ලංකාවේ ආර්ථිකය අවපාතය වලක්වන්න ‘ජුලී නැන්දා’ ළඟ හඬා වැටී බදු අඩු කරගැනීම ජනපතිගේ වගකීමක්…
ලංකාවේ ආර්ථිකය අවපාතය වලක්වන්න ‘ජුලී නැන්දා’ ළඟ හඬා වැටී බදු අඩු කරගැනීම ජනපතිගේ වගකීමක්…
(03.04.2025 – 15:50 +0530 – lankacnews.com)
‘දැන්වත් අපි ඉන්දියාව ආදර්ශයට අරගෙන ඇමෙරිකාව සමග අපේ වෙළඳ පරතරය අඩු කරගෙන බදු අඩු කර ගැනීමට සාකච්ඡා ආරම්භ කිරීමත් චීනය ආදර්ශයට අරගෙන නව වෙළඳපොලවල් සොයා යෑමත් නව භාණ්ඩ අපනයන වෙළඳපොලට හඳුන්වා දීමත් කළ යුතුයි’ යයි ‘පිවිතුරු හෙළ උරුමය’ නායක නීතිඥ උදය ගම්මන්පිල මහතා පවසයි.
එම පක්‍ෂ මූලස්ථානයේදී පැවති මාධ්‍ය හමුවකදී ඒ මහතා මෙම අදහස් පල කලේය :
“ඇමෙරිකා එක්සත් ජනපදය ලෝකයේ විශාලතම වෙළඳ අවාසිය තිබෙන රට. ඔවුන් වාර්ෂිකව ඩොලර් බිලියන 3,200 ක් වටිනා භාණ්ඩ අපනයනය කරද්දී ඩොලර් බිලියන 4,100 ක් වටිනා භාණ්ඩ ආනයනය කරනවා. මේ නිසා වාර්ෂිකව ඩොලර් බිලියන 900 ක අවාසි සහගත වෙළඳ පරතරයකට මුහුණ දෙන්න ඇමෙරිකාවට සිදු වී තිබෙනවා. මේ වෙළඳ පරතරය නිසා එක පැත්තකින් ඇමෙරිකාව දිගින් දිගටම ණය වෙනවා. අනිත් පැත්තෙන් ඇමෙරිකාවේ විරැකියාව ඉහළ යනවා.
මේ අවාසිදායක වෙළඳ පරතරය නැති කරන්න ඇමෙරිකාවේ භාණ්ඩ වලට ඉහළ බදු පනවා තිබෙන රටවලට තමනුත් ඒ ආකාරයේම බදු පනවන බව ‘ට්‍රම්ප්’ මුලින්ම කිව්වේ තමන්ගේ ජනපතිවරණ වේදිකාවේ. Tit for tat tariff නැතිනම් ‘එකට එක කිරීමේ බදු’ විධියටයි ජනමාධ්‍ය මේ බදු හැඳින්වූයේ.
තමන්ගේ මැතිවරණ පොරොන්දුව ඉටු කරමින් ඇමෙරිකාව ගනුදෙනු කරන සෑම රටකටම 2025 අප්‍රේල් 02 දා ‘නව ආනයන බදු ප්‍රතිශත’ ප්‍රසිද්ධ කර තිබෙනවා. මෙහි වැදගත්ම කරුණ වෙන්නේ ලෝකයේ ඉහළම ආනයන බදු වලට ලක් වුණු රටවල් අතර ලංකාවත් සිටීමයි. ලංකාවෙන් ඇමෙරිකාවට යවන භාණ්ඩ මත පනවා ඇති බද්ද 44% ක්. ලංකාවට වඩා වැඩි බද්දක් පනවා තිබෙන්නේ කාම්බෝජය, ලාඕසය, වියට්නාමය, මැඩකස්කරය, ලෙසෝතෝ වැනි රටවල් කිහිපයකට පමණයි.
