රාජිත කිරින්ද ධීවර වරායේ වැලි කැණීමෙන් රජයට රු. කෝටි 2 ක් පාඩු කරලා – අල්ලස් කොමිසම
රාජිත කිරින්ද ධීවර වරායේ වැලි කැණීමෙන් රජයට රු. කෝටි 2 ක් පාඩු කරලා – අල්ලස් කොමිසම
(29.08.2025 – hirunews.lk)
සැකකාර ‘රාජිත සේනාරත්න’ ධීවර අමාත්‍යවරයාව සිටියදී කිරින්ද ධීවර වරායේ වැලි කැණීමේ ව්‍යාපෘතියක් කොරියානු සමාගමකට ලබාදී රජයට රුපියල් කෝටි දෙකකට (2) අධික පාඩුවක් කර ඇතැයි අල්ලස් කොමිසම අද (29) අධිකරණයට දැනුම් දුන්නා.
සැකකාර හිටපු අමාත්‍යවරයාව මෙම සිද්ධියේ දෙවැනි (2) සැකකරු ලෙස නම් කරන බව ද එම කොමිසමේ සහකාර අධ්‍යක්ෂ (නිතී) සුලෝචනා හෙට්ටිආරච්චි අධිකරණයට දැනුම් දුන්නා.
කොළඹ මහාධිකරණය මගින් අද (29) වෙනත් නඩුවකට අදාළව සැකකරු රක්ෂිත භාරයට පත් කළ අතර පසුව බන්ධනාගාරය සැකකරු කොළඹ මහේස්ත්‍රාත් අධිකරණයට ඉදිරිපත් කරනු ලැබුවා.
එහිදී සැකකරු ලබන 09 වැනිදා තෙක් රක්ෂිත බන්ධනාගාර කොළඹ ප්‍රධාන මහේස්ත්‍රාත් අසංග එස්. බෝදරගම අද (29) නියෝග කළේය.
‘ධීවර සංස්ථාවේ හිටපු සභාපති උපාලි ලියනගේ’ අල්ලස් කොමිසමට කැඳවා ප්‍රකාශයක් ලබාගත් බවත් එම ප්‍රකාශය අනුව උපාලි ලියනගේ යන අය එම සිද්ධියේ පළමුවෙනි (1) සැකකරු වශයෙන් හා හිටපු ධීවර අමාත්‍ය රාජිත සේනාරත්න දෙවන (2) සැකකරු වශයෙන් නම් කළ බවද අල්ලස් කොමිසම අධිකරණයට දැන්වූවා.
සිද්ධියේ පළමු (1) සැකකාර ධීවර සංස්ථාවේ හිටපු සභාපති උපාලි ලියනගේ යන අය අල්ලස් කොමිසම මගින් අත්අඩංගුවට ගෙන රක්ෂිත බන්ධනාගාරගත කිරීමෙන් අනතුරුව මේ වන විට ඇප මත මුදාහැර තිබෙන බවද විමර්ශන නිලධාරීන් අධිකරණයට පෙන්වා දුන්නා.
