16 හැවිරිදි පුතා විසින් පියාට පහරදීලා ඝාතනය කරලා
බොරලැස්ගමුවේ වෙඩි තැබීමට පැමිණි යතුරුපැදිය පන්නිපිටියෙන් හමුවෙයි
දිගන හෝටලයක ෆේස්බුක් සාදයක් වටලයි : තරුණියන් 5 ක් ඇතුළු 43 ක් අත්අඩංගුවට
විද්‍යුත් වාහන සඳහා කොළ පාට අංක තහඩු – මෝටර් රථ ප්‍රවාහන දෙපාර්තමේන්තුව
සැප්තැම්බර් 15 සිට ශ්‍රී ලාංකිකයන්ටද තායිලන්තයේ ‘වීසා නොමැතිව ඇතුළු වීමේ’ සහනය අහෝසි වෙයි
අනතුරකින් බරපතළ තුවාල ලැබූ තරුණයින් දෙදෙනාගේ (2) ගමන් මල්ලේ ‘අයිස් මත්ද්‍රව්‍ය’
අධික උෂ්ණත්වය හේතුවෙන් යාල කලාප දෙකක් වසා දැමීමට තීරණයක්
16 හැවිරිදි පුතා විසින් පියාට පහරදීලා ඝාතනය කරලා
(06.09.2026 – sinhala.adaderana.lk)
මාතලේ, උකුවෙල ප්‍රදේශයේදී පුතෙකු විසින් තියුණු ආයුධයකින් පහරදී සිය පියා ඝාතනය කරනු ලැබ තිබේ.
මෙලෙස මියගොස් ඇත්තේ අවුරුදු 40 ක් වූ උකුවෙල, මාතලේ ප්‍රදේශයේ පදිංචිකරුවෙකි.
දෙදෙනා අතර ඇති වූ ආරවුලක් මත පුතා විසින් මෙම ඝාතනය සිදු කර ඇති බව මූලික විමර්ශනවලදී අනාවරණය වී ඇත.
අවුරුදු 16 ක් වන සැකකරු අත්අඩංගුවට ගෙන ඇති අතර මාතලේ පොලිසිය වැඩිදුර විමර්ශන සිදු කරයි ෴
+++
+++
ආනන්තරීය පාප කර්ම පහකි. 1) තම මව මැරිම, 2) තම පියා මැරීම, 3) රහත් උතුමෙකු මැරීම, 4) බුදුරජුන්ගේ ශරීරයේ ලේ වෛරී සිතින් සෙළවීම, 5) සංඝ භේදය සිදුකිරීම (කළහැක්කේ උපසම්පදා භික්ෂුවක විසින් පමණි). ආනන්තරීය පාප කර්ම සිදුකළ තැනැත්තා මියගිය මොහොතේම ඒකාන්තයෙන් ම දරුණු කර්ම විපාකයකට මුහුණදීමට සිදුවේ. එයට අදාළ කර්ම විපාකය නම් මරණින් මතු ‘අවිචී මහා නරකයෙහි’ ඉපිද දුක් විඳීන්නට සිදුවීමයි. ආනන්තරීය පාප කර්මයේ විපාක අතිශයින්ම ප්‍රබලය ෴
බොරලැස්ගමුවේ වෙඩි තැබීමට පැමිණි යතුරුපැදිය පන්නිපිටියෙන් හමුවෙයි
(05.09.2026 – hirunews.lk)
බොරලැස්ගමුව ප්‍රදේශයේ ඊයේ (04) රාත්‍රියේ සිදුවූ පුද්ගල ඝාතනය සඳහා වෙඩික්කරුවන් විසින් යොදාගන්නා ලද බවට සැකකෙරෙන යතුරුපැදිය පන්නිපිටිය, මහල්වරාව, දිගන පුරාණ විහාරස්ථානය අසල වෙල්යායක අතහැර දමා ගොස් තිබියදී මහරගම පොලිසිය විසින් සොයාගෙන තිබෙනවා.
මහරගම පොලිසියේ ප්‍රජා පොලිස් ඒකකයේ ස්ථානාධිපතිවරයා වෙත ලැබුණු තොරතුරකට අනුව ක්‍රියාත්මක වූ පොලිස් කණ්ඩායමක් විසින් මෙම යතුරුපැදිය සොයාගත් බවයි පොලිසිය සඳහන් කළේ.
බොරලැස්ගමුව – මාලනී බුලත්සිංහල මාවත ප්‍රදේශයේ නිවසකට ඊයේ (04) රාත්‍රියේ යතුරුපැදියකින් පැමිණි පුද්ගලයින් දෙදෙනෙකු (2) විසින් සිදුකළ වෙඩිතැබීමකින් පුද්ගලයෙකු ජීවිතක්ෂයට පත් වුණා.