බොහෝ දෙනෙක් ප්‍රශ්න කරන්නේ ලංකාවට මෙවැනි විශාල බද්දක් පැනවූයේ ඇයි කියලා. සෑම රටකම පොදු බද්ද ගණනය කලේ 2024 ආනයන සහ අපනයන වටිනාකම් අනුව එකම සූත්‍රයකට. අපි ඒ සූත්‍රය දාලා ලංකාවට 44% ක බද්දක් ආවේ කොහොමද කියලා බලමු. ලංකාවෙන් ඇමෙරිකාවට 2024 දී ඩොලර් මිලියන 3,000 ක් වටිනා භාණ්ඩ අපනයනය කළත් ඇමෙරිකාවෙන් ආනයනය කර තිබෙන්නේ ඩොලර් මිලියන 368 ක් වටිනා භාණ්ඩ විතරයි. ඒ අනුව ඇමෙරිකාවට ලංකාව සමග ඩොලර් මිලියන 2,632 ක අවාසිදායක වෙළඳ පරතරයක් තිබෙනවා. සමස්ත අපනයන වලින් ප්‍රතිශතයක් ලෙස වෙළඳ පරතරය බැලුවොත් ඒ කියන්නේ වෙළඳ පරතරය වන 2,632 අපනයන වටිනාකම වන 3,000 බෙදලා සීයෙන් වැඩි කලොත් පිලිතුරු 87.87%. ඒ නිසා ඒක 88% ක් ලෙස ගත්තා. දැන් ඒ අගයෙන් 50% තමයි බදු ප්‍රතිශතය වෙන්නේ. 88% කින් 50% කියන්නේ 44% යි. ඒ නිසා ලංකාවේ අපනයන මත ඇමෙරිකාව පනවන බද්ද 44% යි. ලෝකයේ සෑම රටකටම බදු ගණනය කලේ එහෙමයි. ඊට අමතරව ආර්ථිකමය කාරණා අනුව සමහර භාණ්ඩ වලටත් සමහර රටවලටත් මේ සූත්‍රයෙන් පිටත බදු පනවා තිබෙනවා.
‘ඇමෙරිකාවට කිවිසුමක් ගියාම ලංකාවට නිව්මෝනියාව හැදෙනවා’ කියා ප්‍රකට කියමනක් තිබෙනවා. මේ බදු ලෝකයේ බොහෝ රටවලට වඩා භයානක විධියට ලංකාවට බලපානවා. ඒකට හේතු වෙන්නේ ලංකාවේ අපනයන වලින් 25% ක්ම යවන්නේ ඇමෙරිකාවට වීමයි. නිදසුනක් ලෙස ඉන්දියාවේ ඒ අගය 10% යි. බංගලිදේශයේ 15% යි. ඒ නිසා අන් රටවලට වඩා ලංකාවේ දැවැන්ත ආර්ථික අර්බූදයක් ඇති වීමට නියමිතයි. මේ පිළිබඳ කඩිනම් පියවර නොගත්තොත් ආර්ථික වර්ධනය සෘණ වී ආර්ථික අවපාතයක් ඇති වීමේ අවදානමක් තිබෙනවා.
ලංකාව ඇමෙරිකාවට යවන ප්‍රධානම භාණ්ඩ වෙන්නේ ඇඟළුම්, තේ, පොල් සහ කුරුඳු. නව බද්ද නිසා ලංකාවේ මේ භාණ්ඩවල ඇමෙරිකාවේ වෙළඳපොලේ මිල 44% කින් ඉහළ යනවා. මේ භාණ්ඩ වලට වෙනත් රටවලින් එවන ආදේශක භාණ්ඩ තිබෙනවා. ඒ රටවලට 44% කින් බදු අය කර නැති නිසා ඒ රටවලින් එවන භාණ්ඩ සාපේක්ෂව ලාභයි. එතකොට අපේ ඇඟලුම්, තේ සහ පොල් වැනි භාණ්ඩ මිල දී ගැනීමට පුරුදු වී සිටි ඇමෙරිකානුවෝ වෙනත් රටවලින් එවන ඒ භාණ්ඩ මිල දී ගැනීමට පෙළඹෙනවා. මේ තත්වය යටතේ ලංකාවේ ඇඟළුම්හල් හිමියන් ඒ කර්මාන්ත බදු අඩු රටවලට ගෙන යෑමට ඉඩ තිබෙනවා. එවිට එක පැත්තකින් අපේ අපනයන ආදායම අඩු වෙලා ඩොලර් අර්බූදය තවත් උග්‍ර වෙනවා. අනිත් පැත්තෙන් දස දහස් ගණනකට රැකියා අහිමි වෙලා විරැකියාව ඉහළ යනවා. ලංකාවේ සමස්ත ඇඟළුම් අපනයන වලින් 42% ක්ම යවන්නේ ඇමෙරිකාවට. ඒ නිසා මෙම බදු වලින් ඇඟළුම් කර්මාන්තයට විනාශකාරි බලපෑමක් එල්ල වන බව අවිවාදිත කාරණයක්.