නඩුව කැඳවූ අවස්ථාවේ අල්ලස් හෝ දූෂණ විමර්ශන කොමිෂන් සභාව වෙනුවෙන් පෙනී සිටි සහකාර අධ්‍යක්ෂ (නීති) සුලෝචනා හෙට්ටිආරච්චි :
“ස්වාමීනි 2012 මැයි 19 වන දින කිරින්ද ධීවර වරායේ වැලි කැණීමේ ව්‍යාපෘතියක් කොරියානු සමාගමකට මෙම සැකකරු නිසි ප්‍රසම්පාදන ක්‍රියාවලියකින් තොරව ලබා දී තිබෙනවා. ඒ නිසා රුපියල් කෝටි දෙකකට (2) අධික මුදලක් රජයට පාඩු වී තිබෙනවා. මේ සිද්ධියේ පළවෙනි සැකකරු වන එවකට ධීවර වරාය නීතිගත සංස්ථාවේ හිටපු සභාපති උපාලි ලියනගේ නිකුත් කළ වාර්තාවක් මත පමණක් පදනම් වී මෙම ව්‍යාපෘතිය ආරම්භ කර තිබෙනවා. මෙවන් ආකාරයේ පාරිසරික ව්‍යාපෘතියක් නිසි ක්‍රමවේදයක් යටතේ සිදුවිය යුතුව තිබෙනවා. නමුත් මෙහිදී නිසි පාරිසරික තක්සේරු වාර්තා කැඳවීමකින් තොරව, කැබිනට් අනුමැතියකින් තොරව දෙවන සැකකරු මෙම ව්‍යාපෘතිය කොරියානු සමාගමට සිදුකිරීමට භාරදී තිබෙනවා. දෙවන සැකකරු කොමිසම මගහැර සැඟව සිටියා. 2012 මැයි මස 10 දින කොරියානු සමාගමක් විසින් කිරින්ඳ ධීවර වරායේ වැලි කැණීම්කර, එම වැලි දේශීය වෙළඳපොළට නිකුත් කළ හැකි පරිදි ව්‍යාපෘතියක් පවත්වාගෙන ගෙන යාමට සිදුකළ යෝජනාවක් නියමිත ප්‍රසම්පාදන ක්‍රියාවලයක් හෝ කැබිනට් අනුමැතියකින් තොරව ක්‍රියාත්මක කර රජයට පාඩු කිරීම සම්බන්ධයෙන් මෙම විමර්ශනය සිදු කරනවා. එවකට ධීවර අමාත්‍ය රාජිත සේනාරත්න මහතා විසිනුයි ලංකා ධීවර වරාය නීතිගත සංස්ථාවට මෙම ව්‍යාපෘති යෝජනාව ඉදිරිපත් කරලා තියෙන්නේ. මේ පැමිණිල්ලේ පළමු සැකකරු වන උපාලි ලියනගේ මේ වෙනවිට ඇප මත මුදා හැර සිටින්නේ. සිද්ධිය සම්බන්ධයෙන් ප්‍රකාශයක් ගැනීමට පසුගිය ජූලි දෙවැනි (02) දින දෙවැනි සැකකරුට අල්ලස් කොමිසමට පැමිණෙන ලෙස දැනුම් දී ලිපියක් යොමු කළා. එදින තමන්ට පැමිණිමට බෑ; තමන් අසනීප බව රාජිත සේනාරත්න නීතිඥවරයකු මාර්ගයෙන් අල්ලස් කොමිසම වෙත දැනුම් දුන්නා. ඒ ලිපියේ තිබෙන්නේ බෙහෙත් වට්ටෝරුවක් පමණයි. එහි වෛද්‍යවරයෙක්ගේ නමක් හෝ ප්‍රතිකාර ලබා ගත් දිනයක් හෝ වෙන කිසිදු පිළිගත හැකි කරුණක් නෑ. පසුව මොහු එම බෙහෙත් වට්ටෝරුව තහවුරු කරමින් ජාතික රෝහලේ නියෝජ්‍ය අධ්‍යක්ෂ රුක්ෂාන් බෙල්ලන නිකුත් කළ වෛද්‍ය වාර්තාවක් කොමිසමට එවා තිබුණා. පසුගිය 08 වෙනි දින සැකකරු සම්බන්ධයෙන් සෝදිසි වරෙන්තුවක් ද අල්ලස් ක්‍රියාත්මක කළා. සැකකරු නිවසේ සිටියේ නෑ. මොහු සැඟව සිටීයේ යැයි අනුමාන කරන ස්ථාන පහක් (5) කොමිෂන් සභාවේ විමර්ශන නිලධාරීන් විසින් පරීක්ෂාවට ලක් කළා, නමුත් ඒ කිසිදු ස්ථානයකවත් මොහු සිටියේ නැහැ.”
