රියැදුරු රැකියාවට ලිතුවේනියාවට ගිය ශ්‍රී ලාංකිකයන් 106 ක් යුරෝපයේ හිර වෙලා
රියැදුරු රැකියාවට ලිතුවේනියාවට ගිය ශ්‍රී ලාංකිකයන් 106 ක් යුරෝපයේ හිර වෙලා
(27.04.2024 – dinamina.lk)
- සුදුසුකම් ලත් රියැදුරන් ඌරු කොටුවකට දැම්මා
- පිටුවහල් කර එවුණු දෙදෙනෙක් හෙළි කරති
ලිතුවේනියාවේ බර වාහන රියැදුරන් ලෙස සේවය කිරීමට ගිය ශ්‍රී ලාංකිකයන් 106 දෙනකු එම රැකියා, ආහාරපාන සහ නවාතැන් පහසුකම් නැති වීම නිසා යුරෝපයේ අතරමං වී සිටින බව එම කණ්ඩායමේ සිටි, ලිතුවේනියාවෙන් පිටුවහල් කර පැමිණි ශ්‍රී ලාංකියෝ දෙදෙනෙක් (2) ඊයේ (26) උදෑසන කටුනායක ගුවන් තොටුපොළේදී පැවසූහ. ඔවුන් දෙදෙනා (2) ඇතුළු ශ්‍රී ලාංකික 108 දෙනකු රජයේ මැදිහත් වීමෙන්, ශ්‍රී ලංකා විදේශ සේවා නියුක්ති කාර්යාංශයේ ලියාපදිංචි වී, රුපියල් ලක්ෂ 12 ක් කොළඹ රැකියා නියෝජිත ආයතනයකට දී ලිතුවේනියාව බලා බර වාහන රියැදුරුන් ලෙස සේවය කිරීම සඳහා පිටත්ව ගොස් තිබේ. මෙසේ ලිතුවේනියාවේ සිට මෙරටට පැමිණි ගාල්ල උණවටුන ප්‍රදේශයේ පදිංචි එන්.ඩබ්. ප්‍රියන්ත මහතා කටුනායක ගුවන් තොටුපොළේදී මෙසේ පැවසීය :
“මම කොළඹ වරායේ බර වාහන රියැදුරකු ලෙස සේවය කරමින් සිටි අතර, මටම අයත් බර වාහන දෙකක් (2) ද වරායේ සේවයට යොදවා තිබුණා. ඒත් ශ්‍රී ලංකාවේ පවතින වර්තමාන ආර්ථික තත්ත්වය යටතේ ඒ වාහන විකුණා, රත්රන් බඩු උගස් කර, රජයේ මැදිහත් වීමෙන් කොළඹ රැකියා නියෝජිත ආයතනයකට රුපියල් ලක්ෂ 12 ක් ගෙවා ලිතුවේනියාවේ බර වාහන රියැදුරන් ලෙස සේවය කිරීමට යෑමට සූදානම් වුණා. මේ මුදලට අමතරව ගුවන් ටිකට් පත් ඇතුළු තවත් බොහෝ දේවල් අප මිල දී ගත්තා.
