රෝහල්වල ඖෂධ හිඟයි.. පිටට ලියල ලෙඩ දාගන්න බෑ.. රෝහල් සේවා බිද වැටෙයි.. – GMOA
රෝහල්වල ඖෂධ හිඟයි.. පිටට ලියල ලෙඩ දාගන්න බෑ.. රෝහල් සේවා බිද වැටෙයි.. – GMOA
(15.07.2025 – 08:40 +0530 – lankacnews.com)
රජයේ වෛද්‍ය නිලධාරීන්ගේ සංගමය විසින් නිකුත් කරන ලද මාධ්‍ය නිවේදනයක් මෙහි දැක්වෙයි.
= මාධ්‍ය නිවේදනය =
රෝගී සත්කාර සේවාවන් අඛණ්ඩව පවත්වාගැනීමේ අරමුණින්, හිඟ වී ඇති ඖෂධ සහ උපකරණ සපයා ගැනීමේදී වෛද්‍යවරුන් මුහුණ දී ඇති නීතිමය ගැටලු සහ ඒමගින් රෝගී සත්කාර සේවාවන්ට ඇතිවන බලපෑම.
රෝගී සත්කාර සිදු කරගෙන යාමේදි ප්‍රශස්ත මට්ටමේ සේවාවක් සැපයීම සඳහා වෛද්‍යවරුන් ඇතුළු සෞඛ්‍ය කාර්ය මණ්ඩලය උපරිම කැපවීමෙන් කටයුතු කරන අතර එය සම්පූර්ණ කර ගැනීම සඳහා ඖෂධ, වෛද්‍ය උපකරණ සහ උපාංග අංග සම්පූර්ණ වීම මූලික කරුණක් වේ. එම ඖෂධ සහ උපකරණ සැපයුම උපරිම මට්ටමේ පවත්වාගෙන යා නොහැකි නම් ප්‍රතිකාර සේවාව ප්‍රශස්ත මට්ටමේ රඳවා ගැනීම දැඩි අපහසු කාරණාවකි.
දැනට රට පුරා පවතින ඖෂධ සහ උපකරණ හිඟය හේතුවෙන් රෝගී සත්කාර සේවාවන්ට බලපෑම් ඇති වෙමින් පවති. රෝහල් වලට ගුණාත්මක ඖෂධ අඛණ්ඩව සැපයීම රජයේත්, සෞඛ්‍ය අමාත්‍යංශයේත් අත්හල නොහැකි වගකීමක් වුවද, පැවති රජයන් සහ සෞඛ්‍ය අමාත්‍යංශයේ ක්‍රමවේද වල පවතින ආකර්‍යක්ෂමතාවයත් අඩුපාඩුත් නිසා දිගින් දිගටම එය හරියාකාරව සිදු නොවුණු අතර මේ වන විට පවතින රජයේ යටතේද මෙම ගැටලුව නැවතත් පැණ නැගි ඇත.
ඖෂධ හිඟය සම්බන්ධයෙන් රජයේ වෛද්‍ය නිලධාරීන්ගේ සංගමය දිගින් දිගටම රජයන්ට බලපෑම් කරමින් ඖෂධ සැපයුම ක්‍රමවත් කරන ලෙස ඉල්ලා සිටියත්, එම ඉල්ලීමට ලබා දෙන ප්‍රමුඛතාවය සම්බන්ධයෙන් ගැටලු මතු වෙමින් පවති. ඖෂධ පමණක් නොව ශල්‍ය හා වෛද්‍ය උපකරණ සම්බන්ධයෙන්ද, රසායනාගාර පරීක්ෂණ සහ විකිරණ පරික්ෂාවන් සදහා භාවිතා වන උපකරණ සම්බන්ධයෙන්ද මෙම අර්බුදකාරි තත්ත්වයම පැන නැඟි ඇත.
