නේපාලයේ වගේ මහා ගංවතුර ඛේදවාචකයක් ඕනෑම වෙලාවක ලංකාවෙත් වෙන්න පුලුවන්… (28.08.2026)
22 වැනි සංශෝධනයට එරෙහි පෙත්සමට නීතිඥ සංගමයෙන් නව මෝසමක්
කිඹුල් ප්‍රහාරයකින් මිය ගිය දෙදරු පියාගේ මළ සිරුර හමුවෙයි
ඩෙංගු රෝගීන්ගේ සංඛ්‍යාව 95,000 සීමාව ඉක්මවයි
සංවිධානාත්මක අපරාධකරුවන්ගේ මිලියන 6,000 ක වත්කම් සහ දේපළ තහනම්
තිරිඟු පිටි කිලෝවක මිල රුපියල් 17 කින් ඉහළට – රොටි, පරාටා ඇතුළු පිටි ආශ්‍රිත ආහාර මිල රුපියල් 5 කින් ඉහළට
(29.08.2026 – hirunews.lk)
රොටි, පරාටා සහ කෙටි ආහාර ඇතුළු පිටි ආශ්‍රිත ආහාරවල මිල රුපියල් 5 කින් ඉහළ දැමීමට සමස්ත ලංකා ආපනශාලා හිමියන්ගේ සංගමය තීරණය කර තිබෙනවා.
ඒ අනුව මෙම මිල වැඩි කිරීම අද (29) මධ්‍යම රාත්‍රියේ සිට ක්‍රියාත්මක කිරීමට නියමිත බවයි එම සංගමය සඳහන් කරන්නේ.
අද (29) උදෑසන තිරිඟු පිටි කිලෝග්‍රෑමයක මිල රුපියල් 17 කින් ඉහළ දැමීමත් සමග මෙම තීරණය ගෙන තිබෙනවා.
ඒ අනුව අද (29) මධ්‍යම රාත්‍රියෙන් පසු රොටි, පරාටා සහ කෙටි ආහාර ඇතුළු පිටි ආශ්‍රිත ආහාර මිල ගණන් ඉහළ යනු ඇති.
+++
++
නේපාලයේ වගේ මහා ගංවතුර ඛේදවාචකයක් ඕනෑම වෙලාවක ලංකාවෙත් වෙන්න පුලුවන්… (28.08.2026)
+
විනිසුරුවරුන්ට බලපෑම් කරන්න මාලිමාවෙන් සැලසුමක්. කොළඹ වරායට අමෙරිකාව, ඉන්දියාව සහ චීනය බල පොරයක. (29.08.2026)
+
22 වැනි සංශෝධනයට එරෙහි පෙත්සමට නීතිඥ සංගමයෙන් නව මෝසමක්
(29.08.2026 – hirunews.lk)
ආණ්ඩුක්‍රම ව්‍යවස්ථාවට ගෙන එන ලද ‘විසි දෙවන ආණ්ඩුක්‍රම ව්‍යවස්ථා සංශෝධන’ පනත් කෙටුම්පතට එරෙහිව ශ්‍රේෂ්ඨාධිකරණය හමුවේ ගොනු කර ඇති පෙත්සම සම්බන්ධයෙන්, ශ්‍රේෂ්ඨාධිකරණයේ සියලුම විනිසුරුවරුන්ට පවතින උනන්දුව හා පැහැදිලි ලබැඳියාවන් අතර ගැටුමක්‌ (Conflict of Interest) පවතින හේතුවෙන් එය පූර්ණ විනිසුරු මඬුල්ලක් ඉදිරියේ විමසා බලන ලෙස ඉල්ලා ශ්‍රී ලංකා නීතිඥ සංගමය විසින් නව මෝසමක් ඉදිරිපත් කර තිබෙනවා.
ඒ පසුගිය අගෝස්තු 24 වැනි දින ඉදිරිපත් කරන ලද පෙත්සමට වැඩි යමක් ලෙසයි.
