කපිල චන්ද්රසේනගේ මරණය සැක සහිතයි : පශ්චාත් මරණ පරීක්ෂණයට වෛද්ය මණ්ඩලයක් පත් කිරීමට අධිකරණයෙන් නියෝග
(08.05.2026 – hirunews.lk)
ශ්රී ලංකන් ගුවන් සමාගමේ හිටපු ප්රධාන විධායක නිලධාරී කපිල චන්ද්රසේනගේ මරණය සැක සහිත බැවින්, වෛද්ය මණ්ඩලයක් ඉදිරියේ පශ්චාත් මරණ පරීක්ෂණය සිදු කර, එම වාර්තාව අධිකරණයට ඉදිරිපත් කරන ලෙස අදාළ ස්ථානීය පරීක්ෂාව සිදුකළ කොළඹ කොටුව මහේස්ත්රාත් පසන් අමරසේන පොලිසියට අද (08) නියෝග කළා.
මරණය සම්බන්ධයෙන් කොල්ලුපිටිය පොලිසිය කොළඹ කොටුව මහේස්ත්රාත් අධිකරණයට කරුණු වාර්තා කළ අවස්ථාවේදීයි මහේස්ත්රාත්වරයා මෙම නියෝගය සිදු කර තිබුණා.
එමෙන්ම මැයි මස 12 වැනිදා මරණ පරීක්ෂණයේ සාක්ෂි කැඳවීමට ද නියෝග කළ මහේස්ත්රාත්වරයා, කපිල චන්ද්රසේනගේ මෘත ශරීරය ඔහුගේ බිරිඳගේ වැඩිමහල් සහෝදරියට භාරදෙන ලෙසට ද නියෝග කළා.
පසුව මෘත ශරීරය කොළඹ අධිකරණ වෛද්ය නිලධාරිවරයා වෙත යොමු කිරීමටයි පොලිසිය පියවර ගනු ලැබුවේ.
කපිල චන්ද්රසේන අත්අඩංගුවට ගැනීමට නිකුත් කර තිබූ වරෙන්තුව වළක්වාලීමේ මෝසමක් ඉදිරිපත් කිරීමේ කටයුත්තක් වෙනුවෙන් ඔහුගේ නීතිඥවරයා අද (08) උදෑසන මෙම නිවසට පැමිණ තිබුණා.
එහිදී නීතිඥවරයා සහ නිවසේ සිටි පිරිස කපිල චන්ද්රසේන සිටි කාමරයට ගොස් තිබූ අතර, එම කාමරය වසා තිබීම හේතුවෙන් නිවැසියන් සතු අමතර යතුරකින් එය විවෘත කර ඇති බව සඳහන්.
එහිදී කපිල චන්ද්රසේන බිම වැටී සිටින අයුරු දැක නිවැසියන් විසින් 119 පොලිස් හදිසි ඇමතුම් අංකය අමතා දැනුම් දී තිබුණා.
2013 වසරේ මෙරටට එයාර් බස් ගුවන් යානා මිලදී ගැනීමේ ප්රසම්පාදන කමිටුවේ සභාපති ලෙස අමෙරිකානු ඩොලර් මිලියන 2 ක අල්ලස් ලබාගත් බව කියන සිද්ධියකට අදාළව ශ්රී ලංකන් ගුවන් සමාගමේ එවකට හිටපු ප්රධාන විධායක නිලධාරී කපිල චන්ද්රසේනට එරෙහිව අල්ලස් හෝ දූෂණ චෝදනා විමර්ශන කොමිෂන් සභාව නඩු පවරා තිබුණා.
ඒ අනුව, මෙම සිද්ධිය සම්බන්ධයෙන් අවස්ථා කිහිපයකදී ප්රකාශ ලබා දීමෙන් අනතුරුව ඔහු අල්ලස් කොමිසම මගින් අත්අඩංගුවට ගැණුනු අතර, පසුව අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කිරීමටයි නියෝග කෙරුණේ.
මාස 2 කට ආසන්න කාලයක් රක්ෂිත බන්ධනාගාරගත කර සිටි ඔහු ඇප මත මුදාහරින ලෙස ඉකුත් 05 වැනිදා කොළඹ මහේස්ත්රාත් අධිකරණය නියෝග කළා.
ඒ, රුපියල් ලක්ෂ 05 ක මුදල් ඇප සහ රුපියල් ලක්ෂ 100 බැගින් වූ ශරීර ඇප තුනක් (3) මතයි.
කෙසේ වෙතත් ඔහු වෙනුවෙන් ශරීර ඇප තැබීමට ඉදිරිපත් වූ ඇපකරුවන් දෙදෙනකු (2) කපිල චන්ද්රසේන සමග කිසිදු පෞද්ගලික සම්බන්ධතාවයක් නොමැති බවට අනාවරණ වීම හේතුවෙන් ඔවුන් දෙදෙනා (2) පෙරේදා දිනයේ අත්අඩංගුවට ගෙන රක්ෂිත බන්ධනාගාරගත කෙරුණා.
පසුව අල්ලස් කොමිසම අධිකරණයෙන් ඉල්ලීමක් කළේ කපිල චන්ද්රසේනගේ ඇප අවලංගු කර නඩු විභාගය අවසන් වන තෙක් ඔහු රක්ෂිත බන්ධනාගාර ගත කරන ලෙසටයි.
