උතුම් වෙසක් පුන් පොහොය අදයි (23)
(23.05.2024 – 06:39 +0530 – hirunews.lk/sinhala)
ගෞතම බුදුරජාණන් වහන්සේගේ (සිදුහත් කුමරුගේ) උත්පත්තිය, බුද්ධත්වය සහ පරිනිර්වාණය යන තෙමඟුල සිහිකෙරෙන උතුම් වෙසක් පුර පසළොස්වක පොහොය දිනය අදට (23) යෙදී තිබෙනවා.
ශාසනික වැදගත්කම් රාශියකින් යුත් වෙසක් පුර පසළොස්වක පොහොය දිනය ශ්‍රී ලංකාවාසීන් මෙන්ම සමස්ත ලෝකවාසී බෞද්ධ ජනතාව උත්සවශ්‍රීයෙන් සමරනු ලබයි.
බුදු හිමියෝ බුද්ධත්වයෙන් අටවන වර්ෂයේ මණිඅක්ඛිත නා රජුගේ ආරාධනයෙන් කැලණියට වැඩම කරවන ලද්දේ වෙසක් පොහෝ දිනය දා යි.
එම ගමනේදී සමනළ කඳු මුදුනට වැඩම කළ බුදු හිමියෝ සිරිපා සටහන එහි තැබූ අතර එය සිහිපත් කරමින් කෙරෙන සිරිපා සමය නිමවන්නේද වෙසක් පුර පසළොස්වක පොහෝ දිනක වීම විශේෂත්වයක්.
විජය කුමරුගේ පැමිණීම, දුටුගැමුණු රජු විසින් රුවන්වැලි සෑය ඉදිකිරීම ආරම්භ කිරීමද වෙසක් පුර පසළොස්වක පෝ දිනක සිදුවූ බව කියැවෙයි.
බුදු හිමියන්ගේ ධර්ම භාණ්ඩාගාරික ආනන්ද හිමියන් පිරිනිවන්පාන්නේ ද වෙසක් පෝ දිනකයි.
ශාසනික වැදගත්කම් රාශියකින් යුත් වෙසක් පුර පසළොස්වක පොහොය දිනය ශ්‍රී ලංකාවාසීන් මෙන්ම සමස්ත ලෝකවාසී බෞද්ධ ජනතාව විසින් උත්සවශ්‍රීයෙන් සමරනු ලබයි ෴
+
+
+
වෙසක් කලාපයක් හේතුවෙන් කටුනායක – නිට්ටඹුව ප්‍රධාන මාර්ගයේ වේයන්ගොඩ ප්‍රදේශය අවහිර විය හැක
(23.05.2024 – 07:30 +0530 – hirunews.lk/sinhala)
අද (23) සිට දින 07 ක් වෙසක් කලාපයක් හේතුවෙන් අවහිර විය හැකි ප්‍රධාන මාර්ගයක් පිළිබඳව පොලීසියෙන් රියදුරන්ට දැනුම්දීමක් සිදුකර තිබෙනවා.
ඒ, කටුනායක – නිට්ටඹුව ප්‍රධාන මාර්ගය වේයන්ගොඩ ප්‍රදේශයෙන්.
වේයන්ගොඩ පොලිස් වසමේ වෙසක් කලාප 04 ක් සහ වෙසක් තොරණ 07 ක් ප්‍රදර්ශනය කෙරේ.
මේ සම්බන්ධයෙන් පොලිසිය නිකුත් කළ නිවේදනය පහතින් :
සිරකරුවන් 278 කට ජනපති සමාව
(23.05.2024 – 11:13 +0530 – hirunews.lk/sinhala)
මෙවර වෙසක් පොහොය නිමිත්තෙන් බන්ධනාගාරගත සිරකරුවන් 278 දෙනකුට ජනාධිපති විශේෂ රාජ්‍ය සමාව ලබාදී තිබෙනවා.
මේ අතර කාන්තාවන් 10 දෙනකු සිටිනවා.
ඔවුන් සියලු දෙනා අද (23) පෙරවරුවේ නිදහස ලබා පිටව යාමට නියමිතයි.
මොවුන්ගෙන් වැඩිම පිරිසක් නිදහස ලබා ඇත්තේ මහර බන්ධනාගාරයෙන් වන අතර ප්‍රමාණය 37 ක් බවයි බන්ධනාගාර කොමසාරිස් මාධ්‍ය ප්‍රකාශක ගාමිණී බී දිසානායක පවසන්නේ ෴
සම්බුදු තෙමඟුල සමරමින් ඓතිහාසික මාතලේ අළුවිහාර පුදබිම අලෝකමත් කළ ‘හිරු ශාක්‍යසිංහ මංගල්‍යය’
(23.05.2024 – 18:31 +0530 – hirunews.lk/sinhala)
තිලෝගුරු අමා මෑණී සම්මා සම්බුදු රජාණන් වහන්සේගේ උතුම් තෙමඟුල වෙනුවෙන් ‘හිරු ටී.වී., හිරු එෆ්.එම්. ප්‍රමුඛ හිරු මාධ්‍ය ජාලය’ සංවිධාන කරන ‘හිරු ශාක්‍යසිංහ මංගල්‍යය’ අද (23) දිනය පුරා , ඓතිහාසික මාතලේ අලුවිහාර පුද බිම කේන්ද්‍ර කරගනිමින් පැවැත්වුණා.