ශ්‍රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්‍රාමික වයස් සීමාව ඉහළ නැංවීම සඳහා ගෙනැවිත් ඇති 22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත ආණ්ඩුක්‍රම ව්‍යවස්ථාවේ 3 වන ව්‍යවස්ථාවට පටහැනි බැවින් එය සම්මත කර ගැනීමට ජනමත විචාරණයක් අවශ්‍ය වන බවටත්, ආණ්ඩුක්‍රම ව්‍යවස්ථාවේ 132(3)(iii) ව්‍යවස්ථාව යටතේ සියලුම විනිසුරුවරුන්ගෙන් සමන්විත පූර්ණ විනිසුරු මඬුල්ලක් (Full Court) ඉදිරියේ මෙම නඩුව විමසීමට නියෝග කරන ලෙසටත් තීන්දුවක් ලබා දෙන ලෙස ඉල්ලමින් ශ්‍රී ලංකා නීතිඥ සංගමයේ සභාපති රජීව් අමරසූරිය සහ ලේකම් නලින් ද සිල්වා විසින් පසුගිය අගෝස්තු 24 වැනි දින ශ්‍රේෂ්ඨාධිකරණය වෙත උක්ත පෙත්සම ඉදිරිපත් කර තිබුණා.
කෙසේ නමුත් ශ්‍රී ලංකා නීතිඥ සංගමයේ සභාපති රජීව් අමරසූරිය සහ ලේකම් නලින් ද සිල්වා යන මහත්වරුන්ගේ අත්සනින් යුතුව S.C. (S.D.) No: SC/SD/47/26 යටතේ ගොනු කර ඇති මෙම නව මෝසම මඟින් අධිකරණ පනතේ 49(3) වගන්තිය පෙන්වා දී තිබෙනවා.
එහි සඳහන් වන්නේ යම් විනිසුරුවරයෙකුට අදාළ කරුණක් සම්බන්ධයෙන් පෞද්ගලික උනන්දුවක් හෝ බලපෑමක් ඇත්නම්, එය වෙනත් විනිසුරුවරුන් විසින් විමසිය යුතු බවයි.
මෙම සංශෝධන පනත් කෙටුම්පත මඟින් උසස් අධිකරණ විනිසුරුවරුන්ගේ සේවා කාලය සහ විශ්‍රාම යන වයස් සීමාවන් වෙනස් කිරීමට යෝජනා කර ඇති බැවින්, ශ්‍රේෂ්ඨාධිකරණයේ විනිසුරුවරුන් සියලු දෙනාම මෙම කාරණය සම්බන්ධයෙන් සෘජුවම පාර්ශ්වකරුවන් බවට පත්වන බව නීතිඥ සංගමය වැඩිදුරටත් පෙන්වා දෙනවා.
ඒ අනුව, පවතින ලබැඳියාවන් අතර ගැටුම්කාරී තත්ත්වය මඟහරවා ගැනීම සඳහා මෙම නඩුව ඉදිරි අගෝස්තු 31, සැප්තැම්බර් 01 හෝ 02 යන දිනවලින් එකක විවෘත අධිකරණයේදී පූර්ණ විනිසුරු මඬුල්ලක් (Full Court) ඉදිරියේ සලකා බලන ලෙසට ඔවුන් වැඩිදුරටත් ඉල්ලා සිටිනවා ෴
කිඹුල් ප්‍රහාරයකින් මිය ගිය දෙදරු පියාගේ මළ සිරුර හමුවෙයි
(29.08.2026 – sinhala.adaderana.lk)
බෙල්ලන්විල වැව ආසන්නයේ අතුරු ඇළ මාර්ගයක පාවෙමින් තිබූ පිරිමි පුද්ගලයෙකුගේ මළ සිරුරක් හමූවී තිබේ.
