චීන රේඩාර් පද්ධතියක් දෙවුන්දරට ?
(10.04.2023 – 08:52 +0530 – hirunews.lk/sinhala)
ඉන්දියන් සාගරයේ එක්සත් රාජධානියේ සහ එක්සත් ජනපද හමුදා කඳවුරු පිළිබඳ ඔත්තු බැලීම සඳහා චීනය ශ්‍රී ලංකාවේ නව රේඩාර් කඳවුරක් ඉදිකිරීමට සැලසුම් කර ඇතැයි විදෙස් මාධ්‍ය අනාවරණ කරනවා.
ශ්‍රී ලංකා ඔත්තු සේවා මූලාශ්‍ර මගින් හෙළිදරව් කරන ලද මෙම ව්‍යාපෘතිය විශේෂඥයින් විසින් හෙළා දැක ඇත්තේ බීජිං සිය ආර්ථික හවුල්කරුවන්ගේ ණය උපායමාර්ගික වාසි සඳහා යොදා ගැනීමට ඇති කැමැත්ත පිළිබඳ සාක්ෂියක් ලෙස යි.
චීන විද්‍යා ඇකඩමියේ අභ්‍යවකාශ තොරතුරු පර්යේෂණ මගින් දුරස්ථ චන්ද්‍රිකා ග්‍රහණ භූමි මධ්‍යස්ථානය සැලසුම් කිරීම මෙහෙයවනු ලබන අතර, දිවයිනේ දකුණු කෙළවරේ පිහිටි දෙවුන්දර බොක්ක ආසන්නයේ ඝන කැලෑබද ප්‍රදේශයේ මෙම රේඩාර් කඳවුර ඉදිකරනු ලැබීමට නියමිතයි.
එම පිහිටීම චීනයට ඉන්දියන් සාගරයේ බටහිර කොටසේ බුද්ධි තොරතුරු එක්රැස් කිරීමේ මෙහෙයුම් විශාල වශයෙන් වැඩි කිරීමට ඉඩ සලසයි.
වඩාත් බැරෑරුම් ලෙස, එය ඩියාගෝ ගාර්ෂියා හි එක්සත් ජනපද හා බ්‍රිතාන්‍ය ආරක්ෂක කඳවුරු පිළිබඳ මෙන්ම ඉන්දියාව පිළිබඳ ඔත්තු බැලීමේ විභවය චීනයට ඉඩ දෙනු ඇති.
ශ්‍රීහරිකෝටා හි ඉන්දියාවේ අභ්‍යවකාශ තොටුපළ, ඔඩීෂාහි මිසයිල අත්හදා බැලීමේ පරාසය සහ අර්ධද්වීප කලාපයේ තවත් ආරක්ෂක හමුදා මර්මස්ථාන කිහිපයක් යන සියල්ලම නිරීක්ෂණ සීමාව තුළට ඇතුළත්වන බව විදෙස් මාධ්‍ය වාර්තාවන්හි සඳහන්.
කූඩන්කුලම් සහ කල්පක්කම් න්‍යෂ්ටික බලාගාර ඇතුළු දකුණු ඉන්දියාවේ උපාය මාර්ගික මර්මස්ථානවලට අමතරව ඉන්දීය සාගර කලාපයේ ඉන්දියාවේ පැවැත්ම සහ ඉන්දීය නාවික හමුදාවේ ක්‍රියාකාරකම් නිරීක්ෂණය කිරීම සඳහා මෙම රේඩාර් මධ්‍යස්ථානය යොදා ගනු ඇති බවයි ඉන්දීය මාධ්‍ය වාර්තා කරන්නේ.
රේඩාර් මගින් අන්දමන් සහ නිකොබාර් දූපත් වෙත ගමන් කරන ඉන්දීය නාවික යාත්‍රා නිරීක්ෂණය කළ හැකි බවට කනස්සල්ලක් මතුව තිබෙනවා.
චීනය වසර 99 කට හම්බන්තොට වරාය බදුදීම සහ කලාපය තුළ ඉන්දියාවේ අවශ්‍යතා සඳහා අහිතකර බලපෑම් ඇති කරන චීන හමුදා බුද්ධි තොරතුරු නෞකාවක් පසුගිය වසරේ සංචාරය කිරීම ඉන්දියාව විසින් සමීපව නිරීක්ෂණය කරනු ලැබුවා.