අප ලිතුවේනියාව බලා පිටත්ව යන උත්සව අවස්ථාවට අග්‍රාමාත්‍ය දිනේෂ් ගුණවර්ධන මහතා ද පැමිණ සහභාගී වී සිටියා. ඒ නිසා අපි විශාල බලාපොරොත්තුවක් රඳවා ගෙන තිබුණා. එහෙත් අප ලිතුවේනියාවට ගියාට පසුව, එරට ‘මාන්වෙස්ටා සමාගම’ අප ශ්‍රී ලංකාවෙන් ගිය පිරිස අතුරින් දෙදෙනකුට (2) පමණක් බර වාහන රියැදුරු තනතුරු දී, අනෙක් පිරිස ඌරු කොටුවල රැකියා සදහා යොමු කළා. අප සියලු දෙනා බර වාහන පැදවීම පිළිබඳ සුදුසුකම් ලත් රියැදුරන්. ඒ නිසා අපි ඌරු කොටුවේ රැකියාවට කැමැති වුණේ නැහැ. ඒ නිසා ලිතුවේනියා රජය වසර දෙකකට (2) අපට දී තිබූ නේවාසික වීසා බලපත්‍ර අහෝසි කළා. ඊට පස්සෙ අප දවසකට යූරෝ 10 ක් වැය කර නවාතැන් පහසුකම් සලසාගත්තා; ඊට අමතරව ආහාරපාන වෙනම මිල දී ගත්තා. අප මේ පිළිබඳ ‘ලංකා මානව හිමිකම් සංවිධානයේ’ සභාපති ආචාර්ය සරත් ජයන්ත පීරිස් මහතා දැනුවත් කිරීමෙන් පසුව මෙසේ අප ශ්‍රී ලංකාවට ගෙන්වා ගැනීමට කටයුතු කළා. ඒ අනුව මමත් සමග ලිතුවේනියාව බලා පිටත්ව ගිය දෙදරු පියෙකු වන අතුරුගිරියේ කාලිංග බුලත්සිංහල මහතා ද පැමිණ සිටිනවා. අපිට මේ වෙනකොට රුපියල් ලක්ෂ 35 විතර මේ ගමනට වියදම් වෙලා තියෙනවා. මේ මුදල් ලංකාවෙ අපේ ගෙවල් දොරවල් උගස් තියල සොයාගත්තෙ, අප ශ්‍රී ලංකාවට ගෙන්වාගන්න ඕනැ නිසා.”
මොවුන් ඊයේ (26) දින අලුයම 05:20 ට තුර්කියේ ඉස්තාන්බුල් නුවර සිට තුර්කි ගුවන් සේවයේ ටී.කේ. 730 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබූ අතර, ඔවුන් භාර ගැනීම සදහා ‘ශ්‍රී ලංකා මානව හිමිකම් සංවිධානයේ’ සභාපති ආචාර්ය සරත් ජයන්ත පීරිස් මහතා ඇතුළු එම සංවිධානයේ නිලධාරීහු දෙදෙනෙක් (2) ද කටුනායක ගුවන් තොටුපොළ වෙත පැමිණ සිටියහ ෴
රුපියල් කෝටි 16 ක වටිනාකමකින් යුත් හෙරොයින් 08kg සමඟ පුද්ගලයෙක් අත්අඩංගුවට
(27.04.2024 – 11:20 +0530 – hirunews.lk/sinhala)
රුපියල් කෝටි 16 ක වටිනාකමකින් යුත් හෙරොයින් 08kg සන්තකයේ තබාගෙන සිටි සැකකරුවෙකු අත්අඩංගුවට ගෙන තිබෙනවා. ඒ මහරගම නාවින්න ප්‍රදේශයේදීයි. මෙලෙස අත් අඩංගුවට පත්ව ඇත්තේ අවුරුදු 45 ක පුද්ගලයෙක් ෴
කාර් එකෙන් මත්ද්‍රව්‍ය කිලෝ 30 ක් ඇද්ද සැකකරුගේ පැටිකිරිය මෙන්න
(27.04.2024 – 12:58 +0530 – hirunews.lk/sinhala)
බියගම පොලීසියට ලද තොරතුරක් මත ඊයේ (26) රාත්‍රියේ කරන ලද වැටලීමකදී රුපියල් කෝටි 19 කට ආසන්න වටිනාකමකින් යුත් මත්ද්‍රව්‍ය තොගයක් සොයාගනු ලැබුවා.
කඩුවෙල බෝමිරිය, බණ්ඩාරවත්ත ප්‍රදේශයේදී මෝටර් රථයක් පරීක්ෂා කිරීමේදී අයිස් මත්ද්‍රව්‍ය කිලෝග්‍රෑම් 15 යි මිලිග්‍රෑම් 81 ක්, හෑෂ් මත්ද්‍රව්‍ය කිලෝග්‍රෑම් 14 යි මිලිග්‍රෑම් 527 ක් සහ හෙරොයින් මිලිග්‍රෑම් 941 ක් සොයා ගැනීමට පොලීසිය සමත්ව තිබෙනවා.
මෙහිදී අත්අඩංගුවට ගත් සැකකරු එම ප්‍රදේශයේම පදිංචි වයස අවුරුදු 31 ක පුද්ගලයෙක් බවයි පොලිස් මාධ්‍ය කොට්ඨාසය පවසන්නේ.