රෝහල් පද්ධතිය තුල ඖෂධ හෝ උපකරණ නොමැති අවස්ථා වලදී ඒවා සපයා ගැනීම සදහා විවිධ සීමාවන්ට යටත්ව විශේෂඥ වෛද්‍යවරුන් සහ වෛද්‍යවරුන් යොදාගන්නා විකල්ප ක්‍රමවේද කීපයක් ඇත. යම් අවදානමක්ද දරමින් වෛද්‍යවරුන් මෙම විකල්ප කරා සද්භාවයෙන් යුතුව යොමු වනුයේ ගුණාත්මක රෝගී සත්කාර සේවාවක් අඛණ්ඩව පවත්වා ගැනීමේ මුඛ්‍ය පරමාර්ථයෙනි.
එහෙත් විවිධ රෝහල් වල ඖෂධ සහ උපකරණ බාහිරව මිලදි ගැනීම සම්බන්ධයෙන් සිදු වන විමර්ෂණත්, ඒ පිළිබද මාධ්‍ය හැසීරිමත් හමුවේ විශේෂඥ වෛද්‍යවරුන් සහ වෛද්‍යවරුන් බාහිරින් ඖෂධ සහ උපකරණ ලබා ගැනීම නිර්දේශ කිරීම ප්‍රතික්ෂේප කිරීමේ ප්‍රවණතාවයක් මතු වී ඇත. ඊට ප්‍රධානතම හේතුව වන්නේ වෛද්‍යවරුන් සෑම අවස්ථාවකදීම රෝගී සත්කාර සේවාව වෙනුවෙන් පෙනිසිටිමින් ප්‍රතිකාර වෙනුවෙන් කැප වුවද, ඒ සදහා ඔවුන්ට නීතිමය රාමුව තුල ප්‍රමාණවත් ආරක්ෂාවක් නොතිබිමය. ඒ හේතුවෙන් රෝහල් පද්ධතිය තුල ශල්‍යකර්ම ඇතුලු රෝගී සත්කාර සේවාවන් බිදවැටීමේ සහ සීමා වීමේ අවදානමක් මතු වී ඇත.
රෝගීන්ගේ සහ වෛද්‍යවරුන්ගේද ආරක්ෂාව තහවුරු වන අයුරින් මෙම විකල්ප ක්‍රමවේද සදහා අවශ්‍ය මාර්ගෝපදේශ, නිර්ණායක සහ නීතිමය ප්‍රතිපාදන සකස් කිරීමේ වගකිම ඇත්තේ සෞඛ්‍ය අමාත්‍යංශයටය. එහෙත් මේ වන තුරු එවන් නිශ්චිත මාර්ගෝපදේශයක් සකස් කර නිකුත් කිරීමට සෞඛ්‍ය අමාත්‍යංශය ඇතුළු වගකිව යුතු පාර්ශව අපොහොසත්ව ඇත. එබැවින් මේ හරහා බිඳවැටෙන රෝගී සත්කාර සේවාවන් සම්බන්ධයෙන් සම්පූර්ණ වගකීම සෞඛ්‍ය අමාත්‍යංශය භාර ගත යුතුය.
මෙම ගැටළුව සහ එහි වත්මන් ප්‍රවණතාවයන් කෙරෙහි විශේෂඥ වෛද්‍යවරුන් සහ වෛද්‍යවරුන්ගේ දැඩි අවධානය යොමු වී ඇති අතර මේ පිළිබදව සියලු පාර්ශව සමඟ සාකච්ඡා කර යෝජනාවලියක් සැකසීම සඳහා රජයේ වෛද්‍ය නිලධාරීන්ගේ සංගමයේ විධායක සභාව විසින් විශේෂඥ වෛද්‍යවරුන් ති‌දෙනෙකු (3) ගෙන් සමන්විත විශේෂ කමිටුවක් පත් කරන ලදි. මෙම කමිටුව දැනටත් මූලික සාකච්ඡා පවත්වා මූලික ලේඛනයක් සකස් කර ඇති අතර ඒ සඳහා යෝජනා ලබා දෙන මෙන් සමස්ත සමාජිකත්වයට දැනුම් දී ඇත.
