අවිස්සාවේල්ලේ භීෂණය පැතිරවූ ‘මන්නා රමේෂ්’ බිරියත් සමඟ සාජා පොලිසියට කොටු
අවිස්සාවේල්ලේ භීෂණය පැතිරවූ ‘මන්නා රමේෂ්’ බිරියත් සමඟ සාජා පොලිසියට කොටු
(29.02.2024 – dinamina.lk)
අවිස්සාවේල්ලේ පාතාල භීෂණය පතුරුවමින් මත්කුඩු බෙදාහැරීමේ ජාවාරම මෙහෙයවමින් පාතාල අපරාධවල නිරතව සිටින ප්‍රබල පාතාල අපරාධකරුවකු වන ‘මන්නා රමේෂ්’ සිය බිරිය සමඟ සාජා පොලිසියට දින තුනකට (3) පෙර හසුවී ඇතැයි මෙරට ආරක්ෂක අංශ වෙත ඊයේ (28) වන විට තොරතුරු ලැබී තිබිණි.
මෝටර් රථයකින් සාජා සිට ඩුබායි බලා ‘මන්නා රමේෂ්’ සිය බිරිය සමඟ ගමන් කරමින් සිටියදී සාජා පොලිසිය එම රථය නතර කරන ලෙස සංඥා කළ අවස්ථාවේදී ඊට වෙට්ටුවක් දමා යන්නට ගොසින් පොලිසියට හසුවී ඇති බව එරටින් ලැබෙන තොරතුරුවල සඳහන්ය. සාජා පොලිසිය ‘මන්නා රමේෂ්’ පදවාගෙන යමින් සිටි මෝටර් රථය නතර කර ඇත්තේ ඒ තුළ මත්ද්‍රව්‍ය ප්‍රවාහනය කරන බවට ලද තොරතුරකට අනුවය. එම තොරතුර ‘මන්නා රමේෂ්’ එරට පොලිසියට කොටුකර දීම සඳහා තවත් පාතාලයේම අපරාධකරුවකු විසින් ලබාදුන් ව්‍යාජ තොරතුරක් බව සඳහන්ය. ඒ ‘මන්නා රමේෂ්’ට ජාත්‍යන්තර පොලිසිය මඟින් රතු නිවේදනයක් ඇති බැවින් එරට පොලිසිය විසින් ඔහුව පරීක්ෂා කරන විට ඔහු ‘රතු වරෙන්තුකරුවකු’ බව හෙළිවන බැවිනි.
‘මාකඳුරේ මධූෂ්’ නමැති පාතාලයේ ප්‍රබලයාව ඩුබායි පොලිසිය මඟින් අත්අඩංගුවට ගත්තේ ද මෙවැනි ඔත්තුවකට අනුවය. ඩුබායිහි සුපිරි හෝටලයක සිය දියණියගේ උපන් දින සාදය පැවති අවස්ථාවේදී එම සාදය පැවති ශාලාවට මත්ද්‍රව්‍ය දමා ඩුබායි පොලිසිය යොදා වැටලීමක් කර ‘මාකඳුරේ මධූෂ්’ ඇතුළු පිරිස අල්ලා දී තිබුණේ ප්‍රබල මත්කුඩු ජාවාරම්කරුවකු විසිනි. ‘අන්නාසි මොරිල්’ නමැති මත්කුඩු ජාවාරම්කරු එම ඔත්තුව දී තිබුණු බව එකල සඳහන් විය. ඊට මුල්වී ඇත්තේ ‘අන්නාසි මොරිල්’ මෙරටට එවූ මත්කුඩු කිලෝ 200 ක් පමණ ‘මාකඳුරේ මධූෂ්’ සිය ගෝලයන් යොදා පොලිස් වෙසින් කොල්ලකා තිබීමක් හේතුවෙන් බව ද එකල කියැවිණි. ‘මාකඳුරේ මධූෂ්’ හා ‘අන්නාසි මොරිල්’ එකට මත්කුඩු ජාවාරමේ නිරතව සිටි අය බව කියැවේ. ‘මන්නා රමේෂ්’ සහ ඔහුව මෙසේ පාවා දුන් පාතාල අපරාධකරු ද ඩුබායිහි එකට සිටි දෙදෙනකු (2) බව බුද්ධි අංශ නිලධාරියෙක් සඳහන් කළේය. එම පාතාල අපරාධකරු ‘කුරුණෑගල දරුන්’ නමැති අයකු බව ද ඔහු පැවසීය. දෙදෙනා (2) අතර ඇතිවුණු ගැටුමකින් අනතුරුව ‘මන්නා රමේෂ්’ව ඔහු සැලසුම්සහගතව පොලිසියට හසුකර දී ඇති බව ද එම බුද්ධි අංශ නිලධාරියා කීය.
