ජපානය ශ්‍රී ලංකාවට පත්ල පහත් බස් රථ 7 ක් පරිත්‍යාග කරයි
ඩොක්ටර් ප්‍රභාත්, අවසන් වරට ලියූ ලිපියක් එළියට..! “නෑ නෑ එයාලා එන් නෑ විසඳගන්න” (02.09.2026)
5 ශ්‍රේණිය ශිෂ්‍යත්ව ප්‍රතිඵල මත දරුවන් හිංසනයට ලක් කළොත් දැඩි දඬුවම්
රු. කෝටි 20 කට අධික මත්ද්‍රව්‍ය සමග ‘සේදවත්ත කසුන්ගේ’ ගෝලයෙකු අත්අඩංගුවට
22 ට එරෙහි පෙත්සම් විභාගය අවසන් – රහසිගත නිගමනය කථානායකට
‘රහස් පෙදෙසේ කැළැල් වාර්තාවක්’ සොයා තරුණියකට ලිංගික අතවර කළ ‘පොලිස් බුද්ධි අංශ සැරයන්’
නාමල් රාජපක්ෂට අල්ලස් කොමිසමෙන් ලබන 04 වැනිදා කැඳවීමක්
පෙත්සම්කරුවන්ගේ නීතිඥවරුන්ට, අවස්ථාව නොදීම ගැන CLA සභාපතිගේ අවධානය
නලින්ද ඉල්ලූ පාඩම ගම්මන්පිල කියා දෙයි. තිරිගු පිටි මිල ගැන ආණ්ඩුව නොකී කතාව මෙන්න (02.09.2026)
ජපානය ශ්‍රී ලංකාවට පත්ල පහත් බස් රථ 7 ක් පරිත්‍යාග කරයි
(02.09.2026 – hirunews.lk)
ජපන් රජය සහ ශ්‍රී ලංකාව අතර පවතින අඛණ්ඩ සංවර්ධන සහයෝගීතාව යටතේ මෙරට පොදු ප්‍රවාහන සේවාව නංවාලීම සඳහා පත්ල පහත් බස් රථ 7 ක් පරිත්‍යාග කර තිබෙනවා.
ජපන් රජය සහ ජපානයේ යොකොහමා නගරවාසීන්ගේ ඒකාබද්ධ පරිත්‍යාගයක් ලෙස මෙම බස් රථ ශ්‍රී ලංකාවට ලබාදී ඇති බව සඳහන්.
අදාළ බස් රථ 7 ශ්‍රී ලංකා රජය වෙත නිල වශයෙන් භාරදීම ශ්‍රී ලංකාවේ ජපාන තානාපති අකියෝ ඉසොමොටා මහතාගේ ප්‍රධානත්වයෙන් සිදුකර තිබෙනවා.
මෙම බස් රථ මෙරට පොදු ප්‍රවාහන සේවාව වැඩිදියුණු කිරීම සඳහා යොදා ගැනීමට නියමිතයි.
+++
+
ඩොක්ටර් ප්‍රභාත්, අවසන් වරට ලියූ ලිපියක් එළියට..! “නෑ නෑ එයාලා එන් නෑ විසඳගන්න” (02.09.2026)
+
5 ශ්‍රේණිය ශිෂ්‍යත්ව ප්‍රතිඵල මත දරුවන් හිංසනයට ලක් කළොත් දැඩි දඬුවම්
(02.09.2026 – sinhala.adaderana.lk)
5 ශ්‍රේණිය ශිෂ්‍යත්ව ප්‍රතිඵල මත දරුවන් හිංසනයට ලක් කළොත් දැඩි දඬුවම් ලබා දෙන බව කාන්තා සහ ළමා කටයුතු අමාත්‍යාංශය නිවේදනයක් නිකුත් කරමින් දැනුම් දී තිබේ.
5 ශ්‍රේණිය ශිෂ්‍යත්ව විභාග ප්‍රතිඵල පදනම් කරගනිමින් දරුවන් දණ්ඩණයට ලක් කිරීම, මානසිකව හිංසනයට ලක්කිරීම සිදු කිරීමෙන් වළකින ලෙස දැනුම් දී ඇත.