මියගිය තැනැත්තා නෙළුම් මල් කැඩීමට ගොස් කිඹුල් ප්‍රහාරයට ලක්ව අතුරුදන්ව සිටි අයෙකු බව බොරලැස්ගමුව පොලීසිය සඳහන් කළේය.
මරණකරු හොරණ කණන්විල ප්‍රදේශයේ පදිංචිව සිටි මදුර ජිනේන්ද්‍ර නමැති 44 හැවිරිදි දෙදරු පියෙකි.
මෙම පුද්ගලයා පසුගිය 27 වැනිදා නෙළුම් මල් කැඩීම සඳහා බෙල්ලන්විල වැව ආසන්නේ අතුරු ඇළ මාර්ගයකට බැස ඇති අතර එහිදී ඔහු අතුරුදන්ව ඇතැයි පොලීසිය කියයි.
මේ සම්බන්ධයෙන් ප්‍රදේශවාසීන් පොලිසියට කරන ලද දැනුම්දීමක් අනුව සොයා බැලුව ද කිසිදු තොරතුරක් එදින දැනගැනීමට නොහැකිවී ඇත.
අද (29) දහවල් එම පුද්ගලයාගේ මළ සිරුර ඊට මීටර් 100 ක් පමණ ඈතින් වූ ඇළ මාර්ගයේ පාවෙමින් තිබියදී ලද තොරතුරක් අනුව මළ සිරුර ගොඩගත් බව පොලීසිය සඳහන් කළේය.
මළ සිරුරේ හිස ප්‍රදේශයේ සහ පපු ප්‍රදේශයේ කිඹුල් ප්‍රහාරයට ලක්වීමේ ලකුණු දක්නට ඇති බව ද සඳහන්ය.
ස්ථානීය පරීක්ෂණ නුගේගොඩ අපරාධ පරීක්ෂණාගාරයේ නිලධාරීන් සිදු කළ අතර මේ සිද්ධිය සම්බන්ධයෙන් වැඩිදුර විමර්ශන බොරලැස්ගමුව පොලීසියි විසින් සිදු කරනු ලබයි ෴
ඩෙංගු රෝගීන්ගේ සංඛ්‍යාව 95,000 සීමාව ඉක්මවයි
(29.08.2026 – sinhala.adaderana.lk)
2026 වසරේ මේ දක්වා කාලය තුළ වාර්තා වූ ඩෙංගු රෝගීන්ගේ සංඛ්‍යාව 95,035 දක්වා ඉහළ ගොස් තිබේ.
නිවේදනයක් නිකුත් කරමින් ජාතික ඩෙංගු මර්දන ඒකකය සඳහන් කළේ, අගෝස්තු මාසයේදී රෝගීන් 9,699 දෙනෙකු වාර්තාවී ඇති බවය.
මේ (2026) වසරේ මේ දක්වා කාලය තුළ ඩෙංගු ආසාදිත මරණ 72 ක් වාර්තාවී ඇති බව සඳහන්ය.
මෙම කාලයේදී වැඩිම රෝගීන් සංඛ්‍යාවක් බස්නාහිර පළාතෙන් වාර්තා වන අතර එම ප්‍රමාණය 50,287 කි. දකුණු පළාතෙන් රෝගීන් 13,843 ක්, මධ්‍යම පළාතෙන් රෝගීන් 8,647 ක් සබරගමුව පළාතෙන් රෝගීන් 7,808 ක් ලෙස හඳුනාගෙන තිබේ.
එමෙන්ම වැඩිම රෝගීන ප්‍රමාණයක් ගම්පහ දිස්ත්‍රික්කයෙන් හඳුනාගෙන ඇති අතර එම සංඛ්‍යාව 20,248 ක් වේ.
තව ද කොළඹ දිස්ත්‍රික්කයෙන් රෝගීන් 18,842 දෙනෙකු, මහනුවර දිස්ත්‍රික්කයෙන් රෝගීන් 6,931 දෙනෙකු, මාතර දිස්ත්‍රික්කයෙන් රෝගීන් 6,125 දෙනෙකු සහ කළුතර දිස්ත්‍රික්කයෙන් රෝගීන් 6,122 දෙනෙකු වාර්තාවී ඇත.
