බොරලැස්ගමුවේ වෙඩිතැබීමක් – එක් (1) අයෙකු මරුට
චීන ජාතිකයා ඝාතන සිද්ධියේ මහ චීනා වෙස්වලාගෙන සිටියදී අල්ලයි
නාමල් අත්අඩංගුවට ගැනීම නීති විරෝධී යි. ගම්මන්පිල 12 වැනිදා පොහොට්ටු වේදිකාවට. (05.09.2026)
නීතිඥයින් අධිකරණයට එරෙහිව කැරැල්ලක. 22 නඩුවේ හෙලි නොවුණු ආන්දෝලනාත්මක රහස් රැසක්. (05.09.2026)
තලෙයිමන්නාරම මුහුදේ වැලිපරයක සිටි තවත් තිදෙනෙක් (3) මුදාගැනේ
බස් රථවලට ‘AI තාක්ෂණික උපකරණ’ සවිකෙරේ
බම්බලපිටියේ සිට දෙහිවල දක්වා අනවසර හෝටල්වලට අවසන් දින දෙයි : සැප්තැම්බර් 10 ට පෙර ඉවත් කිරීමට නියෝග!
GovPay ක්‍රමවේදයට සමාන ව්‍යාජ වෙබ් අඩවියක් ගැන පොලීසියෙන් අනතුරු ඇඟවීමක්
බොරලැස්ගමුවේ වෙඩිතැබීමක් – එක් (1) අයෙකු මරුට
(04.09.2026 – sinhala.adaderana.lk)
අද (04) රාත්‍රියේ බොරලැස්ගමුව මාලනී බුලත්සිංහල මාවත ප්‍රදේශයේදී වෙඩිතබා පුද්ගලයෙකු ඝාතනය කර තිබේ.
පොලිසිය සඳහන් කළේ අදාළ පුද්ගලයා සිය නිවසේ රැඳී සිටියදී යතුරුපැදියකින් පැමිණි නාඳුනන පුද්ගලයින් දෙදෙනෙකු (2) විසින් පිස්තෝල අවියකින් වෙඩිතබා ඇති බවය.
ඝාතනයට ලක්වී ඇත්තේ අවුරුදු 74 ක් වූ බොරලැස්ගමුව ප්‍රදේශයේ පදිංචිකරුවෙකි.
මියගිය පුද්ගලයා මත්ද්‍රව්‍ය ජාවාරම්කරුවෙකු වන ‘කොස් මල්ලි’ නමැත්තාගේ මුදල් අයකැමි ලෙස කටයුතු කළ පුද්ගලයා බවටද හඳුනාගෙන ඇති බව පැවසෙයි.
වෙඩිතැබීමෙන් පසු වෙඩික්කරුවන් පලාගොස් ඇති අතර සැකකරුවන් අත්අඩංගුවට ගැනීම සඳහා බොරලැස්ගමුව පොලිසිය වැඩිදුර විමර්ශන සිදුකරයි.
+++
බොරලැස්ගමුව, මාලිනී බුලත්සිංහල මාවතේ පිහිටි නිවසකදී ඊයේ (04) රාත්‍රියේ සිදුවූ වෙඩිතැබීමෙන් පුද්ගලයෙකු ඝාතනය වීමේ සිද්ධිය සම්බන්ධයෙන් තොරතුරු රැසක් අනාවරණය කරගැනීමට බොරලැස්ගමුව පොලීසිය සමත්ව තිබේ.
පොලිස් විමර්ශනවලදී හෙළිවී ඇත්තේ මෙම වෙඩිතැබීම පාතාල කල්ලි සාමාජිකයෙකු ලෙස සැලකෙන ‘දෙහිවල සැන්ඩෝ’ නමැත්තා විසින් ‘කොස්මල්ලි’ නමැත්තාගේ මුදල් අයකැමිවරයා ඉලක්ක කර මෙම වෙඩිතැබීමට පැමිණ ඇති බව ය.