එසේම විභාග ප්‍රතිඵල මත පදනම්ව දරුවන් අපහසුතාවයට පත්වන අයුරේ ජනමාධ්‍ය සහ සමාජ මාධ්‍ය ප්‍රචාරණ කටයුතු සිදු කිරීමෙන්ද වළකින ලෙසට අවධාරණය කර තිබේ.
ඉහත ආකාරයෙන් කටයුතු කිරීම ළමා හිංසනය යටතේ දඬුවම් ලැබිය හැකි වැරදි වන බැවින් එසේ සිදු කරන්නන් හට උපරිම නීතිමය ක්‍රියාමාර්ග ගැනීම සිදු කරනු ලබන බව වැඩිදුරටත් දැනුම් දී ඇත ෴
රු. කෝටි 20 කට අධික මත්ද්‍රව්‍ය සමග ‘සේදවත්ත කසුන්ගේ’ ගෝලයෙකු අත්අඩංගුවට
(02.09.2026 – sinhala.adaderana.lk)
රුපියල් කෝටි 20 කට අධික වටිනාකමකින් යුත් අයිස් කිලෝග්‍රෑම් 8 ක් සහ හෙරොයින් කිලෝග්‍රෑම් 4 ක් සමග මත්ද්‍රව්‍ය ජාවාරම්කරුවෙකුගේ ප්‍රධාන ගෝලයෙකු අද (02) අත්අඩංගුවට ගැනීමට කොළඹ අපරාධ කොට්ඨාසය (CCD) සමත් විය.
ලැබුණු බුද්ධි තොරතුරකට අනුව වැල්ලම්පිටිය, සේදවත්ත ප්‍රදේශයේදී සිදුකළ විශේෂ වැටලීමකදී මෙම සැකකරු අත්අඩංගුවට ගෙන ඇත.
පොලිසිය සිදුකළ මූලික ප්‍රශ්න කිරීම්වලදී අනාවරණය වී ඇත්තේ මොහු ‘සේදවත්ත කසුන්’ නමැති මත්ද්‍රව්‍ය ජාවාරම්කරුගේ මත්ද්‍රව්‍ය අලෙවිකරුවෙකු ලෙස කටයුතු කර ඇති බවය.
කොළඹ දිසාව භාර නියෝජ්‍ය පොලිස්පති නිශාන්ත සොයිසා මහතාගේ සෘජු අධීක්ෂණය සහ මෙහෙයවීම යටතේ කොළඹ අපරාධ කොට්ඨාසය මගින් සිද්ධිය සම්බන්ධයෙන් වැඩිදුර විමර්ශන ක්‍රියාත්මක කෙරේ ෴
22 ට එරෙහි පෙත්සම් විභාගය අවසන් – රහසිගත නිගමනය කථානායකට
(02.09.2026 – sinhala.adaderana.lk)
රජය විසින් පාර්ලිමේන්තුවට ඉදිරිපත් කර තිබෙන ආණ්ඩුක්‍රම ව්‍යවස්ථාවේ 22 වන සංශෝධන පනත් කෙටුම්පත අභියෝගයට ලක් කරමින් ගොනුකර ඇති පෙත්සම් පිළිබඳ විභාගය අවසන් කළ ශ්‍රේෂ්ඨාධිකරණය, එම පනත් කෙටුම්පතේ ව්‍යවස්ථානුකූල භාවය පිළිබඳ රහසිගත නිගමනය පාර්ලිමේන්තුවේ කථානායකවරයා වෙත යොමු කරන බව අද (02) සඳහන් කළේය.
අදාළ පනත් කෙටුම්පත අභියෝගයට ලක් කරමින් ගොනුකර තිබූ පෙත්සම්, එම පනත් කෙටුම්පතට සහාය පළ කරමින් ගොනුකළ පෙත්සම් වෙනුවෙන් පෙනී සිටි නීතිඥවරු සහ නීතිපතිවරයා විසින් ඉදිරිපත් කළ කරුණු සලකා බැලීමෙන් අනතුරුව අගවිනිසුරු ප්‍රීති පද්මන් සූරසේන මහතා ප්‍රමුඛ පංච (5) පුද්ගල ශ්‍රේෂ්ඨාධිකරණ විනිසුරු මඩුල්ලක් විසින් මෙම නියෝගය නිකුත් කරනු ලැබීය.
