රුවන්පුර බැකෝ මැණික් ජාවාරම ගැන ‘හිරු CIA’ අනාවරණය
(29.09.2024 – 22:56 +0530 – hirunews.lk/sinhala)
සංවිධානාත්මක කණ්ඩායමක් විසින් රත්නපුර – හංගමුව ගඟේ ඉවුරු වනසමින් නීති විරෝධී මැණික් ගැරීමක් සිදුකරද්දී තවත් ජාවාරම්කරුවන් පිරිසක් හිදැල්ලන – මලන්ගම ප්‍රදේශයේ බැකෝ පතලක් ක්‍රියාත්මක කිරීම හේතුවෙන් පාරිසරික ගැටලු රැසක් මතුව තිබෙනවා.
ප්‍රදේශවාසීන්ට ද මරණ තර්ජන එල්ල කරමින් සිදුවන එම ජාවාරම් ගැන ‘හිරු CIA’ අද (29) අනාවරණය කරගත්තා.
මෙරටින් වටිනා මැණික් හමුවන රත්නපුර ප්‍රදේශයේ පැවති පාරම්පරික මැණික් කර්මාන්තයට බැකෝ පතල් හේතුවෙන් එල්ල වී ඇත්තේ සුළුපටු හානියක් නොවේ.
රත්නපුර – හිදැල්ලන, මලන්ගම ප්‍රදේශයේ අරඹා ඇති මෙම මැණික් පතල ද බැකෝ දෙකක් (2) හා සකර් මැෂින් යොදා පවත්වාගෙන යන්නේ ප්‍රදේශයේ නිහඩ බව සුනු විසුනු කරමින්.
රටේ නීතිය තඹ සතයකට හෝ මායිම් නොකරන මෙහි හිමිකරුවන් දිවා කාලයේ මෙන්ම රාත්‍රීය පුරා ද මෙහි මැණික් සොයන්නේ ප්‍රදේශවාසීන්ගේ ජන ජීවිතය ද උකසට ගනිමින්.
මෙම බැකෝ පතලේ බලපෑම හේතුවෙන් අවට නිවෙස් මුළු මනින්ම ඉරි තලා තිබෙනවා.
බැකෝ පතල් හරහා එලෙස ජන ජීවිතයට හානි සිදුකරද්දී රත්නපුර හරහා ගලා බසින සුන්දර හංගමුව ගංගාවේ ඉවුරු සුනු විසුනු කිරීමට සංවිධානාත්මක නීති විරෝධී මැණික් ජාවාරම්කරුවන් පිරිසක් කටයුතු කර තිබෙනවා.
රත්නපුර – පොත්ගුල් විහාර මාවත , කරංගොඩ ප්‍රදේශයෙන් මුළු ගංගාවම හරස්වන ලෙසින් ලෑලි හා ලී යොදා මහා පරිමානයෙන් මෙම අනවසර මැණික් ගැරීම සිදුකරනවා.
මැණික් ජාවාරම්කරුවන් හංගමුව ගගේ යන්ත්‍ර සුත්‍ර ද සවි කොට අධි පීඩක ජල ප්‍රහාර ඉවුරට එල්ල කර මැණික් ඉල්ලම් සෙවීම නිසා මේ වනවිට හංගමුව ගංගාවේ ගමන් මාර්ගය ද වෙනස් වී දැඩි ඉවුරු ඛාදනයක් සිදුව තිබෙනවා.
ප්‍රදේශවාසීන් පවසන්නේ මෙම ස්ථානයේ සිට විනාඩි 10 ක පමණ වේලාවකින් ළගාවිය හැකි රත්නපුර – ඇලපාත පොලිස් ස්ථානයට කොතරම් පැමිණිලි කල ද මීට නීතිය ක්‍රියාත්මකවීමක් සිදු නොවන බවයි.
එලෙස නීතිය ක්‍රියාත්මක නොවන පසුබිමක් යටතේ මේ පරිසර විනාශයට එරෙහි වන පුද්ගලයන්ට මරණීය තර්ජන එල්ල කිරීමට ද මැණික් ජාවාරම්කරුවන් කටයුතු කර තිබෙනවා.
‘හිරු සී.අයි.ඒ.’ ඉදිරියේදීත් මේ පිළිබඳ අවධානයෙන්.
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