වෙඩි ප්‍රහාර මධ්‍යයේ අණ නොතකා පලාගිය මෝටර්රථය ඇල්ලූ පොලිස් මෙහෙයුම
කොළඹ ජාත්‍යන්තර පොත් ප්‍රදර්ශනයට එන අයට විශේෂ දැනුම්දීමක්
මාලිමා ආණ්ඩුව නිසා මඟුල් කාලා හමාරයි | වෙඩින් එකේ සිංදු දැම්මොත් වෙන දේ මෙන්න (22.09.2026)
හිරේ ඉඳන් ආපු නාමල් පාර්ලිමේන්තුව දෙක කරයි – ආණ්ඩුවේ හැමෝගෙම කටවල් වහපු කතාව මෙන්න (22.09.2026)
අනුරාධපුරයේ ප්රදේශ කිහිපයකට හෙට (23) පැය 8 ක ජල කප්පාදුවක්
ප්රදේශ රැසක ඩීසල් හිගයක් – මිල වැඩි කරන තෙක් සමාගම් ඩීසල් නොබෙදයි
නෙවිල් ප්‍රනාන්දු රෝහලේ හිමිකාරිත්වය භාණ්ඩාගාරය සතු සමාගමකට – කළමනාකරණය ගුවන් හමුදාවට
කප් සුවහස් කල් | නන්දා මාලිනි – Hiru Unplugged With Nanda Malani (29.11.2017)
වෙඩි ප්‍රහාර මධ්‍යයේ අණ නොතකා පලාගිය මෝටර්රථය ඇල්ලූ පොලිස් මෙහෙයුම
(22.09.2026 – sinhala.adaderana.lk)
ගිරිඋල්ල පොලීසිය විසින් නැවැත්වීමට කරන ලද සංඥා නොතකා පලාගිය සුඛෝභෝගී මෝටර් රථයක් පන්නල නගරයේදී වටලා, එහි රියදුරු සහ කාන්තාවන් දෙදෙනෙකු (2) අත්අඩංගුවට ගෙන ඇත.
පොලිස් මාධ්‍ය කොට්ඨාසය සඳහන් කළේ ගිරිඋල්ල ප්‍රදේශයේදී පොලිස් නිලධාරීන් විසින් මෙම මෝටර් රථය පරීක්ෂා කිරීම සඳහා රියදුරුට රථය නවත්වන ලෙසට සංඥා කළ ද ඔහු වේගයෙන් ඉදිරියට රිය පදවා ඇති බවය.
ඒ අනුව, මෝටර්රථය පසුපසු හඹාගිය පොලීස් නිලධාරින්, රථය නවත්වන ලෙසට රියදුරට නැවත නැවත් සංඥා කළද ඔහු පොලිස් අන නොකතා මෝටර් රථය ධාවනය කිරීම හේතුවෙන් පොලීසිය විසින් වෙඩි තැබීමක් සිදුකළ ද ඔහු රථය නොනනවත්වා ධාවනය කර ඇත.
අනතුරුව,පොලීසිය විසින් පන්නල නගරයේදී පොලිස් ජීප් රථය සහ තවත් වාහන කිහිපයක් මෝටර් රථයට හරස් කර එය නවතා ගැනීමට සමත්ව ඇත.
එහිදී වාහනය නැවැත්වූවද රියදුරු මෝටර් රථයේ දොරවල් වෘත්ත නොකිරීම හේතුවෙන්පොලිස් නිලධාරීන් ටී-56 ගිනි අවි පෙන්වා දොර විවෘත කරන ලෙස නියෝග කළද, රියදුරු එය ප්‍රතික්ෂේප කර තිබේ.
ඒ හේතුවෙන්, පොලිස් නිලධාරීන් විසින් මෝටර්රථයේ වම්පස ඉදිරි දොරේ වීදුරුවට ගිනි අවියෙන් පහරදී බිඳ දැමීමෙන් පසු රියදුරු දොර විවෘත කර ඇත.