මෙම පෙත්සම්වලට අදාළ ලිඛිත දේශන තිබේ නම් ඒවා හෙට (03) දින ප.ව. 3 ට පෙර ගොනු කිරීමට පියවර ගන්නා ලෙසත් විනිසුරු මඩුල්ල මෙහිදී පාර්ශ්වකරුවන්ට නියම කළේය.
+
‘රහස් පෙදෙසේ කැළැල් වාර්තාවක්’ සොයා තරුණියකට ලිංගික අතවර කළ ‘පොලිස් බුද්ධි අංශ සැරයන්’
(02.09.2026 – hirunews.lk)
‘ආධුනික පොලිස් කොස්තාපල්වරියක්’ ලෙස සේවයට බැඳීමට අයැදුම් කළ 24 හැවිරිදි තරුණියකගේ ‘රහස් පෙදෙසේ කැළැල් පිළිබඳ වාර්තාවක්’ ලබාගත යුතු බව පවසා ඇගේ නිවසට ගොස් ලිංගික අතවර කළ බව කියන ‘රාජ්‍ය බුද්ධි අංශයේ’ පොලිස් සැරයන්වරයෙකු ‘වැලිමඩ පොලිසිය’ විසින් අත්අඩංගුවට ගෙන තිබෙනවා.
මෙලෙස අත්අඩංගුවට පත්ව ඇත්තේ ‘බණ්ඩාරවෙල බුද්ධි කාර්යාලය’ට අනුයුක්තව සේවය කරන නිලධාරියෙක්.
සිද්ධියට මුහුණ දී ඇත්තේ වැලිමඩ, මිරහවත්ත ප්‍රදේශයේ පදිංචි තරුණියක බවයි වාර්තා වන්නේ.
අදාළ තරුණිය විසින් පොලිසියට කරන ලද පැමිණිල්ලේ සඳහන් වන්නේ, තමන් ‘ආධුනික පොලිස් කොස්තාපල් ධුරය’ සඳහා අයැදුම් කර තිබූ අතර එළඹෙන 09 වැනිදා ඊට අදාළ වෛද්‍ය පරීක්ෂණය සඳහා කැඳවා තිබූ බවයි.
අද (01) සිවිල් ඇඳුමින් සැරසී තම නිවසට පැමිණි අදාළ බුද්ධි නිලධාරියා, වෛද්‍ය පරීක්ෂණයට පෙර ‘රහස් ප්‍රදේශයේ ඇති කැළැල් සම්බන්ධයෙන් වාර්තාවක්’ ලබා දිය යුතු බවත්, එම වාර්තාව ලබා නොදුන්නොත් රැකියාව අහිමි වන බවත් පවසා තිබෙනවා.
පසුව ඔහුගේ ඉල්ලීම මත සාලයේ වූ පුටුවක වාඩි වූ අවස්ථාවේදී, තරුණියගේ ගවුම උස්සා රහස් ප්‍රදේශය අතගා මෙම නිලධාරියා විසින් අතවර කර තිබෙන බව වාර්තා වනවා.
එහිදී වහා ක්‍රියාත්මක වූ තරුණිය, සැකකරුගේ අත ගසා දමා කුස්සියට ගොස් සිදුවූ අතවරය පිළිබඳව සිය මවට පවසා තිබුණා.
අනතුරුව දෙමාපියන් සමඟ පැමිණ අදාළ තරුණිය විසින් ‘වැලිමඩ පොලිස් ස්ථානය’ට මේ පිළිබඳව පැමිණිලි කර තිබෙනවා.
බදුල්ල දිසාව භාර නියෝජ්‍ය පොලිස්පති ලක්සිරි විජේසේන, බණ්ඩාරවෙල ජ්‍යෙෂ්ඨ පොලිස් අධිකාරී මයුර පෙරේරා සහ බණ්ඩාරවෙල සහකාර පොලිස් අධිකාරී (II) අයි.එම්.ඒ. උදයකුමාර යන නිලධාරීන්ගේ උපදෙස් මත වැඩිදුර විමර්ශන ක්‍රියාත්මකයි ෴
නාමල් රාජපක්ෂට අල්ලස් කොමිසමෙන් ලබන 04 වැනිදා කැඳවීමක්
(02.09.2026 – hirunews.lk)
ශ්‍රී ලංකා පොදුජන පෙරමුණේ ජාතික සංවිධායක සහ පාර්ලිමේන්තු මන්ත්‍රී නාමල් රාජපක්ෂට ලබන 04 වැනිදා අල්ලස් හෝ දූෂණ චෝදනා විමර්ශන කොමිෂන් සභාව හමුවේ පෙනී සිටින ලෙස දැනුම්දී තිබෙනවා.
