විදුලිය උත්පාදනයට සීමාව ඉක්මවා වික්ටෝරියා ජලාශයේ ජලය නිදහස් කරන බවට චෝදනාවක්
විදුලිය උත්පාදනයට සීමාව ඉක්මවා වික්ටෝරියා ජලාශයේ ජලය නිදහස් කරන බවට චෝදනාවක්
(15.04.2026 – 19:29 +0530 – sinhala.adaderana.lk)
විදුලිය උත්පාදනය සඳහා වික්ටෝරියා ජලාශයේ ජලය අසාමාන්ය ආකාරයෙන් නිදහස් කිරීමට ආණ්ඩුව තීරණය කර ඇති බව පෙරටුගාමී සමාජවාදී පක්ෂය පවසයි.
එහි බහුජන ලේකම් දුමින්ද නාගමුව අද (15) නුගේගොඩ ප්රදේශයේ පැවති මාධ්ය හමුවකට එක්වෙමින් මේ බව අනාවරණ කළේය.
ප්රමිතියෙන් තොර ගල්අඟුරු ආනයනය හේතුවෙන් තාප විදුලි උත්පාදනය අඩුවීමට පිළියමක් ලෙස මෙම පියවර ගැනීමට යෝජනාවී ඇති බව ද ඔහු අවධාරණය කරයි.
පසුගිය මාර්තු 24 වෙනිදා කෘෂිකර්ම අමාත්ය කේ.ඩී. ලාල්කාන්ත සහ බලශක්ති අමාත්ය කුමාර ජයකොඩි ගේ මූලිකත්වයෙන් සහ නිලධාරීන්ගේ සහභාගීත්වයෙන් පැවති රැස්වීමකදී මෙම තීරණය ගෙන ඇති බව බහුජන ලේකම්වරයා පෙන්වා දුන්නේය.
“බාල ගල්අඟුරු හේතුවෙන් නොරොච්චෝලෙ තාප විදුලි බලාගාරයේ විදුලි ජනනය අඩාල වීම නිසා විදුලි නිෂ්පාදනයට ඩීසල් බලාගාරවල විදුලිය ජනනය කිරීමේදී අධික පිරිවැයක් දරන්නට සිදුවෙන බව දැනටමත් වාර්තා වෙනවා. සිදුවන පිරිවැය පාරිභෝගිකයන් මත පැටවීමට එරෙහි විරෝධතා මතුවන නිසා ආණ්ඩුව මෙම තීන්දුව අරන්. ‘එකක් කඩතොලු වසා ගන්නට ගිහින් මට වූ කාරියා’ කියලා අර ඉඳුරුවෙ ආචාරියා ගැන කියනවා වගේ දැන් ආණ්ඩුව මේ බාල ගල්අඟුරු ප්රශ්නය නිසා සීයක් කඩතොලු ඇතිරමින් තිබෙනවා.
අපට තොරතුරු ලැබී තිබෙන ආකාරයට වික්ටෝරියා ජලාශයේ ජලය, පානීය ජල අවශ්යතා වනුවෙන් භාවිත කිරීම සඳහා මුහුදු මට්ටමේ සිට මීටර් 422 පට්ටමේ පවත්වාගෙන යාම අවශ්ය වන නමුත් මේ ආණ්ඩුවෙ හිතුවක්කාර තීරණ නිසා එම සීමාව පහත වැටීමක් වෙනවා.
ජලාශවල ජලය අධික වශයෙන් විදුලි බල උත්පාදනයට යොදවා ගැනීම හේතුවෙන් මේ වනවිට මහනුවර, කුණ්ඩසාලේ හා දිගන ප්රදේශ කිහිපයකට පානීය ජලය සපයන බලගොල්ල පොම්පාගාරය අකර්මන්ය වන තත්වයක් මේ වනවිට උද්ගතව තිබෙනවා.
