ඕස්ට්‍රේලියාවට බෝට්ටුවෙන් නොගිහින් පනින වංගුවක් ගැන ආරක්ෂක අංශවල අවාධානය
ඩුබායිහිදී කොටුවූ ‘කොණ්ඩ රංජි’ගේ සුලමුල – පැළඳ සිටි රත්‍රංවල ඇත්ත නැත්තත් එළියට
මොරටුව, රාවතාවත්තේ වෙඩිතැබීමක් – කිසිවෙකුට හානියක් නැත
මහා නා හිමිවරුන්ට කුණුහරුපෙන් බනිනවා – සමාජ මාධ්‍යයේ වීඩියෝව ගැන CIDයට පැමිණිල්ලක් (10.09.2026)
දෙහිවල නිවසකට අත්බෝම්බ ප්‍රහාරයක් – ජීවිත හානි සිදුවී නැත; දේපල හානි සිදුවී ඇත
රත්නපුරින් ඇසුණු සාහසික මනුෂ්‍ය ඝාතනයක් – සැකකරු පොලීසියට භාරවෙයි
TT ක්‍රමයට ඩො.මි 80 ක් විදෙස් ගිණුම්වලට යැවූ සැකකරුවෙකු මරදානේදී අත්අඩංගුවට
බණ්ඩාරවෙල මහනගර සභාවේ හිටපු නගරාධිපති අත්අඩංගුවට
ඥානසාර හිමිට පිරිනැමූ ජනාධිපති සමාව නීතියට පටහැනි බවට ශ්‍රේෂ්ඨාධිකරණ තීන්දුවක්
2025 උසස් පෙළ ප්‍රතිඵල මත විශ්වවිද්‍යාලවලට දෙවන (2) වටයේ දී තෝරාගත් සිසුන්ට නිවේදනයක්
ඕස්ට්‍රේලියාවට බෝට්ටුවෙන් නොගිහින් පනින වංගුවක් ගැන ආරක්ෂක අංශවල අවාධානය
(09.09.2026 – sinhala.srilankamirror.com)
ඕස්ට්‍රේලියානු රජය මගින් කලාකරුවන් සඳහා නිකුත් කරන Subclass 408 (Entertainment Visa) අවභාවිත කරමින් සූක්ෂමව සිදුකරනු ලබන මිනිස් ජාවාරමක් සම්බන්ධයෙන් නීති අංශවල අවධානය යොමුව ඇති බවට මාධ්‍ය වාර්තා පලව තිබේ.
මෙම ජාවාරමේ ප්‍රධානතම ක්‍රමවේදය වී ඇත්තේ ප්‍රසංග සංවිධායකයින් විසින් සංගීත කණ්ඩායම්, තාක්ෂණික ශිල්පීන් සහ සහායක පිරිස් ලෙස පෙන්වමින් නීති විරෝධී ලෙස පුද්ගලයින් ඕස්ට්‍රේලියාවට රැගෙන යාමයි.
වාර්තා වන තොරතුරු අනුව, මෙලෙස රැගෙන යන ඇතැම් පුද්ගලයින් අදාළ සංවිධායකයින්ටම අයත් ඕස්ට්‍රේලියාවේ පිහිටි ආපනශාලා තුළ ලාභ ශ්‍රමිකයන් ලෙස සේවයේ යොදවා ඇති බවයි.
මෙම වංචනික ක්‍රියාවලිය සංගීත ප්‍රසංග වලට පමණක් සීමා නොවී, නර්තන ප්‍රසංග හා චිත්‍රපට පෙන්වීම් හරහා ශිල්පීන් සහ නර්තන කණ්ඩායම් ගෙන්වා, ඔවුන් අතරට නීති විරෝධී සංක්‍රමණිකයන් ද ඇතුළත් කරමින් සිදු කර ඇති බවයි.
මේ මගඩියට ප්‍රසංගවලට ප්‍රසිද්ධ නර්තන වින්‍යාසකරුවන් (Choreographers) ලෙස සම්බන්ධව සිටින බවට ද චෝදනා එල්ලවී තිබේ.