“ස්වාමීනි, මෙම සැකකරුගේ පුතා සහ ඔහුට සහය දක්වන අතැම් පාර්ශව විසින් විමර්ශන කටයුතු වලට අනිසි බලපෑමක් සිදු කරමින් මාධ්‍ය තුළ ප්‍රකාශයන් සිදු කරනවා. විමර්ශනයට සහාය නොදක්වමින් තමයි මොවුන් මේ විදියට මාධ්‍යයට ප්‍රකාශ නිකුත් කලේ. ඒ වගේම ස්වාමීනී මෙම සැකකරු මෙම සිද්ධියට අදාළව අත්අඩංගුවට ගැනීම වළක්වාලමින් කොළඹ ප්‍රධාන මහේස්ත්‍රාත් අධිකරණයට අපේක්ෂිත අයදුම්පතක් ගොනුකර තිබුණා. එම අපේක්ෂිත අයදුම්පත කරුණු සලකා බැලීමෙන් අනතුරුව කොළඹ ප්‍රධාන මහේස්ත්‍රාත්වරිය විසින් ප්‍රතික්ෂේප කළා. ප්‍රධාන මහේස්ත්‍රාත්වරිය ලබාදුන් එම නියෝගය ප්‍රතිශෝධනය කරන ලෙස ඉල්ලා සැකකරු මහාධිකරණයේ හමුවේ ප්‍රතිශෝධන ඇප අයැදුම්පතක් මේ වන විට ගොනුකර තිබෙනවා. නමුත් ස්වාමීනි මේ වනතුරුත් අල්ලස් කොමිසමට ඒ සම්බන්ධව නොතිසි ලැබීමක් සිදුව නැහැ. මේ සැකකරු දිගින් දිගටම කොමිසම මඟ හැරි පුද්ගලයෙක්. ඒ නිසා සැකකරු රක්ෂිත භාරයේ තබන ලෙසට ඉල්ලා සිටිනවා.”
සැකකරු වෙනුවෙන් අධිකරණය පෙනී සිටි ජනාධිපති නීතිඥ අනුජ ප්‍රේමරත්න :
“ස්වාමිනී, මගේ සේවාදායකයා අධිකරණය මඟ හැර සිටියා නෙවෙයි. ඔහු අධිකරණයේ පිළිසරණ පැතුවා.ඕනෑම පුද්ගලයෙක්ට අයිතියක් අයිතියක් තිබෙනවා අධිකරණ සහාය පැතීමට, ඒ අනුව මගේ සේවා දායකයත් අධිකරණය මගහැරියේ නැහැ, අධිකරණයෙන් ඔහුට ලබාගත හැකි සහන අපේක්‍ෂා කළා පමණයි. එමෙන්ම සිද්ධිය සම්බන්ධව ප්‍රකාශ සටහන් කර ගැනීමට මුල් අවස්ථාවේදී අල්ලස් කොමිසම දන්නවා තිබූ විට මගේ සේවා දායකයාට යාමට නොහැකි වූවේ ඔහු අසනීප වී රෝහල් ගත වී සිටිය නිසා. ඕනෑම කෙනෙක් දන්නවා රජයේ රෝහලක ප්‍රතිකාර ලබා ගන්නා විට වෛද්‍ය වාර්තාවක් නිකුත් කරන්නේ එම රෝහලේ ප්‍රතිකාර ලබාගෙන රෝහලේ මුදා හරින අවස්ථාවේදී පමණයි. ප්‍රතිකාර ලබන අතරතුරේදී වෛද්‍ය වාර්තාවක් රජයේ රෝහලකින් නිකුත් කරන්නේ නැහැ. එම නිසයි මගේ සේවාදායකයා මුල් අවස්ථාවේදී ඔහුට රෝහලෙන් ලබා දුන් ඖෂධ වට්ටෝරුව අල්ලස් කොමිසම හැමෝට ඉදිරිපත් කළේ. නමුත් පසුව සහතික වෛද්‍ය වාර්තාවක් මගේ සේවා දායකයා ඉදිරිපත් කර තිබෙනවා. පළමු බී වාර්තාවෙන් පසුව ඉදිරිපත් කර තිබෙන වැඩිදුර වාර්තා දෙකෙහිම මගේ සේවා දායකයා සම්බන්ධව එරෙහිව කිසිම කරුණක් නෑ. එබැවින් ප්‍රකාශයක් ලබා ගැනීමට පමණක් මගේ සේවා දායකයා රක්ෂිත බන්ධනාගාර ගතකිරීම නීත්‍යානුකූල වන්නේ නැහැ.අවශ්‍ය නම් කොමිසම හමුවේ පෙනී සිට ප්‍රකාශයක් ලබා දෙන්න මගේ සේවා දායකයා සූදානම්. එම නිසා ස්වාමීනි මොහු සාක්ෂිකරුවන්ට බලපෑම් ද සිදු නොකරන බැවින් සුදුසු ඇපයක් මත මුදා හරින ලෙස මම ඉල්ලා සිටිනවා.”