මේ අතර, එම ප්‍රදේශයේම සිදුකළ තවත් වැටලීමකදී ‘අයිස්’ මත්ද්‍රව්‍ය සමග කඩුවෙල සියඹලාපේ පදිංචි සැකකරුවන් දෙදෙනෙකු (2) සහ අරලගංවිල ප්‍රදේශයේ පදිංචි සැකකාරියක (1) අත්අඩංගුවට ගෙන තිබෙනවා ෴
අමෙරිකානු පර්යේෂණ නෞකාවකට මෙරට මුහුදු සීමාව වැසෙයි
(27.04.2024 – 14:34 +0530 – hirunews.lk/sinhala)
අමෙරිකානු පර්යේෂණ නෞකාවක් ශ්‍රී ලංකා මුහුදු තීරයට ඇතුළුවීමට කළ ඉල්ලීම මෙරට රජය ප්‍රතික්ෂේප කර ඇති බව වාර්තා වනවා.
ඒ කිසිඳු පර්යේෂණ නෞකාවක් ශ්‍රී ලංකා මුහුදු සීමාවෙන් ඇතුළුවීමට අවසර නොදීමේ රජයේ නව ප්‍රතිපත්තියට අනුව බවයි වාර්තා වන්නේ.
අමෙරිකානු විශ්වවිද්‍යාල සිසුන් පිරිසක් රැගත් මෙම නෞකාවට අවශ්‍ය ආහාර, ඉන්ධන ඇතුළු පහසුකම් ලබාගැනීම සඳහායි මෙම ඉල්ලීම මෙරට රජයෙන් ඉල්ලා තිබුණා.
කෙසේ නමුත්, ජාත්‍යන්තර මුහුදු සීමාවට යාත්‍රාවක් යොමුකර ඉන් අනතුරුව එම නෞකාවට අවශ්‍ය පහසුකම් සැපයීමට හැකියාව ඇති බව මෙරටින් අදාළ පාර්ශ්වවලට දැනුවත් කර ඇති බවත් වාර්තා වනවා.
මේ අතර අදාළ නෞකාව ඉන්දියාවට ඇතුළුවීමට කළ ඉල්ලීමත් එරට රජයෙන් ප්‍රතික්ෂේප කර තිබෙනවා ෴
පෙම්වතිය සොයා ගිය පෙම්වතා දින 05 ක් තිස්සේ අතුරුදන්
(27.04.2024 – 15:42 +0530 – hirunews.lk/sinhala)
පසුගිය 22 වැනිදා සිට තම සහෝදරයා අතුරුදන් වී ඇති බව අතුරුදන් වූ පුද්ගලයාගේ සහෝදරයා පවසනවා.
මෙලෙස අතුරුදන්ව ඇත්තේ කුලියාපිටිය කබලෑව ප්‍රදේශයේ පදිංචි අවුරුදු 36 ක තරුණයෙක්.
පසුගිය 22 වැනිදා නිවසින් මිතුරෙකු සමග වස්සාඋල්ල ප්‍රදේශයේ තවත් පුද්ගලයෙකුගේ ආරාධනාවකට නිවසකට යන බව පවසමින් සිය සොයුරා පිටත්ව ගිය බවයි අතුරුදන් වූ තරුණයාගේ සහෝදරයා පවසන්නේ.
‘හිරු ප්‍රවෘත්ති’ කළ විමසීමක දී කුලියාපිටිය පොලිසිය සඳහන් කර සිටියේ මෙම තරුණයා පෙම්වතියගේ නිවසට ගිය අතරතුර දී මෙසේ අතුරුදන් වී ඇති බවයි.
මේ සම්බන්ධව පැමිණිලි කළ අතුරුදන් වූ තරුණයාගේ සහෝදරයා පවසා සිටියේ තම අතුරුදන් සොහොයුරා ගිය නිවසේ ‘සිඟිති’ නමින් හඳුන්වන නිවැසියා ඇතුලු පිරිස ද අතුරුදන්ව ඇති බවයි.