මෙහි ඇති වඩාත්ම කනගාටුදායක තත්ත්වය වන්නේ, ප්‍රසංග සඳහා සහභාගී වන මෙරට ප්‍රධාන පෙළේ ගායක ගායිකාවන් සහ කලාකරුවන් ද මේ පිළිබඳව හොඳින් දැනුවත්ව සිටින බවට වන චෝදනාවය.
ඔවුන් ඕස්ට්‍රේලියාවට ගිය පසු, මීට පෙර මෙවැනිම ප්‍රසංග වීසා හරහා පැමිණ නීති විරෝධීව රැඳී සිටින පුද්ගලයින්ව සෘජුවම මුණගැසෙන බවටද මාධ්‍ය වාර්තා වල දැක්වේ.
මේ හරහා පැහැදිලි වන්නේ සංවිධායකයින් මෙන්ම ඇතැම් ප්‍රධාන ශිල්පීන් ද මෙම වීසා වංචාවට සෘජුව හෝ වක්‍රව අනුබල දෙන බවයි.
ප්‍රසංග වීසා මත ඕස්ට්‍රේලියාවට ඇතුළු වන මෙම පිරිස් භාවිතා කරන ප්‍රධානතම උපක්‍රමය වන්නේ, ඕස්ට්‍රේලියාව තුළට ඇතුළු වූ පසු එරට රැඳී සිටිමින්ම ශිෂ්‍ය වීසා අයැදුම් කිරීම බව මේවන විට ඕස්ට්‍රේලියානු ආරක්ෂක අංශ විසින් අනාවරණය කරගෙන ඇති බවද පැවසේ.
ඒ හරහා ප්‍රසංග වීසා අවභාවිත කරමින් දීර්ඝකාලීනව එරට රැඳී සිටීමටත්, රැකියාවල නිරත වීමටත් ඔවුන් අවස්ථාව උදාකර ගන්නා බවද වාර්තා වේ ෴
ඩුබායිහිදී කොටුවූ ‘කොණ්ඩ රංජි’ගේ සුලමුල – පැළඳ සිටි රත්‍රංවල ඇත්ත නැත්තත් එළියට
(09.09.2026 – sinhala.adaderana.lk)
ඩුබායි ආරක්ෂක අංශ මගින් අත්අඩංගුවට ගෙන මෙරටට පිටුවහල් කළ ‘රංජිත් කුමාර’ හෙවත් ‘කොණ්ඩ රංජි’ නමැති සංවිධානාත්මක අපරාධකරු අද (9) අලුයම කටුනායක ගුවන්තොටුපොළේදී අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගනු ලැබීය.
සැකකරුගෙන් මූලික ප්‍රශ්නකිරීම් වලින් අනතුරුව ඔහු බස්නාහිර උතුර අපරාධ කොට්ඨාසයට රැගෙන ආ අතර, එහිදී පැය 72 ක් රඳවාගෙන ප්‍රශ්න කිරීමට පොලිසිය අවසර ලබාගෙන තිබේ.
‘රංජිත් කුමාර’ නොහොත් ‘කොණ්ඩ රංජි’ ඩුබායිහීදී ඉකුත් මාර්තු 29 වැනිදා රාත්‍රි 7 ට පමණ ඉරානය, ඩුබායි වෙත එල්ල කළ ගුවන් ප්‍රහාර සිය ජංගම දුරකථනයෙන් වීඩියෝගත කර මිතුරන් තිදෙනෙකු (3) වෙත යැවීම හේතුවෙන් එරට ආරක්ෂක අංශ විසින් අත්අඩංගුවට ගනු ලැබීය.
කෙසේ නමුත් එම වීඩියෝ දර්ශන හුවමාරු කර පැය 2 ක් ඇතුළත ඩුබායි ආරක්ෂක අංශ ඔහු අත්අඩංගුවට ගෙන, ඔහු සතුව තිබූ පවුම් 17 ක් බර රන් මාල 2 ක්, ඩිරාම් 18,000 ක මුදලක් හා ජංගම දුරකථනද ආරක්ෂක භාරයට ගෙන තිබේ.
අනතුරුව ඔහු අද (09) අලුයම සාමාන්‍ය මගී ගුවන් යානයකින් මෙරටට පිටුවහල් කර ඇති අතර, ඒ පිළිබඳ මෙරට ආරක්ෂක අංශ වෙත දැනුම්දීමක් හෝ සිදුකර නොමැත.
