SLIIT ආයතනය සම්බන්ධයෙන් කෝප් කමිටුවෙන් නිර්දේශ‍යක්
(14.07.2025 – 15:35 +0530 – sinhala.adaderana.lk)
මහපොළ අරමුදලට අයත් වූ ශ්‍රී ලංකා තොරතුරු තාක්ෂණ ආයතනය (SLIIT) පුර්ණ පෞද්ගලික ආයතනයක් බවට පත් කිරීම අනීතිකව සිදුවී ඇති බව පැහැදිළි වන බවත් නැවත එය මහ පොළ අරමුදල මගින් පරිපාලිත ආයතනයක් බවට පත් කිරීමට නෛතික පියවර ගන්නා ලෙසත් පොදු ව්‍යාපාර පිළිබඳ කාරක සභාව (කෝප් කමිටුව) විසින් පසුගියදා නිර්දේශ කෙරිණි.
ඒ සම්බන්ධයෙන් අවශ්‍ය ඉදිරි පියවර ගන්නා ලෙස කෝප් සභාපති (වෛද්‍ය) නිශාන්තසමරවීර මහතා, වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍යාංශයේ ලේකම් කේ.ඒ. විමලෙන්තිර රාජා සහ මහපොළ භාරකාර අරමුදලේ සභාපති හිටපු ශ්‍රේෂ්ඨාධිකරණ විනිසුරු විජිත් මලල්ගොඩ යන මහත්වරුන්ට නිර්දේශ කළේය.
2022 සහ 2023 වර්ෂවලට අදාළව විගණකාධිපති වාර්තා සහ වත්මන් කාර්ය සාධනය විමර්ශනය සඳහා ලලිත් ඇතුළත් මුදලි මහපොළ ශිෂ්‍යත්ව භාර අරමුදල පොදු ව්‍යාපාර පිළිබඳ කාරක සභාවට පසුගිය 09 වැනිදා කැඳ වූ අවස්ථාවේදී මෙම නිර්දේශ ලබා දී ඇත.
2015 වසරේදී අමාත්‍ය මණ්ඩල තීරණයකට අනුව ඇති කරගත් ගිවිසුමකට අනුව එවකට සිටි අමාත්‍යවරයාගේ අනුදැනුම මත එම වත්කම පවරාගත් ආකාරය නීති විරෝධි බව මෙහිදී දීර්ඝ ලෙස සාකච්ඡා වී තිබේ.
මේ සඳහා රු. මිලියන 408 ක මුදලක් SLIIT ආයතනය විසින් මහපොළ අරමුදලට ගෙවා ඇති බවත් අරමුදලටම අයත් ආයතනයක් විසින් අරමුදලට මෙම මුදල ගෙවා අයිතිය ලබා ගැනීම ගැටලු සහගත බවත් සාමාජික මන්ත්‍රීවරයෝ පෙන්වා දුන්හ.
මේ අනුව මෙහිදී වරදකරුවන්ට නිසි දඬුවම් ලබාදීම මගින් ඉදිරියට හෝ මෙවැනි අනීතික සහ වංචනික ක්‍රියාවන් නැවැත්විය යුතු බවත් කෝප් සභාපතිවරයා අවධාරණය කළේය.
COPE 09.07.25 Sinhala by poornima
+
ප්‍රශ්නගත බහාලුම් සිද්ධිය ගැන පොහොට්ටුවේ නීතිඥ සංගමයෙන් හෙළිදරව්වක්
(14.07.2025 – 17:19 +0530 – sinhala.adaderana.lk)
1805 දී ලංකා රේගුව ආරම්භ කළ දවසේ සිට මේ දක්වා රතු ලේබල් සහිත කන්ටේනර් රේගුවෙන් නිදහස් කර නොමැති නමුත් වර්තමාන ආණ්ඩුව පත්වීමෙන් පසුව රතු ලේබල් කන්ටේනර් 309 ක් නිදහස් කර ඇති බව ‘ශ්‍රී ලංකා පොදුජන පෙරමුණ නීතිඥ සංගමයේ’ ලේකම් නීතිඥ අතුල ද සිල්වා මහතා පවසයි.
