ගෑස් කාන්දුවක් සිදුවූ ජාඇල ඇගළුම් කම්හල තාවකාලිකව වසා දැමීමට නියෝග

(20.03.2018 – 16:37 +0530 – hirunews.lk/sinhala)

ගෑස් කාන්දුවක් හේතුවෙන් සේවිකාවන් අසාත්මිකතාවට ලක්වු ඇගළුම් කම්හල ලබන 22 වනදා දක්වා වසා තැබීමට නියෝග කර තිබෙනවා.

පොලිසිය සඳහන් කළේ මෙම සිද්ධියට අදාළව නියමිත ආයතනවලින් වාර්තාවන් කැඳවන තෙක් කර්මාන්ත ශාලාව වසා දමන ලෙසට ජාඇල පොලිසිය මගින් මීගමුව අධිකරණය වෙත කරුණු වාර්තා කර මෙම නියෝගය ලබාගෙන ඇති බවයි.

නොසැලකිලිමත් ලෙසට ක්‍රියා කිරීම සම්බන්ධයෙන් කර්මාන්ත ශාලාවේ පාලනාධිකාරියට විරුද්ධව නීතිමය පියවර ගැනීමට ක්‍රියාකරමින් පවතින බව ද පොලිසිය සඳහන් කළා.

ඊයේ මෙම ඇගලුම් කම්හලේ ඇතිවු වායු කාන්දුවක් හේතුවෙන් සේවක සේවිකාවන් 47 දෙනෙකු රාගම, ජාඇල සහ ගම්පහ රෝහල් වෙත ඇතුලත් කෙරුනා.

විමර්ශණවලදී අනාවරණ වී ඇත්තේ කම්හලේ යන්ත්‍ර ක්‍රියා කිරීම සඳහා භාවිත කරනු ලබන වාතය සමග ක්‍රියාකරන ගෑස් වර්ගයක් කිසියම් දෝෂයක් මත පිටත වාතය සමග මුසු වී ඇති බවයි.

ඒවා සේවකයන්ට ආඝ්‍රහණය වීමෙන් ඔවුන් රෝගාතුර වී ඇතැයි අනාවරණ වී තිබෙනවා.

එම අවස්ථාවේ කර්මාන්ත ශාලාව තුල සේවක සේවිකාවන් 1200 ක් පමණ සේවය කරමින් සිට ඇතැයි සඳහන්.

අනතුරුව, යන්ත්‍රවල ඇතිවූ ගෑස් කාන්දුව නිවැරදි කර යථා තත්වයට පත් කරන තෙක් කම්හල තාවකාලිකව වසා තබන ලෙසට පොලිසිය පාලනාධිකාරියට දැනුම්දී තිබුනා.

කෙසේවෙතත් එම උපදෙස් නොසලකාහරිමින් අද යළිත් සුපුරුදු පරිදි සේවකයන් සේවයේ යොදවා ඇති බවයි පොලිසිය කියාසිටියේ.

ඒ අනුව සේවයේ නිරත වෙමින් සිටි සේවක සේවිකාවන් 52 ක් ගෑස් කාන්දුව හේතුවෙන් ගම්පහ සහ රාගම රෝහල් වෙත ඇතුලත් කෙරුනා.

ජාඇල පොලිසියයි මේ පිළිබඳ විමර්ශණ මෙහෙයවන්නේ.

++++++++++++++++++++++++++++

************************************

ස්මාර්ට් ජංගම දුරකථනය එක්වරම පුපුරා යාමෙන් අවාසනාවන්ත ලෙස මියගිය සුරූපී තරුණිය
(20.03.2018 – 08:52 +0530 – hirunews.lk/sinhala)

ස්මාර්ට් ජංගම දුරකථනයක් පිපිරීයාම හේතුවෙන් 18 හැවිරිදි තරුණියක් අවාසනාවන්ත ලෙස මියගොස් ඇති පුවතක් විදෙස් මාධ්‍ය වාර්තා කර තිබෙනවා.

අදාළ සිදුවීම වාර්තා වන්නේ ඉන්දියාවේ ඔඩීෂා ප්‍රදේශයෙන්.

අදාළ තරුණිය සිය ජංගම දුරකථනයේ බැටරිය යළි ආරෝපණය කිරීම සඳහා විදුලියට සම්බන්ධ කර දුරකථන ඇමතුමක් ගෙන ඇති බවයි වාර්තා වන්නේ.

එහිදී සිදුවූ පිපිරීමක් හේතුවෙන් ඇයගේ පපු ප්‍රදේශයට, පාදයකට, සහ එක් අතකට ඇතිවූ දරුණු තුවාල හේතුවෙන් ඇය කඩිනමින් රෝහල්ගත කිරීමට පියවර ගනු ලැබුවද එහිදී ඇය අවාසනාවන්ත ලෙස මියගොස් තිබෙනවා.

කෙසේ වෙතත් මේ සම්බන්ධයෙන් අදාළ දුරකථන සමාගම ද ප්‍රකාශයක් නිකුත්කර ඇති බවයි විදෙස් මාධ්‍ය වැඩිදුරටත් වාර්තා කර ඇත්තේ.

මේ අතර ඉන්දීය පොලිසිය විසින් අදාල සිදුවීම සම්බන්ධයෙන් විශේෂ පරීක්ෂණයක් ආරම්භ කර ඇති බවද එහි සඳහන්.

********************* ( නැවත මුල් පිටුවට ….. )

ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *