ඔන්ලයින් මූල්‍ය වංචා ජාතික ආරක්ෂාවට බලපෑමක් – පොලිස් මාධ්‍ය ප්‍රකාශක
ඔන්ලයින් මූල්‍ය වංචා ජාතික ආරක්ෂාවට බලපෑමක් – පොලිස් මාධ්‍ය ප්‍රකාශක
(28.06.2024 – lankadeepa.lk)
ඉන්දියානු නේපාල පාකිස්ථාන ඇතුළු විවිධ ජාතීන් මෙරට රැඳී සිටිමින් නීති විරෝධීව අන්තර්ජාලය ඔස්සේ මූල්‍ය වංචා සිදුකිරීම මෙරට ජාතික ආරක්ෂාවට මෙන්ම ජාතික ආර්ථිකයටත් බලපෑමක් සිදු කර ඇති බව පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දුව මහතා පැවසීය.
ඔහු ඒ බව පැවසුවේ මහජන ආරක්ෂක අමාත්‍යාංශයේ පැවති මාධ්‍ය හමුවකට සහභාගි වෙමිනි.
අන්තර්ජාලය ඔස්සේ සිදු කරනු ලබන මූල්‍ය වංචා පරිගණක අපරාධ ගණයට වැටෙන අතර එය ජාතික ආරක්ෂාවට තර්ජනයක් බවද නිහාල් තල්දුව මහතා පැවසීය.
මෙරට විවිධ ප්‍රදේශවල සුඛෝපභෝගී නිවාස වල රැඳී සිටිමින් අන්තර්ජාලය ඔස්සේ සූදු ක්‍රීඩා සිදුකරමින් මූල්‍ය වංචා කළ ඉන්දියානු ජාතිකයන් 137 දෙනෙකු මේ වන විට අත්අඩංගුවට ගෙන ඇති බවද පොලිස් මාධ්‍ය ප්‍රකාශකවරයා පැවසීය.
එම ඉන්දියානු ජාතිකයන් සංචාරක වීසා මගින් මෙරට රැඳී සිටි ඇති බව විමර්ශනවලදී අනාවරණය වී තිබේ.
ඉන්දියාවේ තහනම් කරන ලද සූදු වෙබ් පිටුවක් මෙරට සිට ක්‍රියාත්මක කර ඒ ඔස්සේ ඉන්දියානු ජාතිකයන් සම්බන්ධ කර ගනිමින් කෝටි ගණනින් සූදු ක්‍රීඩා කර ඇති බව අනාවරණය වී ඇත.
මෙම ඉන්දියානු ජාතිකයන් මාස කීපයක සිට මෙම ජාවාරම් සිදුකරගෙන ගොස් ඇති බව පොලිස් මාධ්‍ය ප්‍රකාශකවරයා කීය.
මේ වන විට අන්තර්ජාලය මගින් මූල්‍ය වංචා සිදුකරන ජාවාරම්කරුවන් ජාලයක් සිටින බවට අනාවරණය වී ඇති අතර එම ජාවාරම්කරුවන් හෙළිදරව් කර ගැනීමට විමර්ශන සිදුකරන බවද නිහාල් තල්දුව මහතා පැවසීය.
යම් පුද්ගලයෙක් සතු නිවසක් කුලියට දුන්නද එම නිවස කුලියට ගත් පිරිස කුමන කාර්යයක නියැලෙන්නේ ද යන්න පිළිබඳව සොයා බැලීමට අයිතිකරුට වගකීමක් ඇති බව පැවසූ තල්දුව මහතා එම කුලියට ගත් නිවස කිසියම් අපරාධයක් සඳහා භාවිතා කර ඇති බවට අනාවරණය වුවහොත් රාජසන්තක කිරීමට පවා හැකියාව ඇති බව පැවසුවේය.
අත්අඩංගුවට ගත් ඉන්දියානු ජාතිකයන් නීතිපතිවරයාගේ උපදෙස් පරිදි නඩු පැවරීමට පියවර ගන්නා බවද නියෝජ්‍ය පොලිස්පති නිහාල් තල්දූව මහතා කීය ෴
++++++++++
+++++++++
මූල්‍ය වංචා කළ චීන්නු මීගමුවෙන් අල්ලයි
(29.06.2024 – 07:19 +0530 – sinhala.adaderana.lk)
චීන ජාතිකයින් 30 දෙනෙකු අපරාධ පරීක්ෂණ දෙපාර්තමේන්තුව මඟින් අත්අඩංගුවට ගෙන තිබේ.
පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව මහතා පැවසුවේ මීගමුව ප්‍රදේශයේ හෝටලයක රැඳී සිටියදී මෙම පිරිස අත්අඩංගුවට ගෙන ඇති බවය.
අන්තර්ජාලය හරහා මූල්‍ය වංචා සිදුකිරීමේ චෝදනා මත මොවුන් අත්අඩංගුවට ගත් බව ඔහු පවසයි.