දැඩි ඉන්දීය විරෝධය හමුවේ වුව ද, යුවාන් වැන්ග් 5 නෞකාව හම්බන්තොට වරායේ නැංගුරම් දැමුවේ ශ්‍රී ලංකාව චීනයේ දැඩි පීඩනයට හසුවීම හේතුවෙන්.
නෞකාවට ශ්‍රී ලංකා මුහුදේ සිටියදී පර්යේෂණ සිදු නොකිරීමේ කොන්දේසිය මත අවසර ලබා දුන් අතර එය ස්වයංක්‍රීය හඳුනාගැනීමේ පද්ධතිය ක්‍රියාත්මක කර ඇති බව ඉන්දීය මාධ්‍ය පසුව වාර්තා කර තිබුණා.
ඉන්ධන පිරවීම සහ අනෙකුත් සැපයුම් ලබා ගැනීම සඳහා දින හයක් (6) නෞකාව හම්බන්තොට රැඳී සිටියා.
හම්බන්තොට වරාය 2017 වසරේ සිට වසර 99 ක බදු පදනම මත චීනය විසින් පවත්වාගෙන යනු ලබනවා.
චීනයේ අභ්‍යවකාශ යානා කක්ෂගත කිරීමේ වේගය මෑත වසරවලදී විස්මයජනක ලෙස ඉහළ ගොස් ඇති අතර, භූමි මධ්‍යස්ථාන, ආධාරක යටිතල පහසුකම් සඳහා වන චීනයේ අවශ්‍යතාවය වැඩි කර තිබෙනවා.
2015 දී චීනය චන්ද්‍රිකා කක්ෂගත දියත් කිරීම් 19 ක් සිදු කළ නමුත් පසුගිය වසරේ දියත් කිරීම් 64 ක් මඟින් චන්ද්‍රිකා 180 කට වැඩි ප්‍රමාණයක් කක්ෂයට යවා ඇතැයි සඳහන්.
මේ වසරේ චීන අභ්‍යවකාශ විද්‍යා හා තාක්ෂණ සංස්ථාව (CASC) අභ්‍යවකාශ යානා 200 කට අධික ප්‍රමාණයක් කක්ෂගත කිරීම සඳහා දියත් කිරීම් 60 කට වැඩි ප්‍රමාණයක් සැලසුම් කර තිබෙනවා.
අධික මිල ගණන් යටතේ චීන ශ්‍රමය යොදා ගනිමින් යටිතල පහසුකම් ව්‍යාපෘති සපයන චීනය තම ගොදුරක් බවට ශ්‍රී ලංකාව පත්කරගෙන තිබෙනවා. ශ්‍රී ලංකාව චීනයට දැඩි ලෙස ණය වී සිටිනවා.
හම්බන්තොට නව සහ ලාභ නොලබන වරායක් ඉදිකිරීමේ අදහස කොළඹින් පැමිණියත්, මිලියන 22 ක ජනගහනයක් පමණක් සිටින දූපත් ජාතිය, මේ වන විට චීනයට පවුම් බිලියන 6 ක් එනම් සමස්ත දළ දේශීය නිෂ්පාදිතයෙන් දහයෙන් පංගුවක් (1/10) ණය වී සිටින අතර එය මුළු බාහිර ප්‍රමාණයෙන් පහෙන් එකක් (1/5).
ශ්‍රී ලංකාව ඉතිහාසයේ මුහුණ දී සිටින දැඩි ආර්ථික අර්බුදය හමුවේ, චීනය මෑතකදී ණය ආපසු ගෙවීම වසර දෙකකට (2) අත්හිටුවීමට ඉදිරිපත් වූ අතර, ශ්‍රී ලංකාව ජාත්‍යන්තර මූල්‍ය අරමුදල සමඟ විස්තීර්ණ ණය පහසුකමක් ද ලබා ගත්තා.