දිවයින පුරා සෞඛ්‍ය වෛද්‍ය නිලධාරී බලප්‍රදේශ 76 ක් තවදුරටත් අධි-අවදානම් කලාප ලෙස හඳුනාගෙන ඇත ෴
සංවිධානාත්මක අපරාධකරුවන්ගේ මිලියන 6,000 ක වත්කම් සහ දේපළ තහනම්
(29.08.2026 – hirunews.lk)
සංවිධානාත්මක අපරාධකරුවන්ගේ සහ මත්ද්‍රව්‍ය ජාවාරම්කරුවන්ගේ රුපියල් මිලියන 6,000 ක දේපළ තහනම් කර ඇති බව නීතිවිරෝධී වත්කම් විමර්ශන කොට්ඨාසය පවසනවා.
2024 වසරේ සැප්තැම්බර් 21 වැනිදා සිට මේ දක්වා සැකකරුවන් 66 දෙනෙකු මෙරටට රැගෙනවිත් තිබෙනවා.
එම සැකකරුවන්ද ඇතුළුව සංවිධානාත්මක අපරාධ සහ මත්ද්‍රව්‍ය ජාවාරම් චෝදනා ලත් සැකකරුවන්ට අදාළ විමර්ශන 113 ක් සම්බන්ධයෙන් එම දේපළ සහ වත්කම් තහනම් කර ඇති බවයි නීතිවිරෝධී වත්කම් විමර්ශන කොට්ඨාසය කියා සිටියේ.
ඒ අනුව, සැකකරුවන් 102 කට අයත්ව තිබූ රුපියල් මිලියන 5,423 ක දේපළ මත්ද්‍රව්‍ය ජාවාරම්කරුවන්ගේ වන අතර, පුද්ගලයින් තිදෙනෙකුට (3) අයත් රුපියල් මිලියන 209 ක් සංවිධානාත්මක අපරාධකරුවන්ගේ දේපළ වනවා.
පිරමීඩ වංචා සහ පුපුරණ ද්‍රව්‍ය වැරදිවලට සම්බන්ධ 8 දෙනෙකුගේ රුපියල් මිලියන 367 ක දේපළ ද ඒ අතරට අයත්.
මෙලෙස තහනම් කළ දේපළ අතර රත්තරන් කිලෝග්‍රෑම් 2 ග්‍රෑම් 140 ක්, අක්කර 136 ක ඉඩම්, නිවාස 55 ක් සහ වාහන 142 ක් ඇති බව සදහන්.
2024 වසරේ සැප්තැම්බර් 21 වැනිදා සිට මෙරටට රැගෙන ආ සැකකරුවන් අතර ‘රතු නිවේදන’ නිකුත් කළ ලද සැකකරුවන් 28 දෙනෙක් සිටින අතර, ‘රතු නිවේදන නිකුත් කර නොමැති සැකකරුවන්’ 38 දෙනෙකු සිටිනවා.
2024 සැප්තැම්බර් මාසයෙන් පසුව මේ වන විට අන්තර්ජාතික පොලිසිය හරහා සැකකරුවන් රැගෙන ඒමට අවශ්‍ය ‘රතු නිවේදන’ 110 ක් අලුතින් නිකුත් කර තිබෙනවා.
පසුගිය අගෝස්තු 18 වැනිදා වන විට මෙරට පොලිසිය මගින් නිකුත් කර ඇති සමස්ත ‘රතු නිවේදන’ සංඛ්‍යාව 236 ක්.
ඒ අතරින් ‘රතු නිවේදන’ 96 ක් සංවිධානාත්මක අපරාධකරුවන් සඳහා ලබාගෙන තිබෙනවා.