මේ අතර අන්තර්ජාලය ඔස්සේ මුදල් වංචා කිරීමේ චෝදනාව යටතේ ඊයේ (28) දිනය වන විට ඉන්දීය ජාතිකයින් 137 දෙනෙකු ද අත්අඩංගුවට ගෙන තිබේ.
ඔවුන් භාරයේ තිබී ලැප්ටොප් පරිගණක සහ ජංගම දුරකථන රැසක් ද පොලිස් භාරයට ගත් බව පොලිස් මාධ්‍ය ප්‍රකාශක පොලිස්පති නිහාල් තල්දූව මහතා වැඩිදුරටත් ප්‍රකාශ කළේය ෴
ධීවරයන් 6 දෙනාගෙන් 3 දෙනෙක් මරුට
(29.06.2024 – 16:29 +0530 – sinhala.adaderana.lk)
මත්පැන් බව සිතා විෂ සහිත ද්‍රාවණයක් පානය කිරීම හේතුවෙන් තංගල්ල ධීවර වරායෙන් මුහුදු ගිය ධීවරයින් 6 දෙනා අතරින් මේ වනවිට 3 දෙනෙකු මියගොස් තිබේ.
තංගල්ල ධීවර වරායෙන් ධීවර කටයුතු සඳහා පිටත්ව ගිය “ඩෙවෝන්” නම් බහුදින ධීවර යාත්‍රාවේ සිටි ධීවරයින් 06 දෙනෙකු මෙම සිද්ධියට මුහුණ පා ඇති බව සඳහන් ය.
ඊයේ (28) රාත්‍රියේ ඔවුන්ට මුහුදේ පාවෙමින් තිබු බෝතල් කිහිපයක් හමුවී ඇති අතර මත්පැන් බව සිතා ඔවුන් ඒවා පානය කර තිබේ.
ධීවර අධ්‍යක්ෂ ජනරාල් සුසන්ත කහවත්ත මහතා,
“වෛද්‍ය කණ්ඩායම් පණිවුඩ හුවමාරු යන්ත්‍රය භාවිත කරමින් ප්‍රථමාධාර ලබාදෙනවා. අපිට ගොඩබිම සිට යාත්‍රාවක් යැවීමට ප්‍රමාණවත් කාලයක් නැහැ. ඔවුන් ඉතා ගැඹුරු මුහුදේ ඉන්නේ. ඒ අසල ගමන් කරන වෙනත් නෞකාවකට ඔවුන් ගොඩ කිරීමට උත්සාහ ගනිමින් සිටිනවා. දැනට තොරතුරු වාර්තා වෙන්නේ මෙම ධීවරයන්ට හමුවූ බෝතල්වලින් කොටසක් ඒ අවට තිබූ අනෙක් යාත්‍රාවලට බෙදාදී තිබෙන බව. තවත් කුමණ යාත්‍රාවක හෝ මේ බෝතල් තිබෙන්න පුළුවන්. අපි ඒ ගැනත් දැන් දැනුවත් කරමින් යනවා.”
+
දඹුල්ලේ ගිහින් ඉල්මහ විරුවන් සමරා “13 ට එකඟවී” තලගොයි මරා සොහොන් කොත් වල පැහැරූ නිවට රතු කමිසකාරයෝ (29.06.2024)
+
ඉන්ධන මිල වෙනස් වෙයි
(30.06.2024 – 21:36 +0530 – hirunews.lk/sinhala)
මාසිකව සිදුවන මිල සංශෝධන සූත්‍රය අනුව අද (30) මධ්‍යම රාත්‍රියේ සිට ක්‍රියාත්මක වන පරිදි ඉන්ධන මිල ගණන් අඩු කර තිබෙනවා.
ඒ අනුව ඔක්ටෙන් 92 පෙට්‍රල් ලීටරය රුපියල් 11 කින්, ඔක්ටෙන් 95 පෙට්‍රල් ලීටරය රුපියල් 41 කින් සහ සුපර් ඩීසල් මිල රුපියල් 22 කින් අඩුකර තිබෙනවා.
ඔක්ටෙන් 92 පෙට්‍රල් ලීටරයක නව මිල රුපියල් 344 ක්වන අතර ඔක්ටෙන් 95 පෙට්‍රල් ලීටරයේ නව මිල රුපියල් 379 ක්.
මේ අතර සුපර් ඩීසල් ලීටරයක නව මිල රුපියල් 355 ක් ලෙස සටහන්ව තිබුණා.
එමෙන්ම, ලංකා සුදු ඩීසල් මිල සහ ලංකා භූමිතෙල් මිල සංශෝධනය කර නොමැති අතර, එය පැවති මිල ගණන් යටතේම අලෙවිකරන බවයි ලංකා ඛනිජතෙල් නීතිගත සංස්ථාව නිවේදනය කර ඇත්තේ.
සිපෙට්කෝ ඉන්ධන මිල ගණන්වලට සාපේක්ෂව සයිනොපෙක් මිල ගණන් වෙනස් කර තිබෙනවා.