ඊයේ (04) සිදුවූ වෙඩි තැබීමෙන් මියගොස් ඇත්තේ, අවුරුදු 74 ක් වයසැති බොරලැස්ගමුව ප්‍රදේශයේම පදිංචිකරුවෙක්.
මියගිය පුද්ගලයාගේ පුත්‍රයා ‘කොස්මල්ලි’ නැමති මත්ද්‍රව්‍ය ඡාවාරම්කරුගේ මත්ද්‍රව්‍ය ඡාලයේ මුදල් අයකැමි ලෙස කටයුතු කර තිබූ බවයි පොලිසිය සඳහන් කළේ.
ඔහු ඉලක්ක කර වෙඩි තැබීමට සැකකරුවන් පැමිණ ඇති නමුත් ඔහු නිවසේ නොමැති වීම හේතුවෙන් පියාට මෙලෙස වෙඩි තබා ඇති බවටයි වාර්තා වන්නේ ෴
දිගන හෝටලයක ෆේස්බුක් සාදයක් වටලයි : තරුණියන් 5 ක් ඇතුළු 43 ක් අත්අඩංගුවට
(05.09.2026 – hirunews.lk)
තෙල්දෙණිය පොලිස් බලප්‍රදේශයට අයත් දිගන, අලුත්වත්ත ප්‍රදේශයේ පිහිටි හෝටලයක විවිධ මත්ද්‍රව්‍ය භාවිත කරමින් පවත්වමින් තිබූ ෆේස්බුක් සාදයක් වටලා කාන්තාවන් 5 දෙනෙකු සහ පිරිමි පුද්ගලයින් 38 දෙනෙකු ඇතුළු 43 දෙනෙකු පොලිසිය විසින් අත්අඩංගුවට ගෙන ඇති බව අප වාර්තාකරු පවසනවා.
තෙල්දෙණිය පොලිස් ස්ථානාධිපති ප්‍රධාන පොලිස් පරීක්ෂක එම්.ඩී. චන්ද්‍රපාලට ලද තොරතුරකට අනුවයි මෙම වැටලීම සිදුකර ඇත්තේ.
වැටලීම සිදුකරන අවස්ථාවේදී අදාළ ස්ථානයේ තිබී තහනම් මත්ද්‍රව්‍ය, මත්පැන් සහ බියර් බෝතල් රැසක් ද පොලිස් භාරයට ගෙන තිබෙනවා.
මෙලෙස අත්අඩංගුවට ගෙන ඇත්තේ දිවයිනේ විවිධ ප්‍රදේශවලින් පැමිණි තරුණ පිරිස් වන බවත්, අත්අඩංගුවට ගත් සැකකරුවන් 43 දෙනා අධිකරණ වෛද්‍ය නිලධාරීවරයා හමුවට ඉදිරිපත් කිරීමෙන් අනතුරුව තෙල්දෙණිය මහේස්ත්‍රාත් අධිකරණය වෙත ඉදිරිපත් කිරීමට නියමිත බවත් අප වාර්තාකරු සඳහන් කළා ෴
විද්‍යුත් (විදුලි) වාහන සඳහා කොළ පාට අංක තහඩු – මෝටර් රථ ප්‍රවාහන දෙපාර්තමේන්තුව
(07.09.2026 09:14 +0530 – newsfirst.lk/sinhala/)
සියලු විද්‍යුත් (විදුලි) වාහන සඳහා කොළ පාට පසුබිම සහිත අංක තහඩු නිකුත් කරන බව ‘මෝටර් රථ ප්‍රවාහන දෙපාර්තමේන්තුව’ පවසයි.
මෝටර් රථ ප්‍රවාහන කොමසාරිස් ජනරාල්, විශ්‍රාමික එයා වයිස් මාෂල් තුෂාර ප්‍රනාන්දු පැවසුවේ, විද්‍යුත් වාහන සඳහා නිකුත් කරන කොළපාට අංක තහඩු නීත්‍යානුකූල බවයි.
සෙසු වාහන සඳහා සුදු සහ කහ වර්ණය සහිත අංක තහඩු නිකුත් කෙරෙන බව මෝටර් රථ ප්‍රවාහන කොමසාරිස් ජනරාල්වරයා සඳහන් කළේ ය.
එමෙන්ම ලියාපදිංචි කරන ලද වාහන 88,740 ක නව අංක තහඩු සකස් කර අවසන්ව ඇතැයි මෝටර් රථ ප්‍රවාහන දෙපාර්තමේන්තුව පවසයි.