පොලිස් වාර්තාවලට අනුව ඉන් 35 දෙනෙකු සිටින රටවල් ද හඳුනාගෙන තිබෙන අතර, ඒ අනුව සැකකරුවන් 18 දෙනෙකු එක්සත් අරාබි එමීර් රාජ්‍යයේ ද, 11 දෙනෙකු ඉන්දියාවේ සැඟවී සිටිනවා.
එක්සත් රාජධානිය, ප්‍රංශය, රුසියාව, කැනඩාව සහ ඉතාලිය යන රටවල සැකකරුවෙකු (1) බැගින් සැඟවී සිටින බවයි අදාළ වාර්තාවල දැක්වෙන්නේ ෴
සෙවනගල සීනී කර්මාන්ත ශාලාව දින නියමයක් නැතිව වසා දමයි
(29.08.2026 – lankacnews.com)
සීමාසහිත ලංකා සීනි (පුද්ගලික) සමාගමට අයත් සෙවනගල ඒකකයේ කර්මාන්තශාලාව නැවත දැනුම් දෙන තුරු දින නියමයක් නොමැතිව වසා දැමීමට එහි පාලනාධිකාරිය තීරණය කර තිබේ. සේවකයින් විසින් අඛණ්ඩව සිදු කරනු ලබන වැඩ වර්ජනය හේතුවෙන් ආයතනයට සිදුවන මූල්‍යමය පාඩුව අවම කර ගැනීම සඳහා මෙම පියවර ගත් බව සමාගම නිවේදනය කරයි.
පසුගිය 25 වැනිදා පස්වරු 02:00 සිට සෙවනගල ඒකකයේ සේවක පිරිසක් සිය රාජකාරි කටයුතුවලින් බැහැරව නිෂ්පාදන කටයුතු අත්හිටුවීමට පියව
ර ගෙන තිබුණි.
මේ හේතුවෙන් සිදුවන මූල්‍ය අලාභය පාලනය කිරීම සඳහා අත්‍යවශ්‍ය සේවා පවත්වාගෙන යන නිලධාරීන් හැර සෙසු සේවකයින්ට පසුගිය 26 සහ 27 යන දෙදින තුළ නිවාඩු ලබා දීමට පාලනාධිකාරිය කටයුතු කර තිබේ.
කර්මාන්තශාලාවේ නිෂ්පාදන කටයුතු යළි ආරම්භ කරන ලෙස ප්‍රධාන මෙහෙයුම් නිලධාරියා විසින් පසුගිය 28 වැනිදා දැනුම් දී තිබුණද, සේවකයින් සිය වර්ජනය අත්නොහැරීම හේතුවෙන් තත්ත්වය තවදුරටත් සංකීර්ණ වී ඇත.
නිෂ්පාදන කටයුතු ආරම්භ කිරීමෙන් පසුවද සේවකයින් සුපුරුදු පරිදි රාජකාරිවල නිරත නොවීම හේතුවෙන්, තවදුරටත් පාඩු ලැබිය නොහැකි බව පවසමින් පාලනාධිකාරිය විසින් කර්මාන්තශාලාව මෙලෙස දින නියමයක් නොමැතිව වසා දැමීමට අවසාන වශයෙන් තීරණය කර ඇත.
+++
+++
සෙවනගල සීනි කර්මාන්ත ශාලාවේ මෙහෙයුම් තත්ත්වය ගැන සභාපතිවරයාගෙන් ප්‍රකාශයක්
(29.08.2026 – sinhala.adaderana.lk)
සෙවනගල සීනි කර්මාන්තශාලාවේ වත්මන් තත්ත්වය සහ සේවක වෘත්තීය ක්‍රියාමාර්ග සම්බන්ධයෙන් එහි සභාපති වසන්ත අතුල කුමාර මහතා පැහැදිලි කිරීමක් සිදු කර තිබේ.
එහිදී ඔහු පෙන්වා දෙන්නේ, කර්මාන්තශාලාවේ සේවක නොසන්සුන්තාව හේතුවෙන් පසුගිය කාලය තුළ අවස්ථා කිහිපයකදී නිෂ්පාදන කටයුතුවලට බාධා එල්ලවූ බවය.