ඇඟළුම් කර්මාන්තකරුවන්ට නම් තමන්ගේ කර්මාන්ත ශාලා වෙනත් රටකට ගෙනි යන්න පුළුවන්. නමුත් තේ සහ පොල් වැනි කර්මාන්ත මොකද කරන්නේ? ඒ ගස් ගලවලා ගිහින් වෙනත් රටක හිටවන්නද? ඒ නිසා ඉතිහාසයේ නොවූ විරූ දැවැන්ත අර්බූදයකට අපි මුහුණ දෙනවා. ‘සහරාන්ගේ බෝම්බ ප්‍රහාරය’ට වඩා ‘ට්‍රම්ප්ගේ බදු ප්‍රහාරයේ’ ප්‍රතිවිපාක බොහොම දරුණුයි කියලා අපි ජාතියට සිහිපත් කරනවා.
ආණ්ඩුවට කෙටිකාලීනව කරන්න පුළුවන් දේ තමයි ඇමෙරිකාවෙන් ආණ්ඩුව විසින් මිල දී ගනු ලබන භාණ්ඩ ප්‍රමාණය වැඩි කිරීමට කටයුතු කරලා වෙළඳ පරතරය පියවන අතරේ බදු ප්‍රතිශතය අඩු කර ගැනීමට සාකච්ඡා ඇරඹීම. ඒ වගේම දිගුකාලීන නව වෙළඳපොලවල් සොයා යන අපනයන වෙළඳපොල විවිධාංගිකරණ වැඩසටහනකුත්, නව අපනයන භාණ්ඩ වෙළඳපොලට හඳුන්වා දෙන අපනයන භාණ්ඩ විවිධාංගීකරණ වැඩසටහනකුත් වහාම දියත් කළ යුතුයි.
‘අවාසිදායක වෙළඳ පරතරයක් තිබෙන රටවලට ඩොනල්ඩ් ට්‍රම්ප් බදු ගහනවා’ කියන එක කිව්වේ 2024 සැප්තැම්බර් තරම් ඈතක. නමුත් ඒ පිළිබඳ ආණ්ඩුව අවධානය යොමු කර ඒකට කිසිම සූදානම් වීමක් වුණේ නෑ. 2025 ජනවාරි මාසයේ දී බලයට පැමිණි වහාම මෙක්සිකෝවට, කැනඩාවට සහ චීනයට ඇමෙරිකාව බදු පැනෙව්වා. ඒ නිසා ඇමෙරිකානු බදු වලට මුහුණ දීමේ ආණ්ඩුවේ වැඩපිලිවෙල පසුගිය අයවැයෙන් ඉදිරිපත් කරාවි කියලා අපි බලාපොරොත්තු වුණා. නමුත් ඒ පිළිබඳ ජනාධිපතිතුමාගේ අයවැය කතාවේ එක වචනයක් තිබුණේ නෑ. ඉන්දියාව ඇමෙරිකාවෙන් අවි ආයුධ සහ ස්වභාවික ගෑස් මිල දී ගෙන වෙළඳ පරතරය අඩු කර ගන්න සාකච්ඡා කරන අතරේ චීනය නව වෙළඳපොලවල් සොයා යෑම ඇරඹුවා. අපේ ආණ්ඩුව විපක්ෂයට බැන බැන කාලය නාස්ති කලා.