අධිකරණය : මෙම සැකකරු විමර්ශනයට සහාය දක්වන බවට අධිකරණයට කරුණු තහවුරුවීමක් සිදුවන්නේ නැහැ. මෙම සැකකරුට ඇප නියම කළහොත් නැවත අධිකරණයට පැමිණේවිද යන කාරණාව සලකා බැලීම සහ සැකකරු විසින් ස්වේච්ඡාවෙන් විමර්ශනය සඳහා අධිකරණයට සහය ලබා නොදීම නිසා අපරාධ නඩු විධාන සංග්‍රහයේ 5 පරිච්ඡේදයට අනුව පුද්ගලයෙකුට පැනවිය යුතු බලතල සියල්ල ක්‍රියාත්මක කිරීමට අල්ලස් කොමිසමට සිදුව ඇති බැවින් සැකකරු රක්ෂිත බන්ධනාගාර ගත කිරීමට නියෝග කරනවා.
ඉදිරිපත් වූ කරුණු සැලකිල්ලට ගත් අධිකරණය සැකකරු ලබන 09 වැනිදා තෙක් රක්ෂිත බන්ධනාගාර ගත කර නඩුව එදින තෙක් කල් තැබීය ෴
හිටපු පාර්ලිමේන්තු මන්ත්‍රී නිමල් ලංසා රිමාන්ඩ් කළ හේතුව මෙන්න…
(29.08.2025 – hirunews.lk)
හිටපු පාර්ලිමේන්තු මන්ත්‍රී ‘නිමල් ලංසා’ කොච්චිකඩේ පොලිසිය විසින් අද (29) උදෑසන අත්අඩංගුවට ගැනීම පිටුපස ඇති හේතුව මේ වන විට අනාවරණය වී තිබෙනවා. 2006 වසරේ සිදුවූ දේපළ කොල්ලකෑමකට අදාළ නඩුවක් හේතුවෙන් මෙම අත්අඩංගුවට ගැනීම සිදු කර ඇති බවයි වාර්තා වන්නේ.
මීගමුව මහේස්ත්‍රාත් අධිකරණයේ නියෝගයකට අනුව නිමල් ලංසා සහ මීගමුව මහනගර සභාවේ හිටපු නාගරික මන්ත්‍රීවරයකු වන බන්දුල නාඔටුන්න යන අය මෙලෙස අත්අඩංගුවට ගෙන ඇත. මෙම නඩුවට පාදක වී ඇත්තේ 2006 මාර්තු 09 වැනි දින කොච්චිකඩේ ප්‍රදේශයේදී මීගමුව මහ නගර සභාවේ හිටපු උප නගරාධිපතිවරයකුගේ නිවසට සහ වාහනවලට පහරදී රුපියල් ලක්ෂ 28 ක් වටිනා දේපළ කොල්ලකෑමේ සිදුවීමකි.
අදාළ නඩුව පසුගිය අගෝස්තු 28 වැනිදා කැඳවූ අවස්ථාවේදී, සැකකරුවන් දෙදෙනා (2) අත්අඩංගුවට ගෙන අධිකරණයට ඉදිරිපත් කරන ලෙස මීගමුව මහේස්ත්‍රාත් අධිකරණය පොලීසියට නියෝග කර තිබුණා.
ඒ අනුව අද (29) දින අත්අඩංගුවට ගත් සැකකරුවන් දෙදෙනා (2) අධිකරණයට ඉදිරිපත් කිරීමෙන් පසු ලබන සැප්තැම්බර් 12 වැනිදා දක්වා රක්ෂිත බන්ධනාගාර ගත කර තිබෙනවා.