කෙසේවෙතත් තොරතුරුකරුවකුගෙන් ලද තොරතුරකට අනුව ‘කොණ්ඩ රංජි’ මෙරටට පැමිණීමේදී අපරාධ පරීක්ෂණ දෙපාර්තමේන්තුවේ කටුනායක ගුවන්තොටුපොළ ඒකකයේ නිලධාරීන් ඔහු අත්අඩංගුවට ගැනීමට සමත්ව ඇත.
එහිදී සිදුකළ මූලික ප්‍රශ්න කිරීම්වලදී සැකකරු පවසාඇත්තේ, මීට පෙර අවස්ථාවකද ඩුබායි සිට ඉතාලිය බලායෑමට උත්සහදැරීමේදී ජාත්‍යන්තර පොලිසිය හරහා නිකුත් කර ඇති ‘රතු වරෙන්තුව’ මත තමා අත්අඩංගුවට පත්වූ බවය.
එම අවස්ථාවේදී සතියක් පමණ ආරක්ෂක අංශ භාරයේ සිට, නඩු පවරා සිය ගුවන්ගමන් බලපත්‍රයද එරට ආරක්ෂක අංශ විසින් ලබාගත් බව ඔහු පවසා තිබේ.
එහිදී ඇප හිමිවීමෙන් අනතුරුව ඔහු සිය සගයන් පිරිසක් සමග සාදයක්ද පවත්වා ඇත.
‘කොණ්ඩ රංජි’ නමැත්තා එරටදී ජල බෝතල් අලෙවි කිරීමේ ව්‍යාපාරයක් ආරම්භ කර ඇති අතර, ඒ හේතුවෙන් ඔහු ගෝල්ඩන් වීසා බලපත්‍රයක්ද ලබාගෙන තිබේ.
තමන් යටතේ සේවකයින් 11 දෙනෙකු සේවය කළ බවත් සැකකරු පවසා ඇත.
හිටපු අමාත්‍ය මංගල සමරවීර මහතාගේ පෞද්ගලික ලේකම්වරයා කඳානේදී වෙඩි තබා ඝාතනය කිරීම සම්බන්ධයෙන් සැකකරුට චෝදනා එල්ලවී තිබුණද, වැඩිදුර ප්‍රශ්න කිරීම්වලදී ඔහු පවසා ඇත්තේ එම සිද්ධිය සම්බන්ධයෙන් තමන් කිසිවක් නොදන්නා බවයි.
එමෙන්ම තමන් ඩුබායිහිදී පැළඳ සිටි ආභරණ චීනයේ නිෂ්පාදිත ව්‍යාජ රත්‍රන් බවත් පවසා තිබේ.
සැකකරුට එරෙහිව හරක් හා එළුවන් සොරකම, යතුරුපැදි සොරකම, සූදු ක්‍රීඩා කිරීම හා මත්ද්‍රව්‍ය සන්තකයේ තබාගැනීම ඇතුළු චෝදනා රැසක් පවතී.
වැඩිදුර විමර්ශන බස්නාහිර උතුර අපරාධ කොට්ඨාසය භාර සහකාර පොලිස් අධිකාරී සී. ධර්මරත්න මහතාගේ උපදෙස් මත ක්‍රියාත්මකයි.
+
මොරටුව, රාවතාවත්තේ වෙඩිතැබීමක් – කිසිවෙකුට හානියක් නැත
(09.09.2026 – sinhala.adaderana.lk)
මොරටුව, රාවතාවත්ත එමානුවෙල් මාවත ප්‍රදේශයේ දී අද (09) රාත්‍රී 07:00 ට පමණ වෙඩිතැබීමක් සිදුව තිබේ.
යතුරුපැදියකින් පැමිණි පුද්ගලයින් දෙදෙනෙකු (2) විසින් ත්‍රිරෝද රථ රියදුරෙකු ඉලක්ක කර මෙම වෙඩිප්‍රහාරය එල්ලකර පලාගොස් ඇත.