නමුත් බීජිං හි සහය කොන්දේසිවලින් තොර නොවූ අතර එක් කොන්දේසියක් වූයේ රේඩාර් පදනම තැනීමට අවසර ලබා ගැනීම බව ඉන්දීය මාධ්‍ය වාර්තා කර තිබුණා.
ලන්ඩනයේ කිංග්ස් කොලේජ් (KCL)හි මහාචාර්ය Alessio Patalano පැවසුවේ “මෙම පදනම ගොඩනගා ගැනීමට චීනයට ඉඩ දීම චීනයේ මිලෙහි කොටසක් විය හැකි” බවයි.
මූලෝපායික වාසි සඳහා චීනය ණය සහන ලබා දීමේ පළමු උදාහරණය ශ්‍රී ලංකාව නොවන අතර, බීජිං විසින් පනවන ලද කොන්දේසි බොහෝ විට කෙතරම් කුරිරුද යත්, රේඩාර් කඳවුරු මගින් සත්‍ය වශයෙන්ම සිදු කරනු ලබන රාජකාරි සඳහා කිසිදු අධීක්ෂණයක් හෝ ප්‍රවේශයක් දේශීය රජයන්ට ලබා දීමක් සිදු වන්නේ නැහැ.
ආර්ජන්ටිනාවේ නියුක්වන් හි චීනය විසින් ඉදිකරන ලද Espacio Lejano රේඩාර් මධ්‍යස්ථානය 2012 සිට මතභේදයට තුඩු දී ඇති අතර, බුවනෝස් අයර්ස් දුම්රිය ස්ථානයේ සිදු කරන ලද ක්‍රියාකාරකම්වලට “මැදිහත්වීමක් හෝ බාධාවක් නොකරන” බවට රජයන් දෙක (2) අතර ඇති කොන්ත්‍රාත්තුවෙන් පවා නියම කර තිබෙනවා.
Espacio Lejano පවත්වාගෙන යනු ලබන්නේ China Satellite Launch and Tracking Control General (CLTC) විසින් වන අතර, එය චීන හමුදාව විසින් එම ස්ථානය භාවිත කිරීමේ ඉඩ සම්බන්ධයෙන් ඇති සැකය තීව්‍ර කරනවා.
CLTC විසින් චීනයේ අභ්‍යවකාශ මෙහෙයුම් සඳහා භූමියේ යටිතල පහසුකම් කළමනාකරණය කරන අතර හමුදා නිලධාරීන් විසින් කාර්ය මණ්ඩලය කළමනාකරණය කරනු ලබන අතර අභ්‍යවකාශයට සම්බන්ධ ක්‍රියාකාරකම් සඳහා හමුදාව ඒකාබද්ධ කිරීම තවදුරටත් නිරූපණය කරනු ලබනවා.
“මෙවැනි කඳවුරුවල මිලිටරි ස්වභාවය වසන් කිරීමට චීනය උපරිමයෙන් කටයුතු කරයි,” මහාචාර්ය Alessio Patalano පවසනවා.
“නමුත් අවසාන වශයෙන් මෙය ‘තොරතුරු යුද්ධයක්’. සියලුම නැව්ගත කිරීම් සංඥා නිපදවන අතර මෙම සංඥාවලට ප්‍රවේශවීමෙන් බීජිං වෙත වැදගත් බුද්ධි තොරතුරු සපයයි. මෙහි කනස්සල්ලට කරුණ නම්, BRI ව්‍යාපෘති හරහා ගෙවිය යුතු ණය ප්‍රයෝජනයට ගන්නේ කෙසේදැයි චීනය දන්නා බව පමණක් නොව, චීනය සමඟ ආර්ථික සහයෝගීතාවයේ දුෂ්කර යථාර්ථයන්ට මුහුණ දෙන රටවල් තමන්ව නිදහස් කර ගැනීමට අවශ්‍ය ඕනෑම දෙයක් කිරීමට ඉදිරිපත් වීමයි.” මහාචාර්ය Alessio Patalano මෙහි ඇති භයානක පැතිකඩ නිරාවරණය කළේ එලෙසයි ෴
ඕමාන ජාතිකයාගේ කටානේ ඇඟළුම් කම්හලට STF ආරක්ෂාව
(10.04.2023 – 07:43 +0530 – hirunews.lk/sinhala)
පහර කෑමට ලක් වූ ඕමාන ජාතිකයාට අයත් කටාන හල්පේ – කෝපියාවත්ත ප්‍රදේශයේ පිහිටි ඇඟළුම් කර්මාන්තශාලාවට පොලිස් විශේෂ කාර්ය බලකායේ ආරක්ෂාව ලබා දී තිබෙනවා.