+
තවත් විදෙස් රැකියා ජාවාරමක් උකුස්සා හෙළිකරයි
(01.07.2024 – 20:05 +0530 – sinhala.adaderana.lk)
බලපත්‍රයක් නොමැතිව පුද්ගලයින් විදෙස්ගත කරවීම සඳහා මුදල් ලබාගන්නා නීතිවිරෝධි විදේශ සේවා නියෝජිතායතනයක් පසුගියදා නීතියේ රැහැනට හසු කරගැනුණි.
උකුස්සාගේ අද (01) අනාවරණය ඒ පිළිබඳවය.
කොට්ටාව මාකුඹුර ප්‍රදේශයේ බලපත්‍රයක් නොමැතිව නීතිවිරෝධි අයුරින් පවත්වාගෙන ගිය විදේශ සේවා නියෝජිතායතනයක් සම්බන්ධයෙන් ලැබුණු විශ්වසනීය තොරතුරක් මත විදේශ සේවා නියුක්ති කාර්යංශයේ වැටලීම් අංශයේ නිලධාරින් සමඟ ‘අද දෙරණ උකුස්සා’ අදාළ ආයතනය පිහිටි ස්ථානය සොයා ගියේය.
මෙම ආයතනය සම්බන්ධයෙන් සමාජ මාධ්‍ය ඔස්සේ ද පුළුල් ප්‍රචාරයක් ලබාදී තිබූ අතර අප එම ස්ථානයට ළඟා වූයේ ෆේස්බුක් ඔස්සේ අදාළ ආයතනය පිළිබඳ අප දැනගත් බව පවසමිනි.
පසුව ඔහු ඉල්ලා සිටින ලද ජීව දත්ත පත්‍රිකාව ද සමඟ නැවත ඔහුව හමුවීමට එන බව පවසමින් අප එම ස්ථානයෙන් පිටව ගියේය.
මද වේලාවකට පසු විදේශ සේවා නියුක්ති කාර්යංශයේ තවත් නිලධාරින් කණ්ඩායමක් සමග අප නැවත එම ස්ථානයට ගියේ අදාළ ජාවාරම නෛතිකව තහවුරු කරගැනීමේ අරමුණ ඇතිවය.
සැකකරුගේ මෝටර් රථය තුළද ජාවාරමට අදාළ ලියකියවිලි ඇතැයි ලැබුණු තොරතුර මත වැටලීම් නිලධාරීන් හෝමාගම පොලීසිය දැනුවත් කළ අතර ඉන් පසුව පොලිස් කණ්ඩායමක් එම ස්ථානයට ගෙන්වා ගැනුණි.
එහිදී ඔහුගේ මෝටර් රථයේ තිබී ගුවන් ගමන් බලපත්‍ර 50 කට අධික සංඛ්‍යාවක්, පුද්ගලයින්ගේ ජීව දත්ත පත්‍රිකා ඇතුළු තවත් ලියකියවිලි රැසක් සොයා ගැනුණි.
ජාවාරම්කරුගෙන් සිදුකළ වැඩිදුර ප්‍රශ්න කිරීම්වලදී අනාවරණය වූයේ ඔහු ඇල්බේනියාවේ සහ රුමේනියාවේ රැකියා අවස්ථා ලබාදෙන බව පවසා එක් පුද්ගලයෙකුගෙන් රුපියල් ලක්ෂ 10 ක පමණ මුදලක් ලබාගෙන ඇති බවය.
නමුත් මේ දක්වා එලෙස මුදල් ලබාදුන් කිසිදු පුද්ගලයෙකු ව ඔහු විදෙස්ගත කර නැත.
එසේම අප එම ස්ථානයේ රැඳී සිටින අවස්ථාවේදීත් මෙම ආයතනය සම්බන්ධයෙන් ෆේස්බුක් ඔස්සේ තොරතුරු දැනගත් තවත් පුද්ගලයෙක් අදාළ ආයතනයට පැමිණියේය.
විදේශ සේවා නියුක්ති කාර්යාංශ පනතේ 62(2) වගන්තියට අනුව බලපත්‍රයක් නොමැතිව විදේශ සේවා නියෝජිතායතන පවත්වාගෙන යාම බන්ධනාගාරගත කිරීම දක්වා දඬුවම් ලැබිය හැකි වරදකි.
ඒ අනුව වහාම මෙම සැකකරු අත්අඩංගුවට ගැනීමට නිලධාරින් කටයුතු කළේය.
ඔබටත් විදේශ රැකියා සිහිනයක් තිබිය හැකිය. නමුත් ඔබේ ඒ සිහිනය ඉටු කරගැනීමට මෙවන් ජාවාරම්කරුවන් වෙත ගොස් රැවටුණහොත් ඔබට රට රැකියාවත්, මුදලුත් දෙකම අහිමි වී ඔබ අසරණ තත්ත්වයට පත්වනු නොඅනුමානය.
මෙවැනි නීතිවිරෝධි ක්‍රියාවන් නීතියේ රැහැනට හසුකර ගැනීමට ‘අද දෙරණ උකුස්සා’ නිරන්තර අවදියෙනි.
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