මෝටර් රථ ප්‍රවාහන කොමසාරිස් ජනරාල් විශ්‍රාමික එයා වයිස් මාෂල් තුෂාර ප්‍රනාන්දු පැවසුවේ 2026 ජුනි 10 වැනිදා සිට 2026 අගෝස්තු 31 වැනිදා දක්වා ලියාපදිංචි කළ අංක තහඩු 56,233 ක්ද ඒ අතර වන බවයි.
එසේම 2023 හා 2024 වසර දෙක තුළ ලියාපදිංචි කළ වාහන 32,507 ක අංක තහඩුද සකස් කර අවසන්ව ඇතැයි ඔහු සඳහන් කළේ ය.
කොමසාරිස් ජනරාල්වරයා, අදාළ වාහන හිමිකරුවන්ට දැනුම් දෙන්නේ, නාරාහේන්පිට මෝටර් රථ ප්‍රවාහන දෙපාර්තමේන්තු කාර්යාල වෙත පැමිණ තම වාහන අංක තහඩු ලබා ගන්නා ලෙසයි ෴
+++
+++
+++
+
සැප්තැම්බර් 15 සිට ශ්‍රී ලාංකිකයන්ටද තායිලන්තයේ ‘වීසා නොමැතිව ඇතුළු වීමේ’ සහනය අහෝසි වෙයි
(07.09.2026 – hirunews.lk)
ලබන සැප්තැම්බර් 15 වනදා සිට ක්‍රියාත්මක වන පරිදි තායිලන්තයේ ‘වීසා රහිතව ඇතුළු වීමේ’ සහනය ශ්‍රී ලාංකික ගමන් බලපත්‍ර හිමියන්ට තවදුරටත් හිමි නොවන බවට තොරතුරු වාර්තා වෙනවා.
තායි රජය විසින් හඳුන්වා දී ඇති නව සංශෝධිත ඇතුළුවීමේ රෙගුලාසි යටතේ මෙම පියවර ගෙන ඇති බව සඳහන්.
තායිලන්ත විදේශ කටයුතු අමාත්‍යාංශය සඳහන් කළේ සංශෝධිත වීසා නිදහස් කිරීම් සහ පැමිණීමේදී ලබාදෙන වීසා සම්බන්ධ නව ක්‍රමවේද අගෝස්තු 31 වනදා එරට රාජ්‍ය ගැසට් පත්‍රයේ ප්‍රකාශයට පත් කර ඇති බවයි.
පසුගිය මැයි මාසයේදී තායිලන්ත කැබිනට් මණ්ඩලය විසින් අනුමත කරන ලද සමාලෝචනයකට අනුව මෙම වෙනස්කම් සිදු කර තිබෙනවා.
ඒ අනුව, මීට පෙර පැවති දින 60 ක වීසා රහිතව රැඳී සිටීමේ සහනය අහෝසි කර ඇති අතර, කෙටි කාලීන සංචාර සඳහා වීසා නොමැතිව ඇතුළු විය හැකි රටවල නාමලේඛනය ද සංශෝධනය කර ඇති බව සඳහන්.
ජාතික ආරක්ෂාව, සංචාරක හා ආර්ථික අභිලාෂයන්, ද්විපාර්ශ්වික අන්‍යෝන්‍ය ප්‍රතිලාභ, අතිරේක වීසා සහන අවම කිරීම සහ තායිලන්තයේ ඉලෙක්ට්‍රොනික වීසා (e-Visa) පද්ධතියේ භාවිතය යන කරුණු සලකා බලමින් තායි රජය මෙම තීරණයට එළඹ තිබෙනවා.
නව රෙගුලාසිවලට අනුව, සැප්තැම්බර් 15 වනදායින් පසුව තායිලන්තය බලා පිටත්ව යන ශ්‍රී ලාංකිකයන් ගමනට පෙර සුදුසු වීසාවක් ලබා ගැනීම අනිවාර්යයි.
ඒ සඳහා තායිලන්තයේ මාර්ගගත e-Visa පද්ධතිය හරහා වීසා අයදුම්පත් යොමු කළ හැකි අතර කොළඹ පිහිටි රාජකීය තායි තානාපති කාර්යාලය ද සැප්තැම්බර් 04 වනදා නිකුත් කළ නිවේදනයක් මගින් මෙම “නව වීසා පියවර” පිළිබඳව දැනුවත් කර තිබෙනවා.
