විගණකාධිපතිකමට මිත්‍රයෙක්.. සුරාබදු කොමසාරිස්කම මාලිමා ජාතික ලයිස්තු අපේක්‍ෂිකාවගේ සැමියාට.. මේ ලක් ඉතිහාසයේ දූෂිතම ජනපතියි..
(14.07.2025 – 15:00 +0530 – lankacnews.com)
විගණකාධිපති තනතුරට මිත්‍රයෙක් පත් කරන ලක් ඉතිහාසයේ දූෂිතම ජනපති අනුර දිසානායක මහතා යයි පිවිතුරු හෙළ පක්ෂ නායක නීතිඥ උදය ගම්මන්පිල මහතා පවසයි.
අද (14) පැවති මාධ්‍ය හමුවකදී ඔහු මේ බව පැවසුවේය.
“විගණකාධිපති තනතුර අප්‍රේල් මාසයේ සිට පුරප්පාඩුයි. ඒ තනතුරට අවශ්‍ය අධ්‍යාපන සුදුසුකම්, වෘත්තීය සුදුසුකම් සහ පලපුරුද්ද වැඩ බලන ධර්මපාල ගම්මන්පිල මහතාට තිබෙනවා. ඒ වගේම දෙපාර්තමේන්තුවේ සම්පූර්ණ සහයෝගය තිබෙනවා. විගණන නිලධාරින්ගේ සංගමය සුදුස්සාට සුදුසු තැන දෙන්න ගම්මන්පිල මහතා පත් කරන්න කියලා ජනාධිපතිතුමාගෙන් ලිඛිත ඉල්ලීමක් කලා විතරක් නොවේ මාධ්‍ය හමුවක් තියලා රටටත් කිව්වා.
ඒ ඉල්ලීම් පැත්තක තියලා ජනාධිපතිතුමා තමන්ගේ කැළණි සගයෙක් විගණකාධිපති තනතුරට පත් කරන්න උත්සාහ කලා. නමුත් ව්‍යවස්ථාදායක සභාවේ සිවිල් සමාජය නියෝජනය කරන කීර්තිමත් වෘත්තියවේදින් තුන්දෙනා (3) ඉතාම නිර්භීතව ජනපතිගේ යෝජනාව ප්‍රතික්ෂේප කලා. ඒ නිසා තමන්ගේ මිත්‍රයා විගණකාධිපති තනතුරට පත් කර ගන්න බැරි වුණා. නමුත් සිවිල් සමාජය නියෝජනය කරන තිදෙනාගේ (3) ධූර කාලය ජනවාරි මස 03 දා අවසන් වෙනවා. ඊලඟට පත් වන තුන්දෙනා (3) ගෙන් එක් (1) අයෙකු ආණ්ඩුවේ යෝජනාවට සහය දුන්නොත් කැළණි මිත්‍රයා විගණාකධිපති තනතුරට පත් කරන්න පුළුවන්.
ඒ නිසා තමයි ගම්මන්පිල මහතාට වැඩ බලන පත්වීම් දෙමින් ජනාධිපති කල් මරන්නේ. මුලින්ම සති දෙකකට (2) දුන්නා. ඊට පස්සේ මාසයකට (1) දුන්නා. දැන් මාස හයකට (6) දුන්නා. මාස හතහමාර (7½) ඉවර වෙන කොට අළුත් ව්‍යවස්ථාදායක සභාවක්. එතකොට කැළණි සගයාට පත්වීම ලබා දෙන්න ව්‍යවස්ථාදායක සභාවේ අනුමැතිය ලබා ගන්න පුළුවන්.
විගණකාධිපති තනතුර විධායකයෙන් ස්වාධීන වෙන්න ඕනේ කියලා මුළු ලෝකය පුරා පිලිගත් සම්මතයක් තිබෙනවා. ඒ නිසා අන්ත දූෂිතයි කියලා චෝදනා ලබපු ජනාධිපතිවරු අගමැතිවරුවත් කවදාවත් තමන්ගේ යාළුවන් විගණකාධිපති තනතුරට පත් කර ගන්න උත්සාහ කරලා නෑ. ලංකා ඉතිහාසයේ ප්‍රථම වතාවට තමයි ජනාධිපතිවරයෙකු තමන්ගේ මිත්‍රයෙක් විගණකාධිපති කර ගන්න මෙතරම් වෑයම් කරන්නේ.