ඒ අනුව විශේෂ කාර්ය බලකායේ පූර්ණ ආරක්ෂාව යටතේ එහි කටයුතු සිදු වන බවයි පොලිසිය සඳහන් කළේ.
මෙම පහරදීම සම්බන්ධයෙන් දැනට අපරාධ පරීක්ෂණ දෙපාර්තමේන්තුව යටතේ විමර්ශන ක්‍රියාත්මකයි.
පසුගිය 30 වනදා කිසියම් පිරිසක් ඇගලුම් කම්හලේ හිමිකරුට සහ ආරක්ෂක නිලධාරියාට පහර දී එහි දේපලවලට හානි කර තිබුණා.
කෙසේවෙතත් මෙහි විමර්ශන නිසි අයුරින් ක්‍රියාත්මක නොවන බවට එහි හිමිකරු ඕමාන තානාපතිවරයා මාර්ගයෙන් මෙරට විදේශ අමාත්‍යවරයාට දැනුම් දෙනු ලැබුවා.
ඕමාන ජාතික හිමිකරු කියා සිටියේ තමාට සාධාරණයක් ඉටු නොවන්නේ නම් රට හැර යන බවයි.
පහරදීම සම්බන්ධයෙන් ප්‍රදේශයේ රාජ්‍ය අමාත්‍යවරයෙකුගේ සමීපතමයින් පිරිසකට චෝදනා එල්ල වූ අතර, පසුව සිද්ධිය සම්බන්ධයෙන් තුන්දෙනෙකු (3) අත්අඩංගුවට ගනු ලැබුවා.
+
දියේ ගිලී දරුවෙක් මරුට
(10.04.2023 – 07:56 +0530 – hirunews.lk/sinhala)
සෙවණගල – වළවේ ගඟේ සිය දරුවන් දෙදෙනා (2) සමඟ දිය නෑමට ගිය පියෙකු දියේ ගිලී අනතුරට පත්ව තිබෙනවා.
සිද්ධියෙන් එක් (1) දරුවෙකු දියේ ගිලී සෙවණගල දන්ඩුම රෝහලට ඇතුළත් කිරීමේදී මියගොස් ඇති බවයි පොලිසිය සඳහන් කළේ.
මෙලෙස මියගියේ අවුරුදු 12 ක් වයසැති සෙවණගල – හබරත්තාවෙල ප්‍රදේශයේ පදිංචි හත්වන (7) ශ්‍රේණියේ ඉගෙනගන්නා සිසුවෙක්.
පියා සිය දරු දෙදෙනා (2) සමඟ හබරත්තාවල ප්‍රදේශය හරහා ගලාබසින වළවේ ගඟේ තොටුපලෙන් ඊයේ (09) දහවල් දිය නෑමට ගොස් ඇති අතර, එහිදී බාල දරුවා නහවා ගොඩින් තබා මියගිය දරුවා නහවමින් සිටියදී මෙම අනතුර සිදුව තිබෙනවා.
පියාට දරුවාගේ අත අතහැරී ගොස් ඇති අතර, එම අවස්ථාවේදියි ඔහු දියේ ගිලී ඇත්තේ ෴
සුබසාධන ප්‍රතිලාභ සංගණන කටයුතු අදින් අවසන්
(10.04.2023 – 09:46 +0530 – hirunews.lk/sinhala)
කාලය දීර්ඝ කරනු ලැබූ සුබසාධන ප්‍රතිලාභ සංගණන කටයුතු අදින් අවසන්වීමට නියමිතයි.
ඊට අදාළ සංගණන කටයුතු මාර්තු මස 31 වනදා අවසන් කිරීමට නියමිතව තිබුණ ද එම කාලය අප්‍රේල් මස 10 වනදා දක්වා දීර්ඝ කිරීමට සුබසාධන ප්‍රතිලාභ මණ්ඩලය පසුව තීරණය කළා.