මෙම සිද්ධියේ පැමිණිලිකරු මේ වන විට ඕස්ට්‍රේලියාවේ පදිංචි බවද වාර්තා වෙනවා ෴
අතුරලියේ රතන සැප්තැම්බර් 12 දක්වා රිමාන්ඩ්
(29.08.2025 – hirunews.lk)
වරෙන්තු ලැබ සිට අද පෙරවරුවේ අධිකරණයට භාරවූ හිටපු පාර්ලිමේන්තු මන්ත්‍රී පූජ්‍ය අතුරලියේ රතන හිමි ලබන මස 12 වැනිදා දක්වා රක්ෂිත බන්ධනාගාර ගත කිරීමට නුගේගොඩ මහේස්ත්‍රාත් අධිකරණය නියෝග කළා.
රතන හිමියන්ට වරෙන්තු නිකුත් වී තිබුණේ 2020 මහමැතිවරණයෙන් ‘අපේ ජනබල පක්ෂය’ට ලැබුණු ජාතික ලැයිස්තු මන්ත්‍රී ධුරය පූජ්‍ය අතුරලියේ රතන හිමියන්ට ලබා ගැනීම සඳහා, තමා පැහැරගෙන ගොස් ලිපි ලේඛන කිහිපයකට බලහත්කාරයෙන් අත්සන් ගත් බවට පූජ්‍ය වේදෙනිගම විමලතිස්ස හිමියන් කොළඹ අපරාධ කොට්ඨාසයට ඉදිරිපත් කළ පැමිණිල්ලක් සම්බන්ධයෙනුයි ෴
රු. ලක්ෂ 173 ක පාඩුවක් සම්බන්ධයෙන් ‘චාමර සම්පත්’ට එරෙහි නඩුව ජනවාරි 23 ට කල්යයි
(29.08.2025 – hirunews.lk)
ඌව පළාත් සභාව නමින් රාජ්‍ය බැංකුවල පවත්වාගෙන ගිය ස්ථාවර ගිණුම් හයක් (6) කල් පිරීමට පෙර ඉවත් කර ගනිමින් රජයට රුපියල් ලක්ෂ 173 ක පාඩුවක් කළේ යැයි පාර්ලිමේන්තු මන්ත්‍රී චාමර සම්පත් දසනායකට එරෙහිව අල්ලස් කොමිසම ගොනුකළ පැමිණිලි දෙකක් ජනවාරි 23 වැනිදා යළි කැඳවීමට කොළඹ ප්‍රධාන මහේස්ත්‍රාත් අසංක එස් බෝදරගම නියෝග කළා.
ඇප මත සිටින චාමර සම්පත් දසනායක අධිකරණය හමුවේ පෙනී සිටියා.
නඩුව කැඳවනු ලැබු අවස්ථාවේ දී අල්ලස් කොමිසම කරුණු දක්වමින් කියා සිටියේ නඩුවේ ලේඛන සම්බන්ධයෙන් වන රස පරීක්ෂක වාර්තා තවමත් ලැබී නොමැති බවයි.
ඒ අනුව ලේඛන වාර්තා කැඳවීමට සිහිකැඳවීමක් යොමු කරන ලෙස නියෝග කළ ප්‍රධාන මහේත්‍රාත්වරයා නඩු විභාගය ජනවාරි 23 තෙක් කල් තබනු ලැබුවා.
චාමර සම්පත් දසනායක ඌව පළාත් සභාවේ ප්‍රධාන අමාත්‍යයවරයාව සිටියදී පළාතේ ළදරු පාසල් දරුවන් සඳහා බෑගයක් ලබාදීමට බැංකුව මගින් අනුග්‍රාහකත්වයක් ඉල්ලා ඇති අතර එම අනුග්‍රහකත්වය ලබා නොදීමේ හේතුව පාදක කර ද්වේශ සහගතව මෙම ගිණුම් හය (6) ඉවත් කරගෙන අල්ලස් පනතේ 70 වෙනි වගන්තිය යටතේ ගැනෙන දූෂණය නම් වරද සිදුකිරීම සම්බන්ධයෙන් මෙම විමර්ශනය සිදු කරනු ලබනවා ෴
බැකෝ සමන්ගේ බිරියගෙන් සී.අයි.ඩී. ය ප්‍රශ්න කරයි
(29.08.2025 – hirunews.lk)
ඉන්දුනීසියාවේදී ‘කෙහෙල්බද්දර පද්මේ’ සමඟ අත්අඩංගුවට ගත් ‘බැකෝ සමන්’ගේ බිරියගෙන් කටුනායක ගුවන්තොටුපල පරිශ්‍රයේදී මේ වන විට ‘අපරාධ පරීක්ෂණ දෙපාර්තමේන්තුවේ නිලධාරින්’ ප්‍රශ්න කරමින් සිටිනවා.