විපක්ෂයේ සිටින කාලයේ ජනාධිපතිතුමා හෙම්බිරිස්සාවක් හැදුනාමත් අඬාගෙන යන්නේ ‘ජුලී චංග් නැන්දා’ ලඟට. මීට වඩා ලොකු ආර්ථික අර්බූදයක් අපට ඇති වෙන්නේ නෑ. ලංකාවේ ආර්ථිකය අවපාතයකට තල්ලු වෙන වලක්වා ගන්න නම් ‘ජුලී නැන්දා’ ඉදිරියේ හඬා වැටිලා හරි මේ බදු අඩු කර ගැනීම ජනපතිගේ වගකීමක්. නමුත් දැන්වත් අපි ඉන්දියාව ආදර්ශයට අරගෙන ඇමෙරිකාව සමග අපේ වෙළඳ පරතරය අඩු කරගෙන බදු අඩු කර ගැනීමට සාකච්ඡා ආරම්භ කිරීමත්, චීනය ආදර්ශයට අරගෙන නව වෙළඳපොලවල් සොයා යෑමත්, නව භාණ්ඩ අපනයන වෙළඳපොලට හඳුන්වා දීමත් කළ යුතුයි”
+
+++
ඇමරිකාව තරු විසිවෙන්න ගහපු බදු ප්‍රහාරයට මොළෙන් දෙන්න ඕන උත්තර ටික මෙන්න | දනනාත් පැහැදිලි කරයි (03.04.2025)
+
ශ්‍රී ලංකාවේ මියන්මාර් මහ කොමසාරිස් කාර්යාලය දැනුම් දුන් පරිදි මියන්මාරයට අවශ්‍ය ආධාර, ලබා දිය යුතු ආයතනය සහ බැංකු ගිණුම් තොරතුරු :
+
මාරවිල මහේස්ත්‍රාත්ගේ වැඩ තහනම්
(03.04.2025 – 11:11 +0530 – hirunews.lk/sinhala)
නඩු කටයුතුවලදී අක්‍රමිකතා සිදුකළ බව චෝදනා එල්ල වූ මාරවිල මහේස්ත්‍රාත් සහ අතිරේක දිසා විනිසුරු අසේල සිලවාගේ සේවය වහ ක්‍රියාත්මක පරිදි අත්හිටුවීමට අධිකරණ සේවා කොමිෂන් සභාව පියවරගෙන තිබෙනවා.
මාරවිල අධිකරණයේ නිතීඥවරුන් පිරිසක් විසින් අධිකරණ සේවා කොමිෂන් සභාවට ඉදිරිපත් කර තිබූ පැමිණිලි කිහිපයක් විමර්ශනය කිරීමෙන් අනතුරුව අධිකරණ සේවා කොමිෂන් සභාවේ ලේකම්වරයා විසින් මෙම තීරණය ගනු ලැබුවා.
විශ්‍රාමික ශ්‍රේෂ්ඨාධිකරණ විනිසුරු ප්‍රීති පත්මන් සුරසේනගේ ප්‍රධානත්වයෙන් සමන්විත විනිසුරු මඩුල්ලක් විසින් ඔහුට එරෙහිව තිබු චෝදනා පසුගිය දින කිහිපය පුරාම විමර්ශනයට ලක් කර තිබුණා.
එම විමර්ශන වාර්තා පදනම් කර ගනිමින් මෙම වැඩ තහනම සිදු කර ඇති බවයි අධිකරණ සේවා කොමිෂන් සභා ආරංචි මාර්ග සදහන් කළේ ෴
හිටපු ප්‍රධාන අමාත්‍ය එස්.එම්. රංජිත් සහ හිටපු අමාත්‍ය එස්.එම්. චන්ද්‍රසේනගේ බිරිඳගෙන් සිර දඬුවමට එරෙහිව අභියාචනයක්
(03.04.2025 – 12:10 +0530 – hirunews.lk/sinhala)
දූෂණ චෝදනා සම්බන්ධයෙන් වරදකරු වී වසර 16 බැගින් සිර දඬුවම් නියම වී සිටින උතුරු මැද පළාත් හිටපු ප්‍රධාන අමාත්‍ය එස්.එම්. රංජිත් සහ ඔහුගේ පුද්ගලික ලේකම්වරිය ලෙස කටයුතු කළ ශාන්ති චන්ද්‍රසේන යන අය එම දඬුවමට එරෙහිව අභියාචනයක් ඉදිරිපත් කර තිබෙනවා.