‘මන්නා රමේෂ්’ට එරෙහිව මිනිස් ඝාතන හා ඝාතන තැත් කිරීම් 10 කට වැඩි ප්‍රමණයක් ඇති බව පොලිස් වාර්තා සඳහන් කරයි. ත්‍රිරෝද රථයක නැඟී මළ ගෙදරක යමින් සිටි තරුණයන් සිව්දෙනකුට (4) පසුගිය වසරේ සැත්තැම්බර් 20 වැනිදා රාත්‍රියේදී තල්දූවේදී වෙඩි තබා තිදෙනකු (3) ඝාතනය කරනු ලැබුවේ ද ‘මන්නා රමේෂ්’ ඩුබායි සිට සිය ගෝලබාලයන්ව මෙහෙයවමිනි.
එම ඝාතන සම්බන්ධයෙන් විමර්ශන පැවැත්වූ අවිස්සාවේල්ල මූලස්ථාන පොලිසියේ ස්ථානාධිපතිවරයාට ද ‘මන්නා රමේෂ්’ ඩුබායි සිට තර්ජනය කර තිබුණේ දරුවන්ට හානි කරන බව කියමිනි. අවිස්සාවේල්ලේ පාතාල භීෂණයක් පතුරුවාගෙන සිටි මෙම අපරාධකරු මෙරටට ගෙන්වා ගැනීමට ඇති හැකියාව සාජා පොලිසිය සමඟ සම්බන්ධ වෙමින් අවශ්‍ය පියවර ගන්නා බව උසස් පොලිස් නිලධාරියෙක් සඳහන් කළේය. ජාත්‍යන්තර පොලිසිය මඟින්ද මෙම අත්අඩංගුවට ගැනීමට අදාළ තොරතුරු විමසා ඇති බවද එම නිලධාරියා කීය. මෙයට දින කිහිපයකට පෙර ඩුබායිහි රාත්‍රී සමාජ ශාලාවක ඇතිවුණු යම් සිදුවීමක් මුල්කරගෙන ‘ඌරගහ මයිකල්’ නමැති පාතාලයේ ප්‍රබල අපරාධකරු ඇතුළු පිරිස ඩුබායි පොලිසිය විසින් අත්අඩංගුවට ගෙන තිබිණි. ඒ අය සම්බන්ධයෙන් ගන්නා ඉදිරි ක්‍රියාමාර්ග මෙතෙක් ඩුබායි පොලිසිය ජාත්‍යන්තර පොලිසිය මඟින් මෙරට දැනුවත් කර නැත.
ගයාන් කුමාර වීරසිංහ
++++++++
+
කරන්දෙණියේ PHI ඝාතනය : සැකකරුවන් අල්ලන්න CCTV දර්ශන 100 ක් පරීක්ෂා කර අවසන්
(29.02.2024 – dinamina.lk)
ශ්‍රී ලංකා මහජන සෞඛ්‍ය පරීක්ෂක සංගමයේ භාණ්ඩාගාරික සහ කරන්දෙණිය පරිපාලන මහජන සෞඛ්‍ය පරීක්ෂක ‘දිලීප රොෂාන් කුමාර’ මහතාගේ ඝාතනය සම්බන්ධයෙන් වැදගත් තොරතුරක් අනාවරණය කර ගැනීම සඳහා සීසීටීවී දර්ශන 100 කට ආසන්න ප්‍රමාණයක් මේ වන විට පරීක්ෂාවට ලක් කර ඇතැයි ජ්‍යෙෂ්ඨ පොලිස් නිලධාරියෙක් පැවසීය.
එකී පරීක්ෂණ කටයුතු සඳහා කොළඹ අපරාධ කොට්ඨාසයේ පොලිස් පරීක්ෂක එස්.එස්.පී.ජේ. නිශාන්ත හා ලසන්ත ධර්මරත්න මහත්වරුන්ගේ ප්‍රධානත්වයෙන් යුත් කණ්ඩායම් දෙකක් (2) ඇල්පිටියට ගොස් ඇත.