ඒ අනුව මෝටර්රථයේ සිටි රියදුරු සහ තවත් කාන්තාවන් දෙදෙනෙකු (2) පොලීසිය විසින් අත්අඩංගුවට ගෙන තිබේ.
එහිදී රියදුරු සන්තකයේ තිබී මත්ද්‍රව‍ය සුළු ප්‍රමාණයක් ද පොලිස් භාරයට ගෙන ඇත.
මෙලෙස අත්අඩංගුවට ගෙන ඇත්තේ ගිරිඋල්ල ප්‍රදේශයේම පදිංචිකරුවන් පිරිසකි.
සිද්ධිය සම්බන්ධයෙන් ගිරිඋල්ල පොලීසිය වැඩිදුර විමර්ශන පවත්වයි.
+++
වීදුරු කඩලා අල්ලපු කාර් එකේ අධි තාක්ෂණික උපකරණ | වටේම කැමරා දාලා – ටියුබ්වල දාලා කොකේන් බෙදලා (22.09.2026)
+
කොළඹ ජාත්‍යන්තර පොත් ප්‍රදර්ශනයට එන අයට විශේෂ දැනුම්දීමක්
(22.09.2026 – sinhala.adaderana.lk)
මෙවර කොළඹ ජාත්‍යන්තර පොත් ප්‍රදර්ශනයෙන් පොත් මිලදී ගැනීමට පැමිණෙන විට, ඒ සඳහා සුදුසු පරිසර හිතකාමී නැවත භාවිත කළ හැකි බෑගයක් රැගෙනවිත් පරිසරය සුරැකීමට දායක වන ලෙස මධ්‍යම පරිසර අධිකාරිය මහජනතාවගෙන් ඉල්ලා සිටියි.
පසුගිය වසරවල පැවැති පොත් ප්‍රදර්ශනවලදී පොත් රැගෙන යාම සඳහා පාරිභෝගිකයන් විශාල වශයෙන් ප්ලාස්ටික් බෑග් (සිලි සිලි මලු) භාවිත කර ඇති බව නිරීක්ෂණය වී තිබේ.
පාරිභෝගික කටයුතු පිළිබඳ අධිකාරී පනතට අනුව නිකුත් කළ අංක 2456/41 දරන 2025 ඔක්තෝබර් මස 01 වැනි දිනැති ගැසට් නිවේදනයට අනුව, අතලු සහිත ‘සිලි සිලි මලු’ කිසිදු පාරිභෝගිකයෙකුට නොමිලේ ලබා නොදිය යුතුය.
අදාළ බෑග් මුදලට විකුණන්නේ නම්, අය කරන මුදල බිල්පතේ පැහැදිලිව සඳහන් කළ යුතු බවට ද නීතියෙන් නියෝග කර ඇත.
තනි භාවිත පොලිතීන් සහ ප්ලාස්ටික් නිසා පරිසරයට සිදුවන හානිය වැළැක්වීම මෙම නීති මගින් අපේක්ෂා කෙරේ.
මීට අමතරව, පහත සඳහන් තනි භාවිත ප්ලාස්ටික් සහ පොලිතීන් නිෂ්පාදන රට තුළ විකිණීම, නොමිලේ ලබා දීම, ප්‍රදර්ශනය හෝ භාවිතය නීතියෙන් තහනම් කර ඇත.
- තනි භාවිත ප්ලාස්ටික් බීම බට සහ කලතන
- තනි භාවිත ප්ලාස්ටික් පිඟන්, කෝප්ප, හැඳි, ගෑරුප්පු සහ පිහි
- පොලිතීන් අමුද්‍රව්‍ය ලෙස යොදා සකසන ලද ආහාර දවටන (Lunch Sheets)
එබැවින්, පොත් ප්‍රදර්ශන පරිශ්‍රයේ පිහිටි ආහාර විකුණුම් ස්ථානවලදී ද මෙම තහනම් ප්ලාස්ටික් හා පොලිතීන් වර්ග කිසිදු අයුරකින් භාවිත නොකිරීමට අදාළ පාර්ශ්වයන් සමඟ සාකච්ඡා කර එකඟතාවකට පැමිණ තිබේ.