මාධ්‍ය වෙත අදහස් දක්වමින් ඔහු මේ බව සඳහන් කර සිටියේය.
කන්ටේනර් සඳහා රතු, කොළ, කහ ලේබල් පවතින බවත් කොළ සහ කහ සහිත කන්ටේනර් නිදහස් කිරීම ගැටලු සහගත නොවන බවත් එහිදී ඔහු සඳහන් කළේය.
නීතීඥවරයා පැවසුවේ කන්ටේනර් ගෙන්වනු ලබන පුද්ගලයා වංචාවලට හසුවීම, කන්ටේනර් එවනු ලැබූ පුද්ගලයා මත්ද්‍රව්‍ය හෝ අවි ජාවාරම් සහිත කෙනෙකු වීම, එවනු ලබන පුද්ගලයා වරාය හෝ රට ගැන සැකයක් පැවතීම ආදී කාරණා මුල් කර ගනිමින් මෙසේ කන්ටේනර් රතු ලේබල් කරන බවය.
එහිදී ඔහු වැඩිදුරටත් අදහස් දක්වමින් පැවසුවේ රතු ලේබල් සහිත කන්ටේනර් තුළ අවිආයුධ, කෘෂි කර්මාන්තය හා තේ කර්මාන්තය විනාශ කර දැමිය හැකි පලිබෝධනාශක මෙන්ම මත්ද්‍රව්‍ය ආදී රටට හානි කළ හැකි දේවල් පැවතිය හැකි බවය.
ඒ හේතුවෙන් මෙවැනි රතු ලේබල් කන්ටේනර් රේගුවෙන් නිදහස් නොකරන බවත් වර්ථමාන ආණ්ඩුව ඊට එහා යමින් රතු ලේබල් කන්ටේනර් 309 ක් නිදහස් කර ඇති බවත් එය ආණ්ඩුව පත් කළ කමිටුව විසින්ම එය හෙළි කර ඇති බවද ඔහු පැවසුවේය.
එහිදී වැඩිදුරටත් අදහස් දැක්වූ ශ්‍රී ලංකා පොදුජන පෙරමුණ නීතිඥ සංගමයේ ලේකම් නීතිඥ අතුලද සිල්වා මහතා,
“ඒවා නිදහස් කිරීමේදී රේගුව තියන බලය ඉක්මවා ගිහිල්ලා, පත් කරපු කමිටුවට දීලා තියෙන බලය ඉක්මවා ගිහිල්ලා කරපු කාරණයක් විදිහට, පත් කරපු කමිටුව විසින් හඳුනාගෙන තියෙනවා.. එහෙම නම් මෙහෙම කරන්න මොන බලතලයක්ද තිබ්බේ? මේක කළාට පස්සේ ඇමතිවරයා මාධ්‍යයට ඇවිත් මේක නිවැරදි කියලා කිව්වා.. ලෝකෙ හැම වරායකම මෙහෙම වෙන්නේ කිව්වා.. මේක පිටිපස්සේ දේශපාලන බලපෑමක් තියෙනවා.. දේශපාලන අධිකාරිය සම්බන්ධයි.. මේක දූෂණක්.. මේක හෙළිදරව් කරන්න” ෴
+++
+++
+
ඉසුරුපාය ඉස්සරහා උණුසුම් වෙයි | ඉක්මන්ටම අපි ආයේ එනවා… හැබැයි මෙහෙම නෙවෙයි එන්නේ (14.07.2025)
+
අද (15) මධ්‍යම රාත්‍රියේ සිට තැපෑලේ අතිකාල වර්ජනයක්
(15.07.2025 – hirunews.lk)
අද (15) මධ්‍යම රාත්‍රියේ සිට තැපැල් කාර්යාල සහ පාලන කාර්යාලවල අතිකාල වර්ජන ක්‍රියාමාර්ගයක් දියත් කරන බව ‘ඒකාබද්ධ තැපැල් වෘත්තීය සමිති පෙරමුණ’ පවසනවා.
