මාලිමාවේ තෙල්දෙණිය ක්‍රියාකාරිනියගේ මරණය ඝාතනයක් – අනියම් සැමියා බව කියන මාලිමා ක්‍රියාකාරිකයා අත්අඩංගුවට
(02.04.2024 – dinamina.lk)
= ඝාතනයක් බව හෙළි වූයේ මරණ පරීක්ෂණයෙන් =
නාන කාමරයේ වැටී සිටියදී තුවාල වී ඇතැයි කියමින් මහනුවර රෝහලට ඇතුළත් කළ ‘ජාතික ජනබලවේගයේ’ තෙල්දෙණිය කාන්තා බලමණ්ඩලයේ ප්‍රබල ක්‍රියාකාරිනියක වන ‘අමිලා විමානි කොඩිතුවක්කු’ (48) නැමැත්තියගේ මරණය ඝාතනයක් බව හෙළි වේ.
මෙම ඝාතනයට ඇයගේ අනියම් සැමියා යැයි කියන ද්විත්ව පුරවැසියකු විසින් සිදු කර ඇතැයි සැකකරන අතර ඔහු මේ වන විට රක්ෂිත බන්ධනාගාර ගතව සිටියි.
නාන කාමරයේ වැටී සිටි බව පවසමින් අනියම් සැමියා විසින් පසුගිය 25 දා ‘සුවිසැරිය ගිලන් රථයක්’ ගෙන්වා ගෙන ඇයව මහනුවර රෝහලට ඇතුළත් කර තිබේ. ඇයගේ ශරීරයේ පවතින තුවාලවලට අනුව නාන කාමරයේ වැටීමක් නොව පහරදිමක් හේතුවෙන් ඇති වූ තුවාල බව නිරික්ෂණය වීමෙන් පසු මෙම මරණයට සැකපිට ඇයගේ අනියම් සැමියා පොලීසිය විසින් අත්අඩංගුවට ගෙන තිබේ. කුණ්ඩසාලේ නරේන්ද්‍ර මාවතේ පදිංචි ‘සමන් කොඩිතුවක්කු’ නැමැති සැකකරු ඕස්ට්‍රේලියානු හමුදාවේ සේවයේ නිරතව විශ්‍රාම ගොස් ඇතැයි පැවසෙන අතර මෙම මරණය සම්බන්ධයෙන් මේ වන විට රක්ෂිත බන්ධානාගාර ගතව පසුවේ. මෙම පුද්ගලයාද ‘ජාතික ජන බලවේගයේ’ ක්‍රියාකාරියකු ලෙස කටයුතු කරමින් සිටි අයකු බවට තොරතුරු අනාවරණය වී ඇතැයි පොලීසිය කියයි.
අමිලා විමානි කොඩිතුවක්කු මහත්මිය විවාහක තැනැත්තියක් වන අතර ඇය සමූපාකාර පරීක්ෂකවරියක් ලෙස කටයුතු කරනු ලැබුවාය. පසුගිය 24 දා රාත්‍රියේදී ඇය කුණ්ඩසාලේ නරේන්ද්‍රසිංහ මාවතේ සිය අනියම් සැමියා වූ සමන් කොඩිකුවක්කු රැඳී සිටින නිවෙසට ගොස් තිබේ. එදින රාත්‍රී කාලෙයේ එම නිවෙසේ රැඳී සිට ඇති ඇය ‘නානා කමරයේ වැටී තුවාල වූ බව’ පවසමින් අනියම් සැමියා විසින් 1990 ‘සුවිසැරිය ගිලන් රථයකින්’ 25 දා මහනුවර රෝහලට ඇත්ළත් කර තිබෙන බව මේ සම්බන්ධයෙන් පරීක්ෂණ පවත්වන පල්ලෙකැලේ පොලීසිය පවසයි.
