‘ජාතික ජන බලවේගය’ ලියාපදිංචිය නීති විරෝධී බවට ශ්‍රේෂ්ඨාධිකරණය හමුවේ මෝසමක්
‘ජාතික ජන බලවේගය’ ලියාපදිංචිය නීති විරෝධී බවට ශ්‍රේෂ්ඨාධිකරණය හමුවේ මෝසමක්
(06.02.2024 – 18:32 +0530 – hirunews.lk/sinhala)
‘ජාතික ජන බලවේගය’ (මාලිමාව / JVP) මැතිවරණ කොමිසම විසින් ලියාපදිංචි කර ඇති ආකාරය නීති විරෝධී බවත් ඒ සම්බන්ධයෙන් කරුණු දැක්වීමට අවසර ලබාදෙන ලෙසත් ඉල්ලමින් ශ්‍රේෂ්ඨාධිකරණය හමුවේ මෝසමක් ගොනුකර තිබෙනවා.
‘විනිවිද පෙරමුණේ’ ලේකම් ‘නීතිඥ නාගානන්ද කොඩිතුවකු’ විසින් මෙම මෝසම ඉදිරිපත් කර තිබුණා.
‘විනිවිද පෙරමුණ’ දේශපාලන පක්ෂයක් වශයෙන් ලියාපදිංචි කිරීම ප්‍රතික්ෂේප කිරීමට මැතිවරණ කොමිසම ගත් තීරණයට එරෙහිව ගොනු කර තිබෙන රිට් පෙත්සමකට අදාළව ‘නාගානන්ද කොඩිතුවක්කු’ විසින් මෙම මෝසම ඉදිරිපත් කර ඇති බවයි අප අධිකරණය වාර්තාකරු පැවසුවේ.
එම මෝසම තුළින් ‘නාගානන්ද කොඩිතුවක්කු’ කියා සිටින්නේ ‘ජනතා විමුක්ති පෙරමුණේ’ කොටසක් වන ‘ජාතික ජන බලවේගය’ දේශපාලන පක්ෂයක් වශයෙන් ලියාපදිංචි කිරීම සම්පූර්ණයෙන්ම නීතියට පටහැනි බවයි.
ආණ්ඩුක්‍රම ව්‍යවස්ථාවේ 103(2) වගන්තිය ප්‍රකාරව එකම පක්ෂයක විවිධ ශාඛා වෙන් වෙන්ව දේශපාලන පක්ෂ වශයෙන් ලියාපදිංචි කිරීම මැතිවරණ නීති රීතීන්ට පටහැනි බවත් ඒ තුළින් නිදහස් හා සාධාරණ මැතිවරණයක් පැවැත්වීමට ආණ්ඩුක්‍රම ව්‍යවස්ථාව මගින් සහතික කර තිබෙන අයිතිය උල්ලංඝනය වන අතර එය සම්පූර්ණයෙන්ම නීතියට පටහැනි බවත් අදාළ මෝසමේ සඳහන් කර තිබෙනවා.
ඒ අනුව ‘ජාතික ජන බලවේගය’ ලියාපදිංචි කර ඇති ආකාරය නීති විරෝධී බවට කරුණු දැක්වීම සඳහා අවසර ලබා දෙන ලෙසත් ‘නාගානන්ද කොඩිතුවක්කු’ එම මෝසමෙන් ශ්‍රේෂ්ඨාධිකරණයෙන් ඉල්ලා සිටිනවා ෴
+++++++++
+
මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත ශ්‍රේෂ්ඨාධිකරණ තීරණයට පටහැනිව සම්මත කර ඇති බවට දැනුවත්භාවයෙන් තොරව සහ පදනම් විරහිත ලෙස පළකර ඇති වාර්තා පිළිබඳව කථානායක කාර්යාලය විසින් මහජනතාවට කරනු ලබන පැහැදිලි කිරීම
(06.02.2024 – parliament.lk)
2024 අංක 9 දරන මාර්ගගත ක්‍රමවල සුරක්ෂිතභාවය පිළිබඳ පනත සම්මත වීම සහ ඉන්පසුව බලාත්මක කරනු ලැබීම පිළිබඳව පළවන වාර්තා පොදු යහපත පිණිස නිවැරදි කිරීම සඳහා මෙම ප්‍රකාශය නිකුත් කරනු ලැබේ. මහජනතාවගේ දැනගැනීම පිණිස සහ රැවටීමට ලක්වීම වැළැක්වීම සඳහා, නීතියක් සම්පාදනය කිරීමේ ක්‍රියාවලිය පිළිබඳව මෙසේ පැහැදිලි කරනු ලැබේ.