තමන්ගේ ආණ්ඩුව දූෂණයෙන් තොර නම් හොරකම් කරන්න බලාපොරොත්තුවක් නැති නම් කවුරු විගණකාධිපති වුණාම ආණ්ඩුවට මොකද? ඇයි සුදුස්සෙක් පත් වෙනවාට ජනාධිපති මෙතරම් බය වෙන්නේ? මේ ආණ්ඩුව බලයට ආවේ ජනතාවට සිදුවුණු අත්වැරදීමක් නිසා කියලාත් නැවත කවදාවත් මේ වගේ වරදක් ජනතාව කරන්නේ නෑ කියලාත් ආණ්ඩුව දන්නවා. ඒ නිසා අද රෑට අරක්කු තහනම් කරනවා කිව්වාම මෙලෝ සිහියක් නැතිව බේබද්දෝ බොනවා වගේ ආණ්ඩුව ඉතිරි වසර කිහිපයේ සොරකම් කරලා මේ රාජ්‍යයේ සාරය උරා බොන්නයි සූදානම. එහෙම නැතිනම් තමන්ගේ හිතවතෙක් විගණකාධිපති කරන්න මෙතරම් වෙර දරන්නේ ඇයි? කියලා ආණ්ඩුවට රටට පැහැදිලි කරන්න වෙනවා.
ව්‍යවස්ථාදායක සභාව වග කියන්නේ පාර්ලිමේන්තුවට. ව්‍යවස්ථාදායක සභාවේ තීරණ ගැන කතානානයකතුමාගෙන් පාර්ලිමේන්තුවට ප්‍රශ්න කරන්න පුළුවන්. නමුත් ජනවාරි මාසය වන තුරු කල් මැරීමේ ජනපතිගේ කුමන්ත්‍රණය ගැන පාර්ලිමේන්තුවේ මේ දක්වා කවුරුත්ම ප්‍රශ්න නොකිරීම ඉතාම කනගාටුදායක තත්වයක්.
සුරා බදු කොමසාරිස්කමත් තම්බුත්තේගමට
ඒ වගේ නාවික හමුදාවේ විශ්‍රාමික කොමදෝරු එන්.ඩි.එන්.ඒ. ප්‍රේමරත්න මහතා සුරා බදු කොමසාරිස් ජනරාල්වරයා ලෙස පත් කරලා තියෙනවා. නාවික හමුදාවේ විශ්‍රාමික නිලධාරීයෙක් කිව්වාම අපිට හිතා ගන්න පුලුවන්. නාවික කටයුතු පිළිබඳ ප්‍රවීනයෙක් ඒ නිසා වරාය අධිකාරියේ සභාපති වුනානම් සමුද්‍ර දුෂණ වැළැක්විමේ අධිකාරියේ සභාපති වුනානම් අපිට ඒක තේරුම් ගන්න පුලුවන්. නැව් සංස්ථාවේ සභාපති වුනානම් අපිට තේරුම් ගන්න පුලුවන්.
නාවික හමුදාවේ කොමදෝරු මහත්තයෙක් සුරා බදු ගැන මොනවාද දන්නේ? එතුමා සුරාව පිළිබඳ විශේෂඥවරයෙක්ද කියලා නම් අපි දන්නේ නෑ. හැබැයි බදු පිළිබඳ කිසිම අවබෝධයක් නෑ. එහෙම කෙනෙක් මෙහෙම පත් කරන්නේ ඇයි?