බඳවාගැනීමේ ක්‍රමවේදයේ පවතින ගැටලුවලට විසදුම් ඉල්ලමින් මෙම වර්ජනය ක්‍රියාත්මක කරන බවයි එම පෙරමුණේ සම කැදවුම්කරු චින්තක බණ්ඩාර සඳහන් කළේ ෴
හොර නෝට්ටු තිප්පොළක් මොරටුවේ – කාන්තාවක් අත්අඩංගුවට
(15.07.2025 – 07:39 +0530 – sinhala.adaderana.lk)
මොරටුව නගරයේදී ව්‍යාජ මුදල් නෝට්ටු සමඟ සැකකාරියක් අත්අඩංගුවට ගැනීමට මොරටුව පොලීසිය සමත්ව තිබේ.
ඊයේ (14) සවස් කාලයේ දී මෙම වැටලීම සිදුකර තිබූ අතර, එහිදී රු 5,000 මුදල් නෝට්ටු 10 ක් සමඟ මෙම සැකකාරිය අත්අඩංගුවට පත්ව ඇත.
එලෙස අත්අඩංගුවට ගෙන ඇත්තේ, 52 හැවිරිදි රාවතාවත්ත, මොරටුව ප්‍රදේශයේ පදිංචිකාරියකි.
සැකකාරියගෙන් සිදුකරන ලද වැඩිදුර ප්‍රශ්න කිරීමේදී සැකකාරියගේ නිවසේ තිබී මෙම ව්‍යාජ මුදල් නෝට්ටු මුද්‍රණය කිරීම සඳහා යොදාගත් මුද්‍රණ යන්ත්‍රයක් හා ව්‍යාජ රුපියල් 5,000 මුදල් නෝට්ටු 25 ක්, රුපියල් 1,000 නෝට්ටු 08 ක් සොයාගෙන ඇත.
මොරටුව පොලීසිය වැඩිදුර විමර්ශන සිදුකරනු ලබයි ෴
නීතිවිරෝධී ලෙස එකලස් කරන ලද ජීප් රථයක් සමග අයෙක් අත්අඩංගුවට
(15.07.2025 – 07:17 +0530 – sinhala.adaderana.lk)
නීතිවිරෝධී ලෙස එකලස් කරන ලද ජීප් රථයක් (1) සමඟ සැකකරුවෙකු (1) පොලිස් විශේෂ කාර්ය බළකා ජයවර්ධනපුර කඳවුරේ නිලධාරීන් විසින් අත්අඩංගුවට ගෙන තිබේ.
වැඩබලන පොලිස්පතිතුමාගේ උපදෙස් මත දිවයින පුරා ක්‍රියාත්මක වන පරිදි ශ්‍රී ලංකා පොලීසිය සිදුකරගෙන යනු ලබන අපරාධ හා මත්ද්‍රව්‍ය නිවාරණ මෙහෙයුමට අදාළව මෙම ජිප් රථය සොයා ගෙන ඇත.
ඊයේ (14) දහවල් කාලයේ මුල්ලේරියාව පොලිස් වසමේ හිඹුටාන ප්‍රදේශයේදී පොලිස් විශේෂ කාර්ය බළකා ජයවර්ධනපුර කඳවුරේ නිලධාරීන්ට ලද තොරතුරක් මත වැටලීමක් සිදුකර තිබුණි.
ජිප් රථය සන්තකයේ තබාගෙන සිටි සැකකරු අත්අඩංගුවට ගෙන මුල්ලේරියාව පොලීසිය වෙත ඉදිරිපත් කර ඇති අතර, එලෙස අත්අඩංගුවට ගෙන ඇත්තේ, 53 හැවිරිදි හිඹුටාන, මුල්ලේරියාව ප්‍රදේශයේ පදිංචිකරුවෙකි.