අතුරුදන් තරුණයා සමගින් 22 වැනිදා ගිය අනෙක් තරුණයා පවසා සිටියේ තමන් නිවස අසල රැඳී සිටියදී මිතුරා අදාළ ‘සිඟිති’ යන අයගේ නිවසට ගිය බවයි.
සැළකිය යුතු වේලාවක් ගතවුවත් මිතුරා නොපැමිණි නිසා තමන් දිගින් දිගට ඔහුගේ දුරකථනයට ඇමතුමක් ගැනීමට උත්සහකළත් එය ක්‍රියා විරහිතව තිබූ බවයි ඔහු පවසා සිටියේ.
එමෙන්ම අදාළ නිවෙස පිහිටි වස්සාවුල්ල ප්‍රදේශයේ ගම්මුන් පවසන පරිදි ඒ අසල නිවසක සිට වාහන දෙකක් (2) ඉතා වේගයෙන් ගොස් ඇත. ඒ බැව් ආරක්ෂිත කැමරා දර්ශන තහවුරු කළ බවත් මිතුරා පවසනවා.
එමෙන් ම දුරකථන ඇමතුමක් මඟින් ‘සිඟිති’ නැමැත්තා පවසා තිබුණේ අතුරුදන් තරුණයා මරා දමූ බවයි. එමෙන්ම පොලිසියට ‘ගොටු අල්ලන’ පිරිසක් තවමත් ඉන්නා බවත් ඔවුන් ද මරා දමන බවටත් ‘සිඟිති’ නැමැත්තා එම දුරකථන ඇමතුම ඔස්සේ පවසා තිබෙනවා.
එමෙන් ම පියෙක් ලෙස තම දුවට සාධාරණය ඉටු කළ බවයි ‘සිඟිති’ නැමැත්තා පවසා සිටියේ.
සිදුවීම පිළිබඳව කුලියාපිටිය පොලිසිය වැඩිදුර පරික්ෂණ ක්‍රියාත්මකයි ෴
+++++++++
+
රටේ බැංකු ගිණුම් වලින් 60% ක්ම රුපියල් 5,000 ට අඩුයි
(27.04.2024 – 15:47 +0530 – hirunews.lk/sinhala)
මෙරට බැංකු ගිණුම්වලින් තුන් කෝටි හතළිස් තුන්ලක්ෂයකට (34,320,000) වැඩි ප්‍රමාණයක් රුපියල් පන්දහසට (5000) වඩා අඩු තැන්පතු සහිත ගිණුම් බව අනාවරණය වී තිබෙනවා.
මුදල් රාජ්‍ය ඇමැති රංජිත් සියඹලාපිටිය කියා සිටියේ, මෙරට ජනගහනය දෙකෝටි විසි ලක්ෂයක් (22,000,000) වූවත්, බැංකුවල තිබෙන ගිණුම් ප්‍රමාණය පන් කෝටි හැත්තෑ දෙලක්ෂයකි (57,200,000) එම බැංකු ගිණුම්වලින් 60% ක්ම රුපියල් 5000 ට වඩා අඩු තැන්පතු සහිත ගිණුම් බවයි.
ණය නොගෙවීම නිසා දේපොළ අත්පත් කරගැනීමේ නීතිය ක්‍රියාත්මක කිරීම (පරාටේ නීතිය) මේ වසරේ (2024) දෙසැම්බර් දක්වා තාවකාලිකව රජය විසින් නතර කර ඇතත්, බැංකුවලට අධිකරණයට ගොස් අදාළ දේපොළ අත්පත් කරගැනීමට හැකියාව ඇති බවයි රාජ්‍ය අමාත්‍යවරයා සඳහන් කළේ.
බැංකුවල තිබෙන වත්කම්වලින් සියයට 80 කම අයිතිය ඇත්තේ ගිණුම් හිමියන්ට බව පැවසූ අමාත්‍යවරයා, බදු ගෙවීම පැහැර හරින පුද්ගලයින්ගේ බැංකු ගිණුම් අත්හිටුවීමට දේශීය ආදායම් දෙපාර්තමේන්තුව කටයුතු යොදා ඇති බවයි අමාත්‍යවරයා වැඩිදුරටත් කියාසිටියේ ෴
ගෙන්වූ බෙහෙත් ගැන වගකීමක් නොදරණ බවට ලිපියකින් දැනුම් දීලා
(27.04.2024 – 16:17 +0530 – hirunews.lk/sinhala)
වෛද්‍යවරුන්ගේ වෘත්තීය සමිති සන්ධානයේ සභාපති විශේෂඥ වෛද්‍ය ජී.ජී. චමල් සංජීව අපරාධ පරීක්ෂණ දෙපාර්තමේන්තුවට නැවත වතාවක් පැමිණිල්ලක් ගොනුකර තිබෙනවා.