කෙසේ වෙතත් වෙඩි ප්‍රහාරයෙන් කිසිදු පුද්ගලයෙකුට හානියක් සිදුව නොමැති බව පොලීසිය පවසයි.
මෙලෙස වෙඩි ප්‍රහාරයට ලක්ව ඇත්තේ අඟුලාන ප්‍රදේශයේ පදිංචි මොරටුව නගර සභාවේ සේවය කරන පුද්ගලයෙකු බව වාර්තා වේ.
මත්ද්‍රව්‍ය ජාවාරම්කරුවන් අතර පවතින ආරවුලක ප්‍රතිඵලයක් ලෙස මෙම වෙඩිතැබීම සිදුවන්නට ඇති බවට පොලීසිය සැක කරයි.
සිද්ධිය සම්බන්ධයෙන් සැකකරුවන් අත්අඩංගුවට ගැනීම සඳහා මොරටුව පොලීසිය විසින් විශේෂ පොලිස් කණ්ඩායම් දෙකක් යොදවා විමර්ශන ආරම්භ කර ඇත ෴
මහා නා හිමිවරුන්ට කුණුහරුපෙන් බනිනවා – සමාජ මාධ්‍යයේ වීඩියෝව ගැන CIDයට පැමිණිල්ලක් (10.09.2026)
+
දෙහිවල නිවසකට අත්බෝම්බ ප්‍රහාරයක් – ජීවිත හානි සිදුවී නැත; දේපල හානි සිදුවී ඇත
(10.09.2026 – sinhala.adaderana.lk)
කොහුවල පොලිස් වසමේ කළුබෝවිල, දෙහිවල ප්‍රදේශයේ මහා පරිමාණ මත්ද්‍රව්‍ය ජාවාරම්කරුවෙකුගේ මිතුරෙකුගේ නිවසකට යතුරුපැදියකින් පැමිණි නාඳුනන පුද්ගලයින් දෙදෙනෙකු (2) විසින් අත්බෝම්බ ප්‍රහාරයක් එල්ල කර තිබේ.
පොලීසිය පැවසුවේ ඊයේ (09) රාත්‍රී 11:45 ට පමණ මෙය සිදුව ඇති බවය.
අත්බෝම්බය නිවසේ ගේට්ටුවෙන් ඇතුළට දමා අදාළ සැකකරුවන් පලාගොස් ඇත.
අත්බෝම්බය පුපුරා යෑමෙන් නිවසේ ඉදිරිපස ජනෙල් දෙකකට (2) සහ විදුරුවලට හානි සිදුව ඇති අතර, ජීවිත හානි සිදුව නොමැත.
මෙලෙස ප්‍රහාරය එල්ල වී ඇත්තේ, මහා පරිමාණ මත්ද්‍රව්‍ය ජාවාරම්කරුවෙකු වන ‘දිසානායක මුදියාන්සේලාගේ අවිෂ්ක ඒෂාන්’ යන අයගේ මිතුරෙකු වන ‘තරිදු රවිෂාන්’ යන අයට බවටත්, ඔහු මත් ජාවාරම්කරුගේ අනුගාමිකයන් සමග සමීප සම්බන්ධතා පවත්වන පුද්ගලයෙකු බවටත් තොරතුරු අනාවරණය විය.
මේ සම්බන්ධයෙන් කොහුවල පොලිස්ථානය මඟින් වැඩිදුර විමර්ශන සිදුකරනු ලබයි.
අදාළ සිදුවීම සිදුවන විට එම නිවසේ සිට ඇත්තේ 56 හැවිරිදි කාන්තාවක් පමණි.
+
රත්නපුරින් ඇසුණු සාහසික මනුෂ්‍ය ඝාතනයක් – සැකකරු පොලීසියට භාරවෙයි
(10.09.2026 – sinhala.adaderana.lk)
රත්නපුර, කැටලියන්පල්ල ප්‍රදේශයේ නිවසක් තුළ මියගොස් සිටි පුද්ගලයෙකුගේ මරණය පිළිබඳ රත්නපුර පොලීසිය පරීක්ෂණ ආරම්භ කර තිබේ.
අදාළ පුද්ගලයාව පුටුවක ගැටගසා, අලවංගුවකින් හිසට පහරදී, ගෙල මිරිකා ඝාතනය කර ඇතැයි අනාවරණය වී ඇත.