මීට වසරකුත් මාසයකට පෙර ශ්‍රී ලංකා පරිපාලන මහජන සෞඛ්‍ය පරීක්ෂක සංගමයේ භාණ්ඩාගාරික තනතුර භාර ගන්නා අවස්ථාවේදී ගිණුමේ තැන්පත්ව තිබූ මුදල් සම්බන්ධයෙන් අඩුවක් තිබී ඇති බැවින් ඒ සම්බන්ධයෙන් යම් මතභේදයක් තිබූ බවට තොරතුරු ලැබී ඇතැයි ද විමර්ශන නිලධාරියෙක් පැවසීය.
ප්‍රධාන තනතුරක් සම්බන්ධයෙන් ඔහුගේ නම යෝජනා වීම සම්බන්ධයෙන්ද? විමර්ශන නිලධාරීන්ගේ අවධානය යොමුවී ඇති අතර ඒ සෑම තොරතුරක් ඔස්සේම දිගු විමර්ශනයක් සිදු කරන බව ජ්‍යෙෂ්ඨ නිලධාරියා වැඩිදුරටත් පැවසීය.
පැහැදිලිවම මෙම ඝාතනය කොන්ත්‍රාත්තුවක් මත සිදු කළ එකක් බවට පරිපාලන නිලධාරියාගේ පසුබිම පිළිබඳ පරීක්ෂා කිරීමේදී පැහැදිලි වන බවත් ඔහු ඉතා හොඳින් රාජකාරි ජීවිතය මෙන්ම පෞද්ගලික ජීවිතය පවත්වාගෙන ගිය අයකු බවට ඕනෑවටත් වඩා තොරතුරු ලැබී ඇති බව ද පරීක්ෂණ පවත්වන නිලධාරියෙක් පැවසීය. රාජකාරිය අකුරටම ඉටු කළ නිලධාරියකු වූ ඝාතනයට ලක්වූ ‘දීලිප රොෂාන් කුමාර’ මහතා ජනතාවගේ ජීවිත ආරක්ෂාව වෙනුවෙන් විවිධ කර්මාන්ත ශාලාවන්ට එරෙහිව පැවරූ නඩු ඔහුගේ ජීවිතය අහිමි කිරීමට තරම් ඒවා නොවන බවත් එම නඩු සම්බන්ධයෙන් පරීක්ෂා කිරීමේදී පැහැදිලි වන බව එම නිලධාරියා කීය.
ඔහුගේ පෞද්ගලික ජීවිතේ ඉඩකඩම් නඩු හෝ වෙනත් එදිරිවාදියකුගෙන් තර්ජනයක් සම්බන්ධයෙන් පවුලේ සමීපතමයන්ගෙන් හෝ දැන ගැනීමට ලැබී නැතැයි ද එම නිලධාරියා වැඩිදුරටත් කීය ෴
පැල් රකින උපාධිධාරිනිය
(29.02.2024 – 07:36 +0530 – hirunews.lk/sinhala)
රැකියාවක් නොමැති වීම නිසා වගා කරමින් එම වගා අලින්ගෙන් ආරක්ෂා කර ගැනීම සඳහා ගහක් උඩ තැනූ පැලක පැල් රකින උපාධිදාරිනියක් පිළිබඳ තොරතුරු අනුරාධපුර ප්‍රදේශයෙන් වාර්තා වෙනවා.
නමින් ඩී.පී. චතුරිකා දර්ශනී වන ඇය මූලික අධ්‍යාපනය ඔයාමඩුව සිද්ධාර්ථ විද්‍යාලයෙන් සපුරා ඇති අතර උසස් අධ්‍යාපනය සඳහා අනුරාධපුර මධ්‍ය මහා විද්‍යාලයට ඇතුළත් වී තිබෙනවා.
උසස් පෙළ කඩඉමට අති සාර්ථක ලෙස මුහුණ දෙන මෙම තරුණිය 2014 ව‍ර්ෂයේ විශ්වවිද්‍යාල වරම් ලබනවා.
වසර 4 ක විශේෂ උපාධියක් හැදෑරීමෙන් පසුව ඊට සුදුසු රැකියාවක් සොයා ගැනීම සඳහා වසර ගණනක් තිස්සේ වෙහෙසුණද ඇයට සුදුසු රැකියාවක් ලැබී නොමැති බවයි වාර්තා වන්නේ.
ඒ අනුව ජීවත් වීමට මාර්ගයක් නොමැති වීම නිසා ඇය ගොවිතැනට යොමු වී තිබෙනවා.