කෙසේ වෙතත්, පවතින වීසා සහන ක්‍රමය යටතේ සැප්තැම්බර් 15 වනදාට පෙර තායිලන්තයට ඇතුළු වන ශ්‍රී ලාංකික සංචාරකයින්ට තායි ආගමන විගමන බලධාරීන් විසින් අවසර ලබා දී ඇති කාලසීමාව අවසන් වන තෙක් එරට රැඳී සිටීමට අවස්ථාව හිමිවෙන බවයි වාර්තා වෙන්නේ ෴
අනතුරකින් බරපතළ තුවාල ලැබූ තරුණයින් දෙදෙනාගේ (2) ගමන් මල්ලේ ‘අයිස් මත්ද්‍රව්‍ය’
(07.09.2026 – sinhala.adaderana.lk)
කොටදෙනියාව, දොරොව්ව ප්‍රදේශයේදි බස් රථයක් හා යතුරුපැදියක් ගැටී අනතුරක් සිදුව ඇති අතර අනතුරින් බරපතළ තුවාල ලැබූ යතුරුපැදිකරු හා පසුපැදිකරු දඹදෙනිය රෝහලට ඇතුළත් කර තිබේ.
එහිදී තුවාලකරුවන්ගේ ගමන් මළු තුළ තිබී ‘අයිස් මත්ද්‍රව්‍ය’ ග්‍රෑම් 350 ක් සොයා ගැනීමට පොලිස් නිලධාරීන් සමත් වී ඇත.
ඒ අනුව අදාළ සැකකරුවන් පොලිස් ආරක්ෂාව යටතේ වැඩිදුර ප්‍රතිකාර සඳහා කුරුණෑගල රෝහලට ඇතුළත් කර ඇත.
ඔවුන් අවුරුදු 21 සහ 25 වයස්වල පසුවන ග්‍රෑන්ඩ්පාස් සහ වැල්ලම්පිටිය ප්‍රදේශවල පදිංචිකරුවන් බවද සඳහන්.
කොටදෙනියාව පොලිසිය සිද්ධිය සම්බන්ධයෙන් වැඩිදුර විමර්ශන සිදු කරයි ෴
අධික උෂ්ණත්වය හේතුවෙන් යාල කලාප දෙකක් වසා දැමීමට තීරණයක්
(07.09.2026 – sinhala.adaderana.lk)
පවතින අධික උෂ්ණත්වය හේතුවෙන් සතුන්ට සහ වනජීවි නිලධාරීන්ට ඇතිවන තාප ආතතිය සැලකිල්ලට ගනිමින්, යාල ජාතික වනෝද්‍යානයේ කලාප අංක 01 සහ 02 ලබන 14 වැනිදා සිට වසාදැමීමට තීරණය කර තිබේ.
අද (07) පැවැති ‘BIG FOCUS’ වැඩසටහනට එක් වෙමින් වනජීවි සංරක්ෂණ දෙපාර්තමේන්තුවේ අතිරේක අධ්‍යක්ෂ ජනරාල් (මෙහෙයුම්) මංජුල අමරරත්න මහතා සඳහන් කළේ, පවතින උෂ්ණාධික කාලගුණය හේතුවෙන් සතුන්ට ජල හිඟය මෙන්ම තාප ආතතියද දැඩිව බලපා ඇති බවය.
එමෙන්ම, සංචාරක ජීප් රථ වැඩි ප්‍රමාණයක් වනෝද්‍යානය තුළ ගමන් කිරීමත් සමඟ පවතින තත්ත්වය යටතේ වනජීවි නිලධාරීන්ට රාජකාරි කටයුතු සිදුකිරීමේදී අපහසුතා මතුවන බවද ඔහු පැවසීය.
ශ්‍රී ලංකාවේ වියළි කලාපයට අයත් යාල කලාප අංක 01 සහ 02 මෙන්ම මන්නාරම සහ විල්පත්තුව ජාතික වනෝද්‍යානය ආශ්‍රිත ප්‍රදේශවල පවතින තත්ත්වය සම්බන්ධයෙන්ද නිලධාරීන් අවධානයෙන් කටයුතු කරමින් සිටින බව මංජුල අමරරත්න මහතා සඳහන් කළේය.
අවශ්‍ය අවස්ථාවලදී අදාළ වනෝද්‍යාන වසා දැමීමට හෝ සතුන්ට සහ නිලධාරීන්ට තාප ආතතියෙන් තොරව කටයුතු කිරීමට අවශ්‍ය පහසුකම් සැලසීමට පියවර ගන්නා බවද ඔහු වැඩිදුරටත් පැවසීය.
