මැලේරියා තර්ජනය පිළිබඳ යළි අනතුරු ඇඟවීම්
(15.06.2023 – 07:39 +0530 – hirunews.lk/sinhala)
උතුරු හා නැඟෙනහිර පළාත්වල ප්‍රදේශ 6 ක Anopheles stephensi නමැති ප්‍රධාන මැලේරියා වාහක මදුරුවා සිටීම හේතුවෙන් සෞඛ්‍ය බලධාරීන් විසින් යළිත් වරක් මැලේරියා තර්ජනය පිළිබඳ අනතුරු ඇඟවීම් කර තිබෙනවා.
සෞඛ්‍ය අමාත්‍යාංශයේ තතුදත් ආරංචි මාර්ග සඳහන් කරන පරිදි, එම ප්‍රදේශ 6 ට යාපනය, පේදුරුතුඩුව, අක්කරෙයිපත්තු, තිරුක්කෝවිල් සහ අම්පාර දිස්ත්‍රික්කයේ ආලයඩිවෙම්බු සහ අඩ්ඩාලිචේන ප්‍රදේශ ද ඇතුළත්.
සෞඛ්‍ය අමාත්‍යාංශයේ මැලේරියා මර්දන ව්‍යාපාරය විසින් 2016 දෙසැම්බර් සිට 2017 අප්‍රේල් දක්වා කරන ලද කීට විද්‍යාත්මක පරීක්ෂණ මාලාවකින් 2016 වසරේ මන්නාරමෙන් සහ පසුව උතුරු පළාතේ යාපනය, මුලතිව් දිස්ත්‍රික්කවලින් පළමු වරට Anopheles stephensi මදුරුවන් හඳුනාගෙන ඇති බව අනාවරණය වී තිබෙනවා.
ලෝක සෞඛ්‍ය සංවිධානය විසින් ශ්‍රී ලංකාව මැලේරියාවෙන් තොර රටක් ලෙස ප්‍රකාශයට පත් කර මාස දෙකකට (2) පසුවයි මෙම මදුරුවා හඳුනාගෙන ඇත්තේ.
එම ප්‍රදේශවලින් මදුරුවා තුරන් කිරීමට ශ්‍රී ලංකාව සමත් වූ බව එම ආරංචි මාර්ග සඳහන් කරනවා.
මීට අමතරව, මැලේරියාව විනාශ කරන ඉන්දියාවේ ද මැලේරියාවේ ප්‍රධාන වාහකයා ලෙස Anopheles stephensi මදුරුවා හඳුනාගෙන තිබෙන බව වාර්තා වෙනවා.
මැලේරියාව යනු බරපතළ හා සමහර විට මාරාන්තික රෝගයක්.
සාමාන්‍යයෙන් මිනිසුන්ට මැලේරියාව හැදෙන්නේ ආසාදිත ගැහැනු Anopheles මදුරුවෙකු දෂ්ට කිරීමෙන්. මැලේරියාව සම්ප්‍රේෂණය කළ හැක්කේ ඇනොෆිලිස් මදුරුවන්ට පමණක් වන අතර ඔවුන් මීට පෙර ආසාදිත පුද්ගලයකුගෙන් ලබා ගත් රුධිර ආහාර වේලකින් ආසාදනය වී තිබිය යුතුයි.
ඒ අනුව Anopheles stephensi ම්දුරුවාට මැලේරියාව ආසාදිතයකුගෙන් තවත් අයකුට සම්ප්‍රේෂණය කිරීමේ හැකියාව තිබෙනවා.
එමනිසා මැලේරියාව පැතිරීමට හේතු විය හැකි මැලේරියා ආසාදිත රෝගියකු මෙරටට පැමිණීම වැළැක්වීමට සෞඛ්‍ය බලධාරීන් සීරුවෙන් සිටින බවයි සෞඛ්‍ය බලධාරීන් පවසන්නේ.