දහවල් කාලයේ වගා කටයුතු සිදු කරන මෙම තරුණිය එම වගාවන් අලින් ඇතුළු වන සතුන්ගෙන් ආරක්ෂා කර ගැනීම සඳහා රාත්‍රී කාලයේ පැල් රකින බවයි අප වාර්තාකරු සඳහන් කර සිටියේ ෴
මොණරාගලදී බිහිසුණු අනතුරක්
(29.02.2024 – 08:41 +0530 – hirunews.lk/sinhala)
මොණරාගලදී ලංගම බස් රථයක් පෙරලීමෙන් ළමුන් ඇතුළු මගීන් 36 දෙනෙකුට තුවාල ලබා තිබෙනවා.
මෙසේ තුවාල ලැබූ පිරිස සියඹලාන්ඩුව රෝහලට ඇතුලත් කර ඇති බවයි පොලිසිය සඳහන් කළේ.
අප වාර්තාකරු පැවසුවේ අද (29) උදෑසන 06:45 ට පමණ කොඩයාන වංගුව අසළදී මෙම අනතුර සිදුව ඇති බවයි.
+
+
අධික උණුසුම මැයි තෙක්
(29.02.2024 – 09:23 +0530 – hirunews.lk/sinhala)
දිවයිනේ ප්‍රදේශ රැසකට බලපා ඇති අධික උණුසුම් කාලගුණ තත්ත්වය මැයි මාසය දක්වා අපේක්ෂා කරන බව කාලගුණ විද්‍යා දෙපාර්තමේන්තුව ප්‍රකාශ කළා.
එවැනි පසුබිමක අද (29) සහ හෙට (01) ත් පාසල් දරුවන් එළිමහනේ රැඳවීමෙන් වළකින ලෙසයි අධ්‍යාපන අමාත්‍යාංශය දැනුම් දෙනවා.
උපරිම උෂ්ණත්වය වන සෙල්සියස් අංශක 36.8 කොළඹ සහ රත්මලාන ප්‍රදේශවලින් වාර්තා වන බවයි කාලගුණ විද්‍යා දෙපාර්තමේන්තුව සඳහන් කළේ.
ඔවුන් නිකුත් කළ නවතම වාර්තාවේ දැකවුණේ කොළඹ, ගම්පහ, කළුතර, පුත්තලම, කුරුණෑගල, ගාල්ල, මාතර, හම්බන්තොට සහ රත්නපුර යන දිස්ත්‍රික්කවල ඇතැම් ස්ථානවල මිනිස් සිරුරට දැනෙන උණුසුම් කාලගුණ තත්ත්වයක් පැවතිය හැකි බවයි.
පවතින උණුසුම් කාලගුණය ජනතාවගේ දෛනික කටයුතුවලටද බලපෑම් එල්ල කර තිබෙනවා ෴
නාගානන්ද කොඩිතුවක්කුගේ නීතිඥ භාවය අහෝසි කිරීමට ශ්‍රේෂ්ඨාධිකරණයෙන් තීන්දුවක්
(29.02.2024 – 10:45 +0530 – hirunews.lk/sinhala)
නීතිඥ නාගානන්ද කොඩිතුවක්කුගේ නීතිඥභාවය අහෝසි කිරීමට ශ්‍රේෂ්ඨාධිකරණය අද (29) තීන්දු කළා.
ඔහු ගොනුකළ පැමිණිල්ලේ තීන්දු ප්‍රකාශයට පත් කරනු ලැබුවේ ප්‍රියන්ත ජයවර්ධන, ප්‍රීතිපද්මන් සූරසේන සහ එස්. තුරයිරාජා යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල විසින්.
2014 වසරේදී මොහු ශ්‍රේෂ්ඨාධිකරණයට දිවුරුම් ප්‍රකාශයක් යොමුකරමින් එක්තරා විනිසුරුවරුන් කිහිපදෙනෙකු දූෂිත බැවින් ඔවුන් ඉදිරියේ නඩු නොකැඳවන ලෙස ඉල්ලීමක් කළා.
ඒ හරහා මොහු විෂමාචාරය නමැති වැරැද්ද සිදුකර ඇති බව තීන්දු කරමිනුයි විනිසුරු මඩුල්ල මෙම තීන්දු ලබා දුන්නේ ෴
++++++
මාර්තු 04 සිට මෝටර් රථ දෙපාර්තමේන්තුවේ සේවා ඩිජිටල්කරණය වෙයි
(29.02.2024 – 12:00 +0530 – hirunews.lk/sinhala)
මෝටර් රථ ප්‍රවාහන දෙපාර්තමේන්තුව හරහා ලබා ගන්නා සේවාවන් මාර්තු මස 04 වනදා සිට ඩිජිටල් ක්‍රමවේදයකට සිදු කෙරෙන බව ප්‍රවාහන හා මහාමාර්ග අමාත්‍ය බන්දුල ගුණවර්ධන පවසනවා.