මුල්ලේරියාව පොලීසිය වැඩිදුර විමර්ශන සිදුකරයි ෴
ජාතික විගණන කාර්යාලයෙන් දුම්රිය දෙපාර්තමේන්තුවට චෝදනා
(15.07.2025 – 06:52 +0530 – sinhala.adaderana.lk)
දුම්රිය සන්නිවේදන පද්ධතිය වැඩි දියුණු කිරීමේ ව්‍යාපෘතිය වර්තමානය වන විට ඵලදායී ලෙස ක්‍රියාත්මක නොවන බව ජාතික විගණන කාර්යාලය පවසයි.
දුම්රිය සේවාවේ කාර්යක්ෂමතාව ඉහළ නැංවීමේ අරමුණින් දුම්රිය සන්නිවේදන පද්ධතිය නවීකරණය සඳහා වූ ව්‍යාපෘතිය 2020 නොවැම්බර් මාසයේ දී අවසන් කර තිබුණ ද එම ව්‍යාපෘතිය මඟින් බලාපොරොත්තු වූ ප්‍රතිඵල අත්වී නොමැති බව ඔවුන් පෙන්වා දෙයි.
දුම්රිය සන්නිවේදන පද්ධතිය නවීකරණය සඳහා වූ ව්‍යාපෘතියේ කාර්ය සාධන විගණනය ප්‍රකාශයට පත්කරමින් ජාතික විගනණ කාර්යාලය මේ බව දැනුම් දී තිබේ.
දීප ව්‍යාප්තව දුම්රිය සේවාවේ කාර්යක්ෂමතාවය ඉහළ නැංවීමේ අරමුණින් මෙම දුම්රිය සන්නිවේදන පද්ධතිය නවීකරණය සඳහා වූ ව්‍යාපෘතිය ක්‍රියාත්මක කර තිබුණි.
කෙසේවෙතත් එම පද්ධතිය ක්‍රියාත්මක කිරීමේ දී ඊට අදාළ සියලු නිලධාරීන් පෞද්ගලිකව සහ සාමූහික වශයෙන් පද්ධතියට ඇතුළත් නොවීම, දුම්රිය දෙපාර්තමේන්තුව විසින් ගිවිසුම් ප්‍රකාරව අදාළ සන්නිවේදන නියෝජිතායතනයෙන් නඩත්තු කටයුතු සිදුකර ගැනීමට පියවර නොගැනීම, සමස්ත පද්ධතියේ කටයුතු සම්බන්ධයෙන් අධීක්ෂණ ක්‍රමවේදයක් නොතිබීම යනාදී ප්‍රධාන දුර්වලතාවයන් හේතුවෙන් මේ වන විට ව්‍යාපෘතිය කාර්යක්ෂම සහ ඵලදායී ලෙස ක්‍රියාත්මක නොවන බවට අනාවරණය වී තිබේ.
මෙම සන්නිවේදන පද්ධතියේ උපාංග රාජකාරී කටයුතු සඳහා භාවිතා කිරීම අනිවාර්ය කිරීම සඳහා දුම්රිය දෙපාර්තමේන්තුව චක්‍රලේඛයක් නිකුත් කර තිබුණ ද ඒ අනුව ඇතැම් නිලධාරීන් කටයුතු කර නොමැති බව ජාතික විගණන කාර්යාලය පවසයි.
එලෙස චක්‍රලේඛයට පටහැනිව කටයුතු කර ඇති නිලධාරීන් රාජකාරී කටයුතු පැහැර හැරීම සම්බන්ධයෙන් විනයානුකූල පියවර ගැනීම සිදුකළ යුතු බව සිය වාර්තාව මඟින් ජාතික විගණන කාර්යාලය නිර්දේශ කර තිබේ.
