හෙල්ල විසිකිරීමේ ශූර රුමේෂ්ගේ හෙල්ල 5 කට ගුවන් ගමනේදී හානි
කොටහේනේ දී 18 හැවිරිදි තරුණයෙක් + යක්කලමුල්ල මොරකැටිය ප්‍රදේශයේදී 54 හැවිරිදි පිරිමියෙක් ඝාතනය වෙති
මුන්දලමේ ගින්නක් නිවන්න ගිය ගිනි නිවන රථයට වෙච්චි වැඩේ (15.09.2026)
නුවරඑළියේ පෝනියෝ : පාර පැන්න පෝනියා වෑන් එකේ වැදෙන හැටි (15.09.2026)
අතුරුදහන් වූ ඥානසාර හිමි චෝදනාගාරයෙන් මතුවේ. සෞදි – නෝර්වේ ඩීල් එළියට. (15.09.2026)
සෞදි අරාබියේ බටහිර කලාපයේ වෙසෙන ශ්‍රී ලාංකිකයින්ට හදිසි ආරක්ෂිත උපදෙස් මාලාවක්
විශ්වවිද්‍යාලවලට කළු සතියක් – ආචාර්යවරු කළු ඇඳුමින්
ඕලුගලගේ උපාය දූතයා ඝාතනයට සැලසුම් කළ ‘මධුවා’ ඇතුළු තිදෙනෙකු (3) කොටුකර ගත් මෙහෙයුම
හෙල්ල විසිකිරීමේ ශූර රුමේෂ්ගේ හෙල්ල 5 කට ගුවන් ගමනේදී හානි
(15.09.2026 – sinhala.adaderana.lk)
වත්මන් ලෝක මලල ක්‍රීඩා පිටියේ හෙල්ල විසිකිරීමේ ඉසව්වේ ආධිපත්‍ය තවදුරටත් තමන් සතු කරගෙන සිටින ශ්‍රී ලංකා මලල ක්‍රීඩක රුමේෂ් තරංග අද (15) උදෑසන දිවයිනට පැමිණියේය.
එහිදී ඔහු සතු හෙල්ල 5 ක් ගුවන් මගින් ගෙන ඒමේදී සැකසහිත ලෙස කැඩී හානිවී ඇති බව වාර්තා වෙයි.
ඔහු ලෝක වාර්තා තැබූ එනම් හංගේරියාවේ බුඩාපේස්ට් නුවරදී මීටර් 91.09 ක් දුර විසි කළ හෙල්ල, ස්විට්සර්ලන්තයේ සුරීච් නුවරදී මීටර් 92.07 ක් දුර විසි කළ හෙල්ල ඇතුළු ඔහු භාවිතා කරන හෙල්ල 5 ටම හානි වී ඇති බව සඳහන්ය.
අල්ටිමේට් සහ ඩයමන්ඩ් ලීග් ශූරතා දෙකම දිනාගත් රුමේෂ් තරංග අද (15) අලුයම 05:10 ට තුර්කි ගුවන් සේවයේ ටී.කේ. 730 දරන ගුවන් යානයෙන් කටුනායක ගුවන්තොටුපොළ වෙත පැමිණ තිබුණි.
+++
+++
(15.09.2026 – hirunews.lk)
ලොවක් සිය හෙල්ලයෙන් මෙල්ල කරමින් ලක්මවට ජාත්‍යන්තර ජයග්‍රහණ දෙකක් රැගෙන ආ රුමේෂ් තරංගගේ ජයග්‍රාහනයට සහය වූ හෙල්ල 5 ක් ‘තුර්කි ගුවන් සේවයේ’ නොසැලකිල්ල හේතුවෙන් කැඩී ගොස් තිබීම සම්බන්ධයෙන් හිටපු ක්‍රිකට් ක්‍රීඩකයන් වූ ලසිත් මාලිංග සහ අන්ජලෝ මැතිව්ස් සිය සමාජමාධ්‍ය ගිණුම්වල සටහන් තබා තිබෙනවා.
එහිදී මුහුණු පොතේ සටහනක් තබමින් ලසිත් මාලිංග :
“ක්‍රීඩා දෙකක් වුණත්, දැනෙන ඛේදනීය හැඟීම එකමයි. ඒ අපේක්ෂාවන් දරාගැනීම ඇත්තටම ගොඩක් අමාරුයි. ඒත් කරන්න දෙයක් නැහැ, මොන තරම් අමාරු තැනක වුණත් අපි ඊට වඩා සන්සුන්ව ඉදිරියට යන්න ඕනේ. රුමේෂ්, ඔබට තෙරුවන් සරණයි!” ලෙස සඳහන් කරනවා.