2026 සැප්තැම්බර් මස 25 වන දින ආරම්භ වන කොළඹ ජාත්‍යන්තර පොත් ප්‍රදර්ශනය අතරතුර, වෙළෙඳුන් සහ පාරිභෝගික ජනතාව දැනුවත් කිරීම සඳහා ශ්‍රී ලංකා පොත් ප්‍රකාශකයින්ගේ සංගමය හා එක්ව විශේෂ වැඩසටහනක් ක්‍රියාත්මක කිරීමට මධ්‍යම පරිසර අධිකාරිය කටයුතු යොදා ඇත.
“නුවණින් කියවමු – නුවණින් රැගෙන යමු” යන තේමාව යටතේ මෙම දැනුවත් කිරීමේ වැඩසටහන ක්‍රියාත්මක වන බව එම අධිකාරිය පවසයි ෴
මාලිමා ආණ්ඩුව නිසා මඟුල් කාලා හමාරයි | වෙඩින් එකේ සිංදු දැම්මොත් වෙන දේ මෙන්න (22.09.2026)
+
හිරේ ඉඳන් ආපු නාමල් පාර්ලිමේන්තුව දෙක කරයි – ආණ්ඩුවේ හැමෝගෙම කටවල් වහපු කතාව මෙන්න (22.09.2026)
+
කඩවත වෑබඩම තිගැස්සූ සිද්ධිය | ගෙදර හරියට හමුදා කදවුරක් වගේ | නිවසක් ඇතුළෙන් මහා අවි ගබඩාවක් (22.09.2026)
+
අනුරාධපුරයේ ප්රදේශ කිහිපයකට හෙට (23) පැය 8 ක ජල කප්පාදුවක්
(22.09.2026 – sinhala.adaderana.lk)
අනුරාධපුරයේ ප්රදේශ කිහිපයකට හෙට (23) පැය 08 ක කාලයක් සඳහා තාවකාලිකව ජල සැපයුම අත්හිටුවන බව ජාතික ජල සම්පාදන හා ජලාපවහන මණ්ඩලය පවසයි.
කලාවැව ජල පවිත්‍රාගාරයේ අත්‍යවශ්‍ය නඩත්තු කටයුත්තක් හේතුවෙන් මෙම ජල සැපයුම අත්හිටුවීම සිදුකරන බව එම මණ්ඩලය සඳහන් කරයි.
ඒ අනුව හෙට (23) පෙරවරු 08:30 සිට පස්වරු 04:30 දක්වා ඉහළගම, කලාවැව, මරදන්කඩවල, තිරප්පනේ සහ කැකිරාව යන ප්‍රදේශවලට ජල සැපයුම අත්හිටුවනු ඇත.
ජල සැපයුම අත්හිටුවීම හේතුවෙන් සිදුවන අපහසුතා මඟහරවා ගැනීම සඳහා අවශ්‍ය ජලය කල්තියා රැස්කර තබා ගන්නා ලෙස ජාතික ජල සම්පාදන හා ජලාපවහන මණ්ඩලය ජනතාවගෙන් ඉල්ලා සිටී.
එමෙන්ම, ජල සැපයුම යථා තත්ත්වයට පත් කරන තෙක් ජලය අරපිරිමැස්මෙන් භාවිත කරන ලෙසද එම මණ්ඩලය දැනුම් දෙයි.
ප්රදේශ රැසක ඩීසල් හිගයක් – මිල වැඩි කරන තෙක් සමාගම් ඩීසල් නොබෙදයි
(22.09.2026 – lankacnews.com)
උතුරු, නැගෙනහිර සහ උතුරු මැද පළාත්වල පෞද්ගලික ඉන්ධන සමාගම් විසින් ඩීසල් බෙදාහැරීම උපරිම ලෙස සීමා කර ඇති බවත්, ඒ හේතුවෙන් එම පළාත්වල ජනතාව දැඩි අසීරුතාවකට පත්ව සිටින බවත් ඛනිජ තෙල් බෙදුම්කරුවන්ගේ සංගමය පවසයි.