1912 සුරාබදු දෙපාර්තමේන්තුව පටන් ගත් දවසේ සිට පසුගිය වසර 113 ටම කිසිම රාජ්‍ය නායකයෙක් සුරාබදු දෙපාර්තමේන්තුවේ මුල් පුටුව දේශපාලනිකරණය කරන්න උත්සහ කරලා නෑ. ඇයි? ලංකා ආණ්ඩුවේ ආදායම් ත්‍රිත්වයෙන් (3) එකක් (1) සුරාබදු දෙපාර්තමේන්තුව කියන්නේ. අපේ රටේ ආදායම් ගේන්නේ දෙපාර්තමේන්තු තුනක් (3). දේශිය ආදායම් දෙපාර්තමේන්තුව, රේගු දෙපාර්තමේන්තුව සහ සුරාබදු දෙපාර්තමේන්තුව. මේවා දේශපාලනිකරණය කරලා තමන්ගේ මිත්‍රයන්ට සලකන්න ගියෝත් ‘මේ රටේ ආදාමත් කඩා වැටිලා, ආණ්ඩුවත් වැටිලා, රටත් කඩා වැටෙනවා’ කියන එක මීට කලින් හිටිය අත්දැකිම් තියෙන දේශපාලකයෝ දැනන් හිටිය නිසා තමයි මේ තනතුරට කවදාවත් අත තියන්න කටයුතු නොකලේ.
මේ තනතුර ගැන එක පැත්තකින් කියනවා ප්‍රේමරත්න මහතා තම්බුත්තේගම උපන් කෙනෙක් කියලා. ගමට ඇඳලා තියෙන්නේ. මට මතකයි අනුර දිසානායක විපක්ෂයේ මන්ත්‍රීතුමා, ‘මහින්ද රාජපක්ෂ මැතිතුමා හම්බන්තොටට අදිනවා; මෛත්‍රීපාල සිරිසේන මැතිතුමා පොළොන්නරුවට අදිනවා; ජනාධිපතිවරයා පත් වන්නේ සමස්ථ ජාතියේම ඡන්දයෙන් නම් ඔහුට එක දිස්ත්‍රික්කයක් එක ගමක් වැදගත් වෙන්න බෑ; ඔහු සමස්ථ රටටම එක සේ සලකන්න ඕන’ කියලා ඒ කලේ පාර්ලිමේන්තුවේ මයික් පුපුරන්න කතා කරපු ලස්සන. දැන් ඉතින් ජිවිතය ගොඩ යන්න නම් තම්බුත්තේගම තනි සිග්නල් කණුව වටේ ඉපදිලා තියෙන්න ඕන වගේ තත්වයක් තමයි රටේ ඇති වෙලා තියෙන්නේ.
එක පැත්තකින් තම්බුත්තේගම ගමට ඇද්දා කියලා කතාව යනවා. අනිත් පැත්තෙන් මෙතුමාගේ බිරිඳ තමයි මාලිමාවේ ජාතික ලැයිස්තු අපේක්ෂිකාවක් වෙලා හිටිය කැළණිය විශ්ව විද්‍යාලයේ වසන්තා සුබසිංහ මැතිණිය. එක පැත්තකින් කැලණියට අදිනවා කියන චෝදනාවත් ඔප්පු කරලා තියෙනවා. අනිත් පැත්තෙන් ගමට අදිනවා කියන චෝදනාවත් ඔප්පු කරලා තියෙනවා. රටේ ප්‍රධාන තනතුරු මෙහෙම පක්ෂාග්‍රාහිව ලබා දුන්නොත් ඥාති සංග්‍රහයට, මිත්‍ර සංග්‍රහයට, ගමේකමට දෙන්න ගියොත් රට හදන්නේ කෙහොමද? ‘මේකද ඔබතුන්ලා රටට පොරොන්දු වුන පුනරුදය’ කියලා අපි ජනාධිපතිතුමාගෙන් ප්‍රශ්න කරනවා.