ඓතිහාසික මාතලේ අලුවිහාර චෛත්‍ය රාජයාණන් වහන්සේ සුවඳ දුමින් පුදා නෙළුම් මල් දහස් ගණනින් පූජා කිරීමත්, සම්බුදු සසුනේ චිරස්ථිතිය උදෙසා අධිෂ්ඨාන පූජා පැවැත්වීම හා ආලෝක පූජා පැවැත්වීම මේ වනවිට ආරම්භ වී තිබෙනවා.
ඒ ‘ආසියානු මාධ්‍ය ජාලයේ’ සභාපති රේනෝ සිල්වා මහතාගේ ප්‍රධානත්වයෙන්.
+
+
+
+
බුදු දහම විකෘති කරන භික්‍ෂුන් ගැන CID පරීක්ෂණ…
(23.05.2024 – 16:40 +0530 – lankacnews.com)
සම්බුද්ධ දේශනාව විකෘති කරන්නන්ට එරෙහිව දැඩි නීති ක්‍රියාත්මක කිරීමට රජය අපේක්ෂා කරන බව බුද්ධශාසන, ආගමික හා සංස්කෘතික කටයුතු අමාත්‍යාංශයේ ලේකම් සෝමරත්න විදානපතිරණ මහතා පැවසීය.
වැඩිදුරටත් අදහස් දැක්වූ අමාත්‍යාංශ ලේකම්වරයා :
“මේ දිනවල ශ්‍රී සද්ධර්මය විකෘති කරමින් විවිධ පාර්ශ්වයන් විසින් කරනු ලබන ප්‍රකාශ සම්බන්ධයෙන් මහා නායක ස්වාමීන් වහන්සේලා විසින් ජනාධිපතිවරයා වෙත කරන ලද පැමිණිල්ලකට අනුව එම ධර්මය විකෘති කරන්නන් සම්බන්ධයෙන් දැඩි නීති ක්‍රියාත්මක කිරීමට රජය අපේක්ෂා කරනවා. මේ වන විටත් මහා නායක ස්වාමීන් වහන්සේලාගේ අනුශාසනා පරිදි දැනට ක්‍රියාත්මකව පවතින විහාර දේවාලගම් පනත වහාම ක්‍රියාත්මක වන පරිදි සංශෝධනය කිරීමට අවශ්‍ය මූලික කටයුතු සිදුකර ඒ සඳහා නීති කෙටුම්පත් සම්පාදක වෙත දැනටමත් යවා තිබෙනවා. ඒ තුළින් අපේක්ෂා කරන්නේ ශ්‍රී සද්ධර්මය විකෘති කරන යම් යම් පාර්ශ්වයන් වෙත එම විකෘති කිරීමට එරෙහිව නීතිය මගින් ක්‍රියාත්මක කිරීම සඳහා මේ වන විට නීති ප්‍රමාණවත් නොවන බැවින් ඒ සඳහා වන අවශ්‍ය මූලික නීතිය සකස් කර ගැනීමයි. ඒ තුළින් නිර්මල ථෙරවාදී බුදු දහම තවත් සියවස් ගණනාවක් ලෝකය තුළ පැවතීම සඳහා අවශ්‍ය පරිසරය සකස් වෙනවා.
ත්‍රෙයිනිකායික මහානායක ස්වාමීන් වහන්සේලාගේ අනුශාසනා පරිදී දැනට ධර්මය විකෘති කරන්නන් පිළිබඳව නීතිමය පියවර ගැනීම සඳහා ත්‍රිපිටකය හා බෞද්ධ සාහිත්‍ය සම්බන්ධ තොරතුරු ජනගත කිරීම සඳහා ක්ෂේත්‍රය සම්බන්ධයෙන් විද්වතුන්ගෙන් සමන්විත මණ්ඩලයක් මේ වන විටත් අමාත්‍යාංශය පත්කර තිබෙනවා. ආචාර්ය අකුරැටියේ නන්ද ස්වාමීන් වහන්සේ, මහාචාර්ය මාවතගම පේමානන්ද ස්වාමීන් වහන්සේලා ඇතුළු තවත් ස්වාමීන් වහන්සේලා එයට ඇතුළත්.
ඒ වගේම පුරාවිද්‍යාව හා ඵෙතිහාසික සාධක සම්බන්ධයෙන් කරන විකෘතින්, ප්‍රකාශයන් නිවැරදි නොවන බවට පෙන්වා දීමට පුරාවිද්‍යාඥයන්ගෙන් හා ඉතිහාසඥයින්ගෙන් සමන්විත කමිටුවක් කටයුතු කරමින් තිබෙනවා. පුරා විද්‍යා චක්‍රවර්තී එල්ලාවල මේධානන්ද ස්වාමීන් වහන්සේගේ උපදේශකත්වයෙන් කමිටුවක් පත් කර තිබෙනවා. මේ සඳහා පුරාවිද්‍යා අධ්‍යක්ෂ ජනරාල්වරයාද සම්බන්ධයි.
එමෙන් සිවුරු දරාගෙන ධර්මය විකෘති කරන ස්වාමීන් වහන්සේලා සම්බන්ධයෙන්ද ක්‍රියා කිරීම සඳහා දැනටමත් අමාත්‍යාංශය අපරාධ පරීක්ෂණ දෙපාර්තමේන්තුවට පැමිණිලි කර ඒ සඳහා අවශ්‍ය ක්‍රියා මාර්ග අරගෙන තිබෙනවා.”
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