එම අභියාචනය අභියාචනාධිකරණය හමුවට ඉදිරිපත් කිරීම සඳහා කොළඹ මහාධිකරණයට භාර දී තිබුණා.
මෙම අභියාචනා පෙත්සම් තුළින් පෙත්සම්කරුවන් පවසා සිටින්නේ අදාළ නඩු විභාගයේදී තමන් විසින් ඉදිරිපත් කළ කරුණු මහාධිකරණ විනිසුරුවරයා විසින් තීන්දුව ලබාදීමේදී සැලකිල්ලට භාජනය කර නොමැති බවයි.
ඒ අනුව තමන්ව අදාළ චෝදනාවලින් නිදොස් කොට නිදහස් කරන ලෙසයි ඔවුන් අභියාචනාධිකරණයෙන් ඉල්ලා සිටින්නේ ෴
අප්‍රේල් 01 වැනිදා සිට බෝතල් කළ පානීය ජලය සඳහා උපරිම සිල්ලර මිලක්
(03.04.2025 – 13:02 +0530 – hirunews.lk/sinhala)
2025 අප්‍රේල් 01 වන දින සිට බලපැවැත්වෙන පරිදි බෝතල් කළ පානීය ජලය සඳහා උපරිම සිල්ලර මිල නියම කරමින් පාරිභෝගික කටයුතු අධිකාරිය විසින් ගැසට් නිවේදනයක් නිකුත් කර තිබෙනවා.
ඒ අනුව, මිලි ලීටර් 500 – 999 අතර රුපියල් 70 ක් ද, ලීටර් 1 – 1.499 අතර රුපියල් 100 ක් ද, ලීටර් 1.5 – 1.999 අතර රුපියල් 130 ක් ද, ලීටර් 2 – 2.499 අතර රුපියල් 160 ක් සහ ලීටර් 5 – 6.999 අතර රුපියල් 350 ක් වෙනවා ෴
පොහොට්ටු පාලන සමයේ නෙලුම් කොළය වූ ගුවන් තොටුපළ වහලය, යහපාලනයේ දී අරලිය කොළය බවට පත් කරන්න, රු. මිලියන 350 ක් ගිහින්
(03.04.2025 – 14:21 +0530 – hirunews.lk/sinhala)
කටුනායක බන්ඩාරනායක ජාත්‍යන්තර ගුවන් තොටුපලෙහි මගී ධාරිතාව වැඩි කිරීමේ සංවර්ධන ව්‍යාපෘති නිසි සැලසුමකින් තොරව සිදුකිරීම හේතුවෙන් සිදුවූ මුදල් නාස්තිය පිළිබඳව කෝප් කමිටුවේදී හෙළිව තිබෙනවා.
ඒ ගුවන්තොටුපළ හා ගුවන් සේවා සමාගමේ නිලධාරීන් කෝප් කමිටුව හමුවේ ඊයේ (02) පෙනී සිටි අවස්ථාවේදීයි.
එහිදී ආණ්ඩු මාරුවීමත් සමග බන්ඩාරනායක ජාත්‍යන්තර ගුවන් තොටුපලෙහි ගොඩනැගිල්ලක වහලයද වරින්වර වෙනස් වූ ආකාරය හෙළිවී තිබෙනවා.
වරාය, සිවිල් ගුවන් සේවා ප්‍රවාහන මහාමාර්ග අමාත්‍යාංශයේ ලේකම් කපිල පෙරේරා, ගුවන් තොටුපළ හා ගුවන් සේවා සමාගමේ සභාපති හර්ෂ අබේවික්‍රම, පාර්ලිමේන්තු මන්ත්‍රීවරුන් වන අසිත නිරෝෂන්, චන්දිම හෙට්ටිආරච්චි සහ ගුවන් තොටුපළ හා ගුවන්සේවා සමාගමේ ව්‍යාපෘති අංශ ප්‍රධානී අසිත කරුණාරත්න එහිදී අදහස් පළ කළ තිබෙනවා ෴
වියපත් මවත් දුවත් ජීවත් වූ ගෙදර සමතලා කළ නොමිනිසුන්
(03.04.2025 – 14:41 +0530 – hirunews.lk/sinhala)
තිස්සමහරාම කම්බිවත්ත ප්‍රදේශයේ වයෝවෘද්ධ මවක් සහ දියණියන් දෙදෙනෙක් (2) ජීවත් වූ නිවසක් ඔවුන් නිවසින් පිටව ගිය අවස්ථාවක එම ප්‍රදේශයේම පුද්ගලයෙකු බැකෝ යන්ත්‍රයක් යොදා ගනිමින් සමතලා කොට ඇති බව තිස්සමහාරාම පොලිසිය සඳහන් කළා.