මේ වනවිට ජල සැපයුම් සබඳතා 17,000 කට පානීය ජලය සැපයුම ගැටලුවක් වෙලා. බවුසර් මගින් ජලය සැපයීමට පියවර ගෙන ඇතත් පාරිභෝගික අවශ්යතාව ඝන මීටර් 12,000 ක් වුවත් දෛනිකව බෙදාහරින්නට හැකිව තියෙන්නෙ ඝනමීටර් 500 ක් පමණයි.
ඒ විතරක් නෙවෙයි, මේ හේතුව නිසා පල්ලෙකැලේ ආයෝජන කලාපයේ ඇතැම් කම්හල්වල නිෂ්පාදන ඉලක්ක සැපිරීම අභියෝගයක් වෙලා, මොකද ජලය නැති නිසා අප්රේල් 10 වැනිදා කම්හල් වසා දමන්නට පියවර අරන්.
මේ තත්වය නිසා වික්ටෝරියා, රන්දෙනිගල සහ රන්ටැඹේ ජලාශවල ජලය, කෘෂි කර්මාන්තයට අවශ්ය විදියට කලමනාකරණයේ ගැටලුවක් ඇතිවන නිසා මේ ප්රශ්නය තවත් දිග්ගැස්සෙනවා. අපි ආණ්ඩුවට කියන්නෙ වහාම මේ අමනෝඥ තීරණය හකුලා ගන්න කියලා”.
+++
+
ප්රමිතිගත අංක තහඩු වෙනස් කරන වාහනවලට වැඩ වරදී
(15.04.2026 – hirunews.lk)
මෝටර් රථ ප්රවාහන දෙපාර්තමේන්තුව නිකුත් කරන ප්රමිතිගත අංක තහඩු වෙනස් කර රථ වාහන ධාවනය කරන බවට තොරතුරු ලැබී ඇති බැවින් එවැනි රියදුරන්ට එරෙහිව නීතිය දැඩිව ක්රියාත්මක කරන ලෙස නිලධාරීන්ට උපදෙස් දී ඇති බව රථවාහන පාලන, සහ මාර්ග ආරක්ෂාව භාර නියෝජ්ය පොලිස්පති ඩබ්ලිව්.පි.ජේ. සේනාධීර සඳහන් කළා.
අලුතින් ලියාපදිංචි කෙරෙන වාහන සඳහා අංක තහඩු නිකුත් කිරීම සම්පූර්ණයෙන් සිදුනොකරන පසුබිමක ඇතැම් ජාවාරම්කරුවන් නීතිවිරෝධී ක්රියා සිදුකරගෙන යාමට මෙය අවස්ථාවක් කරගෙන ඇති බවයි ඔහු සඳහන් කළේ.
එමෙන්ම අලුතින් වාහන ලියාපදිංචි කරන මෝටර් රථ හිමියන් විවිධ පැහැයෙන් යුත් අංක තහඩු සවිකර මෝටර් රථ ධාවනය කරන අතර එය නියාමනය කරන ලෙස පොලිස්පතිවරයා මෝටර්රථ කොමසාරිස් ජනරාල් දැනුවත් කර ඇති බව ද නියෝජ්ය පොලිස්පතිවරයා කියා සිටියා ෴
ප්රෙෂර් බලන්න ගිය වෛද්යවරියට ලිංගික අතවර කළ රෝගියෙක් අත්අඩංගුවට
(15.04.2026 – hirunews.lk)
වෛද්යවරියකට ලිංගික අතවර කළ බව කියන සිද්ධියකට අදාළව කළුතර නාගොඩ මහ රෝහලේ ප්රතිකාර ලබමින් සිටි රෝගියෙක් ඊයේ (14) අත්අඩංගුවට ගත් බව කළුතර දකුණ පොලිසිය පවසනවා.
මෙලෙස අත්අඩංගුවට පත්ව ඇත්තේ අගලවත්ත, මහගම ප්රදේශයේ පදිංචි පුද්ගලයෙක්.