ඩීසල් හිඟය හේතුවෙන් විශේෂයෙන්ම එම ප්‍රදේශවල ගොවි සහ ධීවර ජනතාවට සිය දෛනික ජීවනෝපාය සහ කර්මාන්ත කරගෙන යාමට නොහැකිව දැඩි පීඩාවකට මුහුණ පා සිටින බව එම සංගමය පෙන්වා දෙයි.
අදාළ පෞද්ගලික සමාගම් මඟින් මෙම පළාත් වෙත ඩීසල් තොග නිකුත් කරනු ලබන්නේ සතියකට එක්වරක් හෝ දෙවරක් පමණක් වීම මෙම අර්බුදය තීව්‍ර වීමට ප්‍රධාන හේතුව වී ඇත.
මේ වන විට LIOC සමාගමට අයත් ඉන්ධන පිරවුම්හල් 275 ක්, Sinopec සමාගමට අයත් පිරවුම්හල් 150 ක් සහ RM Parks සමාගමට අයත් පිරවුම්හල් 100 ක් ඇතුළුව ඉන්ධන පිරවුම්හල් 500 කට අධික සංඛ්‍යාවක ඩීසල් බෙදාහැරීම සීමා කර තිබේ.
මෙම සමාගම් ත්‍රිත්වය හරහා ඉන්ධන නිකුත් කිරීම සියයට පනහකින් (50%) පමණ පහත වැටී ඇති අතර, මෙම තත්ත්වය අඛණ්ඩව පැවතුණහොත් පෞද්ගලික ඉන්ධන පිරවුම්හල් 500 කට ආසන්න සංඛ්‍යාවක් සම්පූර්ණයෙන්ම වසා දැමීමට සිදුවනු ඇතැයි ද බෙදුම්කරුවෝ අනතුරු අඟවති.
ගොඩබෑමේ පිරිවැයට සාපේක්ෂව සිය ඉන්ධන මිල ගණන් සංශෝධනය කරන ලෙස අදාළ පෞද්ගලික සමාගම් රජයෙන් ඉල්ලීම් කර සති දෙකකට (2) වැඩි කාලයක් ගතව ඇතත්, රජය මෙතෙක් ඊට කිසිදු නිසි ප්‍රතිචාරයක් දක්වා නොමැත.
ගැටලුව සාකච්ඡා මාර්ගයෙන් විසඳා ගැනීම සඳහා බලශක්ති අමාත්‍යාංශයෙන් වේලාවක් ඉල්ලා ලිඛිතව දැනුම් දුන්න ද ඊට ද මෙතෙක් නිසි පිළිතුරක් ලැබී නොමැති බව බෙදුම්කරුවන්ගේ සංගමය සඳහන් කරයි ෴
නෙවිල් ප්‍රනාන්දු රෝහලේ හිමිකාරිත්වය භාණ්ඩාගාරය සතු සමාගමකට – කළමනාකරණය ගුවන් හමුදාවට
(22.09.2026 – lankacnews.com)
මාලඹේ වෛද්‍ය නෙවිල් ප්‍රනාන්දු රෝහලේ කළමනාකරණ කටයුතු ශ්‍රී ලංකා ගුවන් හමුදාව යටතේ ‘දෙමුහුන්’ මෙහෙයුම් ආකෘතියකට අනුව පවත්වාගෙන යාමටත්, එහි පූර්ණ හිමිකාරිත්වය මහා භාණ්ඩාගාරය සතු සමාගමක් යටතට පත් කිරීමටත් අමාත්‍ය මණ්ඩල අනුමැතිය හිමිව තිබේ.
ආරක්ෂක අමාත්‍යවරයා වශයෙන් ජනාධිපතිවරයා සහ සෞඛ්‍ය හා ජනමාධ්‍ය අමාත්‍යවරයා විසින් ඒකාබද්ධව ඉදිරිපත් කරන ලද යෝජනාවකට මෙලෙස කැබිනට් අනුමැතිය ලැබී ඇත.