අදාළ සිද්ධිය සම්බන්ධයෙන් මේ වන විට තිදෙනෙක් (3) තිස්සමහාරාම පොලිසිය විසින් අත්අඩංගුවට ගෙන තිබෙනවා.
අංග සම්පූර්ණව ඉදිකරන ලද පැරණි නිවසක් සහ ඊට යාබදව කාමර දෙකක (2) නිවසක් ද මෙලෙස පොළොවට සමතලා කර ඇත්තේ වයෝවෘද්ධ මව සහ දියණියන් නිවසේ නොසිටි අවස්ථාවේදීයි.
එලෙස නිවස පෙරලූ පුද්ගලයා ප්‍රදේශයේ පාතාල කටයුතු කිහිපයකට සම්බන්ධ පුද්ගලයකු බවත්, මොවුන්ට කරන ලද මරණ තර්ජන හේතුවෙන් කිහිප වතාවක් තිස්සමහාරාම පොලිසියට ඔහු සම්බන්ධයෙන් පැමිණිලි කර ඇති බවත්, නිවසේ ජීවත් වුණු දියණිය සඳහන් කළා.
නිවස පෙරලූ පුද්ගලයාට ඉඩමේ ආරවුලක් ඇති බැවින් කිසිවිටෙකත් නිවසට හෝ නිවස පිහිටි භූමියට ඇතුල් නොවන ලෙස පොලිසිය අවවාද කර තිබූ පසුබිමක එම අවවාද නොතකා මෙය සිදු කර ඇති බවයි සිද්ධිය දුටු යාබද නිවසේ කාන්තාවක් පවසන්නේ.
අදාළ සිද්ධිය සම්බන්ධයෙන් මේ වන විට තිදෙනෙක් (3) තිස්සමහාරාම පොලිසිය විසින් අත්අඩංගුවට ගෙන ඇති අතර, නිවෙස් හිමියන් ඉල්ලා සිටින්නේ මේ සම්බන්ධයෙන් වන්දියක් හෝ ලබා දී තමන්ට සාධාරණයක් ඉටු කර දෙන ලෙසයි.
+
නාමල්ගේ නීතීඥභාවය සම්බන්ධයෙන් විමර්ශනයක්
(03.04.2025 – 15:15 +0530 – hirunews.lk/sinhala)
පාර්ලිමේන්තු මන්ත්‍රී නාමල් රාජපක්ෂ විසින් සිය නීති උපාධිය වංචනික ආකාරයෙන් ලබා ගෙන තිබේද යන්න පිළිබඳව විමර්ශනයක් පවත්වා අධිකරණයට කරුණු වාර්තා කරන ලෙස කොළඹ ප්‍රධාන මහේස්ත්‍රාත් අධිකරණය අද (03) අපරාධ පරීක්ෂණ දෙපාර්තමේන්තුවට නියම කළා.
‘අල්ලස හෝ දූෂණය පිටුදැකීමේ පුරවැසි සංවිධානය’ විසින් ඉදිරිපත් කළ පැමිණිල්ලකට අනුව මෙම විමර්ශන ආරම්භ කර තිබෙන බවයි අපරාධ පරීක්ෂණ දෙපාර්තමේන්තුව අධිකරණයට දැනුම් දී තිබුණේ.
අපරාධ පරීක්ෂණ දෙපාර්තමේන්තුව අධිකරණයට දැනුම් දී සිටියේ නාමල් රාජපක්ෂ නීති විද්‍යාලයේ විභාගයට පෙනී සිටීමේදී වංචාකාරී ලෙස කටයුතු කර තිබේදැයි සොයා බැලීම සඳහා මෙම විමර්ශනය සිදු කරන බවද සඳහන්.