ඒ වගේම මෙතුමා හමුදා සමුහිකයෙත් ඉදලා තියෙනවා කියලා තමයි ආරංචිය. එක පැත්තකින් තම්බුත්තේගම කෙනෙක්; එක පැත්තකින් හමුදා සමුහිකයේ කෙනෙක්; අනිත් පැත්තේන් මාලිමාවේ අපේක්ෂිකාවක‍ගේ සැමියෙක්. වසන්තා සුබසිංහ මැතිණියට මේ වන විටත් ‘වික්‍රමාආරච්චි ආයුර්වේද විශ්ව විද්‍යාලයේ උප කුලපති තනතුර’ ලබා දිලා තියෙන්නේ. මහත්තයාට මේ පැත්තෙන් සුරාබදු කොමසාරිස් ජනරාල් තනතුර ලබා දිලා. ඒ කියන්නේ අර පවුල්වාදය නැති කරනවා කිව්වට පවුල්වාදයම තවදුරටත් තහවුරු කරමින් ඉන්නවා කියන්න මේක උදාහරණයක්.
ඒ නිසා මාලිමා‍වට ඡන්දේ දුන්නු අය වරින් වර ඇඳුම් ගලවගෙන දැන් යට ඇඳුම් පිටින් ඉන්නේ. ඒ නිසා අනුකම්පා කරලා. ඒඅය නිරුවත්භාවට පත් කරන්න එපා කියලා අපි ජනාධිපතිතුමාගේන් ඉතාම කරුණාවෙන් ඉල්ලා සිටිනවා” ෴
+++
+
රට පුරා ආර්ථික මධ්‍යස්ථාන 14 ක් පෞද්ගලික සමාගමකට…
(14.07.2025 – 15:50 +0530 – lankacnews.com)
දිවයින පුරා ඇති ආර්ථික මධ්‍යස්ථාන 18 න් 14 ක් පෞද්ගලික සමාගමකට පැවරීමේ තීරණය වහාම ඉවත් කර නොගතහොත් රටපුරා විරෝධතා මාලාවක් ආරම්භ කරන බව ‘සමස්ත ලංකා ඒකාබද්ධ විශේෂිත ආර්ථික මධ්‍යස්ථාන හා මැනිං වෙළෙඳ සමිතිය’ රජයට ලෙස අනතුරු අඟවයි.
දඹුල්ලේදී පැවති විශේෂ සාකච්ඡාවකදී, ‘තඹුත්තේගම ආර්ථික මධ්‍යස්ථාන වෙළෙඳ සංගමයේ’ සභාපති සුනිල් සෙනෙවිරත්න මහතා ප්‍රකාශ කළේ, මෙම තීරණය වහාම හකුළා නොගතහොත් රටපුරා ඇති සියලුම ආර්ථික මධ්‍යස්ථාන වසා දමා දැවැන්ත විරෝධතා දියත් කරන බවයි.
එමෙන්ම, අධිකරණ ක්‍රියාමාර්ග ගැනීමටත්, ජනාධිපතිවරයා හමුවී සාකච්ඡා කිරීමටත් එහිදී තීරණය වී ඇත.
වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ මහතා පසුගිය මැයි 07 වන දින කැබිනට් මණ්ඩලයට සංදේශයක් ඉදිරිපත් කර ඇත්තේ, විශේෂ ආර්ථික මධ්‍යස්ථාන කළමනාකරණය කිරීම සඳහා වගකීමෙන් සීමිත සමාගමක් (Limited Liability Company) ස්ථාපිත කිරීමටයි.
මෙම කැබිනට් සංදේශය සම්බන්ධයෙන් නිරීක්ෂණ ලබා දෙන ලෙස කැබිනට් මණ්ඩලය මුදල් අමාත්‍යාංශයට දැනටමත් යොමු කර තිබේ.
කිසිදු පූර්ව දැනුම්දීමකින් තොරව, නිසි ලෙස ලියාපදිංචි වී නොමැති පෞද්ගලික සමාගමකට මෙවැනි වැදගත් ආර්ථික මධ්‍යස්ථාන පැවරීමට අමාත්‍යවරයා උත්සාහ කිරීම සම්බන්ධයෙන් ආර්ථික මධ්‍යස්ථාන වෙළෙඳුන් දැඩි විරෝධය පළ කරයි.