එමෙන්ම මෙම පද්ධතිය සාර්ථක ලෙස සහ අඛණ්ඩව ක්‍රියාත්මක කිරීම සඳහා දීපව්‍යාප්තව පුළුල් සංඥා ආවරණයක් ස්ථිපිත කිරීම සඳහා පියවර ගන්නා ලෙස ජාතික විගණන කාර්යාලය වැඩිදුරටත් දැනුම් දී ඇත ෴
+++
අවුරුදු 60 ක් 70 ක් පරණ බඩුත් එක්ක මේක කරන්න බෑ | දුම්රිය සංගම් රතු එළි දල්වයි (15.07.2025)
+
අග්නිදිග විශ්වවිද්‍යාලයේ ගැටුමකින් සිසුන් හතර දෙනෙකුට (4) තුවාල
(15.07.2025 – hirunews.lk)
අග්නිදිග විශ්වවිද්‍යාලයේ සිසුන් පිරිසක් අතර අද (15) අලු‍යම ඇති වූ ගැටුමකින් එම විශ්වවිද්‍යාලයේ පළමු (1) වසරේ ඉංජිනේරු පීඨයේ සිසුන් 04 දෙනෙකු තුවාල ලබා රෝහල් ගත කර තිබෙනවා.
එමෙන්ම සිසුන් රෝහල්වෙත රැගෙන යාමට පැමිණි ගිලන් රථ රියදුරාද තුවාල ලබා ඇති අතර තුවාල ලැබූවන් අක්කරෙයිපත්තුව මූලික රෝහලට සහ ඔලු‍විල් ප්‍රාදේශීය රෝහලට ඇතුලත් කර ඇති බවයි අප කළ විමසීමකදී අක්කරෙයිපත්තු පොලිසිය සදහන් කළේ.
මීට පෙර සිදුවූ නවක වද සිදුවීමක් මෙම ගැටුමට හේතු වී ඇති බවද පොලිසිය සදහන් කළා ෴
විදේශයන්හි පිහිටි මෙරට කාර්යාල හරහා ඔන්ලයින් පාස්පෝට් අයදුම් කිරීමට අනුමැතිය
(15.07.2025 – hirunews.lk)
ශ්‍රී ලාංකිකයින් විසින් විදේශයන්හි පිහිටි ශ්‍රී ලංකා දූත මණ්ඩල / කාර්යාල හරහා සිදු කරනු ලබන විදේශ ගමන් බලපත්‍ර අයදුම් කිරීමේ ක්‍රමවේදය කඩිනම් කිරීම පිණිස එය මාර්ගගතව සිදු කිරීම සඳහා සහාය ලබා ගැනීමට අදාළව යෝජනාවක් සංක්‍රමණ සඳහා වන ජාත්‍යන්තර සංවිධානය (IOM) වෙත ඉදිරිපත් කර තිබෙනවා.
ඒ අනුව, දූත මණ්ඩල / කාර්යාල 20 ක් ආවරණය වන පරිදි ජෛවමිතික ග්‍රහණ මධ්‍යස්ථාන සහ ඒ ආශ්‍රිත උපකරණ සැපයීම, ආගමන හා විගමන දෙපාර්තමේන්තුව සමඟ මාර්ගගතසම්බන්ධතාව පහසු කිරීම සහ ඒකාබද්ධ වීමට අදාළ පද්ධති / මෘදුකාංග සංවර්ධනය හා අවශ්‍ය තාක්ෂණික සහාය ලබා දීම සඳහා ව්‍යාපෘතියක් ක්‍රියාත්මක කිරීම පිණිස සංක්‍රමණ සඳහා වන ජාත්‍යන්තර සංවිධානය විසින් අවශ්‍ය අරමුදල් සපයා දීමට එකඟතාව පළ කර තිබුණා.