කෙසේවෙතත් වෙඩික්කරුවන්ගේ ඉලක්කය වැරදීමෙන් එම මුදල් අයකැමිවරයාගේ පියාට වෙඩි වැදී ඇති අතර, මෙලෙස මියගොස් ඇත්තේ අංශභාග රෝගී තත්ත්වයකින් පෙළුණු සුනිල් ප්‍රනාන්දු නමැති 74 හැවිරිදි වියපත් පුද්ගලයෙක් ය.
යතුරුපැදියකින් පැමිණි නාදුනන වෙඩික්කරුවන් දෙදෙනෙකු (2) විසින් පිස්තෝල වර්ගයේ ගිනිඅවියකින් මෙම ප්‍රහාරය එල්ල කර පලාගොස් ඇත.
සිද්ධියට සම්බන්ධ සැකකරුවන් හඳුනාගෙන අත්අඩංගුවට ගැනීම සඳහා බොරලැස්ගමුව පොලීසිය වැඩිදුර විමර්ශන සහ විශේෂ මෙහෙයුම් ක්‍රියාත්මක කරයි.
+
චීන ජාතිකයා ඝාතන සිද්ධියේ මහ චීනා වෙස්වලාගෙන සිටියදී අල්ලයි
(05.09.2026 – hirunews.lk)
කොළඹ වරාය නගරය තුළදී චීන ජාතිකයකු මෝටර් රථයකින් පැහැරගෙන ගොස් ඝාතනය කර කබොක් ගල්වලින් වසා පලා ගිය අපරාදයේ ප්‍රධාන සැකකාර චීන ජාතිකයා බොරු කොණ්ඩයක් පැළඳ වෙස් වලාගෙන සිටියදී දින 43 කට පසු වරාය නගරය තුළදීම ඊයේ (04) අත්අඩංගුවට ගත් බව කොළඹ අපරාධ කොට්ඨාසය සඳහන් කරනවා.
සැකකරු පැළඳ සිටි බොරු කොණ්ඩය ද පොලිස් භාරයට ගෙන තිබෙනවා.
මෙම අපරාධයට සම්බන්ධ තවත් චීන ජාතිකයන් සිව්දෙනකු (4) මීට පෙර අත්අඩංගුවට ගෙන තිබුණා.
ඇහැලියගොඩ පොලිස් ස්ථානයට අයත් කරදන පොලිස් මුරපොලේ නිලධාරීන් කණ්ඩායමක් පොලිස් මුරපොලේ සිට ගැටහැත්ත දෙසට පිහිටි රඹුටන් වගා කර ඇති ඉඩමක ගරා වැටී ඇති නිවසක් තුළ තිබී පුද්ගල මළ සිරුරක් ඉකුත් ජූලි මස 23 වැනිදා සොයා ගත්තා.
ඒ වනවිට එම මළසිරුර කබොක් ගල්වලින් වසා තිබී ඇති අතර, සැකසහිත සුඛෝපභෝගී මෝටර් රථයක් නුගදණ්ඩ කෝවිල අසල මාර්ගයේ තිබී එදිනම හමුවී තිබුණා.
සිදුකළ මූලික විමර්ශනවලදී එය මනුෂ්‍ය ඝාතනයක් බවත්, එය චීන ජාතිකයකුගේ බවටත් අනාවරණය වීමෙන් අනතුරුව සිදුකළ විමර්ශනවලදී කොළඹ වරාය නගරය තුළදී පැහැරගෙන පැමිණි චීන ජාතිකයා බවට අනාවරණය වුණා.
පසුගිය ජුලි 23 වැනිදා මෙම අපරාධය සිදුකර තිබූ දිනවලම සැකසහිත චීන ජාතිකයන් දෙදෙනකු (2) විදේශගතවීම සඳහා කටුනායක බණ්ඩාරනායක ජාත්‍යන්තර ගුවන් තොටුපොළ වෙත ගොස් සිටියදී අත්අඩංගුවට ගත් අතර, අනෙක් චීන ජාතිකයන් දෙදෙනා (2) අත්අඩංගුවට ගත්තේ සිද්ධියෙන් අනතුරුව කොළඹ ප්‍රදේශය මගහැර සීගිරිය ප්‍රදේශයේ ලැගුම්හලක් තුළ සැඟවී සිටියදී ඉකුත් මස 30 වැනිදායි.