ඔවුන් අවධාරණය කරන්නේ, මෙම තීරණය වෙනස් නොකළහොත් අතීත රජයන්ට සිදුවූ ඉරණම වත්මන් රජයටද අත්වනු ඇති බවයි ෴
පාසල්වලට ජලය සීමාවක් .. වැඩිවුනොත් අතින් ගෙවිය යුතුයි .. – නව චක්රලේඛයක් එයි ..
(14.07.2025 – 11:20 +0530 – lankacnews.com)
අධ්‍යාපන අමාත්‍යාංශයේ ලේකම්වරයා විසින් නිකුත් කරන ලද නව චක්රලේඛයක් මගින් පාසල්වල ජල බිල්පත් ගෙවීම සම්බන්ධයෙන් නව රෙගුලාසි මාලාවක් හඳුන්වා දී ඇත.
මෙම චක්‍රලේඛයට අනුව, රජය විසින් එක් (1) සිසුවෙකු සඳහා මසකට ලීටර් 400 ක ජල පරිභෝජනයකට පමණක් අදාළ වන බිල්පත් මුදල ගෙවනු ලැබේ.
මෙම සීමාව ඉක්මවා යන ඕනෑම ජල පරිභෝජනයක් සඳහා අදාළ බිල්පත් මුදල පාසල විසින්ම දැරිය යුතුවේ.
පාසල්වල පිහිටි ජල තටාක සහ වෙනත් විශේෂ අවශ්‍යතා සඳහා ලබාගෙන ඇති ජල සැපයුම් සම්බන්ධතා වල බිල්පත් අදාළ පාසල මගින් ගෙවිය යුතු බවද මෙම චක්‍රලේඛයේ වැඩිදුරටත් සඳහන් වේ.
පාසල් පරිශ්‍රය තුළ පිහිටි විදුහල්පති නිවාස සහ ගුරු නිවාස වල ජල බිල්පත් අදාළ පදිංචිකරුවන් විසින් ගෙවීම අනිවාර්ය වේ.
මෙම චක්‍රලේඛයට අනුව, පාසලේ සිටින සිසුන් සංඛ්‍යාව, ගුරු මණ්ඩලය සහ අනධ්‍යයන කාර්ය මණ්ඩලයේ එක් (1) පුද්ගලයෙකුට දිනකට ලීටර් විස්සක (20) ජල පරිභෝජනයක් ලෙස ගණනය කරනු ලැබේ.
ඒ අනුව, දින විස්සක් (20) සඳහා, එනම් මසකට ලීටර් 400 ක පරිභෝජනයකට පමණක් රජයේ අරමුදල් මගින් බිල්පත් ගෙවනු ලබයි.
ඉදිරියේදී පාසල් වෙත ලැබෙන ජල බිල්පත් ‘රජයේ ගාස්තුව’ සහ ‘අමතර ගාස්තුව’ යනුවෙන් කොටස් දෙකකින් (2) යුක්ත වනු ඇත. අතිරේක ගාස්තුව ලෙස සඳහන් වන මුදල ‘පාසල් සංවර්ධන සමිතියේ අරමුදලින්’ ගෙවිය යුතු බව අධ්‍යාපන අමාත්‍යාංශයේ ලේකම් නාලක කළුවැව මහතා විසින් නිකුත් කරන ලද මෙම චක්‍රලේඛයේ පැහැදිලිව සඳහන් කර ඇත.
ජලය අරපිරිමැස්මෙන් පරිභෝජනය කිරීමේ වැදගත්කම සහ ජල සංරක්ෂණයේ අවශ්‍යතාවය පිළිබඳව පාසල් සිසුන් දැනුවත් කිරීමේ වැඩසටහන් විදුහල්පතිවරුන් විසින් සංවිධානය කළ යුතු බවද මෙම චක්‍රලේඛය මගින් අවධාරණය කරනු ලැබේ.
මෙම නව රෙගුලාසි මගින් පාසල්වල ජල පරිභෝජනය කාර්යක්ෂම කිරීම සහ ජල සම්පත් අරපිරිමැස්මෙන් භාවිතා කිරීමට දිරිගැන්වීම අපේක්ෂා කෙරේ ෴
+
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