රෝහල්ගත කිරීමෙන් පසු ඇගේ තත්ත්වය බරපතළ වූ බැවින් දැඩි සත්කාර ඒකකයට ඇතුළත් කර ඇති අතර තුවාල සම්බන්ධයෙන් ඇතිවුණු සැකයක් මත රෝහලින් ඒ බව පොලිසිය දැනුම්වත් කර ඇත. ඒ අනුව පල්ලෙකැලේ පොලිසියේ නිලධාරීන් මහනුවර රෝහලේ අධිකරණ වෛද්‍යවරයා මුණගැසී කළ විමසීමේ දී ඔහු පවසා ඇත්තේ එම තුවාල නාන කාමරයේ වැටී සිදුවී නැති බවත් සිරුරේ තැනින් තැනද තුවාල ඇති බැවින් පහරදීමකින් එම තුවාල සිදුව ඇති බව නිරීක්ෂණය වන බවත්ය.
ඒ අනුව පල්ලෙකැලේ පොලිසියේ නිලධාරීන් මහනුවර අපරාධ ස්ථාන පරීක්ෂණාගාර නිලධාරීන් කැඳවා නරේන්ද්‍රසිංහ මාවතේ පිහිටි ඇය අනතුරට ලක්වූ නිවස පරීක්ෂා කර ඇත. ඊට අධිකරණ වෛද්‍යවරයා ද පැමිණ ඇති බව පොලිස් තොරතුරු සඳහන් කළේය. එම විමර්ශනයේ දී පැහැදිලිවම පෙනී ගොස් ඇත්තේ ඇය නාන කාමරයේ වැටී නැති බවටත් එම නිවෙසේ අපරාධමය ස්ථාන ස්වරූපයක් නිරීක්ෂණය වී ඇති බවත්ය. එහිදී නිවෙස් හිමි සමන් කොඩිතුවක්කු ගෙන් ප්‍රශ්න කිරීමේදී, ඔහුගේ හැසිරීම හා ලබාදෙන පිළිතුරු සම්බන්ධයෙන් යම් සැකයක් පොලිස් නිලධාරීන්ට පැන නැ‍ඟී ඇත. එසේම මෙම පුද්ගලයා පොලිසිය මගහැර සිටීමට ද මෙම සිදුවීමෙන් පසු ලොකු උත්සාහයක ද නිරතව තිබේ.
මේ සියල්ලම සැලකිල්ලට ගෙන පල්ලෙකැලේ පොලිසිය අමිලා විමානි කොඩිතුවක්කුට සිදුව ඇති තුවාල සම්බන්ධයෙන් සැකපිට 26 වැනිදා ඇගේ අනියම් සැමියා බව කියන සමන් කොඩිතුවක්කු අත්අඩංගුවට ගෙන ඇත. එහි දී ඔහුගෙන් පොලිසිය කළ දීර්ඝ ප්‍රශ්න කිරීමක දී පවසා ඇත්තේ දෙදෙනා අතර එදා බහින්බස් වීමක් සිදුවූ බවත් ‘ඇය තුවාල වූයේ පඩිපෙළින් වැටී’ බවත්ය.
ඔහු එසේ පැවසුවත් ‘ඇයට අමානුෂික ලෙස පහර දී ඇති බව’ බැලූ බැල්මටම වෛද්‍ය පරීක්ෂණවලින් පවා පෙනී ගොස් ඇති බැවින් ඒ සම්බන්ධයෙන් සැකපිට සමන් කොඩිතුවක්කු නමැති අය තෙල්දෙණිය මහේස්ත්‍රාත් අධිකරණයට 27දා ඉදිරිපත් කළ බව පොලිසිය කියයි. එහිදී ඉදිරිපත් වූ කරුණු සලකා බලා අධිකරණය ඔහුව දින 14 කට රක්ෂිත බන්ධනාගාරගත කළ බවත් දැඩි සත්කාර එකකයේ සතියකට ආසන්න කාලයක් ප්‍රතිකාර ලබමින් සිටි අමිලා විමානි කොඩිතුවක්කු මහත්මිය 30 දා මියගිය බවත් පොලිසිය කියයි. මේ කාලය පුරාවටම ඇයගෙන් පොලිසියට ප්‍රකාශයක් ලබාගැනීමට ඉඩක් නොවූ බවත් ඇය රෝහල්ගත කළ දින සිට මිය යන තුරුම සිටියේ අසාධ්‍ය තත්ත්වයෙන් කිසිවක් ප්‍රකාශ කර ගැනීමටවත් නොහැකි තත්ත්වයකින් බවත් පොලිසිය කියයි.