‘අපරාධ පරීක්ෂණ දෙපාර්තමේන්තුවේ ගුවන්තොටුපල ඒකකය’ විසින් මෙම ප්‍රශ්න කිරීම සිදුකරමින් පවතින බවයි වාර්තා වන්නේ.
මෙම කාන්තාව සිය දරුවා ද සමඟ අද (29) සවස 05:50 ට ඉන්දුනීසියාවේ ජකර්තා නුවර සිට යූ.එල්. 365 ශ්‍රී ලන්කන් ගුවන් යාන‍යෙන් මෙරටට රැගෙන එනු ලැබුවා.
තමන් ‘බැකෝ සමන්’ නමැත්තාගේ බිරිය බව ඇය අපරාධ පරීක්ෂණ දෙපාර්තමේන්තු නිලධාරීන් හමුවේ පිළිගෙන ඇතැයි ද වාර්තා වෙනවා ෴
+++
‘කෙහෙල්බද්දර පද්මේ’ ඇතුලු පාතාලයන් රැගත් ගුවන් යානය හෙට (30) රෑ කටුනායකට
(29.08.2025 – hirunews.lk)
‘කෙහෙල්බද්දර පද්මේ’ , ‘කමාන්ඩෝ සලින්ද’ නොහොත් ‘පිට්ටුවා’, ‘පානදුරේ නිලංග’, ‘බැකෝ සමන්’ සහ ‘තැඹිලි ලහිරු’ යන පාතාලයේ අපරාධකරුවන් පස් දෙනා (5) මෙරටට රැගෙන ඒමට මේ වන විට සියල්ල සූදානම් බව එරටින් ලැබෙන තොරතුරු අනාවරණය කරනවා.
බොහෝ විට ඔවුන් රැගත් ගුවන් යානය හෙට (30) දිනයේ දී ඉන්දුනීසියාවේ සිට ශ්‍රී ලංකාව බලා පියාසර කෙරුණු ඇති බව සඳහන්.
‘කෙහෙල්බද්දර පද්මේ’, ‘කමාන්ඩෝ සලින්ද’ නොහොත් ‘පිට්ටුවා’ සහ ‘පානදුරේ නිලංග’ යන තිදෙනා (3) සිට ඇත්තේ එකටයි.
ඉන්දුනීසියානු පොලිසිය සමඟ ඔවුන් අත්අඩංගුවට ගැනීමට මෙහෙයුම ක්‍රියාත්මක වන විටත් ඔවුන් සිට ඇත්තේ එර‍ට පිහිටි සුඛෝපභෝගී තට්ටු නිවාසයක් කුළියට ගෙන එහි නවාතැන් ගෙන බව පොලිස් ආරංචි මාර්ග සදහන් කරනවා.
එම ස්ථානයේ සිට ඔවුන් පලා යන්නේද එකටයි. ‘බැකෝ සමන්’, ඔහුගේ බිරිඳ සහ ‘තැඹිලි ලහිරු’ සිට ඇත්තේ ඉන්දුනීසියාවේම වෙනත් ස්ථානයකයි.
මෙම මෙහෙයුමේ ඉලක්කය වී තිබී ඇත්තේ ‘කෙහෙල්බද්දර පද්මේ’ සහ ‘කමාන්ඩෝ සලින්ද’ පමණි. අනිත් අය ඉන්දුනීසියාවේ සිටින බව පවා දැනගෙන ඇත්තේ අත්අඩංගුවට පත්වීමෙන් අනතුරුවයි. මොවුන් දෙදෙනා (2) ඉන්දුනීසියාවේ රැදී සිටින බව දැන සිටියත් නිශ්චිත ස්ථානය අනාවරණය කර ගැනීමට පහසුවක් වී ඇත්තේ බස්නාහිර පළාත් උතුරු දිසා අපරාධ කොට්ඨාශ අත්අඩංගුවේ සිටින ‘පස්දේවා’ගෙන් කළ ප්‍රශ්න කිරීම්වලින් බවද ආරංචි මාර්ග අනාවරණය කළා.