යම් පනත් කෙටුම්පතක් පාර්ලිමේන්තුවට ඉදිරිපත් කරනු ලැබූ විට ආණ්ඩුක්‍රම ව්‍යවස්ථාවේ 121 ව්‍යවස්ථාව ප්‍රකාරව ඕනෑම අයෙකුට එය ශ්‍රේෂ්ඨාධිකරණය ඉදිරියේ අභියෝගයට ලක් කිරීමේ අවස්ථාව තිබේ. ආණ්ඩුක්‍රම ව්‍යවස්ථාවේ විධිවිධාන ප්‍රකාරව, ශ්‍රේෂ්ඨාධිකරණය විසින් එම විරෝධතා සලකා බලනු ලැබීමෙන් අනතුරුව සති තුනක කාලයක් ඇතුළත ස්වකීය තීරණය කථානායකවරයා වෙත දැනුම් දෙනු ලැබේ. කථානායකවරයා ශ්‍රේෂ්ඨාධිකරණයේ තීරණය තමන් වෙත දැනුම් දෙනු ලැබීමෙන් අනතුරුව එළඹෙන පළමු වැනි පාර්ලිමේන්තු රැස්වීම් සතියේ පළමු වැනි දිනයේ දී ම එම තීරණය පාර්ලිමේන්තුවට නිවේදනය කර, එම සම්පූර්ණ තීරණය එදිනම පාර්ලිමේන්තුවේ හැන්සාඩ් වාර්තාවෙහි පළ කරන ලෙසට ද නියෝග කරයි.
ඉහත සඳහන් කළ ක්‍රියා පටිපාටිය අනුගමනය කරමින්, 2023 ඔක්තෝබර් 03 වැනි දින මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත පාර්ලිමේන්තුවට ඉදිරිපත් කිරීමෙන් පසුව කථානායකතුමා 2023 නොවැම්බර් මස 07 වැනි දින ශ්‍රේෂ්ඨාධිකරණයේ තීරණය පාර්ලිමේන්තුවට නිවේදනය කර එය එදින හැන්සාඩ් වාර්තාවේ පළ කරන ලෙසට ද නියෝග කළේය. ඉන්පසුව එය උනන්දුවක් දක්වන ඕනෑම පාර්ශ්වයකට ප්‍රවේශ විය හැකි ප්‍රසිද්ධ ලියවිල්ලක් බවට පත් විය.
ශ්‍රේෂ්ඨාධිකරණයේ තීරණය අනුව, අදාළ අමාත්‍යාංශය විසින් (මෙහිදී, මහජන ආරක්ෂක අමාත්‍යාංශය) නීති කෙටුම්පත් සම්පාදක දෙපාර්තමේන්තුවේ සහාය ඇතිව පනත් කෙටුම්පතට යෝජිත සංශෝධන ඉදිරිපත් කරනු ලැබේ. ශ්‍රේෂ්ඨාධිකරණයේ තීරණයට අනුව ආණ්ඩුක්‍රම ව්‍යවස්ථාවට අනුකූල වන පරිදි මෙම සංශෝධන ඉදිරිපත් කිරීම පනත් කෙටුම්පත ඉදිරිපත් කළ පාර්ශ්වය විසින් සිදුකරනු ලැබේ. එම සංශෝධන භාෂා ත්‍රිත්වයෙන් ම මුද්‍රණය කර සියලුම පාර්ලිමේන්තු මන්ත්‍රීවරුන්ට බෙදා දෙනු ලැබේ. මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත සම්බන්ධයෙන් ද මෙම ක්‍රියාවලිය ම අනුගමනය කරන ලද අතර, එම පනත් කෙටුම්පත දෙවැනි වර කියවීමේ විවාදයේ පළමුවැනි දිනය වූ 2024 ජනවාරි 23 වැනි දින පෙරවරුවේ අදාළ සංශෝධන සියලු ම පාර්ලිමේන්තු මන්ත්‍රීවරුන් වෙත භාෂා ත්‍රිත්වයෙන් ම මුද්‍රණය කර බෙදා දෙන ලදී.
මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත දින දෙකක් විවාදයට ගනු ලැබූ අතර, එහි කාරක සභා අවස්ථාව එම විවාදයේ දෙවැනි දිනය වූ 2024 ජනවාරි 24 වැනි දින පස්වරු 5.00 ට ආරම්භ විය. එම පනත් කෙටුම්පත වගන්තියෙන් වගන්තිය සම්මත කර ගන්නා අවස්ථාවේ කථානායකතුමා මහජන ආරක්‍ෂාව පිළිබඳ අමාත්‍යාංශය විසින් ලබා දෙන ලද සංශෝධන ලැයිස්තුව අනුව එක් එක් සංශෝධනය සම්මත කර ගැනීම සඳහා සභාවට ඉදිරිපත් කිරීමට සැලැස්වූයේය. එම අවස්ථාවේ දී පාර්ලිමේන්තුවේ රාජ්‍ය නිලධාරීන් සඳහා වෙන් කර ඇති නිල මැදිරියේ නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල්වරයා, ශ්‍රේෂ්ඨාධිකරණය ලබාදුන් තීරණයට අනුව අනිවාර්යයෙන් ඇතුළත් කළ යුතු සංශෝධන සියල්ල කාරක සභා අවස්ථාවේ ඉදිරිපත් කළ සංශෝධන මගින් ඇතුළත් කර ඇති බව කථානායකතුමාට දැනුම් දුන්නේය. මේ අවස්ථාවේ ගරු එම්.ඒ. සුමන්තිරන් මහතා යම් යම් ගැටලු ඉස්මතු කළ බැවින්, ඒ සම්බන්ධයෙන් ඒ මහතාට වැඩිදුරටත් කරුණු පැහැදිලි කර දෙන ලෙස කථානායකතුමා අතිරේක සොලිසිටර් ජනරාල්වරයාගෙන් ඉල්ලා සිටි අතර, අතිරේක සොලිසිටර් ජනරාල්වරයා ඒ අනුව කටයුතු කළේය.
එකී සංශෝධන ඉදිරිපත් කර කාරක සභා අවස්ථාවේදී සලකා බලනු ලැබීමෙන් අනතුරුව, සෑම පනත් කෙටුම්පතක් සම්බන්ධයෙන් ම අනුගමනය කරන ක්‍රියාවලිය අනුගමනය කරමින්, මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත ද තුන්වැනි වර කියවීමෙන් පසුව යථා පරිදි පාර්ලිමේන්තුවේ දී සම්මත විය. එම අවස්ථාවේදී නීතිපතිවරයා මෙම සංශෝධන ශ්‍රේෂ්ඨාධිකරණයේ තීරණය මගින් ලබා දී ඇති උපදෙස් අනුව ආණ්ඩුක්‍රම ව්‍යවස්ථාවට අනුකූල බව සහතික කරමින් ස්වකීය සහතිකය ද ලබා දුන්නේය.
මෙම සමස්ත ක්‍රියාවලියේදී ම, ශ්‍රේෂ්ඨාධිකරණය ඇතුළුව කවර හෝ පාර්ශ්වයක් විසින් යෝජනා කරනු ලබන සංශෝධනයක් / සංශෝධන සහ / හෝ නිර්දේශ / යෝජනා පිළිගැනීමට හෝ ප්‍රතික්ෂේප කිරීමට කථානායකවරයාට වගකීමක් හෝ බලයක් නැත. එම බලය සම්පූර්ණයෙන් ම පාර්ලිමේන්තුව සතු වේ; එනම් එහි මන්ත්‍රීවරුන්ට, බොහෝ විට බහුතර ඡන්දයෙන් එය සිදු කළ හැක.