54 හැවිරිද සැකකාර චීන ජාතිකයා අධිකරණය වෙත ඉදිරිපත් කර රැඳවුම් නියෝග ලබා ගැනීමට නියමිතයි ෴
නාමල් අත්අඩංගුවට ගැනීම නීති විරෝධී යි. ගම්මන්පිල 12 වැනිදා පොහොට්ටු වේදිකාවට. (05.09.2026)
+
නීතිඥයින් අධිකරණයට එරෙහිව කැරැල්ලක. 22 නඩුවේ හෙලි නොවුණු ආන්දෝලනාත්මක රහස් රැසක්. (05.09.2026)
+
තලෙයිමන්නාරම මුහුදේ වැලිපරයක සිටි තවත් තිදෙනෙක් (3) මුදාගැනේ
(05.09.2026 – hirunews.lk)
තලෙයිමන්නාරමට ඔබ්බෙන් වූ මුහුදු ප්‍රදේශයේ වැලිපරයක අතරමංව සිටි තවත් පුද්ගලයන් තිදෙනෙකු (3) මුදා ගැනීමට නාවික හමුදාව සමත්ව තිබෙනවා.
මෙම පිරිස ද දකුණු ඉන්දියාවේ සිට මුහුදු මාර්ගයෙන් පැමිණ ඇති බවටයි අනාවරණය වී ඇත්තේ.
එම පිරිස අතර පියෙකු (01) සහ ඔහුගේ අවුරුදු 11 ක් හා 13 ක් වයසේ දරුවන් දෙදෙනෙකු (2) ද වන බව සඳහන්.
මෙම මෙහෙයුමත් සමඟ නාවික හමුදාව මඟින් අද (05) දිනය තුළ ළමුන් (05), කාන්තාවන් (04) සහ පිරිමි පුද්ගලයින් (02) ඇතුළුව පුද්ගලයින් (11) ක් මුදාගෙන තිබෙනවා.
එම පිරිස ඉදිරි නීතිමය කටයුතු සඳහා තලෙයිමන්නාරම පොලිස් ස්ථානය වෙත භාරදීමට නියමිතයි ෴
බස් රථවලට ‘AI තාක්ෂණික උපකරණ’ සවිකෙරේ
(05.09.2026 – hirunews.lk)
දුර සේවා මගී ගමන් බස් රථවලට ‘AI තාක්ෂණය’ හඳුන්වාදීමේ ව්‍යාපෘතිය ක්‍රියාත්මක කිරීම සඳහා තාක්ෂණික උපකරණ සවිකිරීම මේ වන විට සිදුවෙමින් පවතිනවා.
මාර්ග ආරක්ෂාව පිළිබඳ ජාතික සභාවේ සම්බන්ධීකරණය මත ජාතික ගමනාගමන කොමිෂන් සභාවට අයත් පුද්ගලික බස් රථ සඳහා තාක්ෂණික මෙවලම් සවි කිරීම කොළඹ බැස්ටියන් මාවතේදී ආරම්භ වුණා.
බස් රථවල ගමන්ගන්නා මගීන්ගේ ආරක්ෂාව මෙන්ම රියැදුරන්ගේ ආරක්ෂාව ද මෙම වැඩසටහනේ අරමුණුයි.
මෙහිදී මූලිකවම දුර සේවා බස් රථ සඳහා ‘AI තාක්ෂණය’ යොදා ගැනීමට සැලසුම් කර තිබෙනවා.
මූලික වටයේදී බස් රථ 10 ක් වෙනුවෙන් මෙම මෙවලම් සවිකෙරෙන අතර ඒවායේ ක්‍රියාකාරීත්වය නිරීක්ෂණය කිරීමෙන් අනතුරුව සමස්ත බස් රථ වෙනුවෙන් මෙම ‘AI තාක්ෂණය’ යොදා ගැනීමට නියමිතයි.
මෙහිදී බස් රථය ගමන් ආරම්භ කරන මොහොතේ පටන් අවසානය දක්වාම රියැදුරුගේ මෙන්ම බසයේ ඇතුළත තත්ත්වයන් නිරීක්ෂණය කරන බව සඳහන්.