අපස්මාර රෝගය සහ අධික බීමත්කම හේතුවෙන් මතුගම පිඹුර රෝහලේ සිට වැඩිදුර ප්රතිකාර සඳහා මොහු ඊයේ (14) පස්වරුවේ නාගොඩ මහ රෝහලේ අංක 22 වාට්ටුවට ඇතුළත් කර තිබූ බව පොලිසිය පවසනවා.
සැකකරු වාට්ටුවේ ප්රතිකාර ලබමින් සිටියදී, ඔහුගේ රුධිර පීඩනය පරීක්ෂා කිරීමට පැමිණි මෙම වෛද්යවරියගේ පපු ප්රදේශය ස්පර්ශ කර ඇති අතර, වෛද්යවරිය ඔහුට බැන වැදී එවැනි දෑ නොකරන ලෙස අවවාද කර ඇතැයි වාර්තා වෙනවා.
කෙසේ වෙතත්, වෛද්යවරිය නැවතත් වෛද්ය පරීක්ෂණ උපකරණය ක්රියාත්මක කිරීමට උත්සාහ කළ අවස්ථාවේදී රෝගියා දෙවන වරටත් එම ආකාරයෙන්ම ලිංගික අතවරයක් සිදු කර ඇති බව පැමිණිල්ලේ සඳහන්.
පසුව මෙම සිද්ධිය සම්බන්ධයෙන් වෛද්යවරිය විසින් වාට්ටුව භාර ප්රධාන වෛද්ය නිලධාරිනිය දැනුවත් කිරීමෙන් අනතුරුව, රෝහලේ ස්ථාපිත පොලිස් මුරපොල වෙත පැමිණිල්ලක් ඉදිරිපත් කර තිබුණා.
ඒ අනුව ක්රියාත්මක වූ කළුතර දකුණ පොලිසිය සැකකරු අත්අඩංගුවට ගෙන ඇති අතර, ඔහු මේ වන විට පොලිස් ආරක්ෂාව යටතේ රෝහලේ ප්රතිකාර ලබමින් පසුවේ. සැකකරු මතුගම අධිකරණයට ඉදිරිපත් කිරීමට නියමිතයි ෴
දියේ ගිලී සහෝදරයින් තිදෙනෙක් (3) අතුරුදන්
(15.04.2026 – hirunews.lk)
සේරුනුවර සෝමාවතිය රක්ෂිතය මගින් ගලා බසින මහවැලි ගගේ දිය නෑමට ගිය එකම පවුලේ සහෝදරයින් තිදෙනෙකු (3) දියේ ගිලී අතුරුදන්ව තිබෙනවා.
මොවුන් මහින්දපුර ප්රදේශයේ පදිංචි අවුරුදු 24, 34 සහ 35 යන වයස්වල පසුවන්නන්.
සිය පියා සහ තවත් සහෝදරයෙකු (1) සමග දිය නාමින් සිටියදීයි මොවුන් මෙම අනතුරට මුහුණ දී ඇත්තේ.
මේ අතර, හබරාදූව පොලිස්වසමේ ඊයේ (14) පස්වරුවේ සිදු වූ දියේ ගිලීම් හේතුවෙන් පුද්ගලයින් දෙදෙනෙකු (2) මියගොස් තිබෙනවා.
පොලිස් මාධ්ය කොට්ඨාසය සඳහන් කළේ, හබරාදූව මුහුදු තීරයේ දිය නෑමට ගිය තරුණයින් දෙදෙනෙකු (2) දියේ ගිලීම හේතුවෙන් ප්රදේශවාසීන් විසින් බේරාගෙන කලුගල රෝහලට ඇතුළත් කරන විටත් ඔවුන් මියගොස් සිටි බවයි.
මෙලෙස මියගොස් තිබුණේ, කටුනායක ප්රදේශයේ සිට විනෝද චාරිකාවක් සදහා හබරාදූ ප්රදේශයට පැමිණි සිටි අවුරුදු 21 සහ 26 යන වයස්වල පසුවන්නන්.
+++
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්රතිචාර (සිංහල හෝ ඉංග්රීසි බසින්) ලබාදෙන්න ෴