යම් පනත් කෙටුම්පතක් පාර්ලිමේන්තුවේ දී සම්මත වූ විට, ආණ්ඩුකම ව්‍යවස්ථාවෙහි 79 සහ 80 ව්‍යවස්ථාවන් ප්‍රකාරව එම පනත් කෙටුම්පත පිළිබඳ සහතිකය අත්සන් කිරීමට කථානායකවරයා ආණ්ඩුක්‍රම ව්‍යවස්ථාව යටතේ බැඳී සිටියි. ඒ අනුව කථානායකතුමා අදාළ සංශෝධන ද අන්තර්ගත කරන ලද මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත 2024 අංක 9 දරන මාර්ගගත ක්‍රමවල සුරක්ෂිතභාවය පිළිබඳ පනත බවට පත්කරමින් එකී පනත් කෙටුම්පත පිළිබඳ සහතිකය 2024.02.02 වැනි දින අත්සන් කළේය.
මේ අනුව, නීතිපති දෙපාර්තමේන්තුව විසින් සහතික කරන ලද පරිදි, මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත ශ්‍රේෂ්ඨාධිකරණයේ තීරණයට අනුව පාර්ලිමේන්තුව විසින් සම්මත කරන ලද බව කථානායක කාර්යාලය නිවේදනය කරයි. පාර්ලිමේන්තුව විසින් නීති සම්පාදනය කිරීමේ ක්‍රියාවලිය නීතිපති දෙපාර්තමේන්තුව සහ නීති කෙටුම්පත් සම්පාදක දෙපාර්තමේන්තුව සමග එක්ව සිදුකරන ඒකාබද්ධ ක්‍රියාවලියක් බැවින්, පනත් කෙටුම්පතක් සම්බන්ධයෙන් ශ්‍රේෂ්ඨාධිකරණයේ තීරණයකට අනුකූල නොවන ආකාරයට හෝ ආණ්ඩුක්‍රම ව්‍යවස්ථාව උල්ලංඝණය වන ආකාරයකට කටයුතු කිරීමට පාර්ලිමේන්තුවට අවස්ථාවක් නැත.
මෙම ක්‍රියාවලිය පිළිබඳව වඩාත් හොඳින් දැනුවත්ව සිටිය යුතු අය මේ සම්බන්ධයෙන් වෙනත් ආකාරයකින් ප්‍රකාශ කිරීම කනගාටුවට කරුණක් වන අතර, කථානායකවරයාට ස්වකීය අභිමතය පරිදි නීති පැනවීමට හෝ පනත් කෙටුම්පත්වලට සංශෝධන ඉදිරිපත් කිරීමට හැකි බවට අවධාරණය කිරීම නීතිය සහ ආණ්ඩුක්‍රම ව්‍යවස්ථාව පිළිබඳ ඔවුන්ගේම දැනුමට කරන අපහාසයකි.
ඇතැම් මන්ත්‍රීවරුන්ගේ චර්යාව හේතුවෙන් මෙම පනත් කෙටුම්පත පිළිබඳ විවාදයේ කාරක සභා අවස්ථාවේ දී ශ්‍රේෂ්ඨාධිකරණයේ තීරණය හා අනුකූල වන බව සහතික කිරීම පිණිස නීතිපති දෙපාර්තමේන්තුවේ නියෝජිතයන් ද පැමිණ සිටීම අවශ්‍ය කරන තරමට (2017 පළාත් සභා මැතිවරණ සංශෝධන පනතෙන් පසුව) එම මන්ත්‍රීවරුන්ගේ සවිඥාණය වැඩිදියුණු වී ඇති බව පෙනෙන්නට තිබීම දිරිගන්වන සුළු කරුණක් වන නමුත්, ඉහත පැහැදිලි කළ පරිදි කථානායකවරයාට එවැනි ගැටලු සම්බන්ධයෙන් කිසිදු අභිමතයක් නොමැති බැවින්, නොසලකා හරිනු ලැබ ඇත්තේ ශ්‍රේෂ්ඨාධිකරණය විසින් ලබා දෙන ලද කවර නිර්දේශ දැයි එම මන්ත්‍රීවරුන් නිශ්චිතව සඳහන් කරන්නේ නම් අදාළ බලධාරීන්ට එවැනි චෝදනා වලට ප්‍රතිචාර දැක්වීමට හැකි වනු ඇත.
