘2025 ශ්‍රී ලංකා විදුලි බල ස්වේච්ඡා විශ්‍රාම යාමේ යෝජනා ක්‍රමයේ නියම සහ කොන්දේසි’ අනුව මෙය ක්‍රියාත්මක කිරීමට නියමිතයි.
මෙම වන්දි ක්‍රමවේදය සේවකයන්ගේ සේවා කාලය මත පදනම් වී තිබෙනවා. වසර 10 කට වඩා සේවා කාලයක් ඇති සේවකයන්ට, ඔවුන් සේවය කළ සෑම වසරක් (1) සඳහාම මාස දෙකක (2) වැටුපක් සහ විශ්‍රාම යාමට ඇති ඉතිරි කාලයේ සෑම වසරක් (1) සඳහාම මාස එකහමාරක (1½) වැටුපක් හිමි වේ. කෙසේ වෙතත් වසර 10 කට අඩු සේවා කාලයක් ඇති සේවකයන්ට ඔවුන්ගේ සේවා කාලයේ සෑම වසරක් (1) සඳහාම මාස පහක (5) වැටුපක් පමණක් ගෙවන අතර ඉතිරි සේවා කාලය සඳහා කිසිදු ගෙවීමක් සිදු නොවේ. මෙම ක්‍රමවේදය දැනටමත් සේවකයන් වෙත දැනුම් දී ඇත.
මෙම වන්දි ක්‍රමය පිළිබඳව වෘත්තීය සමිති විවිධ මත පළ කරමින් සිටී. ඇතැම් වෘත්තීය සමිති මෙම යෝජනාවට දැඩි විරෝධය පළ කරන අතර තවත් සමිති කොන්දේසි සහිතව තම එකඟතාව පළ කර තිබෙනවා. බලශක්ති අමාත්‍යාංශය පවසන්නේ විදුලිබල මණ්ඩලය ප්‍රතිව්‍යුහගත කිරීමේදී අනුප්‍රාප්තික සමාගමකට අනුයුක්ත වීමට අකමැති සේවකයන්ට මෙම ස්වේච්ඡා විශ්‍රාම යෝජනා ක්‍රමය යටතේ වන්දි ලබා ගැනීමට අවස්ථාව හිමිවන බවයි ෴
බණ්ඩාරගම ඝාතනයට සැක දෙදෙනෙක් (2) අත්අඩංගුවට
(29.08.2025 – hirunews.lk)
බණ්ඩාරගම පොලිස් වසමේ බොල්ගොඩ පාලම ආසන්නයේ දී ඉකුත් 21 වැනිදා වෙඩි තබා පුද්ගලයකු (1) ඝාතනයට අදාළව සැකකරුවන් දෙදෙනකු (2) අත්අඩංගුවට ගෙන තිබෙනවා.
කළුතර අපරාධ කොට්ඨාශසය මගින් විමර්ශන සිදු කර අත්අඩංගුවට ගැනීම සිදු කර තිබුණු අතර, සැකකරුවන් බණ්ඩාරගම පොලිසියට භාර දී තිබෙනවා.
සැකකරුවන් වයස අවුරුදු 18 හා 21 වයස්වල පසුවන පානදුර ප්‍රදේශයේ පදිංචිකරුවන් බවද පොලිසිය පවසනවා.
සැකකරුවන් සන්තකයේ තිබී ව්‍යාජ අංක තහඩු සවිකරන ලද යතුරු පැදියක්, ව්‍යාජ ගමන් බලපත්‍රයක්, රක්ෂණ සහතිකයක්, ආදායම් බලපත්‍රයක් සහ ව්‍යාජ අංක තහඩු යුගළක් ද තමන් භාරයට ගත් බව පොලිසිය කියනවා ෴
අවුරුදු 85 ක කාන්තාවක කපා කොටා ඝාතනය කරලා
(29.08.2025 – hirunews.lk)
වලස්මුල්ල පොලිස් වසමේ උඩගහවත්ත ප්‍රදේශයේ දී අවුරුදු 85 ක කාන්තාවක තියුණු ආයුධයකින් පහර දී ඝාතනය කර ඇතැයි වලස්මුල්ල පොලිසිය පවසනවා.
ඇය උඩගහවත්ත ප්‍රදේශයේ පදිංචිකාරියක බවත් ඇගේ පුතා විසින් රාත්‍රී ආහාරය ලබා දී පිටව ගිය පසු නිවසට ඇතුළු වූ පුද්ගලයකු (1) ඝාතනය සිදු කර ඇති බවත් විමර්ශනවල දී අනාවරණය වී තිබෙනවා ෴
අධිවේගයේ බස් රථවල මගීන්ට ආසන පටි පැළදීම අනිවාර්ය කිරීමේ ගැසට් නිවේදනය 31 වැනිදා
(29.08.2025 – 19:04 +0530 – sinhala.adaderana.lk)
අධිවේගී මාර්ගයේ ගමන් ගන්නා මගී ප්‍රවාහන බස් රථවල මගීන්ට ආසන පටි පැළදීම අනිවාර්ය කිරීමේ විධිවිධාන ඇතුළත් ගැසට් නිවේදනය මේ මස 31 වැනිදා නිකුත් කිරීමට නියමිත බව ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍ය සහ පාර්ලිමේන්තුවේ සභානායක බිමල් රත්නායක මහතා පැවසීය.