ඒ ඖෂධ නියාමන අධිකාරියේ විධායක අධ්‍යක්ෂකවරයා විසින් ඉකුත් සැප්තැම්බර් මස 17 වැනි දින මානවහිමිකම් කොමිසමට යොමුකළ ලිපියක් මගින් ඖෂධ නියාමන අධිකාරියේ හිටපු විධායක අධ්‍යක්ෂවරයා සහ එම අධ්‍යක්ෂ මණ්ඩලය පසුගිය කාලසීමාව තුළ ගෙන්වූ ඖෂධ සම්බන්ධයෙන් වගකීමක් නොදරන බවට නිකුත් කර ඇති ලිපියක් සම්බන්ධයෙන් පැමිණිලි කිරීමටයි.
ඖෂධ නියාමන අධිකාරියේ ව්‍යවස්ථාවට අනුව එහි 129 වගන්තිය උපයෝගී කරගනිමින් විධායක අධ්‍යක්ෂකවරයා මානව හිමිකම් කොමිසමට මෙම ලිපිය යොමුකර තිබෙන අතර වෛද්‍ය චමල් සංජිව සඳහන් කරන්නේ, මෙම වගන්තිය විශේෂ අවස්ථා සඳහා පමණක් භාවිතා කළ යුතු වගන්තියක් බවයි ෴
දැඩි ආරක්ෂාවක් මැද අධිකරණයට ආ විනිසුරු ඉලන්චෙලියන්
(27.04.2024 – 18:32 +0530 – hirunews.lk/sinhala)
තමා වෙඩිතබා ඝාතනය කිරීමට තැත්කිරීම සම්බන්ධයෙන් යාපනය මහාධිකරණයේ විභාග වන නඩුවේ ප්‍රධාන සාක්ෂිය දීම සඳහා වවුනියාව මහාධිකරණ විනිසුරු මානික්කවාසගම් ඉලන්චෙලියන් දැඩි ආරක්ෂාවක් යටතේ පෙරේදා (25) යාපනය මහාධිකරණය වෙත පැමිණ සිටියා.
නඩුව ආරම්භ වීමට පෙර සිටම අධිකරණ පරිශ්‍රයට දැඩි හමුදා ආරක්ෂාවක් යොදවා තිබූ අතර විනිසුරුවරයා අධිකරණයට පැමිණෙන විට පොලිස් ආරක්ෂාවට අමතරව පොලිස් විශේෂ කාර්ය බළකායේ ආරක්ෂාවද යොදවා තිබූ බවද වාර්තා වෙනවා.
පසුගිය 2017 වසරේ ජූලි මස 22 වනදා එවකට යාපනයේ මහාධිකරණ විනිසුරු ලෙස කටයුතු කළ ඉලන්චෙලියන්, අධිකරණ කටයුතු අවසන් කර සිය මෝටර් රථයෙන් පොලිස් ආරක්ෂාව මැද නිල නිවෙස වෙත යමින් සිටියදී විනිසුරුවරයාට වෙඩිතැබීමට තැත්කළ අවස්ථාවේ ප්‍රහාරය වැළැක්වීමට උත්සාහ කළ විනිසුරුගේ ආරක්ෂාවට සිටි පොලිස් සැරයන්වරයා වෙඩි ප්‍රහාරයට ලක්ව මියගියා.
විනිසුරුවරයා බේරාගැනීමට උත්සහ කිරීමේදී වෙඩි පහරින් මියගිය සැරයන් හේමචන්ද්‍ර ගේ පවුලේ සියලු කටයුතු විනිසුරු ඉලන්චෙලියන් විසින් භාරගෙන සිදුකරයි ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