මේ අතර X ගිණුමේ සටහනක් තබමින් ඇන්ජලෝ මැතිව්ස් :
“ගුවන් සමාගමේ මේ ක්‍රියාව සැබවින්ම නින්දිතයි! මේවා හුදෙක් ක්‍රීඩා උපකරණ විතරක් නෙවෙයි, ක්‍රීඩකයෙකුට ඒ එක්ක තියෙන්නේ මහත් ආවේගාත්මක සහ ‘සෙන්ටිමෙන්ටල්’ වටිනාකමක්. ක්‍රීඩකයෙක් විදිහට මං ඒක හොඳටම දන්නවා. ගුවන් සමාගම් මීට වඩා වගකීමෙන් තමන්ගේ මගීන්ගේ බඩු බාහිරාදිය ගැන සොයා බලන්න ඕනේ!” ෴
කොටහේනේ දී 18 හැවිරිදි තරුණයෙක් + යක්කලමුල්ල මොරකැටිය ප්‍රදේශයේදී 54 හැවිරිදි පිරිමියෙක් ඝාතනය වෙති
(15.09.2026 – sinhala.adaderana.lk)
කොටහේන නගරයේදී තියුණු ආයුධයකින් පහරදීමක් හේතුවෙන් බරපතළ තුවාල ලැබූ තරුණයෙකු කොළඹ ජාතික රෝහලට ඇතුළත් කිරීමෙන් පසු මියගොස් තිබේ.
ඊයේ (14) දින රාත්‍රියේ මෙම ඝාතනය සිදුව ඇති අතර, කොටහේන පොලිස් ස්ථානයට ලද පණිවුඩයක් මත විමර්ශන ආරම්භ කර ඇත.
මියගොස් ඇත්තේ, අවුරුදු 18 ක් වූ වැල්ලම්පිටිය ප්‍රදේශයේ පදිංචිකරුවෙකි.
පුද්ගලික ආරවුලක් දුරදිග යාමෙන් පුද්ගලයින් දෙදෙනෙකු (2) විසින් මෙම ඝාතනය සිදුකර ඇති බවට දැනට සිදුකළ විමර්ශනයේදී අනාවරණය වී ඇත.
සැකකරුවන් හඳුනාගෙන ඇති අතර අත්අඩංගුවට ගැනීම සඳහා කොටහේන පොලීසිය වැඩිදුර විමර්ශන සිදුකරයි.
මේ අතර, යක්කලමුල්ල පොලිස් වසමේ මොරකැටිය ප්‍රදේශයේදී පුද්ගලයෙකුට තියුණු ආයුධයකින් පහරදී පුද්ගලයෙකු ඝාතනය කර ඇති බවට යක්කලමුල්ල පොලිස් ස්ථානයට ලද පණිවුඩයක් මත විමර්ශන ආරම්භ කර ඇත.
ඝාතනයට ලක්ව ඇත්තේ, අවුරුදු 54 ක් වූ යක්කලමුල්ල ප්‍රදේශයේ පදිංචිකරුවෙකි.
පැරණි ආරවුලක් මත බහින් බස්වීමක් දුරදිග ගොස් තියුණු ආයුධයකින් පහරදී මෙම ඝාතනය සිදුකර ඇති බවට දැනට සිදුකළ විමර්ශනයේදී අනාවරණය වී ඇත.