‘ඇත්තම කියමු – ඇත්තම අයට ප්‍රතිලාභ දෙමු’ තේමාව යටතේ සුබසාධන ප්‍රතිලාභ ලැබීම සඳහා සුදුසු පවුල් හඳුනාගැනීමේ වැඩසටහනට පුද්ගල තොරතුරු රැස් කිරිම වෙනුවෙන් මෙම සංගණනය ආරම්භ කෙරුණා.
ඒ සඳහා අයදුම්පත් ලක්ෂ 37 ක් ලැබී තිබුණා ෴
ප්‍රදේශ කිහිපයක ගැටුම්වලින් එක් අයෙකු මියගොස් 9 දෙනෙකුට තුවාල
(10.04.2023 – 09:48 +0530 – hirunews.lk/sinhala)
ප්‍රදේශ දෙකක (2) ඇති වූ ගැටුම්වලින් එක් (1) අයෙකු මියගොස් 9 දෙනෙකු තුවාල ලබා තිබෙනවා.
මන්නාරම – ශාන්තිපුරම් ළමා උද්‍යායනය ප්‍රදේශයේදී මත්පැන් සාදයක් අතරතුර ඇති වූ ආරවුලකින් 35 හැවිරිදි පුද්ගලයෙකු (1) මියගොස් කාන්තාවන් තුන්නෙකු (3) ඇතුලු පස්දෙනෙකු (5) තුවාල ලැබුවා.
මෙහිදී සාදය පැවති නිවසේ සිටි පිරිස විසින් ඉදිරිපස පිහිටි නිවසට බරපතළ හානි සිදුකර කාන්තාවකගේ ගෙළ බැඳි රන් මාලයක් ද කොල්ලකා පලාගොස් ඇති බවයි පොලිස් මාධ්‍ය ප්‍රකාශක කාර්යාලය සඳහන් කළේ.
මේ අතර නාගොල්ලාගම නගරයේ පොල භූමිය තුළ ඊයේ (09) රාත්‍රියේ පැවති ආධුනික ගීත ප්‍රසංගයක් අවසානයේදී දෙපිරිසක් අතර ඇති වූ ආරවුලක් හේතුවෙන් හතරදෙනෙකු (4) තුවාල ලබා තිබෙනවා.
සිද්ධිය සම්බන්ධයෙන් 8 දෙනෙකු අත්අඩංගුවට ගෙන ඇති බවයි පොලිස් මාධ්‍ය ප්‍රකාශක කාර්යාලය සඳහන් කළේ.
මොවුන් වයස අවුරුදු 16 ත් 47 ත් අතර වයස්වල පසුවන්නන් ෴
දෙවියන්ටත් වැඩ ඉන්න නීරස වූ කතරගම පුදබිම – බැතිමතුන්ගෙන් මැසිවිලි
(10.04.2023 – 10:11 +0530 – hirunews.lk/sinhala)
රුහුණු මහා කතරගම පුදබිම යනු දෙස් විදෙස් බැතිමතුන් පැමිණෙන, හින්දු – බෞද්ධ බැතිමතුන්ගේ පමණක් නොව විදේශිකයින්ගේ ද ගෞරවයට පාත්‍ර වූ පුදබිමක් බවට නොරහසක්.
එහෙත් මෙම පුදබිම වෙත පැමිණෙන බැතිමතුන්ගෙන් වැඩිම පිරිසක් පැමිණෙන්නේ බස් රථවලින් වන අතර කතරගමට ඇති එකම බස් රථ ගාල වසර 05 ක පමණ සිට දැඩි ලෙස අබලන් වී ඇති බවටයි ප්‍රදේශවාසීන් මැසිවිලි නගන්නේ.
මෙම බස් රථ ගාල ඌව පළාත් මාර්ගස්ථ මගී ප්‍රවාහන අධිකාරිය යටතේ පාලනය වන්නක්.
මෙය පිරිසිදු කිරීම වැනි කටයුතුවල වගකීම බැරව ඇත්තේ කතරගම ප්‍රදේශීය සභාවටයි.