රජයේ ප්‍රවෘත්ති දෙපාර්තමේන්තුවේ අද (29) පැවති ප්‍රවෘත්ති සාකච්ඡාවකට එක්වෙමින් ඔහු කියා සිටියේ ‘තමන් පදිංචි දිස්ත්‍රික් දුරකතන කේතය’ 2117116 යන දුරකතක අංකය ඉදිරියට යොදා ඇමතීමෙන් දිනයක් සහ වේලාවක් වෙන් කරගැනීමට හැකියාව ලැබෙන බවයි.
එමෙන්ම මෝටර් රථ ප්‍රවාහන දෙපාර්තමේන්තුවේ වෙබ් අඩවිය
( https://dmt.gov.lk/ ) හරහා ද මෙම සේවාවන් ලබා ගැනීමට දිනයක් සහ වේලාවක් වෙන් කරගැනීමට හැකියාව පවතිනවා ෴
නවතා දමා ඇති මාර්ග පාලම් ව්‍යාපෘති අප්‍රේල් මාසයෙන් පසු යළි ඇරඹේ
(29.02.2024 – 12:30 +0530 – hirunews.lk/sinhala)
නවතා දමා ඇති මාර්ග, පාලම් ඇතුළු අනෙකුත් ව්‍යාපෘති අප්‍රේල් මාසයෙන් පසු ආරම්භ කිරීමට හැකිවනු ඇති බව ප්‍රවාහන හා මහාමාර්ග අමාත්‍ය බන්දුල ගුණවර්ධන පවසනවා.
හෝමාගම ප්‍රදේශයේදී මාර්ග කිලෝමීටර් 1500 ක් සංවර්ධනය කිරීමේ ජාතික වැඩසටහනේ පලමු (1) අදියරේ සමාරම්භයට අද (29) එක්වෙමිනුයි ඔහු මේ බව කියා සිටියේ ෴
ජපන් රැකියා සඳහා විශේෂ අවස්ථාවක්
(29.02.2024 – 12:41 +0530 – hirunews.lk/sinhala)
කම්කරු හා විදේශ රැකියා අමාත්‍ය මනුෂ නානායක්කාර ජපානයෙන් කළ ඉල්ලීමක් අනුව ජපානයේ ගොඩනැගිලි පිරිසිඳු කිරීමේ වෘත්තීය රැකියා අවස්ථා ශ්‍රී ලාංකික ශ්‍රමිකයින්ට විවෘත වන අතර එම ශ්‍රමිකයින් තෝරා ගැනීම සදහා වන පරීක්ෂණ මෙම වසරේ (2024) ජුනි මාසයේදී ආරම්භ වන බවට තොරතුරු වාර්තා වෙනවා.
අමාත්‍යවරයා සහ ‘ජපානයේ ගොඩනැගිලි පිරිසිඳු කරන්නන්ගේ සංගමය’ අතර ඊයේ (28) දිනයේදී කම්කරු හා විදේශ රැකියා අමාත්‍යාංශයේ පැවති සාකච්ඡවකදී මේ බව අනාවරණය වූ අතර සිය ඉල්ලීමට සුබවාදී ප්‍රතිචාරයක් ලබාදෙමින් මෙම රැකියා අවස්ථා ශ්‍රී ලාංකික ශ්‍රමිකයින්ට විවෘත කිරීම සම්බන්ධයෙන් ජපන් රජයට සහ ආගමන විගමන විෂයභාර එරට අධිකරණ අමාත්‍යවරයාට මනුෂ නානායක්කාර සිය ස්තූතිය ද පුදකර සිටිනවා.
‘එන් 4’ මටටමේ ජපන් භාෂා ප්‍රවීනතාවය ලබාගත් අයට ‘SSW කාණ්ඩය’ යටතේ මේ සදහා සුදුසුකම් ලබන අතර සුදුසුකම් තහවුරු කරගැනීමේ පරීක්ෂණ කොටස් දෙකකින් (2) සමත්විතව බවයි වාර්තා වෙන්නේ.
එහිදී ලිඛිත පරීක්ෂණයක් මෙන්ම ප්‍රායෝගික පරීක්ෂණයක්ද පැවැත්වෙනවා.