අවුරුදු 27 ක් වන සැකකරු අත්අඩංගුවට ගෙන ඇති අතර, යක්කලමුල්ල පොලීසිය වැඩිදුර විමර්ශන සිදුකරයි ෴
මුන්දලමේ ගින්නක් නිවන්න ගිය ගිනි නිවන රථයට වෙච්චි වැඩේ (15.09.2026)
+
නුවරඑළියේ පෝනියෝ : පාර පැන්න පෝනියා වෑන් එකේ වැදෙන හැටි (15.09.2026)
+
භාණ්ඩාගාරය පිරිලා ඉතිරිලා සල්ලි තිබ්බට වැඩක් නෑ, බැන්ඩේජ් නෑ – රෝහල් අර්බුදය හොඳටම ඔඩුදුවයි (15.09.2026)
+
අතුරුදහන් වූ ඥානසාර හිමි චෝදනාගාරයෙන් මතුවේ. සෞදි – නෝර්වේ ඩීල් එළියට. (15.09.2026)
+
අර්චුනා අපේ රැස්වීමට එන එක නවත්වන්න මාලිමාවේ මන්ත්‍රීවරු 10 ක් ඔහුට පිංසේන්ඩු වුණා – ඩි.වී. චානක (15.09.2026)
+
සෞදි අරාබියේ බටහිර කලාපයේ වෙසෙන ශ්‍රී ලාංකිකයින්ට හදිසි ආරක්ෂිත උපදෙස් මාලාවක්
(15.09.2026 – sinhala.adaderana.lk)
සෞදි අරාබියේ බටහිර කලාපයේ මතුවෙමින් පවතින තත්ත්වයන් හමුවේ එම කලාපයේ වෙසෙන ශ්‍රී ලාංකිකයින්ට ජෙඩා හි පිහිටි කොන්සල් ජනරාල් කාර්යාලය විශේෂ නිවේදනයක් නිකුත් කර තිබේ.
එම නිවේදනය මගින් සඳහන් කර ඇත්තේ සිය ජංගම දුරකතනයට හදිසි අනතුරු ඇඟවීමක් ලැබුණහොත් පහත සඳහන් ආරක්ෂිත ක්‍රියාමාර්ග ගන්නා ලෙසය.
එමෙන්ම හදිසි අවස්ථා සම්බන්ධව හදිසි සේවා අංක ලෙස ‘මක්කා සහ මදීනා කලාප’ තුළ 911 යන දුරකතන අංකයත් අනෙකුත් ප්‍රදේශවල 998 දුරකතන අංකයත් අමතන ලෙසද ඔවුන් දැනුම්දී තිබේ.
තවද කොන්සල් ජනරාල් කාර්යාලයේ හදිසි සම්බන්ධතා අංකය වන 056 098 6671 යන අංකය ඇමතිය හැකි බවත් ඔවුන් සිය නිවේදනය මගින් දැනුම්දී ඇත.
විශ්වවිද්‍යාලවලට කළු සතියක් – ආචාර්යවරු කළු ඇඳුමින්
(15.09.2026 – hirunews.lk)
මෙරට විශ්වවිද්‍යාලවලට සිසුන් ඇතුළත් කර ගැනීමේ ක්‍රමවේදයේ පවතින ගැටලු ඇතුළු කරුණු කිහිපයක් මුල් කර ගනිමින් විශ්වවිද්‍යාල ආචාර්ය සමිති සම්මේලනය කළු සතියක් ප්‍රකාශයට පත් කර තිබෙනවා.
ඔවුන් ප්‍රකාශ කර සිටියේ, විශ්වවිද්‍යාලවල සියලු ආචාර්යවරුන් කළු ඇඳුමින් සැරසී සේවයට වාර්තා කරන බවයි.
ඒ අනුව අදාළ ගැටලුවලට විසඳුම් ලබාදෙන තුරු විශ්වවිද්‍යාල ආචාර්යවරුන් කළු ඇඳුමින් සැරසී රාජකාරි සඳහා පැමිණීමට නියමිත බවයි එම සම්මේලනය සඳහන් කරන්නේ ෴
ඕලුගලගේ උපාය දූතයා ඝාතනයට සැලසුම් කළ ‘මධුවා’ ඇතුළු තිදෙනෙකු (3) කොටුකර ගත් මෙහෙයුම
(15.09.2026 – sinhala.adaderana.lk)
රුපියල් කෝටි 500 කට අධික වටිනාකමකින් යුත් ‘අයිස් මත්ද්‍රව්‍ය’ කිලෝග්‍රෑම් 325 ක් අත්අඩංගුවට ගැනීම සඳහා පොලීසියට තොරතුරු ලබාදුන් උපාය දූතයා ඝාතනය කිරීම සඳහා උත්සහාකළ ‘මධුවා’ නැමැති පුද්ගලයෙකු සෙල්ලකතරගම ප්‍රදේශයේදී අත්අඩංගුවට ගෙන තිබේ.
මෙහිදී තවත් පුද්ගලයින් දෙදෙනෙකු (2) ද වලාන මධ්‍යම දූෂණ මර්දන ප්‍රහාරක බළකාය විසින් අත්අඩංගුවට ගෙන ඇත.