එහෙත් වගකිය යුතු බලධාරින්ගේ දෑස් මර නින්දේ සැතපෙද්දී මේ වන විට මෙම බස් රථ ගාලේ මගීන්ට සෙවණ දෙන ගොඩනැගිලි සහ ඒවායේ වහල ද දිරාපත්ව ගරා වැටෙමින් තිබෙන අයුරු දැකිය හැකියි.
රටක සංචාරක කර්මාන්තයට විශාල වශයෙන් අත්වාරු සපයන මෙම පූජනීය ස්ථානයට පැමිණෙන සංචාරක බස් රථ සඳහා අදාළ බස් නැවතුම්පොළෙහි ගාල් කර තැබිය නොහැකි තත්ත්වයක් උදා වී ඇත්තේ යාචකයින්ගේ තෝතැන්නක් වීමත්, මෙම ස්ථානයේ ඔවුන් විසින් මළපහ කිරීමත් හේතුවෙන්.
මේ නිසා බස් නැවතුම අවට දැඩි දුර්ගන්ධයක් හමමින් දැඩි සෞඛ්‍ය ගැටලුවලට ද ප්‍රදේශවාසීන් මුහුණ දී ඇති බවටත් තොරතුරු වාර්තාවනවා.
මත්පැන් බී හිස් වූ බෝතල්, ටින් පවා මෙම බස් නැවතුමෙහි තැන තැන විසි කර ඇත්තේ දෙව්ලොව සදිසි කතරගම පුදබිම කිලිටි තැනක් බවට පත් කරමින් වීම ඛේදනීය තත්ත්වයක්.
අඩුම තරමේ මෙම ස්ථානයෙහි රාත්‍රී කාලයේ දී දැල්වෙන වීදි පහනක් හෝ සවිකර ගැනීමට තරම් වත්කමක් කතරගම ප්‍රාදේශීය සභාවට හෝ ඌව පළාත් මාර්ගස්ථ මගී ප්‍රවාහන අධිකාරියට නැති බවටයි පෙනී යන්නේ.
මෙම බස් නැවතුම්පොළට අඩුම තරමේ විදුලි රැහැනක් ඇඳ හෝ විදුලිය ලබාදීමටවත් නොහැකි වීම ඌව පළාතේ බහුලව මහජන නියෝජිතයින් සිටීම ද හාස්‍යජනක සිදුවීමක්.
පොදු දේපොළ පරිහානියට යමින්, රටේ සංවර්ධනය වේගයෙන් යන ගමනේ දී අපේ දේ රකිමින් සංස්කෘතික උරුමයන් ආරක්ෂා කරගැනීමට ඒවා නැරඹීමට පැමිණෙන බැතිමතුන් වෙත තම ගමන් රථ නිදහසේ නතර කර තැබිය හැකි අයුරින් හෝ කතරගම බස් නැවතුම්පොළ යළිත් පිළිසකර වන්නේ කවදාදැයි හිරු ප්‍රවෘත්ති දැඩි අවධානයෙන් !
මහාමාර්ග හා ප්‍රවාහන අමාත්‍ය ආචාර්ය බන්දුල ගුණවර්ධන මැතිතුමනි මේ ඔබේ අවධානය පිණිසයි !
+
කරාපිටිය රෝහලේ සී.ටී. ස්කෑන් යන්ත්‍ර දෙකම (2) අක්‍රීය වෙයි
(10.04.2023 – 10:26 +0530 – hirunews.lk/sinhala)
ගාල්ල – කරාපිටිය රෝහලේ පවතින සී.ටී. ස්කෑන් යන්ත්‍ර දෙකම (2) මේ වනවිට (10) අක්‍රීය වීම හේතුවෙන් රෝගීන් දැඩි අසීරුතාවට පත්ව තිබෙනවා.
එක් (1) යන්ත්‍රයක් පසුගිය වසරේ අක්‍රීය වූ අතර, අනෙක් යන්ත්‍රය ද මීට මාස කිහිපයකට පෙර අක්‍රීය වී ඇති බවයි වාර්තාවන්නේ.