‘රොහාන් ඕලුගල’ මෙම මෙහෙයුමට සම්බන්ධ වන්නේ ඒ අනුවයි.
‘කෙහෙල්බද්දර පද්මේ’ ඇතුළු පිරිස ඔවුන් රැදී සිටි තට්ටු නිවාස සංකීර්ණයෙන් පළායන්නේද රහසිගතව කළ මෙහෙයුම ගැන යම් තොරතුරක් ඔවුන් වෙත ලැබී තිබීම හේතුවෙන් බව සැකකරයි. එම තොරතුර පොලිසිය ඇතුලෙන්ම ගිය එකක් බව අනුමාන කරමින් මේ වන විට ඒ සම්බන්ධයෙන් විමර්ශනයක්ද ක්‍රියාත්මකයි.
මෙම මෙහෙයුමේ තොරතුරු හෙළි නොවීම සඳහා ‘රොහාන් ඕලුගල’ත් අපරාධ පරීක්ෂණ දෙපාර්තමේන්තුවේ නිලධාරියාත් ඉන්දුනීසියාවට යවා ඇත්තේද වෙන වෙනමයි. ඒ ඉන්දුනීසියාවට යන බව නොකියා වෙනත් රටකට යන බව සෙසු නිලධාරීන් හමුවේ සඳහන් කරමින්. මෙසේ සංවිධානාත්මකව සැළසුම් කළ මෙහෙයුමේ තොරතුරු පිටතට යාම සැකසහිත බව උසස් පොලිස් නිලධාරියෙක් පැවසුවා.
’කෙහෙල්බද්දර පද්මේ’ ඇතුළු පිරිස ලංකාවට රැගෙන ආ පසු ප්‍රශ්න කිරීම් හමුවේ ඒ සම්බන්ධයෙන් තොරතුරු අනාවරණය කර ගැනීමට හැකි වනු ඇති බව පොලිසිය විශ්වාස කරනවා. මෙම අපරාධකරුවන් විදේශගතව සිට මෙරට අපරාධ මෙහෙයවීමට යොදාගත් ජංගම දුරකථන ඇතුළු උපාංගද ඉන්දුනීසායා පොලිස් භාරයට ගෙන තිබුණා.
එම උපකරණ ද මෙරටට ලැබෙනු ඇති බවත් ඒ ඔස්සේ මෙම අපරාධකරුවන් සමඟ සම්බන්ධකම් පැවැත්වූ පොලිස් නිලධාරීන්, දේශපාලනඥයන්, මාධ්‍යවේදීන් ඇතුළු විශාල පිරිසකගේ තොරතුරු අනාවරණය කර ගැනීමට හැකිවනු ඇති බව පොලිසිය විශ්වාස කරනවා.
මේ පස් දෙනාම (5) මෙරට රැගෙන ඒමට හැකියාවක් ලැබෙන්නේ ඔවුන් සියළු දෙනාටම ජාත්‍යන්තර පොලිසිය මගින් වරෙන්තු නිකුත්කර තිබීම හේතුවෙන්.
‘හරක් කටා’ත්, ‘කුඩු සලිදු’ත් සමඟ මැඩගස්කරයේදී මෙරට පාතාලයට සම්බන්ධ 08 දෙනෙක් 2023 මාර්තුඅත්අඩංගුව ගත්තද ඒ අය අතර සිටි ‘පානදුරේ සුදු’, ‘මෝදර තරංග’ ඇතුළු පාතාල අපරාධකරුවන් 06 දෙනෙක් මෙරට භාරදුන්නේ නැත. මෙරටට භාරදුන්නේ ඒ අය අතරින් ‘රතු නිවේදන’ නිකුත්කර තිබුණු ‘හරක් කටා’ සහ ‘කුඩු සළිදු’ පමණි.