මේ සඳහා නීති විද්‍යාලයෙන් විමර්ශනවලට අවශ්‍ය ලේඛන ලබා ගැනීමට අවශ්‍යව තිබෙන බවත් එම වකවානුවේ සේවය කළ එහි නිලධාරීන්ගෙන් ප්‍රකාශ සටහන් කර ගැනීමට අවශ්‍යව තිබෙන බවත් පොලිසිය අධිකරණයට දන්වා සිටියා.
ඒ අනුව මෙම සිද්ධිය සම්බන්ධයෙන් වැඩිදුර විමර්ශන සිදුකිරීමට නියෝග කළ කොළඹ ප්‍රධාන මහේස්ත්‍රාත් තනුජා ලක්මාලි එහි ප්‍රගතිය ඉදිරියේදී අධිකරණයට වාර්තා කරන ලෙසත් නියම කළා ෴
05 ශ්‍රේණිය ශිෂ්‍යත්ව විභාගය සඳහා අයදුම්පත් කැඳවීම හෙට (04) සිට
(03.04.2025 – 15:39 +0530 – hirunews.lk/sinhala)
මෙවර ශිෂ්‍යත්ව විභාගය සදහා අයදුම්පත් කැඳවීම හෙට (04) සිට අප්‍රේල් 30 දක්වා මාර්ගගත ක්‍රමවේදයට සිදු කරන බව විභාග දෙපාර්තමේන්තුව පවසනවා.
30 වනදා මධ්‍යම රාත්‍රි 12 ට මාර්ගගත ප්‍රවේශය වසා දැමෙන අතර, කිසිදු හේතුවක් මත අයදුම්පත් භාරගැනීමේ අවසන් දිනය දීර්ඝ නොකරන බවයි එම දෙපාර්තමේන්තුව අවධාරණය කළේ.
ශිෂ්‍යත්ව විභාගය අගෝස්තු මස 10 වන ඉරිදා පැවැත්වීමට නියමිතයි ෴
පොලිස් අත්අඩංගුවේ සිටි නිරූපණ ශිල්පියා හදිසියේ ජීවිතක්ෂයට
(03.04.2025 – 18:57 +0530 – hirunews.lk/sinhala)
වැලිකඩ පොලිස් අත්අඩංගුවේ සිටි තරුණයෙක් අසාධ්‍යව රෝහලට ඇතුළත් කිරීමෙන් අනතුරුව මිය ගොස් තිබෙනවා.
අදාළ තරුණයා වැලිකඩ ප්‍රදේශයේදී නිවෙසකට ඇතුළු වී සිට ඇති බව පවසමින් ප්‍රදේශවාසීන් විසින් 119 පොලිස් හදිසි ඇමතුම් අංකයට අමතා පොලිසියට බාරදී ඇති බවයි වාර්තා වන්නේ.
ඔහු අත්අඩංගුවේ සිටියදී මෙසේ අසාධ්‍යව ඇති අතර මුල්ලේරියාව රෝහලට ඇතුළත් කිරීමෙන් අනතුරුව මිය ගොස් ඇති බවයි සඳහන් වන්නේ.
මේ සම්බන්ධයෙන් වැලිකඩ පොලිසියේ නිලධාරීන් ඇතුළු 20 දෙනෙකුගෙන් පමණ ප්‍රකාශ සටහන් කරගත් බවයි නුගේගොඩ කොට්ඨාස අපරාධ විමර්ශන ඒකකය පවසන්නේ.
මෙසේ මියගොස් ඇත්තේ මීගහකිවුල ප්‍රදේශයේ පදිංචි 26 හැවිරිදි තරුණයෙක්.
ඔහු ‘රෝහල් සාත්තු සේවය’ පිළිබදව පාඨමාලාවක් හදරමින් සිට තිබෙනවා.
එමෙන්ම අදාළ තරුණයා ‘නිරූපණ ශිල්පියකු හා නර්ථන ශිල්පියකු’ ද වෙනවා ෴
+
+
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