එම යෝජනාවලිය සමාලෝචනය කිරීම සදහා සියලුම විශේෂඥ වෛද්‍යවරුන් එළඹෙන 2025.07.21 වැනි සදුදා දින රජයේ වෛද්‍ය නිලධාරීන්ගේ සංගමයේ කාර්යාලයේදි සාකච්ඡාවකට එක්විමට නියමිත අතර අවසන් යෝජනාවලිය මෙම මස අවසන් සතියේ පැවැත්වෙන රජයේ වෛද්‍ය නිලධාරින්ගේ සංගමයේ මධ්‍යම කාරක සභා රැස්වීමේ අනුමැතියට ඉදිරිපත් කිරීමට නියමිතය.
ඕනෑම රජයක මූලික ප්‍රතිපත්තිය විය යුත්තේ නිදහස් සෞඛ්‍ය සේවාව සුරැකිමයි. ඒ වෙනුවෙන් ගුණාත්මක ඖෂධ කිසිදු හිඟයකින් තොරව අඛණ්ඩව රෝහල් පද්ධතියට සැපයීමේ පරම වගකීමෙන් රජයට මිදිය නොහැකි අතර රෝගී සත්කාර සේවාව වෙනුවෙන් සීමාව ඉක්මවා කැපවෙන විශේෂඥ වෛද්‍යවරුන් සහ වෛද්‍යවරුන් ආරක්ෂා කිරීමද රජයේ සහ සෞඛ්‍ය අමාත්‍යංශයේ ප්‍රමුඛතම වගකීමක් බව අවධාරණය කරමු ෴
+++
“අපි සත්භාවයෙන් තමයි වැඩ කරන්නේ” ඇමති නලින්දගේ කතාවට වෛද්‍යවරු කන පිරෙන්නම අමතයි … (15.07.2025)
+
භාතියට ජීවිතය අහිමිවුණු හේතුව මෙන්න – උස්සන්න ගිහින් වැඩේ වරද්දගත්තා (15.07.2025)
+++
භාතියට වස දුන්නද..? ආන්දෝලනාත්මක ප්‍රකාශයක් ! (15.07.2025)
+++
භාතිය බේරගන්න ඉන්දියාවෙන් ආ පිරිසට වෙච්චි දේ, පරිසර ඇමති භාතියගේ වියෝව ගැන සියලු තොරතුරු එළියට දායි (15.07.2025)
+
එක්නැලිගොඩව මරන්න ගෙනිච්ච වාහනේ මමත් හිටියා. මේක සෙකට්රි ගේ වැඩක්; කට වහගෙන ඉඳපන් (14.07.2025)
+
වියානා ඇළට මෝටර් රථයක් පෙරළී දෙදෙනෙකු (2) මරුට
(15.07.2025 – 09:03 +0530 – sinhala.adaderana.lk)
මහියංගන – බදුල්ල මාර්ගයේ මාපාකඩවැව 17 කණුව අසලින් ප්‍රධාන මාර්ගයේ ගමන් ගත් මෝටර් රථයක් මහවැලි වියානා ඇළට පෙරලීමෙන් පුද්ගලයින් දෙදෙනෙකු (2) ජීවිතක්ෂයට පත්ව තිබේ.
මාපාකඩවැව පොලිස් අභ්‍යාස විද්‍යාලීය නිලධාරීන් මහියංගණ පොලිසිය හා ගම්වාසීන් එක්ව කඩිනමින් වියානා ඇළට පෙරළුන මෝටර් රථය මහත් වෙහෙසක් දරා ගොඩ ගෙන ඇති අතර එහිදී මෝටර් රථය තුළ පුද්ගලයන් දෙදෙනෙකු (2) සිට තිබේ.
පසුව ඔවුන් කඩිනමින් ගිලන් රථයක් මගින් මහියංගණ මුලික රෝහලට රැගෙන ගියද, ඒ වන විටත් ඔවුන් දෙදෙනා (2) ජීවිතක්ෂයට පත්ව සිටි බව රෝහල් ආරංචි මාර්ග පවසයි.
මෝටර් රථයේ සිටි පුද්ගලයින් දෙදෙනා (2) මොණරාගල ඔක්කම්පිටියේ පදිංචි පුද්ගලයින් දෙදෙනෙකු (2) බවද වාර්තා වේ.