මේ අතර ශ්‍රී ලංකාව, 2012 නොවැම්බර් මාසයේදී දේශීයව අත්පත් කර ගත් මැලේරියා රෝගීන්ගේ සම්ප්‍රේෂණය ශුන්‍ය වුණ අතර අඛණ්ඩව මැලේරියාවෙන් තොර වසර තුනක් සම්පූර්ණ කිරීමෙන් අනතුරුව, ශ්‍රී ලංකාවට 2016 සැප්තැම්බර් මාසයේදී ලෝක සෞඛ්‍ය සංවිධානයෙන් මැලේරියාව තුරන් කිරීමේ සහතිකය ලැබුණා.
රට තුළ දේශීය මැලේරියා සම්ප්‍රේෂණය නැවැත්වීමත් සමඟ මැලේරියාව නැවත පැතිරීම වැළැක්වීම සඳහා කීට විද්‍යාත්මක නිරීක්ෂණ සමඟ රෝග නිරීක්ෂණ ශක්තිමත් කර ඇති අතර මැලේරියාව නැවත මෙරටට හඳුන්වාදීමේ විශාලතම තර්ජනය වන්නේ ආවේණික රටවලින් මැලේරියා රෝගීන් ආනයනය කිරීමයි.
මේ අතර ඇනෝෆිලිස් ස්ටෙෆෙන්සිගේ පැමිණීම රට තුළ මැලේරියා සම්ප්‍රේෂණය වැළැක්වීම සඳහා සෞඛ්‍ය අමාත්‍යාංශය දරන උත්සාහයට බරපතළ අභියෝගයක් විය හැකියි.
+
බන්ධනාගාර ගතව සිටි පුතුට මත්කුඩු රැගෙන ගිය මවක්
(15.06.2023 – 06:44 +0530 – hirunews.lk/sinhala)
කළුතර බන්ධනාගාරයේ රැදවියකු වූ තම පුතුට මත්කුඩු දීමට රැගෙන පැමිණි මවක අත්අඩංගුවට ගත්බව කළුතර උතුර පොලිසිය පවසනවා.
මෙසේ අත්අඩංගුවට ගෙන ඇත්තේ කළුතර විලේගොඩ ප්‍රදේශයේ පදිංචි කාන්තාවක බව සඳහන්.
බන්ධනාගාරයේ රදවා සීටින සැකකාරියගේ පුත්‍රයා බැලීම සදහා සැකකාරිය කොට කලිසමක් රැගෙන පැමිණ ඇති බවත්, බන්ධනාගාර නිළධාරින්ට සැකසිතී පරීක්ෂා කිරීමේදී මෙම මත්කුඩු සොයාගෙන තිබෙනවා.
එහි වාටියේ කඩදාසියක බහා සගවා තිබූ හෙරෝයින් මත්කුඩු ග්‍රෑම් පහකට (5) අධික ප්‍රමාණයක් සොයාගෙන ඇති බවයි වැඩිදුරටත් සඳහන් වන්නේ ෴
ලුතිනන් කර්නල් වෛද්‍ය සුතර්ෂන්ට යුද්ධ හමුදාපති ප්‍රශංසා පදක්කමක්
(15.06.2023 – 07:02 +0530 – hirunews.lk/sinhala)
වකුගඩු ආශ්‍රීත හටගත් ලොව විශාලතම සහ දිගම ගල (Calculus) ඉවත් කර ගිනස් වාර්තා අතරට එක්වූ කොළඹ යුද්ධ හමුදා රෝහලේ මෞත්‍ර ලිංගික පද්ධති අංශ (Genito Urinary Unit) ප්‍රධානි ලුතිනන් කර්නල් වෛද්‍ය කේ සුතර්ෂන් ඇතුළු වෛද්‍ය කණ්ඩායමට යුද්ධ හමුදාධිපති ලුතිනන් ජෙනරල් විකුම් ලියනගේ විසින් ‘යුද්ධ හමුදාධිපති ප්‍රශංසා පදක්කම’ ප්‍රදානය කර තිබෙනවා.