ඒ අනුව අගෝස්තු 25 වැනිදා සිට සේවකයන් සේවයට වාර්තා කළද නිෂ්පාදන කටයුතු නිසි පරිදි සිදු නොවීම හේතුවෙන් කර්මාන්තශාලාවේ මෙහෙයුම් කටයුතු අඩාලවී ඇත.
අගෝස්තු 26 සහ 27 යන රජයේ නිවාඩු දිනවලද නිෂ්පාදන කටයුතු ආරම්භ කිරීමට නොහැකි වූ අතර, අගෝස්තු 28 වැනිදා උදෑසන 10:00 වන විටත් නිෂ්පාදන කටයුතු ආරම්භ නොවීම හේතුවෙන්, නිෂ්පාදනයකින් තොරව වැටුප් සහ අතිකාල දීමනා ගෙවීමෙන් සිදුවන පාඩුව වැළැක්වීම සඳහා නැවත දැනුම් දෙනතුරු කර්මාන්තශාලාව වසා තැබීමට පාලනාධිකාරියට සිදුවූ බව සභාපතිවරයා පැවසීය.
එමෙන්ම, කර්මාන්තශාලාව වසා තිබියදීත් අත්‍යවශ්‍ය කටයුතු පවත්වාගෙන යාමට බාධා එල්ල වී ඇති අතර, සීනි අලෙවිය සඳහා පැමිණි ලොරි රථවලටද බාධා කිරීම හේතුවෙන් ආයතනයේ ආදායම් කටයුතුවලට බලපෑම් එල්ල වී තිබේ.
ආයතනයේ පිරිස් බලය සහ වැටුප් ව්‍යුහය සම්බන්ධයෙන් පසුගිය කාලය තුළ පැවති ගැටලු විසඳීම සඳහා වත්මන් පාලනාධිකාරිය විසින් විධිමත් පිරිස් බල තක්සේරුවක් සහ නව වැටුප් ව්‍යුහයක් හඳුන්වාදීමට කටයුතු කරමින් සිටී.
කිසිදු සේවකයෙකුගේ වැටුප අඩු නොකර මෙම ක්‍රියාවලිය ක්‍රියාත්මක කිරීම සඳහා වැටුප් කොමිෂන් සභාව සමඟ සාකච්ඡා කරමින් සිටින බව වසන්ත අතුල කුමාර මහතා අනාවරණ කළේය.
වත්මන් වෘත්තීය ක්‍රියාමාර්ගය සම්බන්ධයෙන් කම්කරු දෙපාර්තමේන්තුව විසින් ද අදාළ පාර්ශ්ව වෙත නීතිමය තත්ත්වය දැනුම්දී ඇති බව සඳහන්.
සෙවනගල සීනි කර්මාන්තශාලාව මොනරාගල දිස්ත්‍රික්කයේ උක් ගොවීන්ගේ ජීවනෝපාය සහ විශාල සේවක පිරිසකගේ රැකියා සමඟ සෘජුව බැඳී පවතින බැවින්, කර්මාන්තශාලාවේ අඛණ්ඩ පැවැත්ම සුරක්ෂිත කිරීම සියලු පාර්ශ්වයන්ගේ වගකීමක් බව සභාපතිවරයා අවධාරණය කරයි.
එබැවින්, කඩාකප්පල්කාරී ක්‍රියාමාර්ගවලින් වැළකී, වහාම සේවයට වාර්තා කරන ලෙසත්, පවතින ගැටලු සාකච්ඡා මාර්ගයෙන් නීත්‍යානුකූලව විසඳා ගැනීමට සහය වන ලෙසත් සභාපතිවරයා සියලු සේවකයන්ගෙන් වැඩිදුරටත් ඉල්ලා සිටියි.
++
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (ඕනෑම බසකින්) ලබාදෙන්න ෴