මෙලෙස ඝාතනයට ලක්ව ඇත්තේ කැටලියන්පල්ල, කහංගම, රත්නපුර ලිපිනයේ පදිංචිව සිටි හල්පාවලගේ කුලරත්න නමැති 61 හැවිරිදි පුද්ගලයෙකි.
ඊයේ (09) අලුයම ඝාතනය සිදුව ඇති අතර, ඝාතනය සිදුවු නිවසේ හිමිකාරියගේ සහෝදරයා වන 47 හැවිරිදි පුද්ගලය අදාළ ඝාතනය සම්බන්ධයෙන් පොලීසියට පැමිණ භාරවී තිබුණි.
ඝාතනය පුද්ගලික ආරවුලක් මත සිදුකර ඇති බවට දැනට සිදුකළ විමර්ශනවලදී සැකකෙරෙන අතර, රත්නපුර පොලීසිය වැඩිදුර විමර්ශන කටයුතු මෙහෙයවනු ලබයි.
ඝාතනයට ලක්වු පුද්ගලයා ඝාතනය සිදුවු නිවස බලා ගැනිමට සිටි අයෙකු බව සිදුකළ පරීක්ෂණවලදී අනාවරණය වී තිබේ.
රත්නපුර වැඩබලන මහෙස්ත්‍රාත් කිත්සිරි අරඹේවත්ත මහතා විසින් මහෙස්ත්‍රාත් පරීක්ෂණය සිදුකළේය.
+
TT ක්‍රමයට ඩො.මි 80 ක් විදෙස් ගිණුම්වලට යැවූ සැකකරුවෙකු මරදානේදී අත්අඩංගුවට
(10.09.2026 – sinhala.adaderana.lk)
අමෙරිකානු ඩොලර් මිලියන 80 ක් නීතිවිරෝධී TT (Telegraphic Transfer) ක්‍රමය හරහා විදේශීය ගිණුම් වෙත හුවමාරු කිරීමේ සිද්ධියක් සම්බන්ධයෙන් සැකපිට පුද්ගලයෙකු අත්අඩංගුවට ගෙන තිබේ.
පොලිස් මූල්‍ය අපරාධ විමර්ශන කොට්ඨාසය (FCID) විසින් මරදාන ප්‍රදේශයේදී අදාළ සැකකරු අත්අඩංගුවට ගෙන ඇත.
මෙලෙස විදේශීය ගිණුම් වෙත මාරු කර ඇති බවට සැක කෙරෙන අමෙරිකානු ඩොලර් මිලියන 80 හෙවත් ආසන්න වශයෙන් රුපියල් බිලියන 23 ක මුදල 2023 සහ 2025 අතර කාලය තුළ හුවමාරු කර ඇති බවට වාර්තා වෙයි ෴
බණ්ඩාරවෙල මහනගර සභාවේ හිටපු නගරාධිපති අත්අඩංගුවට
(10.09.2026 – sinhala.adaderana.lk)
බණ්ඩාරවෙල මහනගර සභාවේ හිටපු නගරාධිපති ජනක නිශාන්ත රත්නායක මහතා බණ්ඩාරවෙල විශේෂ අපරාධ විමර්ශන ඒකකය විසින් අත්අඩංගුවට ගෙන තිබේ.
ඒ, නගර සභාවේ සිදු වූ මුදල් වංචාවක් සහ කූඨ ලේඛන සකස් කිරීමේ සිද්ධිය් සම්බන්ධයෙන් සිදු කෙරෙන විමර්ශනවලට අදාළවය.
මේ පිළිබඳව මීට මාස කිහිපයකට පෙර අත්අඩංගුවට ගෙන රක්ෂිත බන්ධනාගාර ගතකර සිටින එම සභාවේ ආදායම් පරීක්ෂකවරුන් දෙදෙනා සහ ලිපිකරුවන්ගෙන් සිදු කරන ලද විමර්ශන මත මෙම අත්අඩංගුවට ගැනීම සිදු කර ඇත.
හිටපු නගරාධිපතිරවයා ඊයේ (09) රාත්‍රියේදී අත්අඩංගුවට ගෙන ඇති බව සඳහන්ය.