ඕනෑම පාර්ලිමේන්තු මන්ත්‍රීවරයකුට පැමිණ 2024 අංක 9 දරන මාර්ගගත ක්‍රමවල සුරක්ෂිතභාවය පිළිබඳ පනත සම්මත කර ගැනීම හා සම්බන්ධ සියලු ම ලියකියවිලි සහ ක්‍රියාපටිපාටි පරීක්‍ෂා කර කරුණු හොඳින් අවබෝධ කර ගැනීමට සහ විෂය පිළිබඳ දැනුමක් ඇති නිලධාරීන්ගෙන් උපදෙස් ලබා ගැනීමට හැකි බැවින් ඒ සඳහා සාදරයෙන් ආරාධනය කරන්නෙමු.
ප්‍රජාතන්ත්‍රවාදී ක්‍රමයක් තුළ එහි කොටස් පිළිබඳව විනිශ්චය කරනු ලබන්නේ සමස්තය සැලකිල්ලට ගෙන මිස එහි ප්‍රතිවිරුද්ධ පිළිවෙළට නොවන බැවින්, පාර්ලිමේන්තුව අපකීර්තියට පත් කිරීම හෝ එහි විශ්වාසනීයත්වය හෑල්ලුවට ලක් කිරීම යහපත් දෙයක් නොවන බව කථානායක කාර්යාලය සියලුම මන්ත්‍රීවරුන්ට මෙයින් නැවත සිහිපත් කර දෙයි ෴
සෞඛ්‍ය වෘත්තීය සමිති වර්ජන ක්‍රියාමාර්ගය සතියකින් කල් දමයි
(06.02.2024 – 18:17 +0530 – hirunews.lk/sinhala)
මුදල් අමාත්‍යාංශ බලධාරීන් සමඟ පැවති සාකච්ඡාවලින් අනතුරුව හෙට (07) සිට යෝජනා කර තිබූ වර්ජන ක්‍රියාමාර්ගය සතියකින් කල් දැමීමට ‘සෞඛ්‍ය වෘත්තීය සමිති සන්ධානය’ තීරණය කර තිබෙනවා.
+
‘යුක්තිය මෙහෙයුම’ ආරම්භ වී අදට (06) දින 50 ක් සපිරෙනවා
(06.02.2024 – 17:36 +0530 – hirunews.lk/sinhala)
පසුගිය වසරේ (2023) දෙසැම්බර් 17 වෙනිදා ආරම්භ කළ එම මෙහෙයුම යටතේ දිවයින පුරා සිදුකළ වැටලීම්වලින් සැකකරුවන් පනස්හයදාස් පන්සිය හතළිස් එක් දෙනෙකු (56,541) අත්අඩංගුවට ගෙන තිබෙනවා.
මත්ද්‍රව්‍ය වැරදි සම්බන්ධයෙන් සැකකරුවන් 49,558 ක් සහ අපරාධ අංශය වෙත යොමු කළ ලැයිස්තුවේ සිටි සැකකරුවන් 6,983 ක් ඊට අයත්.
අත්අඩංගුවට ගත් සැකකරුවන් 1,981 ක් පුනුරුත්ථාපනය සඳහා යොමු කර තිබෙනවා ෴
අවිස්සාවේල්ලේ පිපිරීමකින් පුද්ගලයෙක් (1) ජීවිතක්ෂයට
(06.02.2024 – 15:16 +0530 – hirunews.lk/sinhala)
අවිස්සාවේල්ල – මාදොළ ප්‍රදේශයේ අබලි යකඩ එක්රැස් කරන ස්ථානයක පිපිරීමක් සිදුව තිබෙනවා.