ඒ අනුව ඔහු යළි අත්අඩංගුවට ගෙන අධිකරණයට ඉදිරිපත් කරන ලෙස කොළඹ මහේස්ත්රාත් අසංක එස්. බෝදරගම ඊයේ (07) වරෙන්තු නිකුත් කළා.
එවන් පසුබිමකයි කොල්ලුපිටිය, පේද්රිස් පෙදෙසේ අංක 37 දරන නිවසේ තිබියදී සැකකටයුතු ලෙස මියගොස් සිටි කපිල චන්ද්රසේනගේ සිරුර අද (08) උදෑසන සොයා ගැනුණේ.
2013 වසරේ මෙරටට එයාර් බස් ගුවන් යානා මිලදී ගැනීමේදී සිදුවූ බව කියන ඩොලර් මිලියන 2 ක අල්ලස් ලබාගැනීම පිළිබඳව ජාත්යන්තරයේ ද එවකට වැඩි අවධානයක් හිමිවූ අතර, එහිදී එයාර්බස් සමාගම ද සිය කොන්ත්රාත්තුව තහවුරු කරගැනීම සඳහා ගැනුම්කරුවන් වෙත අල්ලස් ලබාදී දූෂිත ක්රියාවල නිරත වී ඇති බවට චෝදනා එල්ල වුණා.
මෙම ප්රශ්නගත ගනුදෙනුව පළමුවරට අනාවරණය වුණේ ප්රංශයේ ජාතික මූල්ය අභිචෝදක කාර්යාලය, එක්සත් රාජධානියේ බරපතල වංචා විමර්ශන කාර්යාලය සහ අමෙරිකා එක්සත් ජනපදයේ අධිකරණ දෙපාර්තමේන්තුව එක්ව සිදු කළ විමර්ශනයක් හරහායි.
මෙහිදී ශ්රී ලංකාවට අදාළ ගනුදෙනුව සිදුකළ පුද්ගලයාගේ බිරිඳගේ නමින් බෲනායි හි ලියාපදිංචි කර තිබූ සමාගමකට අමෙරිකානු ඩොලර් මිලියන 16.84 ක මුදලක් ලබාදීමට එකඟවී තිබූ බවටත්, ඉන් ඩොලර් මිලියන 2 ක් 2013 වසරේ දෙසැම්බර් මාසයේදී අදාළ සමාගමේ සිංගප්පූරුවේ තිබූ ගිණුමකට බැරවී තිබූ බවත් මෙහිදී අනාවරණ වුණා ෴
+++
කපිල චන්ද්රසේන අබිරහස් ලෙස මිය ගොස් ඇත්තේ අරවින්ද ද සිල්වාගේ නිවසේදී..
(08.05.2026 – lankacnews.com)
ශ්රී ලංකන් ගුවන් සේවයේ හිටපු ප්රධාන විධායක නිලධාරී කපිල චන්ද්රසේන මහතා අද (08) අලුයම අබිරහස් ලෙස මියගොස් සිටියදී හමුවූයේ කොල්ලුපිටිය, පෙඩ්රිස් පෙදෙසේ පිහිටි ප්රවීණ ක්රිකට් ක්රීඩක අරවින්ද ද සිල්වා මහතාගේ නිවසේදී බව පොලිසිය පවසයි.
කපිල චන්ද්රසේන මහතා සහ අරවින්ද ද සිල්වා මහතා සහෝදරියන් දෙදෙනෙකු විවාහ කරගෙන සිටින සමීප ඥාතීන් වන අතර, චන්ද්රසේන මහතා ඊයේ (07) දින මෙම නිවසට පැමිණ ඇති බව මූලික විමර්ශනවලදී හෙළි වී තිබේ.
මෙම මරණය සිදුව ඇත්තේ, චන්ද්රසේන මහතා විසින් අධිකරණයට නුසුදුසු ඇපකරුවන් ඉදිරිපත් කරමින් ඇප කොන්දේසි උල්ලංඝනය කර ඇති බවට එල්ල වූ චෝදනා මත කොළඹ ප්රධාන මහේස්ත්රාත්වරයා විසින් ඔහු අත්අඩංගුවට ගැනීමට වරෙන්තුවක් නිකුත් කර දිනක් ගතවීමටත් පෙරය.
මෙම මරණය සියදිවි නසාගැනීමක් විය හැකි බවට සැක කෙරෙන නමුත්, ඒ පිළිබඳව ස්ථිර නිගමනයකට එළඹීම සඳහා කොටුව මහේස්ත්රාත් පසන් අමරසේන මහතා අද (08) දහවල් එම ස්ථානයට පැමිණ මහේස්ත්රාත් පරීක්ෂණය පැවැත්වීය.
ඩොලර් බිලියන 2.3 ක ගුවන් යානා මිලදී ගැනීමේ ගනුදෙනුවකදී බෲනායි රාජ්යයේ ව්යාජ සමාගමක් හරහා ඩොලර් මිලියන 2 ක අල්ලසක් ලබාගැනීමේ චෝදනාව මත කපිල චන්ද්රසේන මහතා සහ ඔහුගේ බිරිඳට එරෙහිව නඩු පවරා තිබුණි ෴
+
********************* ( නැවත මුල් පිටුවට ….. ) –
ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්රතිචාර (සිංහල හෝ ඉංග්රීසි බසින්) ලබාදෙන්න ෴