මෙම මරණය සම්බන්ධයෙන් පැවැති පශ්චාත් මරණ පරීක්ෂණයේ දී පවා තහවුරු වී ඇත්තේ මොට ආයුධයකින් කළ පහරදීමකින් ඇය මියගොස් ඇති බව යැයි පොලිසිය සඳහන් කළේය. ඇගේ අනියම් සැමියා අධිකරණයට මුල් අවස්ථාවේ දී ඉදිරිපත් කරනු ලැබුවේ ඇයට පහරදීම සම්බන්ධයෙන් බවත් දැන් මෙම පහරදීම ඝාතනයක් බව අනාවරණය වී ඇති බැවින් ඒ සම්බන්ධයෙන් ඔහුට එරෙහිව අධිකරණයට කරුණු වාර්තා කරන බවත් පොලිසිය කියයි.
මෙසේ සිය අනියම් බිරිය ඝාතනය කර ඇති මෙම පුද්ගලයා ඔස්ට්‍රේලියානු ජාතික කාන්තාවක් විවාහ කරගෙන සිටින අයෙක් බවත් ඔහු මෙරටට පැමිණ ඇත්තේ මාස තුනකට (3) පෙර බවත් විමර්ශනයේ දී අනාවරණය වී ඇත. ඇය ජාතික ජන බලවේගයේ දේශපාලන ක්‍රියාකාරිනියක් ලෙස සිටි බැවින් ඔහුද ඇය අනුගමනය කරමින් එම පක්ෂයේ දේශපාලන වැඩකටයුතුවලට ක්‍රියාකාරීව සම්බන්ධ වී ඇති බව සඳහන්ය. මේ සිද්ධිය වන අවස්ථාවේ දෙදෙනා අතර විරසකයක් තිබුණු බවට ද වාර්තා වේ ෴
++++++++
+
කැෂියර් එකෙන් පොලිතින් නොගත්තොත් පාරිභෝගිකයන්ට ‘ඩිස්කවුන්ට්’ එකක්
(02.04.2024 – 10:10 +0530 – hirunews.lk/sinhala)
දිවයින පුරා පිහිටි සුපිරි වෙළඳ සැල් සහ ඒවායේ වෙළඳ ශාඛාවලින් භාණ්ඩ මිල දී ගැනීමේ දී, මුදල් කවුන්ටරයෙන් පොලිතීන් බෑග් ලබා නොගන්නා හෝ නැවත භාවිත කළ හැකි බෑගයක් භාණ්ඩ රැගෙන යාමට ගෙන එන පාරිභෝගිකයින්ට, රුපියල් 500 ට වැඩි බිල්පත් සඳහා රුපියල් 5 ක මුදලක් අඩු කිරීමට තීරණය කර තිබෙනවා.
ඒ සඳහා පරිසරය, ස්වාභාවික සම්පත් හා තිරසර සංවර්ධනය පිළිබඳ පාර්ලිමේන්තු ආංශික අධීක්ෂණ කාරක සභා රැස්වීමේ දී සුපිරි වෙළඳසැල්වල ඉහළ කළමණාකාරිවයේ ද එකඟත්වය ද හිමි වූ බවයි පාර්ලිමේන්තුවේ සන්නිවේදන දෙපාර්තමේන්තුව පවසන්නේ.