ආසන බඳපටි නොපැළඳීම, රියැදුරු වෙහෙසකර තත්ත්වයක් පෙන්නුම් කිරීම, ධාවනය අතරතුර දුරකථන භාවිතය වැනි අනාරක්ෂිත ක්‍රියාවක් සිදුවන්නේනම්, මෙම ආරක්ෂක මෙවලම මගින් වහාම ඒ සම්බන්ධයෙන් කථන පණිවිඩයක් නිකුත් කරනු ඇති.
එමගින් පැවති අනාරක්ෂිත තත්ත්වය ඉවත් කරගැනීමට හැකියාව ලැබෙන බව පෙන්වා දෙනවා.
ප්‍රවාහන මහා මාර්ග හා නාගරික සංවර්ධන අමාත්‍යංශය යටතේ මෙම ව්‍යාපෘතිය ක්‍රියාත්මක කෙරෙනවා ෴
බම්බලපිටියේ සිට දෙහිවල දක්වා අනවසර හෝටල්වලට අවසන් දින දෙයි : සැප්තැම්බර් 10 ට පෙර ඉවත් කිරීමට නියෝග!
(05.09.2026 – hirunews.lk)
බම්බලපිටියේ සිට දෙහිවල දක්වා වෙරළ තීරයේ පවත්වාගෙන යන අනවසර හෝටල් සහ අනෙකුත් ඉදිකිරීම් සැප්තැම්බර් 10 වැනිදාට පෙර ඉවත් කරන ලෙසට බලධාරීන් විසින් නියෝග කර ඇති බව සතිඅන්ත රජයේ ජාතික පුවත්පතක් වාර්තා කරනවා.
එම පුවත්පත වාර්තා කර ඇති පරිදි, වෙරළ සංරක්ෂණ බලධාරීන් විසින් අදාළ අනවසර ව්‍යාපාරික ස්ථාන සහ ඉදිකිරීම් ඉවත් කිරීම සඳහා මෙම උපදෙස් ලබාදී ඇති බව සඳහන්.
වෙරළ කලාපය තුළ අවසරයකින් තොරව සිදුකරන ඉදිකිරීම් සහ පවත්වාගෙන යන ව්‍යාපාරික කටයුතු සම්බන්ධයෙන් ගන්නා ක්‍රියාමාර්ගවල කොටසක් ලෙස මෙම නියෝගය නිකුත් කර තිබෙන බවයි එම වාර්තාවේ සඳහන් වෙන්නේ.
ඒ අනුව නියමිත කාලය තුළ අදාළ අනවසර ඉදිකිරීම් සහ ව්‍යාපාරික ස්ථාන ඉවත් නොකරන ආයතන සම්බන්ධයෙන් නීතිමය සහ පරිපාලන ක්‍රියාමාර්ග ගැනීමට බලධාරීන් සූදානමින් සිටින බවද සඳහන් ෴
GovPay ක්‍රමවේදයට සමාන ව්‍යාජ වෙබ් අඩවියක් ගැන පොලීසියෙන් අනතුරු ඇඟවීමක්
(05.09.2026 – sinhala.adaderana.lk)
රථවාහන වැරදි සඳහා දඩ මුදල් අන්තර්ජාලය ඔස්සේ ගෙවිය හැකි GovPay ක්‍රමවේදයට සමාන ව්‍යාජ වෙබ් අඩවියක් සකස්කර ජනතාවගේ මුදල් සහ සංවේදී දත්ත සොරාගන්නා ජාවාරමක් ක්‍රියාත්මක බව පොලිසිය පවසයි.
GovPay හරහා ගෙවීමට වෙනත් කිසිඳු වෙබ් අඩවියක් නොමැති අතර එම මූල්‍ය වංචාවලට අසු නොවෙන ලෙසට පොලිසිය දැනුම්දෙයි.
රථවාහන වැරදි සඳහා GovPay ක්‍රමවේදය මගින් දඩ මුදල් ගෙවීම හඳුන්වාදුන්නේ මේ වසර (2026) මුලදීය.
ඒ, ජනතාවගේ කටයුතු පහසුකිරීම සහ මුදල් වංචා අවම කිරීමේ අරමුණින්ය.