ඒ අනුව ලබන 04 වැනිදා පෙරවරු 9 ට කොමිෂන් සභාව හමුවේ පෙනී සිටින ලෙස නාමල් රාජපක්ෂ වෙත ලිඛිතව දැනුම්දී ඇති බවයි වාර්තා වන්නේ.
අදාළ කැඳවීමට අනුව නාමල් රාජපක්ෂ කොමිෂන් සභාව හමුවේ පෙනී සිටීන බවයි ශ්‍රී ලංකා පොදු ජන පෙරමුණේ පක්ෂ කාර්යාලයේ ප්‍රකාශකයෙක් ‘හිරු ප්‍රවෘත්ති’ සමඟ අදහස් දක්වමින් සඳහන් කළේ.
කෙසේ වෙතත්, ඔහුට අදාළව කොමිෂන් සභාව හමුවේ පෙනී සිටීමට කැඳවීමට හේතුව මෙතෙක් නිල වශයෙන් අනාවරණ වී නොමැති බවයි වාර්තා වන්නේ ෴
පෙත්සම්කරුවන්ගේ නීතිඥවරුන්ට, අවස්ථාව නොදීම ගැන CLA සභාපතිගේ අවධානය
(02.09.2026 – sinhala.adaderana.lk)
22 වැනි ආණ්ඩුක්‍රම ව්‍යවස්ථා සංශෝධනයට එරෙහි පෙත්සම් විභාගයේ දී පෙත්සම්කරුවන්ගේ නීතිඥවරුන්ට, පිළිතුරුදීමට අවශ්‍ය වූ නමුත් ඔවුන්ට අවස්ථාවක් නොලැබුණු බව ‘පොදුරාජ්‍ය මණ්ඩලීය නීතිඥ සංගමයේ’ (CLA) සභාපති ස්ටීවන් තිරූ මහතා පවසයි.
ශ්‍රේෂ්ඨාධිකරණයේ අද (2) පැවැති අදාළ පෙත්සම් විභාගය සඳහා නිරීක්ෂකයකු ලෙස එක්වීමෙන් අනතුරුව මාධ්‍ය වෙත අදහස් දක්වමින් ඒ මහතා මෙහිදී වැඩිදුරටත් පවසා සිටියේ, අවසානයේ සිදුවු දේ ‘ඉතාමත් කණගාටුදායකය’ බවය.
එමෙන්ම පෙත්සම් විභාග කිරීම සඳහා පූර්ණ විනිසුරු මඬුල්ලක් පත් නොකිරීම සම්බන්ධයෙන්ද ස්ටීවන් තිරූ මහතා මෙහිදී අදහස් දැක්වීය.
අධිකරණයේ ස්වාධීනත්වයට සහ ආණ්ඩුක්‍රම ව්‍යවස්ථාවට අතිශය වැදගත් වන මෙවැනි කරුණක් විභාග කිරීමට පූර්ණ විනිසුරු මඬුල්ලක් (Full Bench) පත් නොකිරීම පිළිබඳව ශ්‍රී ලංකා නීතිඥ ප්‍රජාව අතර දැඩි කතාබහක් නිර්මාණය වී ඇති බවද ස්ටීවන් තිරූ මහතා සඳහන් කළේය.
සාමාන්‍යයෙන් මෙවැනි වැදගත් ආණ්ඩුක්‍රම ව්‍යවස්ථාමය කරුණු විභාග කිරීම සඳහා විශාල විනිසුරු මඬුල්ලක් පත් කරනු ලබන නමුත්, මෙම නඩුව සඳහා පූර්ණ විනිසුරු මඬුල්ලක් ලබා දෙන ලෙස කළ ඉල්ලීම ප්‍රතික්ෂේප වී ඇති බව තමාට දැනගන්නට ලැබුණු බවද හෙතෙම පැවසීය.