+++
+
මුවන් දෙදෙනෙකුගේ ජීවිතය අහිමි වුණු හැටි (15.07.2025)
+
රටම කතාවූ ‘ප්ලග් බේස්’ ගනුදෙනුවේ ටෙන්ඩරය අවලංගුයි
(15.07.2025 – hirunews.lk)
ඉකුත් දිනවල දැඩි කතා බහකට ලක් වූ, විද්‍යුත් හැඳුනුම්පත් සකස් කිරීම සඳහා රජයේ ආයතනවලට ලබා දීමට නියමිත ‘ප්ලග් බේස්’ මිලදී ගැනීමට අදාළ ටෙන්ඩරය අවලංගු කර තිබෙන බව ආරංචි මාර්ග සඳහන් කරනවා.
ඩිජිටල් ආර්ථික කටයුතු අමාත්‍යංශයේ ප්‍රකාශකයෙක් සඳහන් කළේ, එම ගනුදෙනුවට අදාළ ටෙන්ඩරය පුද්ගලයන් ලියාපදිංචි කිරීමේ දෙපාර්තමේන්තුව පාර්ශ්වයෙන් අවලංගු කර ඇති බවයි.
මෙලෙස කතාබහට ලක් වූ ‘ප්ලග් බේස්’ එකක් රුපියල් 72,000 ක පමණ මුදලකට ලබා ගැනීමට ටෙන්ඩර් කැඳවා තිබූ අතර, ඒකක හත්සීයක් (700) පමණ මිලට ගැනීමටයි සැලසුම් කර තිබුණේ.
මේ අතර පසුගිය දිනක මෙම ටෙන්ඩරය සම්බන්ධයෙන් කැබිනට් මාධ්‍ය හමුවේ දී කැබිනට් මාධ්‍ය ප්‍රකාශකවරයා වෙත යොමු වූ ප්‍රශ්නයකට පිළිතුරු වශයෙන් ඔහු සඳහන් කර තිබුණේ, ප්‍රසම්පාදන ක්‍රියාවලිය යටතේ ඕනෑම පුද්ගලයකුට තම මිල ගණන් ඉදිරිපත් කර එම ටෙන්ඩරය ලබාගැනීමේ අවස්ථාව පවතින බවත්, එසේ නැතිව තැන් තැන්වල චෝදනා එල්ල කිරීම ඵලක් නොවන බවයි ෴
රත්‍රං කිලෝ 35 ක් ගෙන ආ ගුවන් මගියෙක් අත්අඩංගුවට
(15.07.2025 – 19:18 +0530 – sinhala.adaderana.lk)
නීති විරෝධි ලෙස රුපියල් කෝටි 110 ක වටිනාකමකින් යුත් රත්‍රං කිලෝ 35 ක් සමග පුද්ගලයෙකු ගුවන්තොටුපොළ රේගුව විසින් අත්අඩංගුවට ගෙන ඇත.
සැකකරු ඩුබායි සිට මෙරටට පැමිණ ඇති බව සඳහන් වේ.
ඔහු 32 හැවිරිදි ග්‍රෑන්ඩ්පස් ප්‍රදේශයේ පදිංචි පුද්ගලයෙකි.
ඔහු සතුව තිබී රන් බිස්කට් 195 ක් සහ ස්වර්ණාභරණ කිලෝ 13 ක් තිබූ බව සඳහන් වේ ෴
ලාංකික තරුණියන්ට ජපානයෙන් රැකියා අවස්ථා
(15.07.2025 – 16:38 +0530 – sinhala.adaderana.lk)
ශ්‍රි ලංකා විදේශ සේවා නියුක්ති කාර්යාංශය හා ජපානයේ ජාත්‍යන්තර මානව සම්පත් සංවර්ධන සංවිධානය අතර ඇති කරගත් අවබෝධතා ගිවිසුම අනුව තවත් ශ්‍රී ලාංකික තරුණියන් පිරිසකට ජපානයේ හෙද සත්කාර ක්ෂේත්‍රයේ රැකියා අවස්ථා හිමිවී තිබේ.