ගොඩනැගිලි පිරිසිදු කිරීමේ ක්ෂේත්‍රය යටතේ ‘SSW පරීක්ෂණය’ සදහා මුහුණදීමට අපේක්ෂිත ශ්‍රමිකයින් සදහා වන පුහුණු අවස්ථා සම්බන්ධයෙන් අමාත්‍යවරයා විමසා සිටි අතර එයට ප්‍රතිචාර දැක්වූ ජපන් නියෝජිතයින් සදහන් කළේ ඒ සදහා අවශ්‍ය පෙළපොත් සහ වීඩියෝ පට සකස් කර ඇති බවයි.
ඒවා ජනතාව අතරට ගෙන යාම සදහා ක්‍රමවේදයක් සකස් කරන ලෙසට අමාත්‍යවරයා මෙහිදී උපදෙස් ලබා දී තිබෙනවා.
මෙම රැකියා සදහා යොමුවන ශ්‍රමිකයින්ට ‘SSW 2’ මට්ටමට යොමුවීම මගින් කළමනාකාර තනතුරු සඳහා යොමුවීමටද අවස්ථාව හිමිවන බවත් එමගින් ජපානයේ ස්ථිර පදිංචියටද අවස්ථාව හිමිවන බවද ජපාන නියෝජිතයින් මෙහිදී පෙන්වා දී ඇති අතර මෙම සාකච්ඡාව සදහා ජපානයේ ගොඩනැගිලි පිරිසිදු කරන්නන්ගේ සංගමයේ විශේෂ නියෝජිත Sachio Sugiyama ඇතුළු ජපන් නියෝජිතයෝ එක්ව සිටි බවයි වාර්තා වෙන්නේ ෴
වී සඳහා ගොවීන් සහතික මිලක් ඉල්ලයි
(29.02.2024 – 13:00 +0530 – hirunews.lk/sinhala)
මෙවර වී අස්වනු සඳහා කිලෝවකට අවම වශයෙන් රුපියල් 150 ත් 200 ත් අතර සහතික මිලක් නියම විය යුතු බව ගොවීන් පවසනවා.
දිවයිනේ බොහෝ ප්‍රදේශවල මහ කන්නයේ වී අස්වනු නෙලීමේ කටයුතු සියයට 80 කින් පමණ මේ වනවිට අවසන්ව තිබෙනවා.
ගොවීන් ප්‍රකාශ කළේ වසර 3 කට පසු මෙවර ඉහළ අස්වැන්නක් ලැබී ඇති බවයි.
එසේ තිබියදීත්, සිය අස්වනු මිල දී ගැනීමට රජයෙන් මෙතෙක් කිසිදු වැඩපිළිවෙළක් අරඹා නොමැති බවට ගොවීන් චෝදනා කරනවා.
ගොවීන්ගෙන් වී මිල දී ගැනීම සඳහා සුළු හා මධ්‍ය පරිමාණ මෝල් හිමියන්ට රජයෙන් මුදල් වෙන් කරන බව පැවසුවද, මෙතෙක් තමන්ට කිසිදු මුදලක් ලැබී නැතැයි සුළු හා මධ්‍ය පරිමාණ සහල් මෝල් හිමියන්ගේ සංගමයේ ලේකම් එස්.ජී. ගුණදාස පවසනවා.
මේ අතර, කාබනික පොහොර භාවිතය මෙරට ජාතික පොහොර ප්‍රතිපත්තියට ඇතුළත් කළ යුතු බව ආහාර සුරක්ෂිතතාව හා කෘෂිකර්මය පිළිබඳ ආංශික අධීක්ෂණ කාරක සභාව පවසනවා.
පසුගියදා පාර්ලිමේන්තුවේදී රැස්වූ අවස්ථාවේදී එම සභාව අවධාරණය කළේ කාබනික පොහොර යොදා ගනිමින් ගොවිතැන් කරන ආදර්ශ කෘෂිකාර්මික ගොවිපළ වෙත සෘජුවම ගොස් එහි තත්ත්වයන් සොයා බැලීමට කටයුතු කරන බවයි.
එමෙන්ම, පොහොර භාවිතය සම්බන්ධයෙන් ස්ථිර ජාතික ප්‍රතිපත්තියක් ක්‍රියාත්මක කළහොත් සාධනීය වෙනසක් ඇති කළ හැකි බව ද ආහාර සුරක්ෂිතතාව හා කෘෂිකර්මය පිළිබඳ ආංශික අධීක්ෂණ කාරක සභාව කියා සිටියා ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