වකුගඩු ආශ්‍රීත හටගත් සෙන්ටිමීටර 13.372 ක දිගකින් සහ ග්‍රෑම් 801 ක බරින් යුක්ත ගලක් (Calculus) ඉවත් කිරීමට කොළඹ යුද්ධ හමුදා රෝහලේ ලුතිනන් කර්නල් වෛද්‍ය කේ. සුතර්ෂන් ඇතුළු වෛද්‍ය කාර්යය මණ්ඩලය ඉකුත් බ්‍රහස්පතින්දා (ජුනි 01) දින සිදු කළ ප්‍රධාන ශල්‍යකර්මයකදී සමත් වී තිබෙනවා.
ගිනස් ලෝක වාර්තාවට අනුව, ලෝකයේ මේ වන විට හමු වී ඇති දිගම වකුගඩු ගල (Calculus) වර්ෂ 2004 දී ඉන්දීයාවේදී කරන ලද ශල්‍යකර්මයකදී හමුවී ඇති අතර, එය සෙන්ටිමීටර 13 ක් දිගින් යුක්ත වන බවයි වාර්තා වන්නේ.
බරින් වැඩිම වකුගඩු ගල වර්ෂ 2008 දී පාකිස්ථානයෙන් හමුවී ඇති අතර, එය ග්‍රෑම් 620 ක් ලෙස සඳහන්.
මෙම අවස්ථාව සඳහා යුද්ධ හමුදා මාණ්ඩලික ප්‍රධානි, මාණ්ඩලික නිලධාරීන්, උපදේශකවරුන් සහ අධ්‍යක්‍ෂවරුන් කිහිප දෙනෙකු ද සහභාගී වී තිබෙනවා ෴
ලුණුගම්වෙහෙර වෙඩි තැබීමක්
(15.06.2023 – 07:40 +0530 – hirunews.lk/sinhala)
මේ අතර ලුණුගම්වෙහෙර – ස්ප්‍රිල්යාය කැලෑබඳ ප්‍රදේශයේදී යතුරුපැදියකින් ගමන් කරමින් සිටි වයස අවුරුදු 49 ක එම ප්‍රදේශයේම පදිංචි පුද්ගලයෙකුට වෙඩි තැබීමක් සිදුකර ඇති බවට පොලිසියට ලද පණිවිඩයක් මත විමර්ශන ආරම්භ කර තිබෙනවා.
යතුරුපැදියෙන් ගමන් කළ පුද්ගලයාට වෙඩි වැදී නොමැති අතර යතුරුපැදියේ පැති කණ්ණාඩියට වෙඩි වැදීමෙන් හානි සිදුව ඇති බවයි වාර්තා වන්නේ.
මුහුණු ආවරණය කරගෙන සැගව සිටි පුද්ගලයන් දෙදෙනෙකු (2) ගෙන් එක් (1) අයෙකු මෙම වෙඩි තැබීම සිදු කර පළාගොස් ඇති අතර ඔවුන් සොයා විමර්ශන ක්‍රියාත්මකයි ෴
නාවික හමුදා සෙබළකු නැවේදීම සිය දිවි හානි කරගෙන
(15.06.2023 – 09:06 +0530 – hirunews.lk/sinhala)
නාවික හමුදාවේ විජයබාහු නෞකාවේ රාජකාරි කළ නිලධාරියකු එම නෞකාව තුළදී ඊයේ (14) ගෙල වැලලාගෙන සිය දිවි හානි කර ගෙන තිබෙනවා.
වයස අවුරුදු 44 ක් වන මෙම නිලධාරියා කොළඹ වරායේ බණ්ඩාරනායක ජැටියේ නැංගුරම් දා තිබූ නෞකාව තුළදී මෙලෙස සිය දිවි හානි කර ගෙන ඇති බවයි වරාය පොලිසිය පවසන්නේ.
මෙම නිලධාරියා මෙලෙස සිය දිවි හානි කර ගැනීමට හේතුව මෙතෙක් අනාවරණය වී නොමැති බව වරාය පොලිසිය පවසනවා ෴
නීතිවිරෝධී ලෙස ආනයනය කරන ලද දුම්වැටි තොගයක් විනාශ කෙරේ
(15.06.2023 – 09:12 +0530 – hirunews.lk/sinhala)
නීතිවිරෝධී ලෙස ආනයනය කරන ලද දුම්වැටි කූරු මිලියන 203 ක් අද (15) විනාශ කර දමන බව වාර්තා වී තිබෙනවා.