අමාත්‍යවරයා මේ බව පැවසුවේ ප්‍රවාහන, මහාමාර්ග, වරාය සහ සිවිල් ගුවන් සේවා කටයුතු පිළිබඳ අමාත්‍යාංශයීය උපදේශක කාරක සභාව ඒ මහතාගේ සභා‍පතිත්වයෙන් පසුගියදා පාර්ලිමේන්තුවේ දී රැස් වූ අවස්ථවේදීය.
මෙහිදී වැඩිදුරටත් අදහස් දක්වමින් අමාත්‍යවරයා පෙන්වා දුන්නේ ‘ක්ලීන් ශ්‍රී ලංකා’ වැඩසටහනේ ප්‍රධාන අංශයක් ලෙස මෙය ක්‍රියාත්මක කරන බවය.
එසේම අධිවේගී මාර්ගවල ගමන් කරන පාසැල් බස් රථ, කාර්යාල සේවා ප්‍රවාහන බස්රථ, විනෝද චාරිකා බස් රථ සහ අනෙකුත් බස් රථ සඳහා ද ආසන පටි සැකසීමට මාස 3 ක පමණ කාලයක් ලබාදෙන බවද ඔහු පෙන්වා දුන්නේය.
විශේෂයෙන්ම රු. 2000 පමණ මිලකට පැවති ආසන පටි මිල රු. 5,000 ත් 7,000 ත් අතර මිලක් දක්වා මේ වන විට ඉහළ ගොස් ඇති බවත් මෙය පාරිභෝගික කටයුතු පිළිබඳ අධිකාරියෙන් පරීක්ෂා කර බැලිය යුතු බවත් අමාත්‍යවරයා සඳහන් කළේය.
දුර ගමන් සේවා බස් රථ සඳහාද ආසන පටි පැළදීම අනිවාර්ය කිරීම සම්බන්ධයෙන් ජනතාවගේ මතය විමසූ බවත් මේ සම්බන්ධයෙන් සියලුම දෙනා පාහේ සිය කැමැත්ත පළ කළ බවත් මෙහිදී අමාත්‍යවරයා පෙන්වා දුන් අතර එබැවින් ඉදිරියේදී දුරගමන් සේවා බස් රථ සඳහා ද ආසන පටි පැළදීම අනිවාර්ය කිරීමට සැලසුම් කර ඇති බවත් හෙතෙම පෙන්වා දුන්නේය.
අවශ්‍ය නීතිමය සංශෝධන සිදු කරමින් අධිවේගී මාර්ගයට වාහන ඇතුළත් කිරීමේදී වාහන අමතර කොටස්වල තත්ත්වය පරීක්ෂා කරමින් ලකුණු ලබාදීමේ ක්‍රමයක් ආරම්භ කරන බවද මෙහිදී අමාත්‍යවරයා ප්‍රකාශ කළ අතර ඊට අදාළ ගැසට් නිවේදනය ඉදිරියේදී නිකුත් කරන බව ද පැවසීය.
එමෙන්ම වාහනවල ටයර් අවශ්‍ය නියමිත තත්ත්වයන් සහ ප්‍රමිතියෙන් නොපවතී නම් එවැනි වාහන අධිවේගී මාර්ගයට ඇතුළත් කිරීමට අවසර ලබා නොදෙන බව ද ඔහු සඳහන් කළේය.
ත්‍රීරෝද රථ, වෑන් රථ ඇතුළු පෞද්ගලික ප්‍රවාහන ක්ෂේත්‍රයේ රියදුරන් වෙනුවෙන් සුබසාධන අරමුදලක් සකස් කිරීමට අවශ්‍ය කටයුතු මේ වන විට අවසන් කොට ඇති බවත් මේ සම්බන්ධයෙන් වන පනත් කෙටුම්පත ඉදිරියේදී පාර්ලිමේන්තුවේ අනුමතියට ඉදිරිපත් කරන බවත් මෙහිදී අමාත්‍යවරයා වැඩිදුරටත් පැවසීය.
දුරගමන් සේවා සහ අධිවේගී මාර්ගයේ ගමන් කරන බස් රථ ගාල් කිරීම සම්බන්ධයෙන් අවශ්‍ය වැඩපිළිවෙළක් සකස් කිරීම කෙරෙහි අවධානය යොමු කොට ඇති බවත් මෙහිදී කාරක සභාව පෙන්වා දුන්නේය.
එසේම දුම්රිය සේවය යාවත්කාලීන කිරීම සම්බන්ධයෙන් අවශ්‍ය යෝජනා සහ නිර්දේශ ඉදිරිපත් කිරිම සඳහා සහ වරාය සම්බන්ධ අවශ්‍ය යාවත්කාලීන කිරීම් සිදු කිරීම සඳහා යෝජනා සහ නිර්දේශ ඉදිරිපත් කිරීම සඳහා අනු කමිටු දෙකක් පත් කිරීම සහ එහි සාමාජිකයින් නම් කිරීම ද මෙහිදී සිදු කෙරිණි.
මීට අමතරව කඩවත – මීරිගම අධිවේගී මාර්ගයේ ඉදි කිරීමේ කටයුතු සැප්තැම්බර් මස සිට ආරම්භ කිරීම සම්බන්ධයෙන් සහ එහි පිළිසකර කිරීම් අවසන් කිරීම සම්බන්ධයෙන් ද මෙහිදී සාකච්ඡා විය ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