එම කාරක සභාව හමුවට මෙරට ප්‍රමුඛ සුපිරි වෙළඳසැල් කිහිපයක ප්‍රධානින්, නිමි ඇදුම් වෙළඳසැල්වල ප්‍රධානින් සහ පෑන් නිෂ්පාදන ආයතනවල ප්‍රධානින් ද කැඳවා තිබුණා ෴
‘ඩාලි’ නෞකාවේ විෂ අපද්‍රව්‍ය තිබූ බව මධ්‍යම පරිසර අධිකාරිය දැනුවත් නැහැ
(02.04.2024 – 11:30 +0530 – hirunews.lk/sinhala)
ඉකුත් 26 වැනි දා අමෙරිකාවේ බැල්ටිමෝර් වරාය ආසන්නයේ ෆැන්සිස් ස්කොට් යතුරු පාලමේ ගැටුණු, ශ්‍රී ලංකාව බලා යාත්‍රා කරමින් තිබූ ‘ඩාලි’නැමති භාණ්ඩ ප්‍රවාහන නෞකාව මගින් මෙරටට ගෙන ඒමට නියමිත ද්‍රව්‍ය සම්බන්ධයෙන් මධ්‍යම පරිසර අධිකාරිය දැනුවත් කර නොතිබූ බව පරිසර රාජ්‍ය අමාත්‍ය ජානක වක්කුඹුර පවසනවා.
විපක්ෂ නායක සජිත් ප්‍රේමදාස විසින් අදාළ නෞකාවේ බහාලුම්වල අඩංගුව තිබූ භාණ්ඩ සම්බන්ධයෙන් යොමු කළ ප්‍රශ්නයකට පිළිතුරු දෙමින්.
මේ අතර පරිසර රාජ්‍ය අමාත්‍යවරයා පැවසුවේ, ඊට අදාළ පරීක්ෂණ මේ වනවිටත් ආරම්භකර ඇති බවයි.
මෙරටට පැමිණෙමින් සිටිය දී අනතුරට පත් වූ නෞකාව තුළ ටොන් 746 ක් බර විෂ සහිත අපද්‍රව්‍ය ප්‍රවාහනය කරමින් පැවති බවයි අමෙරිකානු මාධ්‍ය වාර්තා කළේ.
එම මාධ්‍ය වාර්තාවල සඳහන් වූයේ, එම නෞකාව තුළ ටොන් 746 ක් බරැති, විඛාදන, ගිනි ගන්නා සුළු, සංකීර්ණ ද්‍රව්‍ය සහ ප්‍රවාහනයේ දී සැලකිලිමත්විය යුතු පුපුරන ද්‍රව්‍ය, ලිතියම් අයන් බැටරි ද තිබී ඇති බවයි ෴
+++++++
+
+
පාසල් සිසුවියන්ට නොමිලේ ‘සනීපාරක්ෂක තුවා’ දෙන්න කැබිනට් අනුමැතිය
(02.04.2024 – 12:15 +0530 – hirunews.lk/sinhala)
තෝරාගත් පාසල් සිසුවියන් සඳහා නොමිලේ ‘සනීපාරක්ෂක තුවා’ ලබාදීමට අදාළ වැඩසටහනට සඳහා අධ්‍යාපන අමාත්‍යවරයා විසින් ගෙන ආ යෝජනාවට කැබිනට් අනුමැතිය හිමි වී තිබෙනවා.
ඒ අනුව, අති දුෂ්කර ග්‍රාමීය පාසල්, දුෂ්කර පාසල්, හුදකලා පාසල්, වතු පාසල් සහ දරිද්‍රතාවයට මුහුණ දෙන සිසුන් සහිත නාගරික පාසල්වල ඉගනුම ලබන ශිෂ්‍යාවන් 800,000 කට එම සනිපාරක්ෂක තුවා නොමිලේ ලබා දෙනු ඇති.
එම වැඩසටහන මෙම මාසයේ සිටම ක්‍රියාත්මක කිරීමට නියමිතයි ෴
ඇහැලේපොළ වලව්ව ශ්‍රී දළඳා මාළිගාවට
(02.04.2024 – 12:55 +0530 – hirunews.lk/sinhala)
ඇහැලේපොළ වලව්ව සහ ඊට අයත් භූමිය පූජා ඔප්පුවක් මඟින් ශ්‍රී දළදා මාළිගාව වෙත පවරා දීම සඳහා ජනාධිපති රනිල් වික්‍රමසිංහ ඉදිරිපත් කළ යෝජනාවට කැබිනට් අනුමැතිය හිමිව තිබෙනවා.