ශ්‍රී ලංකා රේගුව සහ ලංකා දුම්කොළ සමාගම (CTC) එක්ව මෙරට ඉතිහාසයේ සොයාගත් විශාලතම නීතිවිරෝධී දුම්වැටි තොගය මෙය බවයි වාර්තා වන්නේ.
2021 වසරේදී රුපියල් බිලියන 9.7 ක් ලෙස ඇස්තමේන්තුගත කර තිබූ මෙම දුම්වැටි තොගය කන්ටේනර් 21 ක අසුරා ඇති බවයි වාර්තා වී ඇත්තේ.
දේශීය අපනයනකරුවකුට ඩුබායිහි වෙසෙන තවත් ශ්‍රී ලාංකිකයකුගෙන් මෙම හොර බඩු ලැබී ඇති අතර, එම හොර බඩු නෙදර්ලන්තය, එක්සත් රාජධානිය සහ ජර්මනිය ඇතුළු ගමනාන්ත රැසකට නැවත නැව්ගත කිරීමට නියමිතව තිබෙනවා.
රේගු දෙපාර්තමේන්තුවේ ප්‍රධානී සරත් නෝනිස්, විෂයභාර මුදල් රාජ්‍ය ඇමැති රංජිත් සියඹලාපිටිය ඇතුළු ඉහළ නිලධාරීන් පිරිසකගේ නිරීක්ෂණය යටතේ අද (15) පෙරවරුවේ මුතුරාජවෙල පිහිටි අපද්‍රව්‍ය බලශක්ති තාප බලාගාරයේදී මෙම දුම්වැටි විනාශ කිරීමට නියමිතයි ෴
ඖෂධවේදීන් හදිසි වැඩවර්ජනයක
(15.06.2023 – 09:34 +0530 – hirunews.lk/sinhala)
දිවයිනේ සියලු රෝහල් හා සෞඛ්‍ය ආයතන තුළ රජයේ ඖෂධවේදීන් හදිසි වැඩවර්ජනයක් ක්‍රියාත්මක කර තිබෙනවා.
ඒ ජාතික ඖෂධ නියාමන අධිකාරියේ ඖෂධවේදීන් 23 දෙනෙකු ඉවත් කිරීමට එරෙහිවයි.
රජයේ ඖෂධවේදීන්ගේ සංගමය විසින් මෙම වැඩවර්ජනය ආරම්භ කර ඇති අතර එය අද (15) දිනයට පමණක් සීමා වන බවයි වාර්තා වන්නේ ෴
නිවසේ සවිකොට තිබූ ගේට්ටුව ගැලවී අවුරුදු තුනක (3) දරුවෙක් ජීවිතක්ෂයට
(15.06.2023 – 09:46 +0530 – hirunews.lk/sinhala)
නිවසක සවිකොට තිබු ගේට්ටුවක් ගැලවී ඊට යටවීමෙන් වයස අවුරුදු තුනක (3) දරුවෙකු ජීවිතක්ෂයට පත්ව තිබෙනවා.
මෙසේ ජීවිතක්ෂයට පත්ව ඇත්තේ කේප්පාපිලව් ප්‍රදේශයේ පදිංචි වයස අවුරුදු තුනක (3) දරුවෙක් බව සඳහන්.
ගේට්ටුවේ එල්ලි දරුවා සෙල්ලම් කරමින් සිටි අවස්ථාවේ ගේට්ටුව ගැලවී දරුවාගේ ඇඟ මතට කඩා වැටී ඇති බවයි වාර්තා වන්නේ.
ගේට්ටුව ඇඟ මතට කඩා වැටීමෙන් තුවාල ලැබු දරුවා මුලතිව් රෝහලට ඇතුළත් කිරීමෙන් අනතුරුව ජීවිතක්ෂයට පත්ව ඇති බවයි වැඩිදුරටත් වාර්තා වන්නේ ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