කෙසේ වෙතත් එය යථා තත්වයට පත් කිරීමට කටයුතු නොකිරීම හේතුවෙනුයි රෝගීන් මෙලෙස අපහසුතාවට පත්ව ඇත්තේ.
ඒ අනුව සී.ටී. පරීක්ෂණ පෞද්ගලික රෝහල්වලින් සිදුකරගැනීමට රෝගීන්ට සිදුව තිබෙනවා ෴
පාලන මිලට වැඩියෙන් බිත්තර අලෙවි කළ වෙළඳුන් තුන්දෙනෙකුට (3) නඩු
(10.04.2023 – 10:35 +0530 – hirunews.lk/sinhala)
පාලන මිලට වඩා වැඩි මිලට බිත්තර අලෙවි කළ වෙළඳුන් තුන්දෙනෙකුට (3) එරෙහිව හැටන් මහේස්ත්‍රාත් අධිකරණය හමුවේ නඩු පවරා තිබෙනවා.
පාරිභෝගික සේවා අධිකාරියේ නුවරඑළිය දිස්ත්‍රික් කාර්යාලය ප්‍රකාශ කළේ හැටන්, කොටගල සහ නෝවුඩ් යන ප්‍රදේශවල වෙළඳුන් මෙලෙස වැඩිමිලට බිත්තර අලෙවි කර ඇති අතර, ඔවුන් රුපියල් 56 සිට රුපියල් 60 දක්වා වූ විවිධ මිල ගණන් යටතේ සුදු සහ රතු බිත්තර අලෙවි කර ඇති බවයි.
මේ අතර මිල ප්‍රදර්ශනය නොකොට ආහාර ද්‍රව්‍ය අලෙවි කළ මස්කෙළිය සහ කොටගල නගරවල වෙළඳුන් තුන්දෙනෙකුට (3) එරෙහිව ද නීතිමය පියවර ගෙන තිබෙනවා ෴
සහල් පෝළිමේ ඇති වූ තෙරපීමකින් මවක් ජීවිතක්ෂයට
(10.04.2023 – 10:59 +0530 – hirunews.lk/sinhala)
දිළිඳු පවුල් සඳහා රජය මගින් නොමිලේ ලබා දෙන සහල් ලබා ගැනීම සඳහා පාතහේවාහැට ප්‍රාදේශීය ලේකම් කාර්යාලයට පැමිණි පිරිස අතර ඇති වූ අධික තෙරපීමක් හේතුවෙන් සිහිසුන්ව ඇඳ වැටුණු කාන්තාවක් ජීවිතක්ෂයට පත් වී තිබෙනවා.
මෙලෙස ජීවිතක්ෂයට පත් වී ඇත්තේ, තලාතුඔය, පුස්සතන්න ප්‍රදේශයේ පදිංචිව සිටි 68 හැවිරිදි එක දරු මවක්.
ඇය පෙරේදා (08) දින පාතහේවාහැට ප්‍රාදේශීය ලේකම් කාර්යාලයට ගොස් සිටි අවස්ථාවේදී එතැන සිටි පිරිස් අසංවර ලෙස හැසිරීම හේතුවෙන් මෙම තෙරපීම සිදු වී තිබෙනවා.
එහිදී අදාළ කාන්තාව කාලයක් තිස්සේ දියවැඩියාව සඳහා සායනික ප්‍රතිකාර ලබාගෙන ඇති තැනත්තියක නිසාවෙන් පෝළිමේ සිටියදී ශරීරයේ සීනී මට්ටම අධික ලෙස පහත වැටීම මෙම මරණයට හේතු වී තිබෙනවා.
රෝහල් ආරංචි මාර්ග සඳහන් කළේ, ගිලන් රථයක් මගින් රෝගියා තලාතුඔය රෝහලට ගෙන ගොස් ප්‍රතිකාර සඳහා ඇතුලත් කරන විටත් කාන්තාව ජීවිතක්ෂයට පත් වී සිටි බවටයි.
එසේම ඇයගේ අන්තිම කැමත්ත අනුව මෘතශරීරය පේරාදෙණිය විශ්වවිද්‍යාලයේ වෛද්‍ය පීඨයට භාර දීමට ඥාතීන් විසින් කටයුතු කෙරුණා ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