මුදල්, ක්‍රමසම්පාදන සහ ආර්ථික සංවර්ධන අමාත්‍යාංශය, ආරක්ෂක අමාත්‍යාංශය, සෞඛ්‍ය හා ජනමාධ්‍ය අමාත්‍යාංශය මෙන්ම ශ්‍රී ලංකා ගුවන් හමුදාව එක්ව සකස් කරන ලද නව පාලන සහ මූල්‍ය රාමුවකට අනුව මෙම තීරණය ක්‍රියාත්මක කෙරේ.
ඒ යටතේ රෝහල මගින් මහජනතාව වෙනුවෙන් නොමිලේ මෙන්ම සාධාරණ ගාස්තු අය කිරීමේ පදනම මත ද නේවාසික සහ බාහිර රෝගී ප්‍රතිකාර සේවාවන් සැපයීමට නියමිතය.
අමාත්‍ය මණ්ඩලය විසින් අනුමත කරන ලද නව කළමනාකරණ සැලැස්මේ ප්‍රධාන කරුණු මෙසේය :
-• හිමිකාරිත්වය සහ පාලනය : සමාගම් පනත යටතේ සංස්ථාපනය කෙරෙන, මහා භාණ්ඩාගාරය සතු සියයට 100 ක පූර්ණ කොටස් හිමිකාරිත්වයක් සහිත රජයේ සමාගමක් වෙත රෝහලේ අයිතිය සහ වත්කම් පවරනු ලබන අතර, එහි සමස්ත කළමනාකරණ කටයුතු ශ්‍රී ලංකා ගුවන් හමුදාව විසින් සිදු කරනු ඇත.
-• අධ්‍යක්ෂ මණ්ඩලය : ආරක්ෂක අමාත්‍යාංශ ලේකම්වරයාගේ නිර්දේශය පරිදි භාණ්ඩාගාර ලේකම්වරයා විසින් සාමාජිකයන් 11 දෙනෙකුගෙන් සමන්විත නව අධ්‍යක්ෂ මණ්ඩලයක් අදාළ සමාගම වෙනුවෙන් පත් කරනු ලැබේ.
-• මූල්‍ය ප්‍රතිපාදන : 2026 සිට 2028 දක්වා වූ ඉදිරි දෙවසරක (2) කාලය තුළ රෝහලේ කාර්ය මණ්ඩල වැටුප් සහ මෙහෙයුම් වියදම් සඳහා අවශ්‍ය මුදල් මහා භාණ්ඩාගාරය විසින් සපයනු ඇති අතර, ඉන් අනතුරුව රෝහල ස්වයං මූල්‍යකරණයෙන් (Self-financing) පවත්වාගෙන යන ආයතනයක් බවට පත් කළ යුතුය.
-• නොමිලේ ඖෂධ සැපයීම : රෝහල හරහා මහජනතාවට නොමිලේ පිරිනමනු ලබන සෞඛ්‍ය සේවාවන් සඳහා සෞඛ්‍ය හා ජනමාධ්‍ය අමාත්‍යාංශයට වෙන් කෙරෙන ප්‍රතිපාදනවලින් වාර්ෂිකව රුපියල් මිලියන 125 ක් වටිනා ඖෂධ, වෛද්‍ය සැපයුම් සහ සෙසු පාරිභෝජ්‍ය ද්‍රව්‍ය ලබා දීමට පියවර ගැනේ.
2017 වසරේදී සෞඛ්‍ය අමාත්‍යාංශය යටතට පවරා ගැනුණු මෙම රෝහල, රජයේ ව්‍යවසායයක් ලෙස වඩාත් ඵලදායීව මහජන සේවයට යෙදවීමේ අරමුණින් මෙම නව වැඩපිළිවෙළ ක්‍රියාවට නංවා ඇත ෴
කප් සුවහස් කල් | නන්දා මාලිනි – Hiru Unplugged With Nanda Malani (29.11.2017)
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (ඕනෑම බසකින්) ලබාදෙන්න ෴