ඒ අදාළ ගොඩනැගිල්ල ශ්‍රී දළදා මාළිගාව වෙත පවරා දීම සුදුසු බවට ජනාධිපති ලේකම්වරයාගේ වාර්තාව මගින් නිර්දේශ කිරීමෙන් අනතුරුවයි.
ඇහැලේපොළ වලව්ව ශ්‍රී දළදා මාළිගාව වෙත පවරාදීම සම්බන්ධයෙන් අදාළ සියලු පාර්ශ්වයන් සමඟ සාකච්ඡා කර, අමාත්‍ය මණ්ඩලය වෙත නිර්දේශ සහිත වාර්තාවක් ඉදිරිපත් කරන ලෙස ජනාධිපති ලේකම්වරයාට ඉකුත් පෙබරවාරි 19 වැනි දා පැවති අමාත්‍ය මණ්ඩල රැස්වීමේ දී ගනු ලැබූ තීරණයක් පරිදි, දැනුම් දී තිබුණා.
ඒ අනුව, ඉදිරිපත් කර ඇති වාර්තාව මගින්, ඇහැලේපොළ පවුල ප්‍රමුඛ කර ගනිමින් වසර සිය ගණනකට එපිට පැවති මහනුවර රාජධානියේ ශ්‍රී විභූතිය හා එම පරිසර පසුබිම නිරූපණය වන අයුරින් මෙම ගොඩනැගිල්ල තුළ ඉටි රූප කෞතුකාගාරයක් පිහිටුවීමටත්, එමඟින් එම ඉතිහාසය පිළිබඳ තොරතුරු වර්තමාන ජන සමාජය වෙත වඩාත් ආකර්ෂණීය අයුරින් ඉදිරිපත් කිරීමට සහ දේශීය හා විදේශීය සංචාරක ආකර්ෂණය ඇති කිරීමත් අරමුණු කර ගනිමින් ශ්‍රී දළදා මාළිගාව විසින් ඇහැලේපොළ වලව්ව ආශ්‍රිතව ව්‍යාපෘතියක් සකස් කර තිබෙනවා ෴
වාහන වර්ග කිහිපයක් ආනයනයට අනුමැතිය
(02.04.2024 – 13:15 +0530 – hirunews.lk/sinhala)
සංචාරක ව්‍යාපාරයේ අවශ්‍යතාවයන් සඳහා අවශ්‍ය වෑන් රථ සහ කුඩා ප්‍රමාණයේ බස් රථ ආනයනය සඳහා කැබිනට් අනුමැතිය හිමිව තිබෙනවා.
ඒ සංචාරක අමාත්‍ය හරීන් ප්‍රනාන්දු ඉදිරිපත් කර ඇති යෝජනාවකට අනුවයි.
ඒ අනුව විශේෂයෙන්ම සංචාරකයන් ප්‍රවාහනය කිරීම සඳහා භාවිත කිරීමට ආසන 6-15 වෑන් රථ 750 ක් (විදුලි සහ දෙමුහුන් රථ ඇතුළුව) සහ ආසන 16-30 කුඩා ප්‍රමාණයේ බස් රථ හා ආසන 30-45 බස් රථ 250 ක් ආනයනය කිරීමටයි කැබිනට් අනුමැතිය හිමි වුණේ.