එම පිපිරීමෙන් එක් (1) පුද්ගලයෙකු ජීවිතක්ෂයට පත්ව ඇති බවයි පොලිසිය සඳහන් කළේ.
මේ පිළිබඳව පොලිසිය වැඩිදුර විමර්ශන සිදු කරනු ලබනවා ෴
හිටපු සෞඛ්‍ය අමාත්‍ය සහ වත්මන් පරිසර අමාත්‍ය කෙහෙළිය රඹුක්වැල්ල පරිසර අමාත්‍ය ධුරයෙන් ඉල්ලා අස්වෙයි
(06.02.2024 – 14:37 +0530 – hirunews.lk/sinhala)
හිටපු සෞඛ්‍ය අමාත්‍ය සහ වත්මන් පරිසර අමාත්‍ය කෙහෙළිය රඹුක්වැල්ල සිය අමාත්‍ය ධුරයෙන් ඉල්ලා අස් වී තිබෙනවා.
පරිසර අමාත්‍ය ධුරයෙන් තමන් ඉල්ලා අස්වන බව කෙහෙළිය රඹුක්වැල්ල විසින් ජනාධිපතිවරයා වෙත ලිපියක් මඟින් දැනුම් දී ඇති බවයි වාර්තා වෙන්නේ.
ප්‍රමිතියෙන් තොර ඖෂධ මිලදී ගැනීම්වලට සම්බන්ධ බවට චෝදනා එල්ල වූ හිටපු සෞඛ්‍ය අමාත්‍ය කෙහෙළිය රඹුක්වැල්ල මේ වනවිට රක්ෂිත බන්ධනාගාර ගතවයි පසුවන්නේ.
මාලිගාකන්ද මහේස්ත්‍රාත් අධිකරණය නියෝග කර ඇත්තේ ඔහු එළැඹෙන 15 වැනි දින දක්වා රක්ෂිත බන්ධනාගාර ගත කරන ලෙසයි ෴
පරිසර අමාත්‍ය කෙහෙළිය රඹුක්වැල්ලගේ ඉල්ලා අස්වීම තහවුරු කෙරෙන ගැසට් නිවේදනය මේ වනවිට ප්‍රකාශයට පත් කර තිබෙනවා.
ඒ අනුව ඔහුගේ ඉල්ලා අස්වීම 2024 පෙබරවාරි 03 වැනිදා සිට ක්‍රියාත්මකවන බවයි වාර්තා වෙන්නේ ෴
පළාත් සභා සහ පළාත් පාලන මැතිවරණ ලබන වසරේ (2025)
(06.02.2024 – 14:23 +0530 – hirunews.lk/sinhala)
පළාත් සභා සහ පළාත් පාලන මැතිවරණ ලබන වසරේදී (2025) පැවැත්වීමට රජය තීරණය කර තිබෙනවා.
ඊට පෙර අදාළ මැතිවරණ නිතී සඳහා වන සංශෝධන පාර්ලිමේන්තුවට ඉදිරිපත් කිරිමටයි අමාත්‍ය මණ්ඩලය එකඟතාවය පළ කර ඇත්තේ.
මෙම වසර (2024) සඳහා මැතිවරණ පැවැත්වීමට රුපියල් බිලියන 10 ක් වෙන් කර ඇති අතර, ජනාධිපතිවරණය සහ මහ මැතිවරණයට අදාළ වියදම් එම ප්‍රතිපාදනය තුළ කළමනාකරණය කර ගැනීමට සිදුවන බවට අමාත්‍ය මණ්ඩලය විසින් සැලකිල්ලට ගත් බවයි කැබිනට් ප්‍රකාශක අමාත්‍ය බන්දුල ගුණවර්ධන සඳහන් කළේ.