මේ වනවිට බණ්ඩාරවෙල විශේෂ අපරාධ විමර්ශන ඒකකයේ නිලධාරින් ඔහුගෙන් ප්‍රශ්න කරමින් සිටියි.
සැකකාර හිටපු නගරාධිපතිවරයා අද (10) දින බණ්ඩාරවෙල මහේස්ත්‍රාත් අධිකරණයට ඉදිරිපත් කිරීමට නියමිතය ෴
ඥානසාර හිමිට පිරිනැමූ ජනාධිපති සමාව නීතියට පටහැනි බවට ශ්‍රේෂ්ඨාධිකරණ තීන්දුවක්
(10.09.2026 – sinhala.adaderana.lk)
අධිකරණයට අපහාස කිරීමේ චෝදනා මත සිරදඬුවම් නියම වී සිටි බොදුබල සේනා සංවිධානයේ ලේකම්, පූජ්‍ය ගලගොඩඅත්තේ ඥානසාර හිමියන්ට හිටපු ජනාධිපති මෛත්‍රීපාල සිරිසේන මහතා විසින් ප්‍රදානය කළ පොදුසමාව බලරහිත බව ශ්‍රේෂ්ඨාධිකරණය තීන්දු කළේය.
අතුරුදන්ව සිටින මාධ්‍යවේදී ප්‍රගීත් එක්නැලිගොඩ මහතාගේ බිරිඳවන සන්ධ්‍යා එක්නැලිගොඩ ඇතුළු පිරිසක් විසින් ගොනුකළ මූලික අයිතිවාසිකම් පෙත්සම් විභාග කිරීමෙන් අනතුරුව ශ්‍රේෂ්ඨාධිකරණය විසින් මෙම තීන්දුව ලබා දී තිබේ.
අධිකරණයට අපහාස කිරීමේ චෝදනාවට වරදකරු කෙරුණු ඥානසාර හිමියන්ට 2018 වසරේ අභියාචරාධිකරණය විසින් වසර හයක (6) සිරදඬුවම් නියම කර තිබුණි.
එම දඬුවමින් ඥානසාර හිමියන් නිදහස් කරමින් එවක ජනාධිපතිවරයා විසින් පොදු සමාවක් ප්‍රදානය කර තිබුණි.
+
2025 උසස් පෙළ ප්‍රතිඵල මත විශ්වවිද්‍යාලවලට දෙවන (2) වටයේ දී තෝරාගත් සිසුන්ට නිවේදනයක්
(10.09.2026 – sinhala.adaderana.lk)
2025 වසරේ අපොස උසස් පෙළ විභාග ප්‍රතිඵල පදනම් කර ගනිමින්, පුරප්පාඩු පිරවීමේ දෙවන (2) වටය යටතේ රාජ්‍ය විශ්වවිද්‍යාලවල ප්‍රථම උපාධි පාඨමාලා සඳහා සිසුන් තෝරා ගැනීම මේ වන විට සිදු කර ඇත.
ඒ අනුව, විශ්වවිද්‍යාල ප්‍රතිපාදන කොමිෂන් සභාව (UGC) විසින් අදාළ සිසුන් තෝරා ගැනීම් සිදු කර ඇති අතර, තෝරාගත් සිසුන් සඳහා ලියාපදිංචි වීමේ කටයුතු මේ දිනවල ක්‍රියාත්මක වේ.
මෙම වටය යටතේ විශ්වවිද්‍යාල පාඨමාලා සඳහා තේරී පත්වී ඇති සිසුන් 2026 සැප්තැම්බර් මස 17 වන දිනට පෙර ලියාපදිංචි කටයුතු අවසන් කළ යුතු වේ.
අදාළ ප්‍රතිඵල, විශ්වවිද්‍යාල ප්‍රවේශය සහ ලියාපදිංචි වීමට අවශ්‍ය වැඩිදුර තොරතුරු විශ්වවිද්‍යාල ප්‍රතිපාදන කොමිෂන් සභාවේ නිල වෙබ් අඩවිය ( https://ugc.ac.lk/ ) හරහා ලබා ගත හැක ෴
++
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (ඕනෑම බසකින්) ලබාදෙන්න ෴