කෙසේ වෙතත් එම වාහන ආනයනය සඳහා විශේෂ බදු සහන හිමි වන්නේ නැහැ ෴
පාස්කු වින්දිතයන්ට යුක්තිය ඉටු කරන අයුරු විපක්ෂ නායකවරයා පාර්ලිමේන්තුවේදී පැහැදිලි කරයි
(02.04.2024 – 13:16 +0530 – hirunews.lk/sinhala)
පාස්කු ප්‍රහාරය සම්බන්ධයෙන් තමා ඊයේ (01) ඇසූ ප්‍රශ්නයට අදටත් පිළිතුරක් නොමැති නිසාත් රජයෙන් ඊට නිසි සාධාරණයක් ඉටු නොවීම නිසාත් එළඹෙන ජනාධිපතිවරණයේ දී තමා ජනාධිපතිවරයා ලෙස ජනතාව විසින් තෝරා පත් කර ගත හොත් පාස්කු ප්‍රහාරය සිදු කළ පුද්ගලයන් සොයා ගැනීමට තමා විසින් අනුගමනය කරනා ක්‍රමවේදය සම්බන්ධයෙන් අද (02) පාර්ලිමේන්තුවේ දී විපක්ෂ නායක සජිත් ප්‍රේමදාස පැහැදිලි කළා.
ඒ අනුව, තමා නව ජනාධිපතිවරයා ලෙස තේරී පත්වීමෙන් පසු මාස 2 ක් ඇතුළත 1948 අංක 17 දරණ පරීක්ෂණ කොමිෂන් සභා පනත යටතේ දේශීය හා විදේශීය සාමාජිකයන් 7 ත් 9 ත් අතර සමන්විත කොමිෂන් සභාවක් පත් කරන බවත් ඒ තුළින් අතීත හා වර්තමාන සමයට අයත් සමස්ත ආරක්ෂක වැඩපිළිවෙළ අධ්‍යයනය කිරිමක් තුළ එයට සීමා නොවූ වගකීමක් ඉටු කරමින් ඕනෑම ආයතනයක ඕනෑම පුද්ගලයකුගෙන් කිසිදු තහංචියකින් තොරව ප්‍රකාශන ලබා ගැනීමේ බලය ලබා දෙන බවත් විපක්ෂ නායකවරයා මෙහි දී සඳහන් කළා.
එමෙන්ම, කොමිෂන් සභාව ස්ථාපිත කර සති 6 ක් ඇතුළත ඒ හා සමානව එක්ව කටයුතු කිරිමට ස්කොට්ලන්ඩ්යාර්ඩ්, එෆ්.බී.අයි. ඇතුළු විදේශ ඔත්තු හා ආරක්ෂක සේවා මෙන්ම දේශීය බුද්ධි අංශ හා ආරක්ෂක අංශවලින් සමන්විත ස්ථිර විමර්ශන කාර්යාලයක් පිහිටුවන බවත් කොමිෂන් සභාවේ නිර්දේශ හා නියෝගවලට යටත්ව ශ්‍රී ලංකාවේ නීතිවලට යටත්ව නීතිපතිවරයා විසින් අධිචෝදනා ඉදිරිපත් කිරීම හෝ අවශ්‍ය ක්‍රියාමාර්ග ගැනීම අනිවාර්ය කරන බවත් විපක්ෂ නායකවරයා මෙහි දී පැවසුවා.
තවද ඒ සඳහා අවශ්‍ය වන ආකාරයට 1948 අංක 17 දරණ පරීක්ෂණ කොමිෂන් සභා පනතේ 7(2) හෝ 24 වැනි වගන්ති සංශෝධනය කරන බවත් ඉහත කී වැරදි සම්බන්ධයෙන් අධි චෝදනා ලැබූ පුද්ගලයන් සම්බන්ධයෙන් තීන්දු ලබා දීමට ස්ථිර මහාධිකරණයක් පිහිටුවන බවත් ඒ සඳහා 1978 අංක 2 දරණ අධිකරණ සංවිධාන පනතේ 12 වැනි වගන්තිය සංශෝධනය කිරිමට පියවර ගන්නා බවත් නීතිපතිවරයාගෙන් ස්වාධීන වූ රජයේ අභිචෝදක කාර්යාලයක් පිහිටුවීමට නීති සම්පාදනය කරන බවත් විපක්ෂ නායකවරයා වැඩිදුරටත් සඳහන් කළා.
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