කෙසේවෙතත් GovPay හා සමාන ව්‍යාජ වෙබ් අඩවියක් සකස් කරමින් ජනතාවගේ මුදල් සහ සංවේදී දත්ත සූක්ෂ්මව සොරාගන්නා ජාවාරමක් ක්‍රියාත්මක බව පොලිසිය සඳහන් කරයි.
එම ව්‍යාජ වෙබ් අඩවියේ සබැඳි, කෙටි පණිවුඩ සහ Whatsapp පණිවුඩ ලෙස ජංගම දුරකථනවලට එවා ජනතාවගේ මුදල් සොරාගැනීම මෙම ජාවාරමේදී සිදුවන බව සඳහන්වේ.
GovPay හරහා ගෙවීමට කිසිඳු වෙබ් අඩවියක් නොමැති බැවින් එම ව්‍යාජ මූල්‍ය වංචාවලට අසු නොවෙන ලෙසට රථවාහන නියෝජ්‍ය පොලිස්පති ඩබ්ලිව්.පී.ජේ. සේනාධීර මහතා ජනතාවට දැනුම් දුන්නේය.
++
ව්‍යාජ රථවාහන දඩ පණිවිඩ පිළිබඳව ප්‍රවේශම් වන්න !
GovPay හරහා මාර්ගගතව (online) රථවාහන දඩ ගෙවීම් කළ හැකි බව පවසමින් මහජනතාව වෙත ව්‍යාජ පණිවිඩ ලැබෙමින් පවතී.
විශේෂ අවධානයට :
GovPay යනු ඔබේ නිල බැංකු යෙදුම් (Banking Apps) හෝ මූල්‍ය තාක්ෂණ යෙදුම් (Fintech Apps) හරහා පමණක් ක්‍රියාත්මක වන ගෙවීම් සේවාවකි.
කෙටි පණිවිඩ (SMS) හෝ වෙනත් කිසිදු නිල නොවන මාර්ග හරහා ලැබෙන ගෙවීම් සබැඳි (payment links) භාවිතා කිරීමෙන් කරුණාකර වළකින්න.
ඕනෑම සැක කටයුතු පණිවිඩයක් හෝ ඊමේල් පණිවිඩයක් පහත ස්ථානයට වාර්තා කළ හැක : info@govpay.lk
- GovPay ( https://govpay.lk/ )
ලිට්‍රෝ ගෑස් මිල පහළට
(05.09.2026 – hirunews.lk)
අද (05) සිට ක්‍රියාත්මක වන පරිදි ලිට්‍රෝ ගෑස් මිල අඩු කර තිබෙනවා. ඒ අනුව,
- කිලෝග්‍රෑම් 12.5 ක ගෘහස්ථ ගෑස් සිලින්ඩරයක මිල රු. 100 කින් අඩු කර ඇති අතර, එහි නව මිල රු. 4,365 යි.
- කිලෝග්‍රෑම් 5 ක ගෘහස්ථ ගෑස් සිලින්ඩරයක මිල රුපියල් 42 කින් අඩු කර ඇති අතර, එහි නව මිල රු. 1,750 යි.
- කිලෝග්‍රෑම් 2.3 ක ගෘහස්ථ ගෑස් සිලින්ඩරයක මිල රුපියල් 20 කින් අඩුකර ඇති අතර, එහි නව මිල රු. 815 යි.
සැප්තැම්බර් මාසය සඳහා ලාෆ්ස් (LAUGFS) ගෑස් මිලෙහි කිසිදු සංශෝධනයක් සිදු නොකරන බව එම සමාගම නිවේදනය කරනවා.
ඒ අනුව, පවත්නා මිල ගණන් යටතේම ලාෆ්ස් ගෑස් සිලින්ඩර පාරිභෝගිකයින් වෙත නිදහස් කෙරෙනු ඇති.
එහිදී, කිලෝග්‍රෑම් 12.5 ක සිලින්ඩරයක මිල රු. 4,965 ක්ද, කිලෝග්‍රෑම් 05 සිලින්ඩරයක මිල රු. 1,988 ක්ද ලෙස පැවති මිලම පවතිනවා ෴
++
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (ඕනෑම බසකින්) ලබාදෙන්න ෴