එම බළකායේ විශේස පොලිස් කණ්ඩායමක් විසින් සෙල්ලකතරගම ලක්ෂ්මී දේවාලය ඉදිරිපිට කඩ කාමරයක රහසිගතව සැඟව සිටියදී අත්අඩංගුවට ගෙන තිබේ.
අත්අඩංගුවට ගත් ප්‍රධාන සැකකරු වැල්ලම්පිටිය ප්‍රදේශයේ පදිංචි 41 හැවිරිදි ‘මධුක චාමර’ නොහොත් ‘මධුවා’ නමැත්තෙකු ලෙස හඳුනාගෙන ඇති අතර ඔහු සංවිධානාත්මක අපරාධකරුවන් වන ‘අංගොඩ ප්‍රියංකර’ සහ ‘රූබන්’ යන අයගේ සමීපතමයෙකු බව පොලීසිය සඳහන් කරයි.
‘මධුවා’ සතුව තිබී උපාය දූතයා ඝාතනය කිරීමට යොදා ගැනීමට සැලසුම් කර තිබූ මන්නා පිහි දෙකක් (2), හෙරොයින් ග්‍රෑම් 08 ක් සහ පොලිස් ජීප් රථයකට සමාන ජීප් රථයට සවිකර තිබූ ව්‍යාජ අංක තහඩුවට අදාළ ලියකියවිලි ද පොලීසිය සොයාගෙන තිබේ.
එම අවස්ථාවේදී අත්අඩංගුවට ගත් දෙවන (2) සැකකරු වන්නේ ඉංගිරිය වත්ත ප්‍රදේශයේ පදිංචි 38 හැවිරිදි නලීන් නමැත්තෙකි.
ඔහු සතුව තිබී ‘අයිස් මත්ද්‍රව්‍ය’ ග්‍රෑම් 06 ක් සොයාගෙන තිබේ.
මෙම දෙවන (2) සැකකරු අත්අඩංගුවට ගන්නා අවස්ථාවේදී මොහු සන්තකයේ තිබී මොහුගේ අත් අකුරින් සිය පුතාට සියදිවි නසා ගන්නා බවට ලියන ලද ලිපියක් හමුවී ඇති අතර මහමගදී ජීවිත අවධානමක් ගනිමින් ආයුධවලින් කපාකොටා සිය ජීවිතය පරදුවට තබා මාරාන්තික ප්‍රහාරයක් ලෙස මහමගදී මෙම ඝාතනය සිදු කිරීමට සැළසුම් කර තිබූ බවට අනාවරණය වී ඇත.
තුන්වන (3) සැකකරු ලෙස අත්අඩංගුවට ගෙන ඇත්තේ වැල්ලම්පිටිය ප්‍රදේශයේ පදිංචි 42 හැවිරිදි ‘සුසන්ත’ නමැත්තෙකි.
ඔහු සතුව තිබී ‘අයිස් මත්ද්‍රව්‍ය’ ග්‍රෑම් 03 යි මිලිග්‍රෑම් 200 ක් සොයාගෙන තිබේ.
‘සුසන්ත’, ප්‍රධාන සැකකරු වන ‘මධුවා’ගේ මස්සිනා බවත්, ‘මධුවා’ සහ ‘සුසන්ත’ යන දෙදෙනාට එරෙහිව වැල්ලම්පිටිය ප්‍රදේශයේදී තියුණු ආයුධයකින් පහරදී පුද්ගලයෙකු ඝාතනය කිරීම සම්බන්ධයෙන් නඩුවක් අලුත්කඩේ අංක 02 මහෙස්ත්‍රාත් අධිකරණයේ විභාග වෙමින් පවතින බවත් පොලීසිය පවසයි.
මෙම සැකකරුවන් තිදෙනා (3) පොලිස් ජීප් රථයකට සමාන නිල් පැහැති ජීප් රථයකින් කිරින්ද ප්‍රදේශයේ උපාය දූතයා රැඳී සිටින නිවස වෙත ගොස් ඔහු පැහැරගෙන ගොස් ඝාතනය කිරීමට සැලසුම් කර තිබූ බව විමර්ශනවලදී අනාවරණය වී තිබේ.
අනතුරුව එම ඝාතනය සඳහා යොදාගත් ජීප් රථය ගිනි තබා විනාශ කිරීමට ද සැලසුම් කර තිබූ බව පොලීසිය සඳහන් කරයි.