ඉන්දුනීසියාවේදී අත්අඩංගුවට ගත් පස් දෙනා (5) අතරින් ‘කෙහෙල්බද්දර පද්මේ’, ‘කමාන්ඩෝ සලින්ද’ සහ ‘පානදුරේ නිලංග’ සතුව තිබී ඇති විදෙස් ගමන් බලපත්‍ර ව්‍යාජ ලෙස වෙනත් නම් වලින් ඔවුන් සකස්කර ගත් ඒවායි.
එබැවින් ඊයේ (28) වන විට ඔවුන්ට නීත්‍යානුකූලව තාවකාලික විදෙස්ගමන් බලපත්‍ර සකස්කර දීමට ඉන්දුනීසියාවේ ශ්‍රී ලංකා තානාපති කාර්යාලය පියවර ගෙන තිබුණා.
ඒ අනුව ඉන්දුනීසියානු පොලිසියේ නිලධාරීන් ද 10 දෙනකුගේ ආරක්ෂාවක් සහිතව හෙට (30) රාත්‍රියේ මෙම පාතාල අපරාධකරුවන් ඉන්දුනීසියාවෙන් මෙරට බලා ගුවන් ගත වනු ඇතැයි එරටින් ලැබෙන තොරතුරු අනාවරණය කරයි ෴
+++
ඉන්දුනීසියාවේදී අත් අඩංගුවට ගන්නා මොහොතේ පාතාලයන්ට සුළුදිය (මූත්‍ර) පහ වූ හැටි
(29.08.2025 – hirunews.lk)
ඉන්දුනීසියා පොලිසිය මගින් අත්අඩංගුවටට ගැනීමෙන් අනතුරුව ‘කෙහෙල්බද්දර පද්මේ’, ‘කමාන්ඩෝ සලින්ද’ සහ ‘පානදුර නිලංග’ට සුළු දිය (මූත්‍ර) පහව ඇති බව එරටින් ලැබෙන තොරතුරු අනාවරණය කරනවා.
ඔවුන්ට එ‍සේ සිදුව ඇත්තේ ඉන්දුනීසියා පොලිස් කණ්ඩායම අතර සිටි සහකාර පොලිස් අධිකාරී ‘රොහාන් ඕලුගල’ සිංහලෙන් ඔවුන්ගෙන් කළ ප්‍රශ්න කිරීමේදීය.
ශ්‍රී ලංකා පොලිසිය කිසි දිනක මේ ආකාරයට තමන්ව හඹාගෙන ඒවි යැයි නොසිතූ බවත් තමන්ව නොමරා බේරාගන්නා ලෙසත් ඔවුන් පොලිස් නිලධාරීන් හමුවේ ආයාචනාත්මකව පවසා ඇති බවත් ඉන්දුනීසියාවෙන් ලැබෙන තොරතුරු සඳහන් කරනවා.
‘කෙහෙල්බද්දර පද්මේ’ සහ ‘කමාන්ඩෝ සලින්ද’ වසරක (1) පමණ කාලයක් තිස්සේ ඉන්දුනීසියාවේ රැදී සිට ඇති බවටද තොරතුරු අනාවරණය තිබෙනවා.
මේ දෙදෙනා (2) ඩුබායි, මලයාසියාව, තායිලන්තය, ඇතුළු රවල් රැසකට එහි සිට සංචාරයේ නිරතව සිට ඇති බවත් ඉන්දුනීසියාවේද එක් ස්ථානයක මාසයකට වැඩි කාලයක් ගතකර නැති බවත් අනාවරණය වී තිබෙනවා.
මලයාසියා‍වේදී ‘කෙහෙල්බද්දර පද්මේ’ සහ ‘කමාන්ඩෝ සලින්ද’ අත්අඩංගුවට ගත් බව පසුගිය ජූලි මාසයේ සමාජ මාධ්‍ය ඔස්සේ හුවමාරු වූ තොරතුර පවා ඔවුන් දෙදෙනා (2) විසින් ගොතා සමාජ මාධ්‍ය අතර හුවමාරුකළ එකක් බවද හෙළිවී තිබෙනවා.
ඒ වන විටත් ඔවුන් දෙදෙනා (2) රැදී සිට ඇත්තේ ඉන්දුනීසියාවේ ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