එකී ව්‍යාපෘතිය ක්‍රියාත්මක කිරීම මඟින් විදේශගත ශ්‍රී ලාංකිකයින් සඳහා විදේශ ගමන් බලපත්‍ර, ඩිජිටල් තාක්ෂණය භාවිත කර කඩිනමින් හා පහසුවෙන් ලබා ගැනීමට පහසුකම් සැලසීම අරමුණු කර තිබෙනවා.
ඒ අනුව, හඳුනාගනු ගනු ලබන විදේශයන්හි පිහිටි ශ්‍රී ලංකා දූත මණ්ඩල / කාර්යාල 20ක් මඟින් මාර්ගගත ක්‍රමවේදය ඔස්සේ විදේශ ගමන් බලපත්‍ර අයදුම් කිරීම සඳහා වන ව්‍යාපෘතිය මෙම වර්ෂයේ සිට ක්‍රියාත්මක කිරීම පිණිස විදේශ කටයුතු, විදේශ රැකියා සහ සංචාරක අමාත්‍යවරයා සහ මහජන ආරක්ෂක සහ පාර්ලිමේන්තු කටයුතු අමාත්‍යවරයා ඉදිරිපත් කරන ලද ඒකාබද්ධ යෝජනාව අමාත්‍ය මණ්ඩලය විසින් අනුමත කළා ෴
හෙද සේවයට පිවිසීමට බලාපොරොත්තු වෙන අයට සුබ ආරංචියක්
(15.07.2025 – 13:41 +0530 – sinhala.adaderana.lk)
හෙද සේවයේ පවතින පුරප්පාඩු සඳහා බඳවා ගැනීම් උදෙසා ගැසට් නිවේදන 02 ක් එළැඹෙන සිකුරාදා (18) දින නිකුත් කිරීමට බලාපොරොත්තු වන බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පවසයි.
ඒ අනුව 2020 වසරේ සිට 2022 වසර දක්වා අපොස උසස් පෙළ විභාගයට ඉදිරිපත් වුණු පිරිසෙන් 2,650 ක් සහ හෙද උපාධිය ලබා ගත් උපාධිදාරීන් 850 ක් හෙද සේවය බඳවා ගැනීමට පියවර ගන්නා බව අමාත්‍යවරා අද (15) පැවැති කැබිනට් තීරණ දැනුම්දීමේ මාධ්‍ය හමුවේදී පැවසීය.
එහිදී වැඩිදුරටත් අදහස් දැක්වූ අමාත්‍යවරයා :
“ඇත්තටම ගත්තොත් අපිට හෙද කාර්ය මණ්ඩලයේ අඩුපාඩුවක් පවතිනවා. උතුරේ පමණක් පවතිනවා ප්‍රාදේශීය රෝහල් 33 ක් කිසිදු හෙදියක් නැති. දැන් තමයි අපි අනුමත කරගෙන යන්නේ අපි දැන් 2020, 2021 සහ 2022 අපොස උසස් පෙළ විභාගයට ඉදිරිපත් වුණු අයගෙන් සිසු හෙද හෙදියන් 2,650 ක් බඳවා ගැනීම සඳහා ගැසට් නිවේදනය මේ සිකුරාදා (18) නිකුත් කරනවා. ඒ නිසා ඒ අයට මේ පුහුණුව සඳහා ඉල්ලුම් කරන්න පුළුවන් කමක් තියෙනවා. ඊට අමතරව පසුගිය කාලයේදී හෙද උපාධි විදිහට ලබා ගත් 875 ක් උපාධිධාරීන් අපි රාජ්‍ය සේවයට බඳවා ගන්නවා ඒකටත් අදාළ කරන ගැසට් එක 18 වැනිදා නිකුත් කරනවා. ඒ අනුව උපාදිධාරීන් කොටසකටත් වගේම AL සමත් කොටසකටත් හෙද සේවය ආරම්භ වීම සඳහා පුහුණුව ආරම්භ කරන්න අපි සිකුරාදා (18) ගැසට් නිවේදනය නිකුත් කරනවා.”
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