එබැවින් මෙවැනි තීරණාත්මක නඩුවක් සඳහා පූර්ණ විනිසුරු මඬුල්ලක් නොදීමට හේතු වූ කරුණු කවරේදැයි ප්‍රශ්න කළ ඒ මහතා, මෙය අධිකරණයේ ස්වාධීනත්වය හමුවේ මතුවන බරපතළ ගැටලුවක් බව වැඩිදුරටත් අවධාරණය කළේය.
මෙහිදී තවදුරටත් අදහස් දැක්වූ ඒ මහතා :
“මං අද ආවේ මේ නීති කෘත්‍ය බලන්න. අප විසින් සිදුකළ නිරීක්ෂණයන් පදනම් කරගනිමින් අපි වාර්තාවක් සකස් කරනවා. විනිසුරුවරුන් අද දවස පුරාම ඉතා ඉවසීමෙන් යුක්තව මෙම නීති කෘත්‍ය හැසුරුවා. ඔවුන් නීතිඥයින්ට කරුණු දැක්වීම සඳහා ප්‍රමාණවත් කාලයක් ලබා දුන්නා.
කෙසේ වෙතත් අවසානයේ සිදුවූ දේ එක ඉතාමත් කනගාටුදායකයි. පෙත්සම්කරුවන්ට, නීතිඥවරුන්ට පිළිතුරුදීමට අවශ්‍ය වූ නමුත් ඔවුන්ට අවස්ථාවක් ලබාදුන්නේ නැහැ. ඔවුන්ට කිව්වා ලිඛිතව කරුණු දැක්වීමක් සිදුකරන්න කියලා.
බොහොමයක් අධිකරණ ක්‍රියාවලිවලදී ඒක ඒතරම් සුලබ දෙයක් නෙමෙයි. විශේෂයෙන්ම මේවගේ වැදගත් නඩුවලදී වාචික පිළිතුරුදීමේ අයිතිය සාමාන්‍යයෙන් ලබාදෙනවා.
ඉතින් මට හිතෙනවා ඒක හරිම කනගාටුදායකයි කියලා. අපේ අදහස නම් ඔවුන්ට තිබ්බා පිළිතුරුදීමට අවස්ථාවක් ලබාදෙන්න.
මම මෙතන නීතිඥ සංගමයේ සාමාජිකයන්ගෙන් දැනගත් දේ තමයි, මෙතන පූර්ණ විනිසුරු මඩුල්ලක් සිටියේ නැහැ. මොකද මේක ඉතාමත් වැදගත් නීති කෘත්‍යයක්.
සාමාන්‍යයෙන් මේ වගේ අවස්ථාවක පූර්ණ විනිසුරු මඬුල්ලක් ඉන්න ඕන. මට කිව්වා ඔවුන්, ඔවුන්ගේ ඒ ඉල්ලීම ප්‍රතික්ෂේප කරා කියලා. එතන ගැටලුවක් තියෙනවා පූර්ණ විනිසුරු මඬුල්ලක් පත් නොකළේ ඇයි කියලා.
දෙපාර්ශ්වය විසින් තර්ක කරනු ලැබූ නඩුවේ හොඳ නරක පිළිබඳ මා අදහස් දක්වන්නේ නැහැ. ඒක අපේ රාජකාරිය නෙමෙයි. නමුත් අධිකරණයේ ස්වාධිනත්වය කියන්නේ ඉතාමත් වැදගත් සංකල්පයක්.
ඒ නිසා එය ආරක්ෂා විය යුතුයි. සියලුම නීති තර්ක පැත්තකින් තියමු. අධිකරණයේ ස්වාධිනත්වය පළුදුවීමට යම් පියවරක් අරගෙන තියෙනවා නම් එය ඉවත් කළ යුතුයි. එම සැකය දිගටම පවතිනවා නම් තීතිය ගැන තර්ක කිරීමෙන් ප්‍රයෝජනයක් නැහැ…” යැයි පැවසීය.
+++
22 වැනි සංශෝධනයේ පෙත්සම් විභාගයේ සම්පූර්ණ විස්තරය (02.09.2026)
+
නලින්ද ඉල්ලූ පාඩම ගම්මන්පිල කියා දෙයි. තිරිගු පිටි මිල ගැන ආණ්ඩුව නොකී කතාව මෙන්න (02.09.2026)
++
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (ඕනෑම බසකින්) ලබාදෙන්න ෴