රජයේ ප්‍රවෘත්ති දෙපාර්තමේන්තුවේ අද (06) පැවති කැබිනට් තීරණ දැනුම්දීමේ මාධ්‍ය හමුවට එක් වෙමින් ඔහු මේ බව කියා සිටියා ෴
සූරියවැව දෙදරු මවක් ඝාතනය කළ පුද්ගලයෙක් සියදිවි හානිකර ගනී
(06.02.2024 – 13:11 +0530 – hirunews.lk/sinhala)
ගෙවුණු පැය 24 තුළ දිවයිනේ ප්‍රදේශ දෙකකින් (2) පුද්ගල ඝාතන දෙකක් (2) වාර්තා වී තිබෙනවා.
සූරියවැව, බැද්දෙවැව ප්‍රදේශයේදී තියුණු ආයුධයකින් පහර දී 38 හැවිරිදි දෙදරු මවක් ඝාතනය කර තිබුණේ ඊයේ (05) දිනයේදීයි.
ඇය සිය නිවස තුළ සිටින අවස්ථාවේ සැකකරු නිවසට පැමිණ මෙම ඝාතනය සිදුකර තිබෙනවා.
මියගිය කාන්තාව සහ සැකකරු අතර දීර්ඝ කාලයක සිට අනියම් සබඳතාවයක් පවත්වාගෙන ගොස් ඇති අතර එහි ප්‍රතිඵලයක් ලෙසයි මෙම ඝාතනය සිදු වී ඇත්තේ.
ඝාතනයට ලක්වූ කාන්තාවගේ සැමියා ත්‍රීරෝද රථ රියදුරෙකු වන අතර ඝාතනය සිදු වන අවස්ථාවේ ඔහු නිවසෙහි රැඳී සිට නොමැති බවයි වාර්තා වෙන්නේ.
සැකකරු කාන්තාව ඝාතනය කිරීමෙන් පසු ඒ සම්බන්ධයෙන් දුරකතනයෙන් පොලිසිය දැනුවත් කර තිබෙනවා.
කෙසේ වෙතත් ඔහු ද මේ වන විට හම්බන්තොට බැල්ලගස්වැව ප්‍රදේශයේදී ගෙළ වැලලාගෙන සිය දිවි හානි කර ගෙන ඇති බවයි ‘හිරු වාර්තාකරු’ සඳහන් කළේ.
+
එමෙන්ම තංගල්ල කුඩාවැල්ල ප්‍රදේශයේදී ද 51 ක් හැවිරිදි පුද්ගලයෙකු තියුණු ආයුධවලින් පහර දී ඝාතනය කර තිබෙනවා.
අද (06) උදෑසන මොහු නිවසෙහි රැදී සිටින අවස්ථාවේ කිසියම් පිරිසක් පැමිණ මෙම ඝාතනය සිදු කර ඇති බවයි පොලිසිය සදහන් කළේ .
මිය ගොස් ඇත්තේ මධ්‍යම කුඩාවැල්ල ප්‍රදේශයේ පදිංචි ධීවරයෙක් වන අතර කලක සිට පවතින ආරවුලක් මත මෙම ඝාතනය සිදු කර තිබෙනවා.
ඔහු ‘මිහිරි කඩේ සුද්දා’ යන අන්වර්ථ නාමයෙන් හදුන්වනු ලබන අතර ඉකුත් වසරේ (2023) අගෝස්තු මස 15 වෙනිදා කුඩාවැල්ල ප්‍රදේශයේ සිදු වූ ඝාතනයකට පළිගැනීමක් ලෙස මෙය සිදු කර ඇති බවයි පොලිසිය සදහන් කළේ.
+
මේ අතර මාවතගම, උදානගම ප්‍රදේශයේදී වෑන් රථයකින් පැමිණි පුද්ගලයින් දෙදෙනෙකු (2) විසින් යතුරුපැදියකින් ගමන් කරමින් සිටි පුද්ගලයින් දෙදෙනෙකුට (2) තියුණු ආයුධයකින් පහරදී තිබෙනවා ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