ජූලි මස 16 දින ජපානය බලා පිටත්ව යාමට නියමිත තරුණියන් 9 දෙනෙකු වෙත ගුවන් ටිකට්පත් ලබාදීම ඊයේ (14) ශ්‍රි ලංකා විදේශ සේවා නියුක්ති කාර්යාංශයේදී සිදුකරන ලද අතර, ඒ සඳහා මේ දිනවල ශ්‍රි ලංකාවේ නිල සංචාරයක නිරතවන IM Japan ආයතනයේ නියෝජිතයින් පිරිසක්ද සහභාගි විය.
මෙම ජපාන නියෝජිතයින් ඊයේ දින කාර්යාංශයේ අතිරේක සාමාන්‍යාධිකාරි (ජාත්‍යන්තර කටයුතු) සෙනරත් යාපා මහතා හමුවූ අතර, එහිදී තාක්ෂණික සේවාස්ථ පුහුණු වැඩසටහන සහ විශේෂිත නිපුණතා සහිත ශ්‍රමික වැඩසටහන යටතේ ශ්‍රී ලාංකික තරුණ ප්‍රජාව සඳහා නව රැකියා අවස්ථා ලබා දීම, ඔවුන්ගේ රැකියා වල ගුණාත්මකභාවය වැඩිදියුණු කිරීම සඳහා රැකියා ක්ෂේත්‍රවලට අදාල ප්‍රායෝගික පුහුණුව ලබා දීම ආදිය සම්බන්ධයෙන් සාකච්ඡා කර ඇත.
මෙහිදී ජපානයේ සේවයෙහි යෙදෙන ශ්‍රී ලාංකික පුහුණුලාභීන් සහ ශ්‍රමිකයින්ගේ භාෂා හැකියාව සහ ඔවුන්ගේ සේවය පැසසුමට ලක්කරන ලද අතර, තවදුරටත් ශ්‍රී ලාංකිකයින් සඳහා රැකියා අවස්ථාව ලබා දීමට කටයුතු කරන බවද ජපාන නියෝජිතයින් සඳහන් කළේය.
ශ්‍රී ලංකා විදේශ සේවා නියුක්ති කාර්යාංශය 2017 වර්ෂයේ IM Japan සංවිධානය සමග තාක්ෂණික පුහුණුලාභීන් ජපානය වෙත යොමු කිරීම සඳහා වන අවබෝධතා ගිවිසුම අත්සන් කරන ලද අතර, 2023 වර්ෂයේ විශේෂිත නිපුණතා සහිත ශ්‍රමිකයින් ජපානය වෙත යොමු කිරීම සඳහා වන ගිවිසුමට අත්සන් කෙරිණි.
මෙම වැඩසටහන් යටතේ මේ වන විට සාත්තු සේවා, ඉදිකිරීම්, නිශ්පාදන, මෝටර් කාර්මික නඩත්තු සේවා, කෘෂිකර්ම යන රැකියා ක්ෂේත්‍ර යටතේ තාක්ෂණික පුහුණුලාභීන් ලෙස 589 ක් සඳහා ජපානයේ රැකියා අවස්ථා ලබා දී ඇති අතර, හෙද සත්කාරක සහ ආහාර සේවා කර්මාන්තය යටතේ විශේෂිත නිපුණතා සහිත ශ්‍රමිකයින් 43 දෙනෙකු ජපානය වෙත යොමු කර ඇත.
එසේම මේ වන විට තාක්ෂණික සේවාස්ථ පුහුණු වැඩසටහන යටතේ ඉදිරියේදී ජපානය වෙත යාමට නියමිත පුහුණුලාභීන් 80 කට ආසන්න පිරිසක් සහ විශේෂිත නිපුණතා සහිත ශ්‍රමික වැඩසටහන යටතේ සමාගම් සඳහා තෝරාගෙන ඇති ශ්‍රමිකයින් 30 ක් පෙර විගමනික පුහුණුව ලබමින් සිටී ෴
නැගෙනහිර සිංහළයන් වැනසීමේ සූක්ෂම උපාය හෙළිවෙයි (14.07.2025)
+
බල්ලෝ බළල්ලුත් එක්ක හුරතල් වෙනවා වගේ කලාවැව් ඉස්මත්තේ අලි සෙල්ලම් බලන්න කිට්ටු වෙච්චි ගම්මු (15.07.2025)
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