කෙසේ වෙතත්, මෙම ඝාතන සැලසුම ක්‍රියාත්මක කිරීමට පෙර අදාළ ජීප් රථය කඩුවෙල, හේවාගම, රාජසිංහ මාවතේ පිහිටි ගරාජයක සඟවා තිබියදී පසුගිය සැප්තැම්බර් 08 වනදා වලාන මධ්‍යම දූෂණ මර්දන ප්‍රහාරක බළකායේ නිලධාරීන් විසින් සොයාගෙන තිබුණි.
එම ජීප් රථය වැඩිදුර විමර්ශන සඳහා කිරින්ද පොලිස් ස්ථානය වෙත භාරදී ඇත.
මෙම සිද්ධියට පසුබිම් වී ඇත්තේ 2025 නොවැම්බර් 29 වනදා කිරින්ද මුහුදුබඩ ප්‍රදේශයේදී සිදුකළ මත්ද්‍රව්‍ය වැටලීමක් බව වාර්තා වෙයි.
එහිදී රුපියල් කෝටි 500 කට අධික වටිනාකමකින් යුත් ‘අයිස් මත්ද්‍රව්‍ය’ කිලෝග්‍රෑම් 325ක්, එම මත්ද්‍රව්‍ය මෙරටට රැගෙන පැමිණි බව කියන සැකකරුවන් 08 දෙනෙකු සහ මත්ද්‍රව්‍ය ප්‍රවාහනය සඳහා සූදානම් කර තිබූ වාහන 06 ක් අත්අඩංගුවට ගැනීමට පොලීසිය සමත්ව තිබුණි.
එම වැටලීම සඳහා සහකාර පොලිස් අධිකාරී රොහාන් ඕලුගල මහතාගේ මෙහෙයවීම යටතේ අදාළ උපාය දූතයා තොරතුරු ලබාදී තිබූ බව පොලීසිය පවසයි.
කෙසේ වෙතත්, විදේශගතව සිටින බව කියන ‘රූබන්’ සහ ‘අංගොඩ ප්‍රියංකර’ යන සංවිධානාත්මක අපරාධකරුවන් විසින් මෙහෙයවන ලද මෙම මත්ද්‍රව්‍ය ජාවාරම පොලීසියට හසුවීමෙන් සිදුවූ අලාභයට පළිගැනීමක් ලෙස උපාය දූතයා ඝාතනය කිරීමට සැලසුම් කර තිබූ බවට විමර්ශනවලදී තොරතුරු අනාවරණය වී ඇත.
එහිදී උපාය දූතයා පැහැරගෙන ගොස් ඝාතනය කර, ඔහුගේ හිස සහකාර පොලිස් අධිකාරීවරයාගේ නිවස ඉදිරිපිට දමා යාමට සැලසුම් කර තිබූ බවට ද තොරතුරු අනාවරණය වී තිබේ.
කෙසේ වෙතත්, එම සැලසුම ව්‍යර්ථ වීමෙන් අනතුරුව මාස 09 කට පමණ පසු, එනම් 2026 සැප්තැම්බර් 05 වනදා උදෑසන 06:00 ට පමණ කිරින්ද වරාය දෙසට ගමන් කරමින් සිටි උපාය දූතයා අනතුරකට ලක්කර ඝාතනය කිරීමට උත්සාහ කර ඇති බව පොලීසිය පවසයි.
ඒ සඳහා මෙම ව්‍යාජ පොලිස් ජීප් රථය යොදාගෙන ඇති අතර, එහිදී උපාය දූතයා ඉන් මිදීමට උත්සාහ කිරීමේදී තුවාල ලබා තිබේ.
ඔහු මේ වනවිට පොලිස් ආරක්ෂාව යටතේ රෝහල්ගතව ප්‍රතිකාර ලබන බව සඳහන් වේ.
වලාන මධ්‍යම දූෂණ මර්දන ප්‍රහාරක බළකායේ අධ්‍යක්ෂ සහකාර පොලිස් අධිකාරී රොහාන් ඕලුගල මහතාට ලැබුණු තොරතුරකට අනුව මෙම මෙහෙයුම ක්‍රියාත්මක කර ඇති අතර, ස්ථානාධිපති ප්‍රධාන පොලිස් පරීක්ෂක ඉන්දික වීරසිංහ මහතාගේ මෙහෙයවීම යටතේ පොලිස් පරීක්ෂක චතුරංග ඇතුළු විශේෂ පොලිස් කණ්ඩායමක් විසින් සැකකරුවන් අත්අඩංගුවට ගෙන තිබේ.
++
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (ඕනෑම බසකින්) ලබාදෙන්න ෴