+
පූජ්‍ය අම්පිටියේ සුමනරතන හිමියන් අත්අඩංගුවට
(07.09.2026 – hirunews.lk)
පූජ්‍ය අම්පිටියේ සුමනරතන හිමියන් මඩකලපුව මූලස්ථාන පොලිසිය විසින් අත්අඩංගුවට ගනුලැබ තිබෙනවා.
පසුගිය 31 වැනිදා මඩකලපුවේ භූ විද්‍යා සමීක්ෂණ හා පතල් කාර්යාංශයේ කාර්යාලයට ගොස් එහි නිලධාරීන්ගේ රාජකාරිවලට බාධා කළ බව කියන සිද්ධියක් සම්බන්ධයෙනුයි උන්වහන්සේ අත්අඩංගුවට ගෙන ඇත්තේ.
අත්අඩංගුවට පත් උන්වහන්සේ මඩකලපුව මහේස්ත්‍රාත් අධිකරණයට ඉදිරිපත් කිරීමට නියමිතයි ෴
මඩකලපුවේ පිහිටි භූ විද්‍යා සමීක්ෂණ හා පතල් කාර්යාංශයේ කාර්යාල නිලධාරීන්ගේ රාජකාරියට බාධා කළ බව කියන සිද්ධියක් සම්බන්ධයෙන් උන්වහන්සේ අද (07) මඩකලපුව පොලීසිය විසින් අත්අඩංගුවට ගෙන තිබුණි.
අනතුරුව අම්පිටියේ සුමනරතන හිමියන් මඩකලපුව මහේස්ත්‍රාත් අධිකරණයට ඉදිරිපත් කිරීමෙන් පසු හෙට (08) දිනය දක්වා රක්ෂිත බන්ධනාගාරගත කිරීමට අධිකරණය නියෝග කර ඇත ෴
නාමල් රාජපක්ෂ මන්ත්‍රීවරයාට ගෙදරින් කෑම කන්න අවසර
(07.09.2026 – sinhala.adaderana.lk)
රක්ෂිත බන්ධනාගාර ගත කර සිටින ශ්‍රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මන්ත්‍රීවරයාට නිවසින් ආහාර ලබාගැනීමට අවසර ලබාදී ඇති බව බන්ධනාගාර දෙපාර්තමේන්තුව පවසයි.
බන්ධනාගාර මාධ්‍ය ප්‍රකාශක සේනක පල්ලේතැන්න මහතා සඳහන් කළේ නාමල් රාජපක්ෂ මන්ත්‍රීවරයාගේ පාර්ශවයෙන් ලද ඉල්ලීමක් අනුව ඒ සඳහා අවසර ලබාදී ඇති බවය.
එයාර් බස් ගුවන් යානා මිලදී ගැනීමේ දී අල්ලස් ලබාගත් බවට සැකපිට අල්ලස් කොමිසම මගින් අත්අඩංගුවට ගත් පාර්ලිමේන්තු මන්ත්‍රී නාමල් රාජපක්ෂ මහතා ලබන 18 වනදා දක්වා රක්ෂිත බන්ධනාගාර කිරීමට කොළඹ මහේස්ත්‍රාත් අධිකරණය පසුගිය සිකුරාදා නියෝග කළේය.
ඒ අනුව කොළඹ රිමාන්ඩ් බන්ධනාගාරයේ ඔහු රඳවා සිටින වාට්ටුව ආශ්‍රිතව විශේෂ ආරක්ෂක වැඩපිළිවෙළක් ද ක්‍රියාත්මක කර ඇති බව බන්ධනාගාර මාධ්‍ය ප්‍රකාශකවරයා පැවසීය.
එමෙන්ම දිනකට තිදෙනෙකුට (3) ඔහු බැලීම සඳහා අවසර ලබාදී ඇති බව ද මාධ්‍ය ප්‍රකාශකවරයා වැඩිදුරටත් සඳහන් කළේය.
මේ අතර නාමල් රාජපක්ෂ මහතාගේ මව වන ශිරන්ති රාජපක්ෂ මහත්මිය අද (07) පෙරවරුවේ වැලිකඩ බන්ධනාගාරය වෙත ගොස් නාමල් රාජපක්ෂ මහතාගේ සුවදුක් විමසූ බව ‘අද දෙරණ’ වාර්තාකරු පැවසීය.
පාර්ලිමේන්තු මන්ත්‍රී රෝහිත අබේගුණවර්ධන මහතා අද (07) පෙරවරුවේ නාමල් රාජපක්ෂ මහතා බැලීමට වැලිකඩ බන්ධනාගාරය වෙත පැමිණ තිබුණි ෴
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (ඕනෑම බසකින්) ලබාදෙන්න ෴